Рубрикатор

Развитие АПК «Од азорось» виензы иестэ иес
«Од азорось» виензы иестэ иес

Аволь ансяк минек республикасо, сонзэ томбалеяк содавикс «Од Азор» крестьянонь-фермерэнь хозяйствась. Сонзэ прявтсо Александр Иванович Кандрашкин. Сынст продукцияст – сюронть, модамаренть, сывеленть – мельспаросо рамсить Чувашиянь, Ульяновскоень, Нижней Новгородонь, Саратовань, Самарань ды, нама, минек республикань эрицятне.

Тешкстасынек, «Од Азор» КФХ-нть мельга кемекстазь зярыя тёжат гектарт мода. Вана сюронть алов явозь 1436 гектарт, модамаренть – 80. Корьмаенть лангсто эрьва иестэ хозяйствасонть важодицятне сайнить ламо сюро, модамарь. Тень кемевтемга, тедеде таргазь 2 тёжат тоннат модамарь, эрьва гектарсто саезь 250 центнерт, пивсэзь 3761 тонна сюро, эрьва гектарсто лиссь 26,2 центнерт.

Крестьянонь-фермерэнь хозяйствасонть важодить 15 ломанть. Сынь весе тескень, Ботужелень. Тевест содасызь парсте. Эйстэст ламотне «Од Азор» КФХ-сонть важодить теемань васенце читнестэ саезь. Хозяйствась пурназель 1992 иестэ. Те  шканть перть «Од Азор» крестьянонь-фермерэнь хозяйствась пек виевгадсь. Течи совиндерят тракторонь парконтень, понгат, мерят, велень хозяйствань покш предприятияс. Тесэ неень шкань тракторт, комбайнат, велень хозяйствань инвентарь. Башка таркасо кирдеви модамаресь.

Валонь кирдиця

Александр Иванович тескень, Ботужелень. Важодемадо зярдояк эзь пеле. Кунды кодамояк тевс, топавтсы. А.И.Кандрашкинэнь мелезэ ульнесь теемс крестьянонь-фермерэнь хозяйства. Те арсеманть ёвтызе ялакстнэнень.

– Мезе, мелесь-арсемась а берянь. Нурькинестэ, мон шнан Сашань од тевензэ, – кортась МР-нь Велень хозяйствань ды продовольствиянь министерствасо важодицясь Николай Иванович. – Мон лездан эрявикс документэнь анокстамосо.

Алкукскак, Н.И.Кандрашкин ялаксонзо туртов лездась эрьва мейсэ. Куроксто анокстазельть документтнэ, мейле явозель модась.

Важодемань васенце иетне а шождатнестэльть. Арасельть сатышка вийтне. Явозь моданть, эрицятнень пайтнень, сокасть ансяк вейке-кавто тракторт. Шкань ютазь сиведекшнесь шабра велень техника. Шкастонзо видезельть модатне, путозель модамаресь.

Видькстатано, сась сёксесь. Ушодовсь паксятнень урядамось. Ды мезе? Таштазь изнявкст. Эрьва гектарсто саезь 25 центнерт сюро, мезесь весемеде ламоль районсо. Эрьва гектарсто саезель ламо модамарьгак. Тень пингстэ Александр Ивановичнень, мерят, теевсть сёлмот. Сон ушодсь эсь крестьянонь-фермерэнь хозяйстванть виевгавтомо. Ардтни аволь ансяк республикань, шабра областень прявттнэненьгак. Саезь кредитэнть лангс рамси неень шкань тракторт, комбайнат, модамарень видьмекст. Истя, иестэ иес А.И.Кандрашкинэнь хозяйствась кеместэ стясь пильге лангс.

 

А стувтовикс иеть

А мезть сёпомс, ульнесть шкат, зярдо «Од Азор» крестьянонь-фермерэнь хозяйствань азоронть А.И.Кандрашкинэнь «лепштясть» банктне. Сынь вешсть велявтомс долконть, кона таштавсь пертьпельксэнть кувалма. 2010 иесь пек коськель. Те пек талновтсь Александр Ивановичень.

