Рубрикатор

Образование Ю.Мишанин: «Девятаевень юбилеензэ тешкстасынек келейстэ»
Ю.Мишанин: «Девятаевень юбилеензэ тешкстасынек келейстэ»

 

Аволь умок минь вастовкшнынек Эрзянь ды мокшонь раськень регионъютконь общественной вейсэндявксонь прявтонть, Н.П.Огарёв лемсэ МГУ-нь филологиянь факультетэнь деканонть Ю.А.Мишанинэнь марто. Юрий Александрович ёвтнесь общественной вейсэндявксонть икеле аштиця прявт тевтнеде, университетсэ эрзянь ды мокшонь кельтнень тонавтнема лувдонть ды истя седе тов.

 

– Юрий Александрович, кодат тевть карми топавтомо Эрзянь ды мокшонь раськень регионъютконь общественной вейсэндявксось тедеде?

– Содазь, ютазь иесь алтазель содавикс скульпторонть С.Д.Эрьзянь чачома чистэнзэ 140 иетнень топодемантень. Покш мероприятият ютавтовсть Саранскойсэ, республикань районтнэсэ ды истя жо лия регионтнэсэ. Те иесь жо юты Советской Союзонь Героенть М.П.Девятаевень тештензэ ало. Тедеде топодить 100 иеть чачома чистэнзэ саезь. Эрзянь ды мокшонь раськень регионъютконь общественной вейсэндявксось истя жо ютавты ламо мероприятият те юбилеенть келейстэ тешкстамга.

Михаил Петрович Девятаевень содасызь ламо таркасо, аволь ансяк Россиясо, истя жо Европасо, ды, а мезть сёпомс, весе мирсэнть. Сонзэ ланга теезь пек вадря документальной кино, юбилеентень арсетяно анокстамс эштё вейке. М.П.Девятаев ламо иеть эрясь Казаньсэ, сон тосо калмазь, тосояк сонзэ пек вечксызь. Минек организациянтень Татарстанонь Правительствась явсь грант теемс кино Девятаевень ланга.

Мордовия Республикасо теезь правительствань комиссия Советской Союзонь Героенть М.П.Девятаевень юбилеензэ тешкстамга. Эрзянь ды мокшонь раськень регионъютконь общественной вейсэндявксонть ули эсензэ прявт мероприятиятнень ютавтомань аравтлувозо, сон кемекстазь исполкомонь промкссонть, конань топавтомась уш ушодовсь. Прявтось – М.П.Девятаевнень кеврунгонь теемась, те кевкстеманть минь домкасто ванкшнынек-кортынек Саранск ошонь мэрэнть П.Н.Тултаевень марто. Кеврунгонть туртов кочказь пек вадря тарка – Пролетарской куронь аллеясонть, РДК-нть каршо. Те меленть шныть республикань весе эрицятне.

Покш мероприятия ютавтови М.П.Девятаевень чачома ёнкссонзо – Торбеевасо. Республикань весе школатнесэ эйкакштне сёрмадыть сочиненият, косо ёвтасызь эсест мелест-арсемаст Советской Союзонь Героенть ине подвигензэ коряс. Сонензэ алтавить передачат радиосо ды телевидениясо. Ютавттано исполкомонь выездной промкс Казаньсэ. Республикасонок ютавтови кенярксчинь покш мероприятия, тей тердевить инжеть аволь ансяк республикань весе ёнкстнэстэ, истя жо томбальдеяк.

Весе вейсэ ледстясынек ине подвигенть, те ломаненть путовксонзо Изнямонтень. Эряви тешкстамс, Михаил Петрович ёроков ломанель аволь ансяк войнасо, истя жо сэтьме шкастонтькак, сон пек ламо важодсь.

Тедедень мартсто ютавтови эштё вейке покш мероприятия – Эрзя-мокшонь раськень 1-це съездэнть ютавтома чистэ 25 иетнень тешкстамось. Сонензэ анокстамотне уш ушодовсть. Те шканть перть теезь пек ламо аволь ансяк эсенек республикасо, истя жо сонзэ томбалеяк. Нама, улить аволь аламо кевкстемат ды стакачить, конатнень эрявить ванкшномс ды витемс.

