Рубрикатор

Образование Мединститутонтень – 50 иеть!
Мединститутонтень – 50 иеть!

Сентябрянь 8-це чистэ Республикань Культурань кудосонть ютавтовсь покш кенярксчи, тесэ тешкставсть Н.П.Огарёв лемсэ МГУ-нь Медицинань институтонть  теемань чистэнть саезь 50 иетне. Тонавтыцятненень ды студенттнэнень лембе валонь ёвтамо сакшнось Мордовиянь руководителесь В.Д.Волков.

 

– 50 иеть явить аволь покш факультетэнть масторонь медицинань икеле молиця институтонть эйстэ. Ютазь покш ки. Ды ютызь сонзэ ёроков ломанть, конат весе пингест алтызь вечкевикс тевентень, – мерсь В.Д.Волков. – Течи минь ледстясынек факультетэнь васенце прявттнэнь: Г.Н.Сарайкинэнь, А.А.Беляковонь, В.М.Зайцевень, Н.М.Ивановонь. Неть ломантне путсть юр республикасонть медицинань образованиянтень ды ливтизь сонзэ икелев весе масторонть келес. Покш таликаст факультетэнь виевгавтомасонть неень шкань прявттнэнь: Л.К.Федоткинань, М.Д.Романовонь, А.А.Усановань. Сынст ёроков тевдеемаст вельде медицинань институтонть содасызь Россиясо ды сонзэ томбале.

Неть иетнень перть Мордовиясо анокстазь медицинань высшей образования марто малав 11 тёжа специалистт. Мордовиянь врачтне лезэвстэ важодить Россиянь малав весе регионтнэсэ, истя жо омбо мастортнэсэ – США-со, Англиясо, Германиясо, Израильсэ, Австралиясо, Африкань ды Азиянь мастортнэсэ. Ламотне эйстэст тейсть покш изнявкст профессиясо, кармасть покш ученоекс.

Течи медицинань институтось – минек икеле молиця вузонть сехте покш подразделениясь. Тесэ тонавтнить кавто тёжадо ламо студентт. Институтось парсте ютызе раськеютконь аккредитациянть, теезь вадря сюлмот масторонь медицинань икеле молиця вузтнэнь марто.

Панжозь специалисттэнь анокстамонь од ёнкст. Мелят ульнесь васенце выпускось «Фармация» специальностенть коряс, тедеде – врачтнень-стоматологтнень.

Медицинань факультетэсь – минек вузсонть сехте интернациональной. Омбо масторонь студенттнэнь анокстамось ушодовсь 25 иеде икеле. Васенцекс ульнесть Индиянь, Пакистанонь ды Сириянь представительтне. Ней институтсонть тонавтнить тёжадо ламо студентт, ординаторт ды аспирантт мирэнь 28 масторсто. 2014 иестэнть саезь «Лечебное дело» специальностенть коряс омбо масторонь студенттнэнь тонавтомась ветяви англань кельсэ.

Секскак минек медицинань институтонть мереви лемдемс медицинань кадратнень анокстамонь раськеютконь куншкакурокс. Образованиянь услугатнень экспортонть, истя жо омбо масторонь кельтнесэ тонавтомань программатнень тевс нолдамонть вельде вузонтень сыть седе ламо тонавтницят, кемекстави регионъютконь университетэнь статусось. Минек туртов те пек эрявикс. Институтонть прявт сюпавчинзэ – те, нама, сонзэ тонавтыцятне, сынст ютксо покш ученойть ды специалистт-практикть, – тешкстызе В.Д.Волков.

Врачонь кадратнень анокстамонть ветить 2 академикть ды Медицинань наукань Россиянь академиянь 2 члент-корреспондентт, общественной ды омбо масторонь 10 академикть, 40 ламо наукань докторт ды профессорт.

Течи медицинань институтсонть теезь материально-технической ды клиникань неень шкань база. Тедеде панжозь специалисттнэнь практикань анокстамонь од куншкакуро – региононь аккредитациянь-симуляциянь куншкакуро.

Миненек эрявиксэкс ашти се, уш тонавтнемстэ сы шкань медиктне получаст содамочитнень икеле молиця технологиятнень вельде. Тынь содатадо, меельце иетнестэ Мордовиясо ютавтозь покш важодема здравоохранениянь ресурсонь базанть виевгавтомга, медицинань неень шкань куншкакуротнень теемга. 5 иетнень перть строязь здравоохранениянь 55 объектт, витнезь больницянь ды поликлиникань 100 ламо корпуст. Кавксть ламолгадсть республикань эрицятне, конатненень явозь медицинань покш технологиянь лезкс, – мерсь региононь лидерэсь. – Текень пингстэ минь бажатано ваномс сы шкантень, ёроковсто нолдамс тевс наукань, минек университетэнь, медицинань институтонь потенциалонть. Тынь содатадо, тедеде «Биохимик» заводсонть анокстазь «Ванкомицин» Россиянь антибиотикесь. Университетэнть марто вейсэ теезь научно-производственной куншкакуро, косо арсевить-теевить од препаратт. Иенть прядовомс производствас максовить антибиотикень 4 видт. Сы иенть ушодовомсто панжови производствань площадкась, косо кармить теевеме уш субстанцият. Росссиясо те васенцеде. Сы шкастонть арсеви анокстамс лекарствань оригиналонь препаратт, кодат масторлангсонть эштё арасть. Секскак минек вейсэнь прявт тевенк – эсенек научной школатнень ды направлениятнень виевгавтомась.

Медицинань институтонь тонавтыцятненень ды студенттнэнень поздоровт истя жо ёвтасть Россиянь Здравоохранениянь министрань лездыцясь А.Н.Гулин, МР-нь Государственной Собраниянь Председателесь В.В.Чибиркин, МР-нь Правительствань Председателесь В.Ф.Сушков, Н.П.Огарёв лемсэ МГУ-нь ректорось С.М.Вдовин.

Медицинань институтонь сехте вадря важодицятненень максовсть казнеть.

Т.Аксенова

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...