Рубрикатор

Развитие АПК Минек шкань ломантне
Минек шкань ломантне

Сёрмадомс велесэ трудиця ломанде стакаяк, шождаяк. Неть ломантнень биографияст пек молить вейке-омбоце ёнов, сынь а ёвтыть теть эсь эрямостонть кодаткак журналистэнь талновтыця историят. Ялатеке эрьва ломанесь – «те цела мир».., кода кортась содавикс поэтэсь, ды ёвтнемс неть оймсемань а содыця ломантнеде – те минек васенце тевенек.

 

35 иеть вейке таркасо

Николай Дмитриевич Бухаркин. Сон – «Сабанчеевское» ООО-со роботы водителекс уш 35 иеть. Ве чияк эзь тукшно лия таркав ды Сабанцеле тиринь велензэяк каднызе ансяк кавто иес, зярдо саекшнизь армияв. Служамо Николай Дмитриевич понгсь васов – Польшав. Сестэ ламот служакшность Союзонть марто ояксчисэ эриця мастортнэсэ. «Паро, весть омбо мастор неинь, – пейди Бухаркин. – Школадо мейле прядокшныя Орданьбуень ДОСААФ-нть, тонавтнинь шофёрокс. Армиясо машинань ветницянь содамочитне тень лездасть, ды монь сеске озавтымизь машинань руль экшс. Ледстнян неть иетнень мельспаросо, нать, 18 иесэ весе мирэсь-масторось марявсь та-кодамо лиякс ды дивавтыцякс. Одов велявтынь кудов 1983 иестэ ды, кода покш лелянгак-сазоронгак, карминь важодеме тескень «Путь Ильича» колхозсо. Докачим уш ламоль, секскак озавтымизь вадря од машинас, ды ушодовсть важодемань читне. Пек стакаль сестэ урожаенть пурнамсто. Ульнесть аравтлувт, пелькстамот, вейке-вейкень марто, кода кортыть, соревнованият. Минек коллективесь одоль, весе шофёртнэ – «толт». Пароль шкась, кадык чинек-венек савкшныль руль экшсэ аштекшнемс, ялатеке од порась – свал од пора, сиземат а содылинек».

Эсензэ велестэ Николай Дмитриевич муизе вечкевиксэнзэ – Любовь Владимировна Пумбрань, конась, ветеринарокс тонавтнемадо мейле, сась истя жо тиринь ёнксов ды ояксчисэ эрить Николай Дмитриевич марто уш 30 ламо иеть. Сынь трясть-кастсть кавто цёрат, ансяк, кода меельце шкатнестэ эрси, сынст арасель мелест кадовомс Сабанцелес, ды эйкакштне семияст марто эрить Саранскойсэ.

Ялатеке Бухаркинтнэде Сабанцелесэ роботыть пек ламо. Эйстэдест цела династия ды вейсэнь важодемань иетнеде пурнавить сядодо ламо. Николай Дмитриевич, кода кортыть, чачсь-кассь сокицянь-видицянь семиясо. Тетязо ульнесь колхозсо плотникекс, авазо – робочеекс. Трясть-кастсть вете эйкакшт, малав весе сюлмизь эрямост веленть марто ды аволь ансяк сынь – малавиксэсткак. Саемга, Владимир ялаксозо ламо иеть роботась Сабанцелесэ ветеринарокс, Тамара низэ – осеменатор. Вера сазорозо фермасо якась реве мельга, Надя сазоронзо мирдезэ истя жо важоди фермасо. Бухаркинтнэнь династиясь аволь весть тешкстазель райононь велень хозяйствань роботниктненень алтазь мероприятиятнесэ.

