Рубрикатор

Образование Эрзянь-мокшонь литературань музеентень – 30 иеть
Эрзянь-мокшонь литературань музеентень – 30 иеть

Эрзянь-мокшонь литературань народной музеесь – те республикасонть раськень литературань васенце музей, конась панжозь 1987 иень ноябрянь 4-це чистэ Саранскоень 14№ гимназиясонть (неень шкане те 43№ лицеесь). Зярыя иень перть ютавтовсь анокстамонь, пурнамонь ды научной тонавтнемань важодема, конань вельде путозельть шкинемань кеме сюлмот Мордовиянь сёрмадейтнень марто. Музеень панжоманть вельде теезель покштояк покш казне эрзянь-мокшонь литературань весе вечкицятненень. Анокстазель эрзянь-мокшонь литературань касомань-кепетемань экспозициясь, косо невтезь раськень литературасонть теезь васенце эскелькстнэ ды литературань неень шкань эрямось. Тов совавтозь фотографият, каземань документт, автограф марто книгат, кедьсёрмадовкст, сёрмат. Музеень экспозициянь материалтнэнь ютксо улить алкуксонь раритетт, конат ёвтнить революциядо икелень шкастонть эрзя-мокшонь литературань ушодыцятнеде, С.Аникинэнь ды Т.Завражноень шкинемадост. Од ломантнень ды школасо тонавтницятнень кастомантень-кепетемантень покш путовксонть, краеведениянь движениянть виевгавтомань кисэ 1995 иень маень 30-це чистэ музеентень максозь «Народный музей» почетонь лемесь. Вана уш 30 иень перть раськень литературань музеенть сёлмонзо ало виевгавтови Мордовиянь сёрмадыцятнень эйкакштнень марто шкинемань важодемаст, панжовить од талантт. 

Те музеень прявтось – рузонь келень ды литературань тонавтыцясь, Мордовиянь культурань заслуженной важодицясь Людмила Михайловна Гордеева. Сонзэ бажамонзо вельде музеесь эри лия ёнов а молиця эрямосо, кенярдовты республикань эрицятнень, лезды лиятненень. Сонзэ тонавтницянзо касыть тиринь ёнксонь вечкицякс ды содыцякс, сынь покш мель явить духовной питнейчитненень, литературантень. Людмила Михайловна седейлембе марто ледстни раськень литературань музеенть панжомадонзо, эдь теньсэ сонзэ покш таликазо: 

– Музеень панжомась ульнесь алкуксонь кенярксчикс, покш важодемань топавтомакс. Ниле иень перть пурнавсть книгат, фотографият, сёрмадеень инекужонь материалт, конат ванстовсть Мордовиянь писательтнень ды учёнойтнень личной архивтнесэ. Эйкакштнень марто вейсэ музеенть панжомо сакшность се шкань горкомонь секретаресь В.Н.Тарасов ды Мордовиянь заслуженной писателесь А.К.Мартынов. Те шкас ванстови якстере парсейнесь – музеень панжомань тешксэсь. Музеентень эйкакштнень марто вастовоматнес сеедьстэ сакшность А.К.Мартынов, А.С. Щеглов, А.Д.Куторкин, И.К. Инжеватов, К.Г.Абрамов ды лия содавикс сёрмадыцятне. Неть ине ломантне тонавтсть эйкакштнень а потамс кемекстазь тевтнень эйстэ, кирдемс вал топавтозенть кисэ ды а путомс ответственностенть лиятнень лангс, улемс мелень явицякс ды ловномо вечкицякс. Те вишкинетненень лездась улемс уцяскавокс, эйкакштне марясть пряст алкуксонь, покш тевень пельксэкс. Ды те важодемань лувонть минь бажатано ванстомс ды виевгавтомс. 

– Людмила Михайловна, Тынк вановтонк коряс, кодамо прявт смустезэ раськень литературань музеенть? 

