Рубрикатор

Экономика Тееви шукшонть марто важодемань комплексной система
Тееви шукшонть марто важодемань комплексной система

Коммуналканть кисэ питнетнень касоманть мельга Мордовиянь эрицятне а кенерить. Ансяк тонадовсь питнетнес, конат панжиковсто кемекставсть «обращение с коммунальными отходами» ёнкссонть, тень кисэ пандоматне тагояк кенерсть полавтовомо. Мезе марто сюлмавозь те услуганть кисэ питнетнень касомась ды кода куроксто регионсонть панжови коммунальной шукшонть марто важодемань комплексной системась, ловнодо минек кортамонть МР-нь Правительствань Председателень полавтыцянть – Жилищно-коммунальной хозяйствань, энергетикань ды эрицятнень гражданской ванстомань министранть Игорь Анатольевич Чадов марто.

 

– Игорь Анатольевич, зярыя ковонь перть Мордовиянь эрицятнень талновтсть пандоматне, конат редявиксстэ покшолгадсть шукшонь урядамонть кисэ. Кода течи пурнави ТКО-нть кисэ тарифесь?

– Мордовиясо коммунальной шукшонь пурнамонь коряс региононь операторось целанек эсь важодеманзо ушодызе 2018 иень панжиковонь 1-це чистэ. Истя, те чистэнть саезь важодияк те услуганть кисэ пандома лувось. Васняяк пандоматне саевсть ламоквартирас кудотнесэ эрямо тарканть покшолмастонть, частной секторсонть – кудосонть эрицятнень ламочинть коряс. Те лувонть полавтомась теевсь Мордовия Республикань Прокуратуранть мереманзо коряс. Надзорной органонть мельвановтозо сюлмавозь сень марто, а виде теемс пандомань а вейке лув ламоквартирас кудотнесэ ды башка кудосо эрицятнень туртов. Омбоце ёнксось, кона кармавтсь одс ванкшномс те кевкстеманть, – эрицятнень пшкадемаст. Ломантне макснесть виде кевкстемат ды эзть чарькоде аравтозь тарифтнень, эдь шукштнень ламочинть теи ломанесь, аволь квартиранть покшолмазо. Умарьковсто те лувось полавтозель. Ней коммунальной шукшонть кисэ пандоматне теевить кудосонть эрицятнень ламочинть эйстэ. Ансяк тесэ региононь операторось вастовсь стакачи марто, зярдо пурнась информациянть, зяро ломанть эрить те эли тона эрямо таркасонть.
Тарифесь, кона саеви Мордовиясо коммунальной шукшонть ускоманзо кисэ, можна меремс, сехте вишкине лия регионтнэнь коряс, косо истя жо роботы региононь операторось. Истя, Мордовиясо ламоквартирас кудотнесэ эрицятне те услуганть кисэ пандыть 84 целковойть 90 трёшникть. Башка кудотнесэ республиканть келес – 92 целковойть, Саранскойсэ – 104 целковойть 50 трёшникть.
Невтемга: Астраханень областьсэ коммунальной шукшонь ускоманть кисэ пандыть 99 целковойть, Курской областьсэ – 131 целковой, Липецкой областьсэ – 119 целковойть, Ставрополень ёнкссо – 118 целковойть.
Весе ярмактне, конатнень Мордовиянь эрицятне пандыть шукшонь ускоманть кисэ, нолдавить истя жо коммунальной шукшонть марто важодемань комплексной системанть тееманзо лангс. Маласо кавто-колмо иетнестэ тееви од полигон, шукшонть туртов станцият республикань районтнэсэ, арсеви теемс шукшонь явомань ды переработкань од инфраструктура. Полигонось карми вейкине весе республиканть туртов ды тееви неень шкань вешематнень ды технологиятнень коряс.
– Кортыть, велетнесэ коммунальной шукшонть марто важодиця региононь операторонть вастызь аволь вейкетьстэ. Договортнэ кемекставить аволь истя эрязасто, кода бу эряволь коммунальщиктненень. Велетнесэ важодемадонть лезэсь аволь покш. А лиси истя, операторось туи велетнестэ, эли велень эрицятнень шукшонть кисэ сави пандомс ошонсетненень?
– Ёвтаса, региононь операторонть апокш мелявксонзо алкукс улить. Сынь сюлмавозь лия лувс ютамо шканть марто. Истя а эрси, штобу истямо нурька шкань перть од системась ушодоволь важодеме стакачивтеме ды мелявкстомо. Мелявкстнэ сюлмавозь велень эрицятнень чарькодеманть марто. Ды те а дивань тев, эдь ламот велетнесэ региононь операторонть самодо икеле коммунальной шукшонть кияк эзь пурна ды эзь усксе. Секскак, аволь весе эрицятне чарькодить те мелявксонть ды а капшить кемекстамс договорт. Сынь икеле ладсо анокт шукшонть ускомс маласо бункертнэс, конатне аштить покш велетнес совамсто. Истя жо весе содатано, велетнесэ ламот тонадсть шукшонть валямс компостной яматнес ды теить тень нейгак. Лиятне жо ёртыть шукшонть маласо латкотнес эли пултыть сонзэ, мезесь ловови законодательствань коламокс. Тень коряс рудазыить ды колавить модась, ведесь, коштось, мезенть коряс лавшомгады ломаненть шумбрачизэ. Нама, минек улить ломанть, конат свал ютавтыть субботникть истят шукшов таркатнень ванськавтомга. Ансяк сынст тевест а реши те мелявксонть. Ды а видеяк те, веенст шукш ёртнить, лиятне жо сынст мельга урядыть.
