Рубрикатор

Развитие АПК Иесь удалась
Иесь удалась

Вана удалов кадовсь 2017 иесь. Кодамо сон ульнесь минек республикань агропромышленной комплексэнть туртов? МР-нь Прявтось В.Д.Волков промкстнэстэ вейкесэнть, кона алтазель велень хозяйствань кевкстематненень, видькстась, 2017 иесь республикань велень хозяйствань предприятиясо важодицятненень удалась. Республикань аграрийтне ламолгавтызь велень хозяйствань продукциянь нолдамонть. Истя, тедеде сюро саезь 1 миллион 450 тёжат тоннат. Мордовиянть историясо те весемеде вадря невтевкс! Эрьва гектарсто саезь 34,4 центнерт сюро.

2017 иестэ эрьва гектарсто саезь 356 центнерт ламбамо якстерькай. Весемезэ – 750 тёжат тоннат, мезесь, ризксэнтень, мелень коряс седе аламо. Те культурантень покш мель явить Ромодановань, Ицялонь, Отяжелень, Орданьбуень ды лия райононь трудий ломантне.

Эряви тешкстамс, Мордовиянь паксятнесэ уш азоркс кармасть соясь, рапсось. Вана соянь зёрнатнеде, конат лововить ламо белоконь кирдиця коромокс, саезь 12 тёжат тоннат, 22 тёжат тоннат рапс, 4,2 тёжат тоннат пиже кснав.

АПК-нь важодицятне эрьва скалс анокстасть малав 30 центнерт кормовой единицат.

Ламолгадсть ловсось

ды  сывелесь

Мордовиянь велень хозяйствань предприятиятнесэ ламолгадсь ловсонь потявтомась. Ды ней миезь 352 тёжат тоннат. Эрьва скалсто потявтозель 6 тёжат килограммат. 2016 иень коряс ловсось ламолгадсь 400 килограммас.

Весемеде ламо ловсо потявтозь Ташто Шайговань районсо. Тесэ ютазь иестэ потявтозь колмо тёжадо ламо тоннат. Истя жо а беряньстэ важодсть Рузаевкань, Ицялонь, Краснослободскоень, Отяжелень, Инсаронь районтнэнь скалонь потявтыцятне.

Саразонь сывелень нолдамосонть пек явови «Чамзинская» нармунень фабрикась. Тесэ нолдазь 12 тёжадо ламо тоннат сывель.

Тувонь сывелень нолдамось кассь малав 21 процентс. Тесэ шнама «Мордовский бекон» Агрохолдингенть.

Путозь кеме юр 

Кеме юр путозь 2018 иень урожаенть алов. Видезь 172 тёжат гектарт озимойть. Сатышка анокстазь яровой культурань видьмекст – 65 тёжат тоннат.

Озимойтнень шкастонзо видизь Отяжелень, Орданьбуень, Краснослободскоень, Инсаронь, Чаунзань районтнэнь велень хозяйствань предприятиятне, крестьянонь-фермерэнь хозяйствань азортнэ.

Мезесь лездась велень хозяйствань предприятиясо важодицятненень шкастонзо топавтомс паксясо сёксень тевтнень? Те, мерема, ломантнень виев важодемаст ды вадря техникась. Течи республикань велень хозяйствань ламо предприятиянь паксятнес сокамо, сюронь урядамо лиснить неень шкань омбо масторонь тракторт, комбайнат.

Ансяк 2017 иестэ рамазельть 55 од тракторт, 45 сюронь урядамонь комбайнат ды 10 коромонь урядамонь комбайнат, истя жо 300 прицепной инвентарь. Ютавтозь 900 миллионт целковойть.

Эряви меремс, растениеводстванть седе тов виевгавтомасонть истя жо покш таликаст видьмексэнь од заводтнэнь, конат важодить Кочкуровань райононь Воеводское велесэ ды Ташто Шайговань А.А.Пантюшкинэнь КФХ-со.

Переработкась кецявты!

Тевтне кецявтыть пищевой ды перерабатывающей промышленностьсэ. Сынь продукция мисть малав кодгемень миллиардт целковоень питнес.

2017 иестэ виевстэ важодсть мясоперерабатывающей отраслясо важодицятне. Сынь нолдасть 23,5 миллиардт целковоень питнес продукция. Колбасань нолдамось ламолгадсь 23% ды лиссь 83 тёжат тоннат. Тесэ покш путовксозо, нама, «Талина» предприятиянть.