Данилов трактористэсь

Анатолий Николаевич Данилов колмоце ие важоди «Сабанчеевское» ООО-сонть механизаторокс-трактористэкс, теде икеле малав комсь иеть роботась машинань ветницякс. Ды аволь ансяк Сабанцелень киланготнева тензэ савкшнось ардтнемс, Отяжелень СПТУ-нть прядомадо мейле, косо сонзэ тонавтызь трактористэкс-машинистэкс, понгонесь Анатолий служамо Германияв. Кавто иеть водителекс ульнесь ракетань войскань частьсэ. Мейле велявтсь тиринь ёнксов ды сисемшка иеть роботась АТП-сэ, усксесь пассажирт Отяжелень райононь велетнева. Ансяк тиринь велесь тердсь эстензэ. «Аволь умок мария «Иляк стувтне тон велеть!» моронть, маряви, монь лангаяк сон, – ёвтни Анатолий Николаевич. – Пек вечкса тиринь ёнксом, секскак велявтынь Сабанцелев ды овсе теде а янксян. Ней важодян «Беларусь» тракторсо. Эсь тевем вечкса, роботан мельспаросо, топавтан весе икелень путозь вешематнень, кода армиясо минек тонавтымизь. А чарькодян, мекс неень од цёратне пелить туемс служамо, арсян, те шкась эрямонть туртов паро школа. Монень тонавтыцятнеяк вадрят понгонекшнесть».

Данилов чинь-чоп тракторонь руль экшсэ. Те ансяк ошонь ломантне кортыть, тельня велесэ тевтнеде аламо. Трактористтнэ важодить иень перть. Ней вана, зярс ловось аламо, паксясто фермав ускси олго ды тикше.  Лов пры – китнень сави ванськавтомс, поводи тракторонтень койме. Паксятнес эряви удобреният ёртнемс – те истя жо трактористэнь тевесь. Кизна урожаенть пурнамсто тракторонтень поводевить граблят, ледемка, тикшень кепедемка.

Роботадо мейле тевтне учить кудосояк. Анатолий Николаевич нинзэ марто вейсэ кирдить букинеть ды тулякат, хозяйствась покш, мелявкстнэде мартонзо ламо. Ансяк андомс тенст зяро эряви анокстамс ды пидемс. «Мелесь кепети, зярдо эсеть трязь тувонь сывельденть ярсат, котлетат тейнят, сывелень прякинеть, – корты Анатолий Николаевич. – Лавкатнестэ паро ярсамопель а муят, минек жо весе эсенек, кода кортыть, «экологически ванькс».

Анатолий Николаевичень паро важодеманзо кисэ улить ламо казнензэ ды Почетонь грамотанзо, кода лия минек статьянь весе геройтнень. Ансяк мон течи эзинь сёрмадо сынст ланга, эдь, чарькодеви, сынь роботыть овсе аволь неть конёвтнень кисэ: сынь вишка пингестэ тонадсть важодеме, а маштыть аштеме тевтеме, тенень тонавтызь тетяст-аваст. Меельце шкастонть, зярдо велетнесэ иеде иес кадовить пек аламо ломанть ды одтнэ бажить оргодемс ошов, чарькодеви, неть ломантнень кедьсэ тиринь ёнксонть сы шказо, ды кие лезды сонзэ ванстомс, бути аволь сынсь.

Велень ават – важодиця кедть

Монень пек вечкевить Евгений Самаркинэнь моростонзо строчкатне: «Велень ломань валскень зорят сти, велень ломань пани шумбра кши. Велень ломань озны Пазнэнь веть, велень ломань – важодиця кедть». Неть валтнэ пек ладить Сабанцеле велень кавто аватненень: Марина Дмитриевна Тикшайкинанень ды Любовь Андреевна Жирнованень. Сынь важодить «Сабанчеевское» ООО-нь МТФ-сэ. Тикшайкина – скалонь потявтыцякс, эли, лиякс меремс, машинасо потявтомань операторокс, Жирнова – ловсонь учётчицакс.

