Рубрикатор

Образование Пелагейкинэнь валдо кизэ
Пелагейкинэнь валдо кизэ

 

– Арсят каникуласто ютавтомс занятият вирень кодамо-бути кордонсо, саемс тов мик вете-кото эйкакшт. Тон мезе, ормазкадыть?

– Кодат тосо эйкакшт? Весе спортсментнэ уш вейксэце, кеменце класстнэсэ тонавтнить, сэрест –  мондень покшт! Весе – цёрынеть, тейтерькат а сайтяно.

– Паро эно, сыргадо, ансяк тосо тонавтницятнень мельга седе пштистэ вант.

 

Те кортамось ульнесь 1976 иестэ Мордовия Республикань Отяжелень райононь Сабанцеле велень школань директоронть М.И.Палькинэнь ды физкультурань од учителенть Н.Н.Пелагейкинэнь ютксо.

* * *

Цёрынетне ды сынст тонавтыцяст шканть кувать таргсеме эзть карма – омбоце чистэнть стясть сокс лангс ды паксянь кинть кувалт сыргасть тонавтнема од таркаст ёнов.

Часонь-кавтонь ютазь пачкодсть ков эряви. Те ульнесь вирень валдо кужос кеместэ чапозь-ладязь покш кудо. Николай Николаевич весть уш неизе те мазычинть, секс пшкадськак сонзэ азоронтень – Ю.Д.Елеськиннэнь.

Юрий Дмитриевич од учителенть кевкстемантень мик дивазевсь.

– Мезть кевкстнят? Инескеть, моледе! Тельня кордонось ялатеке чаво. Тосо ярсамопельгак ули косо пидемс.

Кудосонть ярсасть-тейсть, оймсесть ды лиссть ушов. Тесэ чись пейдезь пейди, ловось «чвир-р-рк, чвир-р-рк» корты. Нурькинестэ, чийнек ды кеняркшнок.

Омбоце чистэнть стясть, ды таго – занятияс. Эсь велест ёнов сыргасть ансяк чопоньпелев. Вирень кордонов молемстэяк, кудов самстояк шкась стяко эзь ёма – учителесь сестэяк тонавтсь цёрынетнень, кода лексемс сокс лангсо чиемстэ, кода эскелямс.

Нурькинестэ, лезэвекс лиссь школанть коряс кордонсо ютавтозь шкась. Школань уроктне, содазь, – пек паро тевесь. Ансяк пек уш нурькинеть сынь, неть уроктне – ниленьгемень вете минутат ансяк кувалмост, а тесэ – мик кавто чить. Теде башка, школань сборной командас совиця спортсментнэнь ютксо ояксчинь ладямодонтькак стувтнемс а эряви. Косо сонзэ кемекстамс, бути а вейсэнь важодемань, вейсэнь оймсемань шкатнестэ?

Николай Николаевич топавтсь ламо паро тевть. 1975 иестэ саезь, Сабанцелень школантень важодеме самодо мейле, сеске панжсь сокс лангсо чийнемань, шожда атлетикань, баскетболонь, хоккеень секцият, сонзэ ушодксонзо коряс анокстазельть спортонь площадка, хоккеень корт.

Неть весе секциятне, корттнэ-площадкатне невтизь пряст сеске – уш иень ютазь Отяжелень райононь шожда атлетикань ды сокссо чийнемань коряс пелькстамотнесэ кеменьшка пек виев командатнень ютксто Сабанцелень школань тонавтницятне саизь омбоце тарканть. Седеяк покш изнявкс добовасть хоккеисттнэ – 1976 иестэ районсонть сынь кармасть улеме васенцекс.

А 1978 иестэ Сабанцелень вишка хоккеисттнэ дивавтызь Саранскоентькак. Эйкакштнень ютксо ютавтозь пелькстамотнесэ сынь саизь омбоце тарканть. Чемпионатонь весемеде паро налксицякс тесэ ловозель минек школань тонавтыцясь Степан Батяркин.

Иень ютазь – таго Мордовиянь чемпионат, ды таго Сабанцелестэ тонавтницятне аравтызь эсь пряст весемеде виевтнень юткс. Те разнэ уш средней возрастной группасонть. Тесэ сынь кармасть улеме колмоцекс.

Парсте невтизь эсь пряст Сабанцелень сокс лангсо чийницятнеяк. 1975-1985 иетнестэ Отяжелень районсонть ютавтозь пелькстамотнестэ арасель истямо, зярдо минек школасонть тонавтницятне кадовольть удалов. Сынь свал ульнесть васенцекс.