Истя уш лиссь, масторонь вейке покш ошсонть РФ-нь Президентэнть В.В.Путинэнь марто ютавтозель покш промкс. Тосо ульнесь Мордовиясто фермерэсь А.И.Кандрашкингак. Сон эзь цидярдо, Россиянь весе фермертнэнь пельде вешсь лезкс: банктненень долконть пандомс аволь сеске. РФ-нь Президентэсь В.В.Путин чарькодинзе фермертнэнь талномаст ды лездась.

 

Модамарень

ванстома тарка

«Од Азор» крестьянонь-фермерэнь хозяйствасонть улемстэ тесэнь важодицятне ёвтнесть, вейке иестэнть эрьва гектарсто таргинек колмосядто ламо центнерт модамарь. Те, нама, важодицятнень пек кецявтсь. Ансяк нусманяль Александр Иванович. Мекс? Модамаренть кирдемс а косоль. Туи пиземе ды весе! Ёми ломантнень весе важодемаст. А.И.Кандрашкин кундась тиринь велень икелень колхозонь гаражонть витнеме.

– Минь куроксто вельтинек латонть, – кортыть хозяйствасонть. – Теинек лия тевтькак.

Течи совиндерят гаражонтень, ёжот сеске вадрялгады. Понгить, мерят, покштояк покш иневедень портс. Модамаренть тестэ ильтить ды ильтить. Автомашинатне – Саранскойстэ, Чувашиясто, Саратовасто…

– Минь сынек Чувашиясто, – корты шоферэсь. – Газеленть пештинек вадрясто. «Од Азор» КФХ-нть марто кеме сюлмот кирдтяно умок.

А.И.Кандрашкинэнь мельспарозо – сывелекс ракшатне. Кода уш тешкстынек, тесэ эйстэст колмосядто ламо. Мельгаст ваныть истя, кода авась эсь эйкакшонзо мельга. Тенст кором свал таштакшныть сатышка. Вачодо ракшатне зярдояк а аштить. Теньсэ, нама, покш таликазо хозяйствань азоронть А.И.Кандрашкинэнь. Вастовоматнестэ вейкесэнть Александр Иванович видькстась, келя, кеме нежензэ бухгалтериясо важодицятне В.А.Гафарова ды О.Н. Свойкина.

 

Кеме нежеть

– Мон хозяйствасонть важодян 2006 иестэ саезь, – ёвтни бухгалтерэсь В.А. Гафарова. – Тей сынь важодеме Н.П. Огарёвонь лемсэ МГУ-нь экономикань факультетэнть прядомадо мейле. Видькстан, васенце шкастонть тень а шождатнестэль. Тень лездась тетям, Александр Иванович. Самай сон – «Од Азор» КФХ-нь прявт.

Вера Александровна тевензэ пек вечксы. Чизэнзэ кодат ансяк тевть а топавты! Модамарь марто нолды автомашинат Саратовав, Самарав…

– Ансяк ильтинек модамарь марто автомашина Чувашияв, – ёвтни В.А.Гафарова. – Модамарь кедьстэнек рамсить республикань эйдень кужотнеяк. Питнесь аволь покш. Вейке килограмманть кисэ сайтяно 10-15 целковойть.

В.А.Гафаровань валонзо коряс, «Од Азор» крестьянонь-фермерэнь хозяйствась кеме сюлмот кирди райононь эрицятнень марто, кить эсь паест максызь арендас. Истя, эрьва иестэ сыненст КФХ-сь максни сюро, лия мезе. Те весемесь юты, нама, бухгалтериянь службань важодицятнень вановтост ало.

– Монень эрьва мейсэ лезды бухгалтерэсь Ольга Николаевна Свойкина, – ёвтни Вера Александровна. – Сон парсте содасынзе аволь ансяк КФХ-нть ули-паронзо, истя жо сетненьгак, кинь марто кирдтяно кеме сюлмот.

О.Н.Свойкина «Од Азор» КФХ-сонть важоди 2005 иестэ саезь. Арасель истямо тев, шкастонзо аволь анокста эрявикс документт модамарень видьмексэнь, сывелекс ракшань рамамс.

Тешкстасынек, Ботужелесь эри, тесэ строявить од кудот, теньсэ, нама, покш таликазо «Од Азор» КФХ-нть, конань прявтсо А.И.Кандрашкин.

 

Пётр Зиновьев.

Отяжеле ёнкс

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...