Рубрикатор

Образование Казнеть – тонавтыцятненень
Казнеть – тонавтыцятненень

Октябрянь 6-це чистэ Республикань культурань дворецсэ келейстэ тешкставсь Тонавтыцянь раськеютконь чись. Тей пурнавкшность ошонь ды республикань тонавтыцятне, эйдень кужонь важодицятне, педагогтне-ветерантнэ. МР-нь Прявтонть пельде лембе вал марто сыненст пшкадсь МР-нь Правительствань Председателесь В.Ф.Сушков.

– Образованиянь касомась-кемекстамось минек социальной политикасо ашти прявт тевекс. Меельце вете иетнень перть республикань бюджетстэ образованиянть лангс ярмаконь явомась кассь 5%. Весе те алтави неень шкань условиятнень паролгавтомантень. Ламо лезкс явозь «Доступная среда» программантень. Меельце иетнень перть те проектэсь тевс нолдазь 112 школатнесэ. Минь седе товгак поладтано витнеме-петнеме школатнень, одкстомтомо велень школань спортонь залтнэнь.

Вете иень перть Мордовиясо панжинек одт ды витнинек 54 эйдень кужот. Кадык тетятне-аватне а ризныть таркатнень коряс. Икелепелев арсетяно топавтомс эштё вейке задача: 2018 иентень келейгавтомс дошкольной образованиянть, эйдень кужов ветсемс 1,5-3 иесэ эйкакштненьгак, – кортась В.Ф.Сушков.

Сон истя жо пачтясь, поладови лезксэнь максомась од педагогтненень ды велень тонавтыцятненень. Кецявты, школатнес сыть од ломанть.

Эрьва ковсто башка ярмакт пандовить сеть педагогтненень, конат анокстасть олимпиадань призёрт. Истят тонавтыцятнеде кармасть кавксть седе ламо. Эряви меремс, мелят республикань сборноесь Весероссиянь предметной олимпиадасо сайсь 48 казнеть. Истямо вестькак арасель. Бути ваномс регионтнэнь рейтингенть лангс, Московдонть мейле Мордовиясь саизе омбоце тарканть!

2016-2017 тонавтомань иенть цётамотнень коряс, Россиянь сехте вадря школань ТОП-500-с совасть: Республикань ёроков эйкакшонь лицеесь, 12, 19, 20 №№ гимназиятне, 43№ лицеесь, 39№ школась. Мордовиянь 10 школатне совасть велень сехте вадря школань ТОП-300-с.

В.Ф.Сушковонь валонзо коряс, поладовсь тонавтыцятненень грантонь лезксэнь максомась.

Нейгак 5 тонавтыцятне казевсть РФ-нь Президентэнь Грантсо, конань покшолмазо 200 тёжат целковойть. 25 тонавтыцятне – МР-нь Прявтонь премиясо – 50 тёжат. Истят жо премият максовсть эйдень кужонь важодицятненень.

500 тёжат целковойть максовсть Рузаевкань 1№ гимназиянтень, Торбеевань 1№ школантень, Саранскоень 24№ школантень, Инсаронь 1№ школантень ды Ицялбуень Рождественань школантень.

500 тёжат целковойсэ казевсть дополнительной образованиянь организациятне (Ковылкинань эйкакшонь творчествань кудось, Чаунзань эйкакшонь творчествань куншкакурось ды Лямбирень эйкакшонь творчествань кудось).

2 млн. целковоень грант максовсь Темниковань велень хозяйствань колледжентень.

Тонавтыцятне казевсть «МР-нь заслуженной учитель», «МР-нь образованиянь заслуженной роботник» покш лемтнесэ.

Мельспаро ёвтамс, «МР-нь заслуженной учитель» покш лемесь максовсь Дубёнка ёнксонь Кочкурвелень рузонь ды эрзянь келень тонавтыцянтень С.И.Юртайкинанень. Сон пшкадсь весенень ды ёвтась сюкпрянь валт эрзянь кельсэ. Светлана Ивановна комсь иень перть важоди велень школасо. Мелят лиссь призёрокс «Эрзянь келень сехте вадря тонавтыця» республикань пелькстамосонть. Арсетяно сонензэ ды весе тонавтыцятненень кеме шумбрачи, паро эрямо, важодемасо од изнявкст, паро тонавтницят!

Т.Маторкина

 

Новости

«СЯТКО» ДЫ «МОКША» журналтнэнень – 90!

Неть читнестэ МР-нь Пресс-центрасо ютась промкс, кона алтавсь «Сятко» ды «Мокша» журналтнэнь 90 иень топодемантень. Мокшонь кельсэ «Валда ян» журналось лиссь Пензасо, эрзянь «Сяткось» – Самарасо. Самай неть изданиятнесэ лиснесть минек ушодыця поэттнэнь ды писательтнень произведенияст.

Подробнее ...
 
Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...