Арсян, течи шукшонть урядамонзо кисэ пандоматнень пурнамось моли стакасто. Велетнесэ эряви башка мель явомс информациянь-толковамонь роботанть ютавтомантень. Сынст пурнамс администрациятнень прявттнэнень активисттнэнь лезксэст вельде, конат улить эрьва велесэнть. Мордовиянь Правительствась ды минек министерствась истя жо теить весементь – анокставить эрявикс памяткат информациянь-толковамонь ютавтомга, конатнесэ ёвтневи ТКО-нть марто важодиця региононь операторонть эрявиксчидензэ. Кеман, вейсэ минь полавтсынек ломантнень мелест вадря ёнов коммунальной шукшонть марто важодемань неень шкань комплексной системанть тееманзо коряс.
– Игорь Анатольевич, зярдо панжови ванськавтомань (очистноень) од линиясь ды решави кевкстемась апаро чиненть марто, кона сеедьстэ качады ошсонть?
– Ванськавтома сооружениятнень од линиянть тееманзо коряс проектэсь, кона топавтови Россиянь Федерациянь ЖКХ-нь сферань модернизациянь программанть юрсо, прядовома лангсо. Линиянть важодемань виезэ – 65 тыщат кубической метрат сутказонзо. Невтемга: течинь сооружениятнень виесь – 160 кубической метрат сутказонзо. Неть линиятнень вейсэнь важодемась максы миненек лоткавтомс колмо ташто линиятнестэ вейкенть ды витнемс сонзэ. Лиякс меремс, ванськавтомань линиятнень одкстомтомань коряс роботась поладови седе тов.
Од сооружениятнесэ тевс нолдавить ванськавтомань неень шкань технологиятне, теке марто ультрафиолетсэ обработкаськак. Целанек линиянть арсеви нолдамс ацамковонть ушодовомсто. Объектэнть питнезэ малав 1,5 миллиардт целковойть. Апаро чинесь сюлмавозь таштомозь сооружениятнень технологиянть марто. Сонзэ юрсо ваннови илэнь кадовкстнэнь пурнамось, конатнень коськемадо мейле тукшныяк апаро чинесь. «Саранскгорводоканал» организациясь ванськавты сооружениятнень эрявикс реагентсэ, конат ванськавтыть коштонть. Те тевесь а нолды апаро чиненть, конань лангс пеняцить ошонь эрицятне.
– Эсь кортамотнесэ Мордовия Республикань Прявтось В.Д.Волков аволь весть тешкстась седе куроксто решамс кевкстеманть ресурсонь максыця организациятнень марто пандомань системанть теемга. Кода ветяви роботась МКД-нь собственниктнень ресурсниктнень марто важодемадо договортнэнь кемекстамга?
– Ресурсонь максыця организациятнень марто важодемадо договортнэс ютамодо ёнксось РФ-нь жилищной законодательствас совавтовсь те иенть ушодовомсто. Ютамось топавтови кавто ёнксонь коряс. Васняяк, ламоквартирас кудонь эрицятнень мелест коряс. Тень туртов пурнави собственниктнень промксось ды примави эрявикс решениясь. Омбоцекс, ресурсонь максыця организациясь тень тейсы эрицятнень мелест апак кевкстеяк, бути управляющей компаниянть долкозо лиссь кавто ды седе ламо расчётной периодт.
Течи республиканть келес коммунальной ресурст максыть 58 организацият. Ней сынст юткс совась эштё коммунальной шукшонть марто важодиця региононь операторось. 55 организациятне уш ней кемекстасть эрицятнень марто важодемань договорт. Лиятнень марто роботась ветяви. МР-нь Правительствась кирди се ёнксонть, штобу ресурсонь максыця весе организациятне важодевельть истямо договоронь коряс, штобу весе пандоматне улевельть неявикст. Те лепшти управляющей компаниятнень манчемаст ды кепеди ответственностенть эсест ресурсниктнень.
– Игорь Анатольевич, МР-нь Прявтось 2018 иень республикань Государственной Собраниянтень Кучомасонть ёвтась седе, што «ломантне иляст пиштевте управляющей компаниятнень банкротствадо, ЖКУ-нть кисэ жо весе пандоматне ютавтовольть тевс». Теке марто «Юго-Западная» ГУК-сь, кона важодсь 300 ламо ламоквартирас кудо марто, ёвтавсь банкротокс, счётонзо лангс путозь арест. Эрицятнень ярмакост, конат шкастонзо пандызь коммуналканть кисэ, поводевсть коштс, ды ней квартиратнень азортнэнень кандовсть счётт, косо кемекстави долк икеле шканть кисэ. Кода улемс те тевсэнть?
– Тевесь, зярдо ломантненень ладявить счётт уш пандозь услагатнень кисэ, а виде ды сонзэ эряви ванномс. Управляющей компаниянть полавтомга, бути икеленсесь туи, а сонзэ таркас сы лия, икелень компаниянтень велявтомат эрицятнень лангсто пурназь, ансяк тевс апак нолда ярмактнень. Кортамось моли «Текущий ремонт», «Содержание жилого фонда» ды лия статьятнень коряс, тезэнь путовиця ярмактнень велявтомат од управляющей компаниянть эли улиця ТСЖ-нть счётс. Весе те ваннови гражданской законодательствасонть. Истя жо тень коряс ули судебной практика, конась корты, бути икелень управляющей компаниясь отказы велявтомс тевс апак нолда ярмактнень од управляющей компаниянть эли ТСЖ-нть счётс, пшкадема судс. Тень туртов собственниктне вейсэнь промкссо примить эрявикс решеният: сезить договоронть икелень УК-ть марто, вешить те компаниянть пельде апак ютавто ярмактнень, кочкить од УК-т ды мерить сонензэ вешемс эсь ярмактнень икеленсенть кедьстэ.
Те кевкстеманть коряс мон меревлинь бу пшкадемс МР-нь Жилищно-коммунальной хозяйствань, энергетикань ды эрицятнень гражданской ванстомань министерстванть юрсо Жилищной инспекциянь управленияв 8 (834-2) 39-16-63 телефононь номерганть. Специалисттнэ толковасызь кевкстеманть ды лездыть лисезь тевсэнть.