* * *

Шкась мольсь, Сабанцелень ульцятнева келейстэ кармасть эскелямо 80-це иетне. Минек велень спортсментнэнь мельс-превс чаповсть «Пионерская правда» ды «Урожай» ДСО-нь призтнэнь кис пелькстамотне. Ютавтовсть истят чемпионатт Мордовиясояк. Эряви тешкстамс, эйкакшонь газетань призтнэнь кис бороцямстонть Мордовиянь чемпионокс кавксть лиснесть Сабанцелень од эрицятне – сокс лангсо чийницятне М.Бухаркин, С.Слугин, Николай ды Иван Игушкинтнэ, С.Володькин. Сабанцелень пионертнэ неть чемпионаттнэсэ весемезэ изнясть нилексть.

Тесэ башка тешкстасынек – «Пионерская правда» газетань ды «Урожай» ДСО-нь призтнэнь кис пелькстамотне эсь ютковаст явовсть ламосо мейсэ. Бути васенцетнес тердевсть ансяк пионерэнь иень эйкакшт, омбоцетнень  теемань историяст ульнесь овсе лия. Ушодсынек вана мейстэ – кода содазь, СССР-нь покш оштнесэ спортонть эрямозо гайнесь, а вана велетне, робочей посёлкатне та-кода стувтовкшность, кадовкшность удалов. КПСС-нь покш прявттнэ тень редизь-неизь ды састь мельс теемс од общества, конань тердизь кепедемс, кода кортыть, «глубинкасо» спортонь роботанть. Лемдизь «Урожай» ДСО-кс. Пелькстамо те ДСО-нть турниртнэсэ васняяк тердевсть од колхозниктне, робочейтне, лиясто эсь виест невтеме тов якасть велень школьниктнеяк. Ды, эряви тешкстамс, эсь седе покш ялгатнень каршо сеедьстэ бороцясть а беряньстэ. Саемс невтемакс теке веленть – Сабанцеленть. «Урожай» ДСО-нь спортсментнэнь ютксо пелькстамотнесэ сынь а весть лиснесть призёрокс ды мик чемпионокс. Неть школьниктнень ютксто чачсть-кассть ламо пек паро сокс лангсо чиицят. Ансяк весемеде покш тештекс, маряви, эряви ловомс Лидия Учеваткинань, кона ульнесь «Урожай» ДСО-нь чемпионокс, сон совавтозель Мордовиянь сборной командантень. Те команданть марто пелькстась Россиянь чемпионаттнэсэяк.

* * *

«Саблясь, кона арасель бойсэ, седе курок ношкалгады» – кавалеристэнь те валмеревксэнть ледстясак, зярдо кармат кортамо Сабанцелень школань баскетболдонть. Тонавтницятнень ульнесь пек покш мелест кундамс те налксемантень, секс Николай Николаевич пурнась-кемекстась секция, козонь совасть малав комсь тейтерькат. Васня весемесь мольсь парсте – те секциясонть тонавтницятне ковсто ковс ёроковгадсть. Берянесь ульнесь ансяк вейкесэ – кода невтизе эрямось, Отяжелень райононь школатне баскетболонтень покш мель эзть яво, секс налксемс ульнесь а ки марто.

Витемс те стакачинть Сабанцелесэ кундасть вана кода – сынь кармасть ардтнеме шабра районтнэва, республикатнева, областтнева. Самай тосо вешнестькак налксемань коряс партнёрт, истя тоцясть-кемекстасть эсь ёрокчисткак. Сынь а весть ульнесть Чаунзасо, Орданьбуесэ, Саранск ошсо, Чувашия Республикасо, ламо лия таркатнесэ.

Кода кассь Сабанцелесэ тейтерькатнень виест, тень невтить вана неть турниртнэ:

1980-це иетнестэ Мордовиянь Орданьбуень районсонть састь мельс ютавтомс баскетболонь коряс панжадо чемпионат. Тов пелькстамо тердсть школань командат Саранск, Рузаевка оштнестэ, Чаунзасто, Чувашия Республикань Алатырь ошсто ды Сабанцеле велестэнть. Те пек виев коллективсэнть минек велень тейтерькатне добовизь призовой колмоце тарканть.

Спортсментнэ эзизь стувто эсь велень каштанчинть – Советской Союзонь Героенть Иван Гусевеньгак. Николай Николаевичень ушодксонзо коряс Сабанцелесэ эрьва иестэ кармасть ютавтнеме Отечественной войнань Героенть призэнзэ кис сокс лангсо чийнемань коряс Мордовиянь тонавтницятнень ютксо пелькстамот. Неть турниртнэсэ изницятненень максовсть спортонь  I разрядт.

