Рубрикатор

Экономика ЗЯРОДО КАССТЬ ТАРИФТНЕ
ЗЯРОДО КАССТЬ ТАРИФТНЕ

 

Зяродо Мордовиясо кассть тарифтне коммунальной услугатнень лангс?

Коммунальной услугатнень лангс – веденть, электричестванть, лембенть ды газонть  – вейсэнь тарифесь Мордовиясо июльстэ кастовсь 4,7%. Россияванть жо те невтевксэсь аламодо седе алкине – 4%. Те шкастонть республикань эрицятнень жилищно-коммунальной услугатнень кис долгтне пачкодсть 1 миллиард целковойс.  Но меельце иестэнть аламонь-аламонь сынь кармасть валгомо.

Ледстясынек, коммунальной тарифтне эрьва иестэ  кастовить аволь  иенть ушодовомсто, январьстэ,  а июлень 1-це чистэ. Истямо лувось ушодозель 2013 иестэнть саезь. Те теезель сень туртов, штобу индексациясь аволинзе тандавто эрицятнень. Эдь кизна квитанциятнесэ арась сехте питней строчкась – «уштомась». Уштома сезононть самс ломантне тонадыть веденть, газонть ды электроэнергиянть кис питнетненень, ды зярдо совавтсызь  уштоманть кис питненть, сон а маряви уш истямо покшокс. Тень лангс апак вано, ламотненень те арифметикась а маряви седе шождакс. Росстатонть пачтямонзо коряс, 2000 иенть ушодовомасто саезь ЖКХ-нь услугатнень кис пандомась Мордовиясо кассь малав 1,8-ксть: 2014 иентень сон кассь 8,9%. Эряви тешкстамс, июлень кастомась токинзе ансяк коммунальной ресурстнэнь. Жилищной услугатнень лангс питнетнень мельга государствась а ваны, сынст аравтыть эрямо кудонь азортнэнь согласованияст коряс управляющей компаниятне. Кода правила, сыньгак эрьва иестэ индексировавить, ансяк январьстэ…

Электроэнергиясь. Те коммунальной ресурсонть лангс июльстэ питнесь кассь 4,2%. Ней  вейке киловаттонть кис ошонь эрицятне кармить пандомо аволь 3,12 целковойть, а – 3,25 целковойть. Сеть эрицятненень, конатнень кудотнесэ аравтозь электроплитат, ды велень эрицятненень коень коряс тееви скидка. Сыненст электричествась карми максовомо 2,33 целковойде  (икеле – 2,18 целковойде, касомась – 6,9%). Кинь ули мелезэ ванстозь ютавтомс, те ресурсонь пачтицятне мерить ютамс расчётонь кавто фазань системас: чинь ды седе дёшова вень тарифентень.

Кельме ведесь. Мордовиянь районтнэсэ сон питнии аволь вейкетьстэ. Невтемакс, Саранскойсэ вейке кубометранть кис 21,12 целковойтнестэ сон «кирнявтсь» 22,57 целковойс. Питнесь кастовсь 6,9%. Седе неявиксстэ – 40% – кельме веденть кис питнесь кастовсь Кадошкинань районсо: вейке кубометранть кис 23,04 целковойстэ кассь 32,28 целковойс. МР-нь Энергетикань ды тарифень политикань министерствасо тень толковить водопроводонь сетенть шкань апак таргсе витнеманть кувалма. 32% касы веденть лангс питнесь Орданьбуень райононь Тургенева посёлкань эрицятнень туртов: 23,3 целковойстэ (кубометранть кис) 30,9. Неявиксстэ те ресурсось питнии Атемарень, Скрябинань ды Протасовань велетнень эрицятнень туртов. Кубометранть кис 24,29 целковойтнень таркас кармить пандомо 31,63 целковойть. Касомась – 30%.

Пси ведесь. Саранскойсэ вейке кубометранть кис ней эрицятне кармить пандомо 124,75 целковойть. Ульнесь 116,01. Касомась – 7,5%. Питнень покшолманть коряс те ресурсось ашти омбоце таркасо, васенце – уштомась. Меельце вете иетнень перть Мордовиясо тарифесь кассь кубометранть кис 35 целковойс. Ялатеке Саранскойсэ  ваннасо пси ведьсэ экшелямось сти седе дешовасто Ковылкинансенть коряс. Тосо пси веденть лангс питнесь кассь 9%: 126,91 целковойстэ – 139,12. Пси веденть лангс сехте покш питнесь кадновкшны Торбеевань районсо. Тосо кубометранть кис ней кармить максомо 156,62 целковойть (кассь 9,06 целковойс).