– Неень шкань ломаненть эрямозо кеместэ сюлмавозь мирэнь ды отечественной культуранть марто. Тень эйстэ лиси, минек прявт тевенек – явовтомс покш мель книгантень, муемс сюлмот литературанть ды эрямонть ютксо, тонавтомс вишкинетнень вечкеме историянть, тиринь ёнксонть, маштомс кунсоломо, сюпалгавтомс эйкакштнень культураст. Покш возможность тень туртов максы Мордовиянь раськень литературань музеесь, тесэ важодемась ветяви «Мордовское литературное краеведение и музееведение» программанть коряс. 
Музеесь ды те программась ёвтнить эрзя-мокшонь литературань касомасо-кепетемасо васенце эскелькстнэде, Мордовиянь народной писательтнень шкинемадост, республикань литературань неень шкань эрямодонть. Те программась пек сюпав смустень коряс. Видькстан, ламо иень перть ветявиця те покш важодемась канды лезэ. Эйкакштне, конат важодить музейсэнть, явовить лиятнень эйстэ ловномо вечкемасонть, видестэ кортамо маштомасонть, сынь анокстыть ды ловныть научной докладт, невтить содамочист литературань шкинематнесэ. 

– Мезе ванстови музейсэнть? Кодамо лувонь коряс ветяви тесэ важодемась? 

– Тесэ ванстовить документт, конат ёвтнить сёрмадыцятнень эрямонь ды шкинемань кидест, сёрматнень, стихтнень вельде невтезь искусстванть коряс вановтост, критиктнень ды ялгатнень ледстнемаст, эйкакштнень важодевксэст. «Устное народное творчество» пелькссэнть максозь сюпав материал ёвксонь ёвтницятнеде – Ф.Беззубовадо, Е.Кривошеевадо, С.Люлякинадо. 

Музейсэнть пурназь 5 тёжадо ламо предметт. Экспозициясь, конась ашти зярыя пельксстэ, ёвтни эрзя-мокшонь литературанть виевгавтомадонзо, сёрмадыцятнень шкинемадост, раськетнень ютксо ялгаксчинь сюлмотнеде. Музеень фонотекасонть ванстовить содавикс сёрмадыцятнень вайгелест. 

Теде башка, музейсэнть ютавтовить тиринь ёнксонь историянтень, культурантень, литературантень алтазь урокт, эрьва кодамо кенярксчить: «Российская словесность», «Топонимия Мордовии», «Драматургия и театр» ды лият. Истя жо тесэ важоди «Эрзянь лисьмапря» поэтической клубось, косо эйкакштне варчнить эсь пряст сермадомасонть. Ютавтовить ледстнемань чить, презентацият, классонь част, тешкставить юбилейть. Эйкакштненень пек вечкевить писательтнень ды поэттнэнь, общественной деятельтнень, искусствань мастертнэнь марто вастовоматне. 

«Мелень ёвтамонь книганть» ванкшнозь, редяви, раськень литературань музеентень сакшныть инжеть Саранскоень школатнестэ, Мордовиянь весе районтнэстэ, истя жо Оренбургонь, Самарань, Пензань областтнестэ, Алтаень ёнкссто, Коми, Карелия, Марий Эл, Чувашия республикатнестэ, истя жо Финляндиясто, Эстониясто ды Венгриясто. Музеесь лезды од сельмсэ варштамс тиринь моданть лангс, лезды одтнэнень чарькодемс раськень питнейчитнень, кастомс сынст алкуксонь патриотокс. Эдь ледстнематнень ванстомась – те пек покш тев. Минь важодтяно сень коряс, кода явовтомс вишкинетнень мелест эрзянь-мокшонь писательтнень шкинемантень. Эдь сёрмадыцятне тонавтыть минек арсемс, произведениятнень вельде неемс масторлангонть, тонавтыть эрямс алкуксокс, вейкень-вейкень чарькодезь ды вечкезь. 

Т.АКСЕНОВА
 
 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...