* * *

Весе те – школань спортонть эрямосо ансяк васенце ёнксось, омбоцесь – физкультурань уроктне. Пумбра, Таразбуе, Паранеи, ды, содазь, Сабанцеле велень малав кавксосядт од эрицят якасть минек школав. Тестэ неяви – уроктнеде эрявсь ветямс байтяк.

Мезесь паро, транспортонть коряскак, строямонь материалтнэнь коряскак лездасть «Путь Ильича» колхозонь председательтне. Н.Н.Пелагейкин нейгак лембестэ ледстни хозяйствань прявттнэнь В.Н.Салдаевень, Н.М.Бариновонь, С.В.Кукинэнь, В.П.Бухаркинэнь, конат важодсть Сабанцелесэ сонзэ пингстэ. Парсте вастызь од учителенть школань директортнэяк – М.И.Палькин, В.П.Бухаркин, М.И.Данилова. Паро ялгакс Николай Николаевич теевсь сеть спортсментнэнь мартояк, конат Сабанцелень школанть прядызь велентень сонзэ самодо икеле. Сеть од ломантне покш мельсэ кармасть тензэ лездамо тонавтнема таркасонть пелькстамотнень ютавтомасо, секциятнень роботаст ветямосо.

* * *

Истя чийсть Пелагейкинэнь чинзэ: валске – физкультурань зярыя урокт, обедтэ мейле чокшнес – занятият секциятнесэ. Теде башка, а эряви стувтнемс соревнованиятненьгак, конат, ловт, эрьва ковсто ютасть эли эсенек районсо, эли сонзэ томбале. Нурькинестэ меремс, оймсема часонзо Николай Николаевичень эрсесть чуросто.

Истямо эрямось, паряк, кой-кинень маряволь пек стакакс, а вана Пелагейкиннэнь сон кандсь певтеме кенярксчи.

* * *

Ней сась шка зярыя валт ёвтамс Н.Н.Пелагейкинэнь эрямодонзо. Чачсь сон 1952 иень февралень 9-це чистэ Отяжелень райононь Аловелесэ. 1975 иестэ сась важодеме физкультурань учителекс Сабанцелев. Эрясь сон тесэ кемень иеть. Те шканть перть те веленть марто теевсь пек малавиксэкс. Вечкевсть тензэ тесэнь ульцятне, сонзэ эрицятне. Эйкакштнень марто прянзо ветясь апак покшкавтне, прок эсест семиянь ломань. Паряк, тень кувалма кемезевстькак вишкинетне тензэ. Сынь ламосо мольсть эсь учителест ёнов – кассть ёроковокс, стакачитнеде а пелицякс, бажасть топавтомс весе сонзэ вешеманзо.

Паронть, кода кортыть, паросо пандыть. Пелагейкингак лездась тенст мейсэ маштсь. Сайсынек истямо тевенть. Вечкевсть эйкакштненень пластикень сокстнэ – чувтонсетнень коряс седе мазыйтькак сынь, нардевтькак, шождаткак, кирякстытькак седе парсте. Сынст лангсо чиемстэ сеске чемпионокс лисят!

Николай Николаевич кевкстинзе учитель ялгатнень – косто неть од сокстнэнь добовамс? Тонат тензэ – келя, рамамодост иля арсеяк – вельть пек питнейть сынь! Пелагейкин удалов потамо эзь карма – омбоце чистэнть ялатеке совась школань директоронтень. «Те тон косто истят сырнень сокстнэнь муить? – дивазевсь тона. – Школанть зняро ярмаконзо арасть!»

Эрявикс тевенть Николай Николаевич шкань ютазь ялатеке топавтызе – усксь велев сокст, ды аволь веенст – мик ниленст. Кадык школань весе виев спортсментнэнень сатыть. Косто, паряк, кевкстьсамизь, ярмактнень сынст рамамс саинзе? Эсензэ тонавтыцянь зарплатасто, оно косто.

Тень кондямо тев лиссь лия иестэяк – аламольть школань спортзалсонть мячтнеде-оскатнеде. Ды таго Пелагейкин эвкстызе кедензэ эсензэ зепс.

Весе сеть историятнень коряс, конат сюлмавозельть сокстнэнь, оскатнень марто, Николай Николаевич школань директоронть лангс овсе эзь кежиявтне. Спортонь инвентарень рамамс Образованиянь министерствась ярмактнеде явнось пек аламо. Теньсэ школань прявтонть чумозо арасель.

