Рубрикатор

Экономика Дыринтнэнь семиясь дока эрьва тевсэ
Дыринтнэнь семиясь дока эрьва тевсэ


Мордовия Республикань Прявтось В.Д.Волков МР-нь Госсобраниянтень Кучомасонзо тешкстызе, кодамо покш путовксозо республиканть виевгавтомасо строителень отраслянть. Ютазь иестэ Мордовиянь строительтне тейсть малав ниленьгемень од объектт ды неявиксстэ кастызь невтевксэст. Теньсэ авишкине путовксост Чаунза ёнксонь Комсомольский посёлкасо важодиця предпринимателень Дыринтнэнь семиянть.
Неень шкане, зярдо ламот пеняцить роботань арасьчинть, вишка зарплатанть ды лия тувталтнэнь лангс, Кузьма Васильевич ды Татьяна Сергеевна аволь ансяк эсь семиянтень: Сергей цёраст, Мария тейтерест, Александра урьваст туртов мусть тев, истя жо те ёнксонь лия эрицятнененьгак. Весемезэ башка предпринимателенть кедьсэ важодить колоньгемень ломанть. Ней од ломантнень ютксто ламотнень аволь ансяк вейке, лиясто кавто-колмо высшей ды средне-профессиональной образованияст, специальностень коряс жо а важодить. Эрси истяяк: аштить кудосо, учить, зярдо тенст тетяст-аваст муить тев. А вана Кузьма Васильевич кодамояк вуз, техникум эзь прядо, ансяк эрямонь паро школа ютась семиясо ды армиясо. Ды аволь ансяк сонсь ды семиянзо кеместэ стявтызе пильге лангс, истя жо лезды лиятнененьгак: ломантненень максы тев, панды заработной плата, теи пандовкст эрьва кодат фондтнэс, налогтнень вельде пешти райононь бюджетэнть ды истя седе тов. Неть читнестэ прась уцяска тенек улемс Чаунза ёнксонь Комсомольский посёлкасо ды кортнемс стакачитнеде а пелиця, ламос бажиця ды оймамонь а содыця Дыринтнэнь семиянть марто.

Покш семиясто – покш килангов
Кузьма Васильевич ды Татьяна Сергеевна Дыринтнэ чачсть-кассть вейке таркасо – Дубёнкань буень Кочкур велесэ. Тосо ютась эйкакш пингест, вейсэ тонавтнесть школасо, вейсэ ютавтсть юткошкаст. Семиясткак малав вейкеть – тевень вечкицят, ламо эйкакшонь трицят. Кузьма Васильевичень тетязо, Василий Сергеевич, ульнесь аволь ансяк эсест Кочкур велесэ, весе райононть келес содавикс кедьчелькев ломанекс, сонзэ кедьсэ путовт кудотне те шкас кенярдовтыть сынст азортнэнь. Эштё районсонть сонзэ содасызь алкуксонь кудазорокс, Наталья Осиповна нинзэ марто вейсэ трясть-кастсть кото эйкакшт. Эрьвантень максызь седей лембест, тонавтызь ламонь тееме, алкуксонь ломанькс улеме, ояксчисэ эрямо, вейке-вейкень чарькодеме.
Кузьма Васильевич эсь шкастонзо топавтызе масторонть икеле долгонзо. 1977-1979 иетнестэ служась Москов ало строителень войскатнесэ. Тосто самодо мейле, кавксоньгеменце иетнестэ, сась эрямо Чаунзав. Колмо иень перть важодсь автоколоннасо водителекс.
Самай се шкане вечкевикс ломанезэ, Татьяна, прядызе тонавтнеманзо Свердловск ошсо. Одтнэ сайсть мель урьвакстомс-венчамс ды эрямо таркакс кочкизь Чаунза ёнксонть. Ледстясынек, Татьяна Сергеевна истя жо чачсь-кассь ламо эйкакшонь триця семиясо. Тетязо, Сергей Сергеевич, пингензэ перть ульнесь вирьваныцякс. Сон – МР-нь вирень хозяйствань заслуженной роботник. Авазо, Софья Анисимовна, истя жо пингень перть важодсь вирьсэ, эрьва тевсэ лездась мирденстэнь. Кудоютконь тевтнень савсь топавтомс ниленест эйкакштненень, конат истя жо эрясть эсь ютковаст покш ояксчисэ, седейшкава вейкень-вейкень туртов лездазь.