Ведень ливтемась. Саранскоень эрицятнень туртов сонзэ лангс тарифесь кассь 7,9%: кубометранть кис 10,31 целковойстэ – 11,12. Малав  1,5-ксть те услугась питниясь Лямбирень райононь секе посёлкатнесэ, кода Атемарьсэ, Скрябинасо ды Протасовасо: 7,46 целковойстэ – 11,15 целковойс. А полавтови тарифесь Кадошкинань районсо ды Орданьбуень райононь Тургенева велесэ. Ведень ливтемась сехте питнеекс карми Ташто Шайговань районсо – кубометранть кис малав 50 целковойть. Истят жо питнеть неить эсь квитанциясост Зубова-Полянань сеть эрицятне, конатненень канализациянь коряс услугатнень максы «Зубово-Поляна – водоканал» ООО-сь. Ведень ливтеманть лангс сехте алкине тарифесь Покш Игнатовань районсо – кубометранть кис весемезэ 2,93 целковойть.

Газось. Мордовиясо сон питниясь 2%. Газонь плитатнень туртов кубометранть кис питнесь карми 6,84 целковойть (касомась – 13 трёшникть). Сетне, кинь улить счётчикест, кармить пандомо 5,04 целковойть (касомась – 10 трёшникть). Природной газонть лангс, конась нолдави тевс кудонь уштомсто, питнесь карми 4,44 целковойть (касомась – 9 трёшникть).

Уштомась. Сон сехте питней. Мелень уштомань сезонстонть саезь Саранскоень эрицятне ней пандыть счётчикень коряс, конатне аравтозь малав весе кудотнева. Ды январьстэ, зярдо якшамотнень кувалма батареятне уштовсть седе псистэ, ломантнень ацирьгадомантень пе арасель. Квитанциятнесэ уштоманть кис строчкась «стакалгадокшнось» сеске 1-2 тёжат целковойс, кой-кинь седеяк ламос. Сестэ ошонь ды республикань прявттнэ толковасть Саранскоень эрицятненень, келя, касомась нурька шкань ды  валгстови якшамонть туеманзо марто. Ней ошонь эрицятне озныть, штобу сыця телесь улевель аволь якшамо. Теке шкастонть лембенть лангс тарифесь Саранскойсэ 1 гигакалориянть кис кассь 1576,75 целковойс, ульнесь –  1501,67 целковойть. Касомась – 5%. Неявиксстэ – 8,4% – уштомась питниясь Отяжелень районсо: вейке гигакалориянть кис 2366,83 целковойстэ – 2566,52 целковойс. Сехте питнеекс те услугась ули Атюрьевань районсо – 2578,35 целковойть (касомась – 7,2%). А кадови Краснослободской районоськак, косо уштоманть кис тарифесь кассь малав 7%, вейке гигакалориянть кис – 2503,87 целковойть.

Теке жо услуганть лангс тарифтнесэ авейкетьксчинть МР-нь Энергетикань ды тарифень политикань министерствасо толковить, келя, те тееви зярыя тувталонь коряс. Васняяк, расценкатне свал алкинеть сеть ресурсоснабжающей организациятнень, конатне максыть седе ламо услугат. Омбоцекс, питнесь аравтови населённой пунктонть аштема тарканть лангс ванозь, мезденть ашти сеттнень протяженностесь. Истя жо питнетне аштить аравтозь оборудованиянть энергоёмкостензэ лангс ванозь,  саеви мельс коммунальной сеттнень ташточиськак.

Квартплатась. МР-нь ЖКХ-нь ды эрицятнень гражданской защитань министерстванть пачтямонзо коряс, жилищно-коммунальной услугатнень кис пандомась Саранскойсэ те иень омбоце кото ковтнестэ кассь 6,7%. Вейке условной ломаненть лангс, конась эри 33 кавонзазь метрат вейке комнатас квартирасо, квитанциясонть вейсэнь суммась среднейстэ кассь 140,5 целковойс, ней карми весемезэ – 2249 целковойть. 64 кавонзазь метрань покшолмасо колмо комнатас квартирасонть эриця условной колмо ломантненень квартплатась кассь 271 целковойс, те карми 4391 целковой. Кавто комнатас квартирасонть (42 кавонзазь метрат) кавто ломантне ЖКУ-нть кис ней  пандыть 200 целковойде седе ламо – 3241,5 целковойть.

«Коммунальной услугатнень лангс питнень покшолмась ашти васняяк ютавтовиця услугатнень объёмдонть», – тешкстасть МР-нь ЖКХ-нь министерствасо.