Мелят минь вастовкшнынек МР-нь Прявтонть В.Д.Волковонь марто, кортавсть раськень кевкстематне ды стакачитне. Минь кортынек, республикасонок эряви ютавтомс «Шумбрат» Весероссиянь покш форум-фестиваль. Владимир Дмитриевич шнызе те меленть. Кеман, те кенярксчись маласо шкастонть ютавтови. Теде башка, РФ-нь регионтнэсэ ютавтови покш важодема профориентациянть коряс ды истя седе тов.

– Юрий Александрович, кода эрзянь ды мокшонь кельтне тонавтневить университетэнь факультеттнэсэ?

–  Тедеде университетэнь весе факультеттнэсэ совавтозь тонавтнемань од курс – «Лингвистические и культурно-исторические особенности мордовского этноса». Икеле мокшонь ды эрзянь кельтне тонавтневсть пелест факультеттнэсэ. Тедеде анокстынек те курсонть, арсемась ёвтазь филологиянь факультетэнть пельде. Ректорось шнызе те меленть, мартонзо вейсэ кортынек весе кевкстематнень.

Курсонь васенце пельксэсь – эрзянь, мокшонь кельтнень лингвистикась, сонзэ ветить минек мокшонь, эрзянь кельтнень кафедрань преподавательтне. Минь кевкстнинек финнэнь-угрань лия регионтнэнь, косояк истямо практика арась. Монь койсэ, те покш эскелькс тиринь кельтнень тонавтнеманть коряс.

Пек паро, минек факультетсэ тонавтневить ламо кельть: мокшонь, эрзянь, рузонь, венгрань, финнэнь, англань, немецень. Студентэнек ютксо мокшот, эрзят, рузт, улить татарткак. Ней минь тонавттано омбо масторонь студентт: Сириясто, Туркмениясто, Ираксто ды лия масторсто. Од ломантне пек покш мельсэ тонавтнить эрзянь ды мокшонь кельтнень.

Ёвтаса мельспаронок, тонавтнемань од иенть ушодынек факультетэнь од зданиясонть. Тесэ теезь неень шкань эрьва кодат студият, путозь вадря оборудования, анокстазь аудиторият. Те лезды анокстамс седеяк вадря специалистт.

Т.Аксенова

 

Новости

Полицейскойтненень – автомобильть

Саранскоень Советской площадьсэ ютась Мордовиянь МВД-нь сотрудникень развод. Торжественной церемониясонть республикань полицейскойтненень максозь 49 од автомашинат. Участникекс ульнесть В.Д.Волков ды внутренней тевень министрась Юрий Арсентьев.

Подробнее ...
 
Ардомань картат

Н.П.Огарёвонь лемсэ МГУ-нь студенттнэнь ды аспиранттнэнь туртов полавтовсь ардомань картань получамонь лувось. 2017 иень сентябрянь 1-це чистэнть саезь сынь максовить справкань коряс, конась кемексты ардомань картань получамонь праванть.

Подробнее ...
 
Ветеранонь хоккей

Ютазь оймсема читнестэ Саранскойсэ ютась хоккейсэ налксема. Вастовкшность «Ветераны Мордовии» ды «Легенды хоккея» командатне.

Налксемадонть икеле участниктненень поздоровт ёвтась Владимир Волков.

Подробнее ...
 
Университетсэ кармить тонавтнеме 4600 студентт

Н.П.Огарёв лемсэ МГУ-нь примамонь комиссиясь панжинзе кенкшензэ абитуриенттнэнь туртов июненть прядовомсто. Неть читнестэ университетэнь ректорось С.М.Вдовин ёвтынзе примамонь комиссиянь икелепелень итогтнень. Васняяк Сергей Михайлович ёвтась сюкпрянь валт республикань СМИ-тненень университетэнть тевдееманзо весеме ёндо невтеманть кисэ.

Подробнее ...
 
Ветеранонь промкс

Августонь 15-це чистэ Саранскойсэ ютась Мордовиянь ветеранонь организациятнень активень промкс. Пурнавкшность малав 400 ломанть. Промксонь участникекс ульнесь Мордовиянь Прявтонь тевтнень нурька шкас топавтыцясь В.Д.Волков.

Подробнее ...