Рубрикатор

Образование А.А.Учеваткин: «Эрзянь келенть тонавтнить мельспаросо»
А.А.Учеваткин: «Эрзянь келенть тонавтнить мельспаросо»

Мон умок бажинь сёрмадомс сондензэ. Ансяк кодаяк эзь лисне вастовомс ды седейшкава кортамс. Ней жо кода а сёрмадомс? Неть читнестэ те ломанесь лиссь изницякс «Эрзянь ды мокшонь кельтнень коряс сехте вадря тонавтыця» республикань конкурссонть. Кортамось моли Александр Андреевич Учеваткиндэ. Те од цёрась важоди ошонь 4№ лицейсэ. 2-7-це класстнэсэ сон вети эрзянь кель, теде башка – воспитательной тевтнень коряс завуч. Кода 30 иес пачкодсь неть тёкштнес, ловнодо седе тов.

 

А.А.Учеваткин аволь ансяк тонавтыця. Сон – филологиянь наукань кандидат, морси «Торама» фольклорной ансамблясо, ушодсь снимамо фильма! Александр чачсь Отяжбуень Сабанцелесэ. Школань прядомадо мейле сась тонавтнеме М.Е. Евсевьев лемсэ МГПИ-нь филологиянь факультетэв. Валонзо коряс, студентэнь шказо ютась сэтьместэ. Эрьва мезде пешксе эрямось ушодовсь аспирантурасо. Вузонь тонавтыцятне тердизь сонзэ поладомс тонавтнеманть, цёранть ульнесь покш мелезэ, ды сон мольсь. Самай те шкастонть Александр ардтнесь весероссиянь ды омбо масторонь эрьва кодамо конференциява, од ломанень промкска, вастневсь ды теевсь содавиксэкс лия ёнксонь од ломантнень марто, пурнась содамочить, мукшнось ялгат. Саемга, 2011 иестэ Удмуртиясо улемстэ, кармась содамо, тосонь од ломантне ютавтызь «ВКонтакте» социальной сетень интерфейсэнть удмуртонь кельс. Минек, эрзятнень, ансяк ушодовсь ютавтомась ды мольсь лавшосто, эрявсть ютавтыцят. Од ломаненть токизе те. Ды сон мерсь эстензэ, карми седе товгак ютавтомо. (Эряви меремс, эрзякс васенцекс интерфейсэнть кармасть ютавтомо Финляндиянь лингвистэсь Джак Рютер ды Санкт-Петербургонь журналистэсь Андрей Петров). Мелесь седеяк кепедевсь, зярдо Россиянь эрьва ёнкссто кармасть сёрмадомо сюкпрянь валт тиринь кельс ютавтоманть кисэ.

Мельспаросо сон ёвтни, кода 2013 иестэ пачколесь Парижев! Тосо ютасть Мордовиянь раськетнень культурань чить. Тердевсть учёнойть, художникть, морыцят. Сонзэ докладозо аштесь колмо пельксстэ: Мордовиянь музыкальной культурась, Саранск ошсо тиринь кельтнень тонавтомась ды «ВКонтакте» соцсетенть ютавтомась.

«Аспирантурасо тонавтнемась ютась лезэвстэ. Научной руководителем ульнесь филологиянь наукань докторось, профессорось Л.П.Водясова. Мон ёвтавлинь тензэ покш сюкпря. Сон ламо лездась монь содамочитнень кастомасо», – ледстни Александр.

Диссертациянть идемадо мейле од цёрась арсезевсь, ков молемс важодеме. Сон кочкизе школанть. Ды а янкси. 2013 иестэ Александр Андреевич ушодсь важодеме 7№ лицейсэ, ветясь эрзянь кель ды ульнесь воспитательной тевтнень коряс завучокс. Сон мелявтсь, кода топавтомс неть тевтнень. Ансяк роботань коряс ялгатне лездасть тензэ эрьва мейсэ.

«Ней апак кавтолдо мерян, эзинь маняво, мекс сынь важодеме школав. Эйкакштнень тонавтомась максы тень вийть. Монень вечкеви важодемам. Седеяк кецявты, зярдо эйкакштне мельспаросо сакшныть эрзянь келень уроктнес», – корты педагогось.

2015 иенть прядовомсто тонавтыцясь ютась ошонь 4№ лицеев, косо истя жо вети эрзянь кель ды топавты завучонь тевенть. Теке жо иестэ Казаньсэ ульнесть РФ-нь раськетнень кельсэ школань тонавтницятнень ловномат ды научно-практической регионъютконь конференция. Тов сакшность Равчирень округсто ды лия ёнкссто малав 10 регионт. Александр Андреевич якась тов Эдуард Ким тонавтницянзо марто. Кавто ковонь перть сынь анокстасть те пелькстамонтень, кочкизь «Эрзянь фамилиятнень этимологиясь» теманть. Эдуард аванзо коряс эрзя, ундоксонзо Чаунзабуень Мокшалейстэ. «Мейсэ конференциянть питнейчизэ? Тосо эряви кортамс ды анокстамс важодематнень тиринь кельсэ. Жюрисэ аштесть ломанть, конат содасызь кельтнень. Эдуард тосо саизе васенце тарканть!» – ёвтни А.А.Учеваткин. Иень ютазь сон таго якась те конференциянтень. 10-це классонь тонавтницянзо Юрий Ломшин марто анокстасть «Дубёнкань райононь эрзянь стувтозь лемтне» важодема. Сынь пурнасть 170 цёрань ды малав 80 авань лемть. Те тевесь истя жо изнясь. Конференциясонть ютась тонавтыцянь промкскак. Александр Андреевич тосо пачтясь Саранскоень школатнесэ тиринь кельтнень тонавтомадо.