Изнизь стакачитнень
Вейксэньгеменце иетнестэ, масторсонть тевтнень одкстомтома шкасто, ламо хозяйстватне каладсть, предприятиятнесэ эзть пандо зарплата… Самай се шкане Дыринтнэ сайсть мель ушодомс эсест тев. Вейксэньгеменце иетнестэ сынст ульнесть колмо «КамАЗ» автомобилест, усксесть сталмот минек республикасо ды сонзэ томбалев. Техниканть ламолгавтомадо мейле, панжсть строямонь материалонь, автозапчастень микшнемань лавкат, автомобилень шлямонь ды витнемань тарка.
Кодамо тевс ансяк эзь кундакшно те тевень вечкиця семиясь. Фермерэнь хозяйстваяк панжсть велень хозяйстванть кепедемга, ломантненень тевень максомга.
Чаунзань Комсомольский посёлкасто лисема таркасонть икеле ульнесь покш латко, конась ваякшнось барлак потс ды ульнесь шукшпрянь ёртома таркакс. Се шкас, зярс Дыринтнэ эзть карма сонзэ ванськавтомо ды лезэвстэ тевс нолдамо. Ней те таркась тунь а содави. Мазыйстэ-парсте ладсезь стройматериалтнэ, тесэ улить лавкат, складонь помещения, офис ды истя седе тов. Истя жо сынст базаст ды лавкаст улить Дубёнкань буень тиринь районсо, ков сеедьстэ якси ояксчисэ эриця Дыринтнэнь семиясь.
Седеймарямонь тевть
Дыринтнэ явить покш мель седеймарямонь тевтненень. Кодат мероприятият илязт юта Чаунзань эли Дубёнкань буень ёнкстнэсэ, сынь зярдояк ве ёнов а кадновить. Невтемакс, тедеде лездасть Ине Изнямонь 70 иетнень тешкстамонть анокстамонь ды ютавтомань тевтнесэ. Сеедьстэ максыть лезкс эрьва кодат спортонь пелькстамотнень ютавтомсто, сыре ломантненень, нужасо эрицятненень.
Сюронь, якстерькаень урядамо шкасто истя жо свал анокт максомс лезкс сыненст пшкадицятненень.

Улить тевест
Дыринтнэнь тевест-арсемаст марто содавиксэкс теевемстэ тень ледстявсть кезэрень семиятне-раськетне. А мезть сёпомс, неень шкасто чуросто вастовить малавикс ломанть, косо эйкакштне поладыть тетяст-аваст тевенть. Покштне тонавтыть вишкинетнень, косо тетясь цёранстэнь аволь прявт, паро ялга ды лездыця. Покш мельспаросо тешкстасынек, Дыринтнэнь Сергей цёраст прядызе РФ-нь Президентэнть юрсо теезь РАН ГС-нь Саранскоень филиалонь юридической факультетэнть, Мария тейтерест, теке жо вузонть дипломдонзо башка, ули эштё вейке высшей образованиязо. Сон тонавтнесь Н.П.Огарёв лемсэ МГУ-нь экономикань факультетсэ. Саранскойсэ вузтнэнь прядомадо мейле велявтсь тиринь ёнксов тетянзо-аванзо марто важодеме.
Александра Дырина урьваст истя жо вейсэндявсь семиянь династиянтень.
Кемтяно, Василий Сергеевич нуцькаст (сонзэ лемдизь покштянзо лемсэ), кода лия нуцькатнеяк, касозь-кепетезь, вейсэндяви покштянзо-бабанзо тевентень ды карми улеме эсь раськень алкуксонь тевень поладыцякс.
Астяко вишка ды средней бизнессэ ламо иень перть парсте важодеманть кисэ Дыринтнэ казезь МР-нь Госсобраниянь, МР-нь Торговлянь ды предпринимательствань министерствань, Рузонь Православиянь Церьковань Орданьбуень епархиянь, «Росохотрыболовсоюз» Ассоциациянь Почётонь грамотасо ды питней казнесэ.
В.Юдина

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...