Парсте пряст марить ловсонь переработчиктне. Продукция нолдазь 10 миллиардт целковоень питнес, мезесь 16,7 процентс седе ламо манынь коряс. Нолдазь 12,3 тёжат тоннат сыра, 3,5 тёжат тоннат скалой ды 129 тёжат тоннат ловсонь продукция.

Тешкстасынек, республикань аграрийтне покш мель явить аволь ансяк продукциянть ламолгавтомантень, истя жо сонзэ вадрячинтеньгак. Истя, 2017 иестэ Московсо ютавтозель «Сырнень сёксь» агропромышленной выставкась, ков якасть Мордовиянь малав 20 предприятият. Тосо сынь сайть 18 сырнень, 2 сиянь ды 1 бронзань медальть.

Аграрийтнень изнявкстнэсэ покш путовксост, нама, фермертнэнь ды семиянь ферматнень, конатнеде минек республикасо байтяк. 2012 иестэ саезь сыненст явозельть 827 миллионт целковойть грант. «Ушодыця фермер» программанть коряс участникекс кармасть 58 КФХ-т, 306 ушодыця фермерт, 5 потребительской кооперативть.

Инвестициятне –

 сы шкантень 

Мордовиянь аграрийтне сы шкаст сюлмить покш инвестициянь проекттнэнь эрямос совавтоманть марто. «Агрофирма «Октябрьская» предприятиясонть совавтозь эрямос инвестициянь кавто проектт. Болотникова велесэнть строязь площадка, косо кармить кастомо бройлерт. Покш Елховка велесэ прядовсь инкубаторонь строямось. Иезэнзэ инкубаторось нолды 45 миллионт ципакат. Истя жо строязь кормоцех. Сон карми нолдамо часозонзо 20 тоннат гранулировазь кором.

Краснослободскоень районсо поладови 6330 левксыиця тувос комплексэнь строямось, Ицялонь районсо прядовсь 1200 потявтовиця скалс ловсонь комплексэнь строямонь васенце этапось. Россиясо, паряк, ловсонь сехте покш комплекс строяви Дубенкань районсо. Те комплекссэнть кармить андомо 6500 потявтовиця скалт.

Покш инвестицият путовить переработкань од предприятиянь теемантень. Торбеевасо поладови «Атяшевский» МПК-со од площадкань келейгавтомась, Ицялсо – сыроваренной заводонть, Кочкуровань райононь «Норов» агрофирмась теи цех, косо кармить нолдамо мороженой. Кадошкинань ды Покш Игнатовань районтнэсэ строявить од теплицат, косо кармить кастомо цецят ды эмежть. «Тепличное» МР-нь ГУП-со строязь од теплица, кона карми «эрямо» эсь энергокомплексэнть вийсэ.

Аграрийтнень продукцияст – республикань томбале

Мордовиянь аграрийтне эсь продукцияст микшнить аволь ансяк минек республикасо, сонзэ томбалеяк. Китайсэ ды Юго-Восточной Азиянь лия мастортнэсэ пек рамить Мордовиясто саразтнэнь, Белоруссиясо – алтнэнь ды цецятнень, Казахстансо ды Узбекистансо – колбасатнень, Армениясо ды Грузиясо – сыратнень. 

Велетнес састь од ломанть 

Меельце кавто-колмо иетнестэ велетнес од программань коряс састь важодеме 300 од ломанть. Велетнес седе ламо од специалистэнь тердемасо лезды «Устойчивое развитие сельских территорий до 2020 года» программась, конань эрямос совавтомантень Мордовиясо ансяк 2017 иестэ ютавтозельть 910 миллионт целковойть. Строязь 18 тёжат кавонзазь метрат эрямо кудот, од кудос совасть 180 семият, строязь 34 вайгельпеть водопровод, ветязь 10 вайгельпеть газ. Рузаевкань райононь Тат.Пишля велесэ панжозь стадион, Ицялонь райононь Лада велесэ – ФАП. А течи-ванды эсь кенкшензэ панжсынзе эрицятненень Кочкур велень Культурань кудось, кона Дубенкань районсо.

…Вана истя течи эрить минек республикань аграрийтне.

 

Пётр Зиновьев

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...