Тедеде Александр варчинзе виензэ «Эрзянь ды мокшонь кельтнень коряс сехте вадря тонавтыця» пелькстамосонть. Васня ютызе ошонь этапонть, мейле невтизе прянзо республикань турсонть, косо пелькстасть 18 тонавтыцят. Эйстэст вете педагогтне ютасть финалс. Ютксост Учеваткингак. Валонзо коряс, анокстамонь этапось сехте стакаль. Эрявсь пурнамс портфолио, теемс важодемань презентация, невтемс уроконь пелькс. Сонзэ темань урокось ульнесь: «Ярсамопельтне ды ловомась». Тонавтыцясь тешксты, бути тон весе вийсэ, паро мельсэ анокстат – весемесь лиси.

«Минек лицейсэ важодема лувось ладязь парсте. Теньсэ покш путовксозо прявтонть Л.Н.Березинань. Эрьва тевсэнть эряви команда. Секскак ёвтан сюкпря М.Б.Кудашкинанень, Д.А.Кручинкиннэнь, О.А.Кербицкованень ды весе коллективентень, кить лездасть тень, – корты А.А.Учеваткин. Изницятнень каземась ютась Эрзянь ды мокшонь Национальной театрасо. Тей Сабанцелестэ сакшность цёранть малавиксэнзэ, тетязо-авазо, Андрей Николаевич ды Любовь Алексеевна Учеваткинтнэ. Цёраст кисэ сынь аштить покш каштанчисэ. Седеяк пек кеци кувалманзо эсензэ семиязо – Наталья низэ ды Всеволод вишка эйдезэ.

2011 иестэ саезь Александр Учеваткин морси «Торама» ансамблясо. Тов тердизе Андрей Ромашкин. Ды кадык сонзэ арась музыкальной образованиязо, покш мелесь морамс панинзе весе кавтолдоматнень. Косо ансяк эзть ульне сынь, косо ансяк эзть морсе! Эрьва косо сынст вастыть паро мельсэ.

Неень шкане Александр важоди «Азор» фильманть лангсо. Те карми эрзянь кельсэ васенце полнометражной фильма. Сонзэ арсизь снимамс В.Чичайкин (Бакич Видяй) морыцянть марто. Кавто иень перть съёмкатне мольсть Кочкурбуень, Покш Березникбуень, Отяжбуень, Дубёнкань, Орданьбуень районтнэсэ. Ней съёмкатне прядовсть, тееви монтаж. Цёратне ёвтыть покш сюкпря весе ломантненень, кить лездасть ярмаксо те общественной проектэнтень.

– Александр Андреевич, косто сайнят зняро вийть?

– Вийть тень максыть малавиксэнь. Кармавтан эсь прям а аштемс ве таркасо. Лиякс меремс, монень вечкевить сеть тевтне, конатненень яван мель. Бажан, XXI пингестэнть минек келесь а ёмаволь, сон касоволь ды кемекставоль.

Те иень сёксня Александр Андреевич сырги Московов, косо карми тиринь келень тонавтыцятнень Весероссиянь пелькстамось. Кемтяно, сон парсте невтьсынзе содамочинзэ ды тосто сы изнявкс марто.

Т.Маторкина

 

Новости

Турчак заявил о запуске конкурса социальных проектов первичных отделений «Единой России»
В ближайшее время стартует конкурс социальных проектов первичных
отделений «Единой России», лучшие проекты смогут претендовать на
грантовую поддержку Партии. Об этом сообщил секретарь Генсовета Партии
Андрей Турчак, выступая на пленарном заседании форума первичных
отделений «Единой России» в Северо-Кавказском федеральном округе.
Подробнее ...
 
20 лучших водных ревизоров Мордовии продолжат свою работу в Артеке
Сегодня в Саранске прошло заседание регионального штаба Всероссийской
экологической акции «Вода и здоровье». Там были названы имена 20 лучших
водных ревизоров республики, которые станут участниками федерального этапа
акции «Вода и здоровье»
Подробнее ...
 
Директор спортивной школы попросил депутата ГД Александра Воробьева помочь мордовской биатлонистке
 9 июня депутат Госдумы РФ, член Комитета Госдумы по
аграрным вопросам Александр Воробьев встретился с жителями
Мордовии на личном приеме. Люди обращались по разным вопросам
– в сфере ЖКХ, обеспечения лекарствами, помощи в получении жилья
и другим.
Подробнее ...
 
Молодогвардейцы - победители «Школы парламентаризма«посетили высшие законодательные органы страны
Первым пунктом экскурсии для ребят из Мордовии стал Совет Федерации Федерального
Собрания Российской Федерации, внутренний интерьер и дизайн которого поразил их своей
красотой и величием. Экскурсовод познакомила ребят с особенностями здания, провела по
главным местам Совета Федерации. Ребятам также удалось побывать в большом зале
заседаний, увидеть своими глазами рабочие места сенаторов и кресло председателя
Валентины Матвиенко. Также молодогвардейцы узнали, как проходит подготовка к
заседанию и собственно
сама
работа
заседаний.
Подробнее ...
 
Путин казизе Мордовиясто семиянть «Родительская слава» орденсэ

Июнень 1-це чистэ, Эйкакшонь ванстомань раськеютконь чистэ, РФ-нь Президентэсь Владимир Путин казинзе ламо эйкакшонь триця семиятнень «Родительская слава» орденсэ. Покш казнесэ тешкстазель Мордовиянь Зубова-Полянань райононь Ширингуши велень Урсовтнень кудораськесь. Покш промксонтень истя жо тердевсть РФ-нь ёнкстнэнь прявттнэ, косто састь семиятне, сынст ютксоль МР-нь Прявтось Владимир Волковгак.

Подробнее ...