Рубрикатор

Образование Школанть юрсо – миграциянь тевтнеде
Школанть юрсо – миграциянь тевтнеде

Ютазь недлясто Межэтнической журналистикань школань тонавтницятне якасть инжекс Россиянь МВД-нь миграциянь кевкстематнень коряс Мордовия Республикасо прявт управлениянтень. Од журналисттнэнь марто вастовкшнось управлениянь прявтось, полициянь полковникесь Алескей Андреевич Кежватов. Сон ёвтнесь управлениянть тевтеемадонзо, толковинзе миграциянь кевкстематнень, ёвтнесь, кода те тематикась панжови СМИ-сэ.

 

А.А.Кежватов тешкстызе, миграциянь службась кувать ульнесь Россиянь милициянь пельксэкс. Мейле теезель Миграциянь башка служба, конась 10 иень перть кирдсь кеме сюлмот внутренней тевень органтнэнь марто. 2016 иень апрельстэ Миграциянь службась одс совавтозь МВД-нь структурантень. Алексей Андреевич видькстась, Россиянь ФМС-нть икелев путозь тевтне эзть полавтово ды топавтовить сынь Россиянь миграциянь законодательстванть лувсо.

– Минек важодемась явови кавто прявт ёнксос. Васенцесь – эсенек масторонь эрицятненень государственной услугатнень максомась. ФМС-сь важодемань те ёнкссонть сайсь пек вадря невтевкст. Ней документтнэ, Россиянь ды омбо масторонь паспорттнэ анокставить ков седе курок. Секскак эряви пштистэ ваномс госуслугатнень максомань стандарттнэнь топавтомаст мельга. Омбоцесь – омбо масторонь эрицятнень марто важодемась. Минь паро мель марто васттано весень, кить сыть минек масторов вадря мель ды бажамо марто важодемс эсест, Россиянь ды тиринь масторонть лезэс. Те ёнксонтень совавтовить мигранттнэнень минек масторсо улемадо документтнэнь максомась ды сынст мельга ваномась, – ёвтнесь А.А.Кежватов

Неень шкане МР-со Россиянь МВД-нь миграциянь кевкстематнень коряс прявт управлениясь максы миграциянь коряс государственной 17 услугат. 2016 иестэ теезь 200 тёжадо ламо услугат. Сехте сеедьстэ вастневицятне – Россиянь эрицятнень регистрациянь учётось ды омбо масторсто сыцятнень миграциянь учётось. Омбо масторонь эрицятне сыть республикав эрьва кодамо бажамо марто: важодеме, тонавтнеме, лецямо...

Мордовиясо мигранттнэнь адаптациянь тевтееманть коряс пурнавозетненень ёвтнесь Культурань ды национальной политикань министрань полавтыцясь В.В.Цыбусова. Вера Васильевна невтизе «Весе минь – Россия» пособиянть, сон алтави республикав сыця мигранттнэнень. Те пособиянть анокстамонзо-нолдамонзо лангсо важодсть МР-нь Национальной политикань коряс министерствась, Миграциянь службань МР-со управлениясь, Эрицятнень важодемань ды занятостень коряс МР-нь Госкомитетэсь, МР-нь Правительстванть юрсо НИИ-сь ды Финнэнь-угрань раськень культурань Равчирень куншкакурось.

Вастовомасонть тешкстазель, республикась иеде иес виевгады. Неень шкане моли культурань, спортонь ды лия объекттнэнь строямось. Тень кувалма республиказонок сыть ламо мигрантт. «Весе минь – Россия» пособиясь нолдавсь сыненст лезксэкс. 2015 иень январень 1-це чистэ саезь минек масторов сыця мигранттнэнень эряви максомс экзамен рузонь келенть, историянть ды Россиянь законтнэнь содамост коряс. Те пособиясь лезды омбо масторонь эрицятненень анокстамс те экзаменэнть туртов.

«Весе минь – Россия» пособиясь ашти зярыя пельксстэ. Васенцесэнть евтневи Россиянь законодательной базадонть. Пособиясонть истя жо максозь содамочить минек масторонть ды республиканть историядонзо, кенярксчитнеде, койтнеде-кирдатнеде, башка евтневи содавикс сермадыцятнеде, политикань, наукань ды культурань важодицятнеде ды истя седе тов. Истя жо максозь варчамонь тест рузонь келенть коряс.

Пособиянть нолдамодо кулянть мельспаросо вастызь республикасонть улиця лия раськень вейсэндявкстнэ. Тешкстызь, сонзэ нолдамонть учость умок. Ней ютавтыть те пособиянть эсест кельтнес ды бажить пачтямс сетненень, кить арсить самс Мордовияв.

Т.Аксенова

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...