 

Долгтнеде. Пачтямотнень коряс, июлень 1-це чинтень Мордовиянь кой-кона эрицятнень жилищно-коммунальной услугатнень кис вейсэнь долгост – 956 миллионт целковойть. Ютксост седе ламотне – Саранскоень эрицятне. Сынь квартплатанть коряс таштасть долгт 705 миллионт целковойть. Районтнэстэ  долгонь коряс  икеле молить Чаунзань, Рузаевкань, Ковылкинань ды Лямбирень районтнэ. Ялатеке, кода пачтить МР-нь ЖКХ-нь министерствасо, эрицятне аламонь-аламонь кармасть киртямо долгонь невтевкстнэнь. Иень перть вейсэнь задолженностесь вишкалгадсь 4,2 миллионс. Жилищно-коммунальной услугатнень кис Мордовиянь эрицятнень пандовтомга тень кис отвечиця ведомстватне должниктненень кучнить уведомленият, лоткавтнить электроэнергиянь максоманть, макснить искть судс… «Жилищно-коммунальной услугатнень кис шкастонзо пандомась лезды ЖКХ-нь предприятиятненень шкастонзо пандомс электроэнергиянть, газонть, веденть ды лембенть кис, истя жо кода эряви анокстамс уштомань од сезононтень», –  тешкстыть профильной министерствань чиновниктне.

 

Новости

Кортавсь шукшонь пурнамонь реформадонть ды «Экология» национальной проектэнть тевс нолдамодо

Неть читнестэ Саранскойсэ ютавтовсь «Единой Россиянь» региональной дискуссионной площадкань васенце промксось. Сонзэ лувсо кортавсь коммунальной шукшонь пурнамонь реформадонть ды республикасонть «Экология» национальной проектэнть тевс нолдамодо. Промксонть важодемасо ульнесть «Ремондис Саранск» региональной операторонь прявттнэ, республикань Жилищно-коммунальной хозяйствань, энергетикань ды эрицятнень гражданской ванстомань, Вирень ды охотямонь хозяйствань, Эрицятнень социальной ванстомань, трудонь ды занятостень министерствань важодицятне, тарифень коряс республиканской службань специалисттнэ, ОНФ-нь ды общественной организациятнень члентнэ.

Подробнее ...
 
Кобзев: Получение паллиативной помощи по месту пребывания сделает ее доступной для всех нуждающихся
Возможность  получения  паллиативной  помощи  по  месту  пребывания   существенно   упростит  жизнь
нуждающихся в ней людей и их родственников по всей стране. Об этом заявил член общественного
совета партпроекта «Единой России» «Здоровое будущее», член комитета Госдумы по охране здоровья
Юрий Кобзев, комментируя подписанное премьер-министром Дмитрием Медведевым постановление о
внесении   изменений   в   программу   государственных   гарантий   бесплатного   оказания   медицинской
помощи.
Подробнее ...
 
Региональная дискуссионная площадка «Единой России» на «круглом столе» обсудит реформу обращения с ТКО
17 апреля в Региональном исполнительном комитете Партии состоится первое
заседаниеРегиональной дискуссионной площадки ВПП «Единая Россия».
Ее Координатором стал заместитель Председателя Государственного Собрания
РМИван Михайлович Москаев.
"Круглый стол" Региональной дискуссионной площадки Партии будет посвящен
теме: "Ход реформы обращения с твердыми коммунальными отходами и реализация
национального проекта "Экология" в Республике Мордовия".
К обсуждению партийцы пригласили регионального оператора "Ремондис Саранск",
министерство ЖКХ, энергетики и гражданской защиты, министерство лесного и
охотничьего хозяйства, министерство социальной защиты, труда и занятости
населения, Федеральную службу по надзору в сфере природопользования,
Республиканскую службу по тарифам, ОНФ и другие заинтересованные ведомства,
общественные организации. Начало мероприятия в 15.00.
 
Уверенную победу на дополнительных выборах в органы местного самоуправления одержали кандидаты от «Единой России»
По предварительным данным,  на   дополнительных выборах в Совет 
депутатов  Большеигнатовского  сельского поселения победу одержала
кандидат от Партии «ЕДИНАЯ РОССИЯ»  Грошева Валентина 
Ивановна,  директор ГКУ «Социальная защита населения по 
Большеигнатовскому району РМ». За нее проголосовали   92,03%   
человек.
Подробнее ...
 
«Единая Россия» просит Центробанк проверить обоснованность роста цен на ОСАГО
В ходе мониторинга стоимости полисов ОСАГО эксперты партпроекта
«Единой России» «Безопасные дороги» выявили повышение цен на
страхование в большинстве регионов страны. По итогам мониторинга
представители партпроекта обратились в Центробанк с требованием
проверить обоснованность роста цен. Об этом заявил координатор
партпроекта «Безопасные дороги», заместитель председателя комитета
Госдумы по транспорту и строительству Владимир Афонский.
Подробнее ...