Рубрикатор

Экономика Оптоволокнань нолдыця Россиянь васенце заводось – саранскойсэ
Оптоволокнань нолдыця Россиянь васенце заводось – саранскойсэ


Сентябрянь 25-це чистэ Саранскоенть содавтызь Россиянь Правительствань Председателень полавтыцясь Аркадий Дворкович ды РОСНАНО-нь правлениянь председателесь Анатолий Чубайс. Мордовиянь Прявтонть Владимир Волков марто вейсэ инжетне панжизь оптоволокнань нолдамонь коряс Россиясо васенце заводонть, Нанотехнологиянь ды наноматериалонь центранть, истя жо ютавтсть промкс кабелень отраслянть виевгавтоманзо коряс.
«Оптиковолоконные Системы» ЗАО-сь оптикань волокнань производствась, конась теезь РОСНАНО-нть ды «Газпромбанконть» лезксэст вельде, – те Россиянь импортонь полавтомань проект. МР-нь Прявтось Владимир Волков тешкстызе, проектэсь тевс нолдазь Россиянь Президентэнть Владимир Путинэнь лезксэнзэ вельде, кона ушодовомсто саезь кирдсь вановтонзо ало Мордовиясо заводонь нолдамонть.
Ней Россиянь весе кабелень предприятиятне оптикань волокнанть рамить омбо масторсто. Саранскоень заводось вадрясто ютынзе весе тестовой испытаниятнень ды анок миемс кабельщиктненень минек масторсо теезь покш технологиянь продукция. Предприятиянть виезэ иезэнзэ – 2,5-3 млн. вайгельпеть оптикань волокна. Проектэнть питнезэ – 2,7 млрд. целковойть, конатнестэ 1,3 млрд. целковойтнень путынзе РОСНАНО-сь. Заводонть панжоманзо марто теезь 150 важодема таркат.
Саранскоень заводось карми нолдамо телекоммуникациянь ды технической оптикань волокна, истя жо нанотехнологиянь юрсо, связенть, медицинанть, оборонань комплексэнть, нефтань ды газонь добовиця ды ускиця предприятиятнень туртов кабельть.
Теде башка, республикась арси омбоце пусковой комплексэнть строямодо – кармить нолдамо преформат. Мордовиянть аравтлувсо – нолдамс масторонть туртов 50% эрявикс волокнадонть, эштё вейке производстванть нолдамонзо марто те продукциянть вешемазо топавтови педе-пев.
Владимир Волков ёвтась весенень сюкпря, кинь ульнесь таликазо Саранскоень оптикань волокнань нолдамонь заводонть строямосо.
Мордовиясо теевиця инновациянь инфраструктурань покш пельксэсь – те Нанотехнологиянь ды наноматериалонь центрась. Истя жо сентябрянь 25-це чистэ Саранскойсэ панжозь РОСНАНО-нь 12-це наноцентрась. Сонзэ прявт тевезэ – технологиятнень коммерциализациясь, стартаптнень теемась ды сынст лезэв покш технологиянь бизнесэс ютавтомась. Наноцентрань директоронь советэсь кемекстась 49 проектт наноцентрань специализациянь ёнкссонть – силовой электроникасо, светотехникасо, приборостроениясо, наноматериалонь теемасо.
Наноцентрань панжома шкастонть теезель покш лезэвчинь карбид-кремниень инверторонть туртов платань васенце партиясь. Арсеви, истят инвертортнэ кармить тевс нолдавомо чипаенть вельде электроэнергиянь таштамонь виев систематнень теемань коряс проектсэнть. Мордовиянь центранть задачакс карми Россиянь ды омбо масторонь партнёртнэнь марто вейсэ кремниень карбидэнть юрсо инвертортнэнь ды компоненттнэнь нолдамось. Истят батареятнень тееманть лангсо важодить масторлангонь ламот компаниятне, конатнень ютксо Американь «Теслась».
Республикань Прявтось весе пурнавозтнень теинзе содавиксэкс Технопарконь резиденттнэнь ды Наноцентрань прявт разработкатнень марто. Промкссонть, кона ютавтовсь республикань Технопарксонть, толковавсть кабелень промышленностень сферасонть инвестициянь проекттнэнень лездамонь кевкстематне.
РФ-нь Правительствань Председателень полавтыцясь Аркадий Дворкович мерсь:
– Масторсонть оптикань волокнань васенце производстванть Саранскойсэ панжомась – васенце эскелькс телекоммуникациянь отраслянть туртов оптоволокнань конкурентоспособной производствань теемань коряс. Проектэсь теевсь малав 15 иеть, меельце кавто иетнестэ удалась эрязасто прядомс тевтнень производстванть теемань коряс. Икелепеле – омбоце очередесь, прявт тевесь жо – основной компонентэнь – ванькс кварцонь, преформань теемась, конатнень вельде топавтови оптоволокнань нолдамонь весе циклась. Нама, омбо масторонь компоненттнэнь полавтомань коряс улить лия мельтькак. Сюкпря Мордовиянь прявттнэнень волокнань ды кабелень продукциянь кластерэнь теемань кевкстематненень покш мелень явоманть кис.

 

Новости

Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...