Рубрикатор

Образование Пенза ёнкссо бажить а стувтнемс тиринь кельдест
Пенза ёнкссо бажить а стувтнемс тиринь кельдест

Аволь умок Саранскоев сакшность инжеть Пенза ёнксонь Малосердобинской районсто. Делегациясонть ульнесть велень прявтт, тонавтыцят, школань прявтт, культурасо важодицят. Сынст туртов арсезель кавто чинь сюпав программа. Васняяк  инжетне тердевсть А.С.Пушкин лемсэ Национальной библиотекав, косо ютась «Эрзянь ды мокшонь койтнень-кирдатнень ды келенть ванстомась» кругловой столь.

Кортамонть ушодызе Эрзянь ды мокшонь раськень регионъютконь общественной вейсэндявксонь прявтось Ю.А.Мишанин.

– Пенза ёнксось – минек шабранок. Зярдо-бути республиканок аволь покш пельксэсь ульнесь те губерниясонть. Пенза ёнксось эсь шкастонзо ламо тейсь минек культуранть кемекстамга. Тосо лиссь мокшонь кельсэ васенце газетась, мейле кармасть нолдамо журнал. Тосо чачсь национальной интеллигенциясь. Пенза ёнксось неень шкане – Самарадо мейле омбоце регион, косо эрить малав 50 тёжат эрзят ды мокшот. Зярдо-бути бажасть панжомс тосо Мордовской автономия, – кортась Юрий Александрович. Сон истя жо пачтясь, кодамо регионсо ды зяро улить неень шкане эрзянь ды мокшонь национально-культурной автономият, кодат кенярксчить ютавтыть республикань томбале эриця эрзятне ды мокшотне.

– Ламот юткстонок Саранскойсэ васенцеде. Минь тей сынек профсоюзонь вейсэндявксонть ды Пенза ёнксонь национально-культурной автономиянть лездамост вельде. Пшкадевлинек Образованиянь министерствав, ёвтнеде тенек тиринь келенть тонавтомадо, Сивиньсэ ютавтовиця эйкакштнень туртов этнокультурной лагерденть. Минь паро мельсэ ветявлинек келенть школатнесэ, ансяк арасть квалифицированной кадранок. Бути кияк сы – макстано эрямо тарка ды карматано андомо. Паряк, сыть меельце курссо тонавтниця студентт эли кадык пратикаст ютыть минек кедьсэ, – кортась Ташто Славкина велень администрациянь прявтось И.С. Еремкина. Ирина Сергеевна истя жо пачтясь, сыненст пек тусь мелезэст этношкола «Кой» проектэсь, кона ютась районсост. Морамонь, киштемань, спортонь, келень коряс мастер-класстнэ киньгак эзизь кадо мельтеме.

Теде мейле вал сайнесь МР-нь Образованиянь министранть полавтыцясь Г.А.Явкина. Сон домкасто ёвтнесь республикасо образовательной системадонть. Пачтясь эйкакшонь технопарконть панжомадо, ёроков эйкакшонь лицейденть, ков тердевить тонавтнеме эрьва кодамо ёнкссто.

– Минек республикасо башка мель явови патриотической ды этнокультурной воспитаниянтень. Саранскоень 90№ эйдень кужосонть панжозь национальной культурань куншкакуро, 19№ гимназиясо – раськень культурань межшкольной куншкакуро. 101 школасо эрзянь ды мокшонь кельтне ветявить 1-це классто саезь 11-це классос. 2004 иестэ саезь республикань весе школатнева 2-це классто саезь 7-це классос тонавтнить эрзянь ды мокшонь кельтнень. Ошонь школатнесэ мереви кочкамс, кодамо кель ули мель тонавтнемс. Минек школатнесэ улить тиринь келень кабинетт, панжозь раськень музейть, важодить эйкакшонь фольклоронь коллективть. Теде башка, сеть тонавтыцятненень, конат анокстасть олимпиадань изницят, пандови эрьва ковонь надбавка. Аволь аламо тонавтыцят казевсть РФ-нь Президентэнь ды МР-нь Прявтонь Грантсо, – пачтясь Г.А.Явкина.

Эряви меремс, МР-нь Образованиянь министерствась лезды регионтнэнень эрьва мейсэ. Эрьва ие ютыть тонавтыцятнень квалификацияст кастомга курсат, сынь питневтеметь. Школатнес кучовить учебникть ды учебно-методической литература.

– 2008-це иестэ саезь учебникень коряс Пенза ёнкссто эзь са вейкеяк яволявкс. Ютасть малав кемень иеть. Те пек ризнэвти. Лия регионтнэс минь кучнотано малав 200 экземплярт. Истя жо тынк пельде а сакшныть тиринь келень ды литературань коряс регионъютконь олимпиадав эйкакшт,  тонавтыцятнеяк а бажить курсатнес. Тунь лия тевесь ашти Ульяновской областьсэ. Келенть тонавтоманть коряс тосо весе ладязь парсте. Бути тынк ули меленк – минь весемесэ аноктано тенк лездамс! Садо, пшкадеде, илядо визде. Ков минь пачкодтяно, бути эйкакшонок а кармить содамо эсь раськень историянть, культуранть, койтнень-кирдатнень, келенть? Течинь истямо вастовомась ютась васенцеде, кеман, Пензань областенть марто карматано вейсэ важодеме образованиянть ды культуранть коряс, – кортась Г.А.Явкина.

Те кортамодонть мейле Пенза ёнксонь инжетне сыргасть эрзянь ды мокшонь раськень культурань музеев. Сынь истя жо ульнесть Макаровкань Иоанно-Богословонь цёрань монастырьсэ, С.Д.Эрьзя лемсэ изобразительной искусствань музейсэ. Омбоце чистэнть вастневсть М.Е.Евсевьев лемсэ МГПИ-нь ректоронть В.В.Кадакинэнь ды Н.П.Огарёв лемсэ МГУ-нь ректоронть С.М.Вдовинэнь марто.

Пенза ёнксонь Малосердобинской районсо зярыя эрзянь велеть. Паро улевель, бути конасонтькак келенть ветявольть куш факультативень лувсо.

 

Т.Маторкина

 

Новости

«СЯТКО» ДЫ «МОКША» журналтнэнень – 90!

Неть читнестэ МР-нь Пресс-центрасо ютась промкс, кона алтавсь «Сятко» ды «Мокша» журналтнэнь 90 иень топодемантень. Мокшонь кельсэ «Валда ян» журналось лиссь Пензасо, эрзянь «Сяткось» – Самарасо. Самай неть изданиятнесэ лиснесть минек ушодыця поэттнэнь ды писательтнень произведенияст.

Подробнее ...
 
Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...