Ю.Еремина


20.11.2018

 

Новости

«Единая Россия» возьмет на контроль реализацию закона о паллиативной помощи

Партия «Единая Россия» поддержит парламентский мониторинг за реализацией закона о паллиативной помощи. Об этом заявил член общественного совета партпроекта «Единой России» «Здоровое будущее», член комитета Государственной Думы по охране здоровья Юрий Кобзев. 

Подробнее ...
 
150 человек пройдут обучение в рамках модуля «Политический лидер» Высшей партийной школы «Единой России»

Первые занятия стартуют 25 февраля

Экспертной группой первого модуля Высшей партийной школы «Единой России» «Политический лидер» по итогам всех испытаний из более чем 6,6 тысяч участников были отобраны 150 слушателей. Из них 50 приступят к учебе уже с 25 февраля, еще 100 пройдут обучение в Высшей партийной школе в следующих потоках в марте-апреле. Конкурс на участие в проекте составил 44 человека на место.

Подробнее ...
 
Республикадонть – социальной сетьсэ

Печатень кудонь Пресс-центрасо аволь умок ютавтовсь мероприятия, конанть лувсо невтевсь социальной сеттнесэ Мордовия Республикань официальной аккаунтось. Пилотной нолдамось ульнесь уш даволковонь 1-це чистэ, секскак васень подписчиктне уш ванызь контентэнть вадрячинзэ.

Подробнее ...
 
Ловонть ускома шкастонзо

Неть читнестэ Саранскоень Администрациясо ютавтозь промкссонть башка мель явовсь ошсонть эйсюротнень, эенть ды ловонть урядамонь кевкстемантень. Ленинской райононь прявтось Александр Юткин ёвтнесь, управляющей компаниятне тагояк рамасть сал китнень ды ютамо таркатнень почодомс. «Эйсюротнень урядамонь коряс роботатне ветявить эрьва чистэ. Тевенть топавтыть верьга якицят ды специализированой техника», – пачтясь Александр Юткин.

Подробнее ...
 
Автобусонь од маршрут

Ошонь прявтось сонсь ловны эрицятнень сёрмаст, конат кучовить сонзэ лемс. Мэрэнть кедьсэ промкссонть Пётр Тултаев пшкадсь Транспортонь управлениянь прявтонь полавтыцянтень Елена Потапованень: «Сась пеняцямо, конасонть тешкстави, автобуссо эли троллейбуссо ардоманть кис карточкасо пандомадонть мейле ярмактне саевить аволь сеске эли аволь зняро эряви. Ломантне арсить те «Горэлектротранс» муниципальной предприятиянть вановтост ало. Ёвтадо: кие чумось ды ков пшкадема?»

Подробнее ...