Марина Дмитриевна Тикшайкина чачсь-кассь Пумбра велень (те велесь ней а явови Сабанцеледенть) покш семиясо, тетязо-авазо трясть-кастсть кемень эйкакшт. Школанзо прядомадо мейле Марина васняяк арсесь тонавтнемс агрономокс, ансяк мекев сась велев зярыя ковдо мейле. Тесэ сонзэ учось вечкевиксэзэ. Налксесть свадьба, ды ошто мельтне тусть васов. Истя Марина Дмитриевна понгсь важодеме фермас скалонь потявтыцякс. Мольсь 1985 иесь. Шкань ютазь Марина Дмитриевна чачтсь кавто цёрат. Роботась, семиясь ды кудонь мелявкстнэ кармасть сонзэ эрямонь смустекс. Кодаткак кувака декретэнь отпускт сон эзь сайне, эйкакштнень велесэ сеедьстэ лездыть трямс-кастомс сырькайтне, ды аватне, оймсемань апак сода, таго лисильть роботамо. Кода ледстни Марина Дмитриевна, 80-90 иетнестэ, нама, важодемс фермасо пек стакаль, весементь савкшнось теемс кедьвийсэ. Ней тевесь лия, важодемстэ лездыть автоматтнэ. Скалтнэ потявтовить «ёлочка» системанть вельде. Покш сюкпря Марина Дмитриевна ёвты велень хозяйствань прявтонтень Д.Н.Игушкиннэнь, конась фермасо роботыцятнень усксеманть туртов нолдась велеванть а покшке автобус, лиякс меремс, «буханка-УАЗ-ик». Сабанцеле велесь кувака, ферматне аштить эйстэдензэ васоло ды икелень шкатнестэ роботамо савкшнось молемс часошка. Ней те мелявксось изнязь, транспортось якси тешкстазь шканть коряс.

Марина Дмитриевна Тикшайкина марто важодить эште вейксэ ломанть. Сисемтне роботыть од МТФ-нь комплекссэнть, колмотне – вазыямонь кардотнесэ. Сынь яла полавтнить вейкест-вейкест. Вейке ие важодить ансяк чачозь вазтнэнь марто, мейле кавто иеть потявтыть скалт фермасо. Истя роботаськак а налкстави, яла таго-мезе од эрямосонть.

Тешкстама, Марина Дмитриевнань патянзояк-сазоронзояк, Елизавета ды Валентина, ламо иеть важодсть скалонь потявтыцякс ды вазонь трицякс. Сынь ней уш тусть пенсияв. Трудиця семиянь династиянть уш 32 иеть полады Марина Дмитриевна ды сонзэ цёразо Роман, конась тонавтнесь зоотехникекс ды ней важоди вейке содавикс велень хозяйствань предприятиясо.

Любовь Андреевна Жирноваяк Сабанцеле велень школанть прядомадо мейле тонавтнесь Н.П.Огарёв лемсэ университетсэ зоотехникекс, ды 1989 иестэ сонзэ кучизь важодеме Отяжелень райононь Сосуновка велев «Наука Ленина» колхозов. 13 иень ютазь Любовь Андреевна велявтсь тиринь велев ды кармась роботамо фермасо ловсонь учётчицакс. Жирнова лови, зяро ловсо потявтозель весе МТФ-сэнть, ды ильти эйсэнзэ Отяжелев, ловсонь заводов. Кода корты Любовь Андреевна, тельня скалтнэ ловсодонть максыть седе ламо. Тевесь сеньсэ, сынь весе вазыить, ды ловсось тень кувалма прибави кавксть седе ламоксть. Вана ней чизэнзэ Жирнова ильти кото тоннадо ламо ловсо. Ансяк теньсэ Любовь Андреевнань тевензэ а прядовить, сон эште лови-арси, зяро ды мезде эряви андомс-симдемс скалтнэнь. Тельня КРС-нь рационось истя жо полавтови. Скалтнэнень максови силос, сенаж, комбикором, конатне анокставить загодь. Кизна жо скалонь «менюнтень» совавтовить пиже тикшеть, конатне ледевить велень хозяйствань паксятнестэ ды сеске усковить скалтнэнь икелев.

Любовь Андреевнань пшти вановтонзо ало 40 ломанть ды скалтнэнь шкастонзо андомась – сынст вейсэнь задачась. Теде башка, Любовь Андреевна кенери кудонь тевтненьгак теемс, тейтерензэ-цёранзо туртов цюлкат-мезть кодамс, пиресэяк котьмамс, кардазсояк три-касты ламо ракшат. Эно кода, велень аватне эдь оймсемань асодыцят, сынь весе – важодиця кедть.

М.Девятова

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...