Кода уш вере тешкстазель, Пелагейкин пек вечкилизе минек ёнксонть, секс мартонзо вастовомсто сон тенек нусманясто яволявтсь: «Бути а се апаро тевесь, мон те шкас важодевлинь Сабанцелень школасонть».

«Се апаро тевесь», конань ледстизе Николай Николаевич, ульнесь истямо. Се чистэнть минек школань командась таго якась пелькстамо ве ёнов. Сабанцелев самсто се машинась, конасонть ардсь Пелагейкин, понгсь аварияс, учителесь пек томбавкшнось, больницясо мейле кувать витнесь эсь шумбрачинзэ. Тень кувалма Сабанцеленть савсь кадомс, ютась эрямо Отяжеле посёлкав – больницянтень седе малав.

Сюкпря врачтненень – шкань ютазь учителенть сынь стявтызь пильге лангс. Зярдо совась вийс, мольсь важодеме васня Отяжелень СПТУ-в, мейле – 1 № школав. Тесэяк эсь тевентень путсь ламо вийть,  секс сонзэ тонавтницянзо райононь пелькстамотнесэ таго кармасть саеме васенце таркат.

Тевесь вана мейсэ – зярыя кементь иеде седе икеле Николай Николаевич заочна прядызе М.Е.Евсевьев лемсэ МГПИ-нь физической воспитаниянь факультетэнть. Ней вана сонзэ тевенть, эйкакшонь кастомань-тонавтомань тевенть, эсь профессиякс теизь Сабанцелень школань малав комсь прядыцят. Вана эйстэст ансяк кой-конатне: И.А.Бухаркин, Е.Е.Палькин, В.Н.Годяев, Н.А. Морозов, И.П.Федотов, Т.А.Гусева, Л.Н.Шепелева, Н.И. Палькина.

* * *

Иетне молить. Ней шумбрачись уш аволь истямо кеме, кодамо ульнесь икеле, секс Николай Николаевич полавтызе важодема тарканзо. Нина Дмитриевна нинзэ марто сынст ули Валя тейтерест, Никита нуцькинест. Весе сынь паро мельсэ ледстнить Сабанцеле веленть, сеедьстэ тов якить инжекс.

А.Тикшайкин,

эрзянь журналистэсь.

Отяжеле ёнксонь Сабанцеле веле.

Снимкасонть: Николай Николаевич Пелагейкин тонавтницянзо марто.

 

 

Новости

Полицейскойтненень – автомобильть

Саранскоень Советской площадьсэ ютась Мордовиянь МВД-нь сотрудникень развод. Торжественной церемониясонть республикань полицейскойтненень максозь 49 од автомашинат. Участникекс ульнесть В.Д.Волков ды внутренней тевень министрась Юрий Арсентьев.

Подробнее ...
 
Ардомань картат

Н.П.Огарёвонь лемсэ МГУ-нь студенттнэнь ды аспиранттнэнь туртов полавтовсь ардомань картань получамонь лувось. 2017 иень сентябрянь 1-це чистэнть саезь сынь максовить справкань коряс, конась кемексты ардомань картань получамонь праванть.

Подробнее ...
 
Ветеранонь хоккей

Ютазь оймсема читнестэ Саранскойсэ ютась хоккейсэ налксема. Вастовкшность «Ветераны Мордовии» ды «Легенды хоккея» командатне.

Налксемадонть икеле участниктненень поздоровт ёвтась Владимир Волков.

Подробнее ...
 
Университетсэ кармить тонавтнеме 4600 студентт

Н.П.Огарёв лемсэ МГУ-нь примамонь комиссиясь панжинзе кенкшензэ абитуриенттнэнь туртов июненть прядовомсто. Неть читнестэ университетэнь ректорось С.М.Вдовин ёвтынзе примамонь комиссиянь икелепелень итогтнень. Васняяк Сергей Михайлович ёвтась сюкпрянь валт республикань СМИ-тненень университетэнть тевдееманзо весеме ёндо невтеманть кисэ.

Подробнее ...
 
Ветеранонь промкс

Августонь 15-це чистэ Саранскойсэ ютась Мордовиянь ветеранонь организациятнень активень промкс. Пурнавкшность малав 400 ломанть. Промксонь участникекс ульнесь Мордовиянь Прявтонь тевтнень нурька шкас топавтыцясь В.Д.Волков.

Подробнее ...