Рубрикатор

Развитие АПК Владимир Сайгушкин: «Изнявкстнэ таштавить вейсэнь вийсэ»
Владимир Сайгушкин: «Изнявкстнэ таштавить вейсэнь вийсэ»

Иестэ иес виевгады Чаунзань районось. Тесэ строявить эрямо кудот, спортивной комплекст, покш лавкат... Райононь куншкакуронь китнеяк явовтыть мель.

Велень хозяйствань предприятиятне велькска топавтнить государствантень сывелень, ловсонь, сюронь миемань аравтлувтнень. Районсонть лововить 7363 скалт,  эйстэст 3140 – потявтовицят, 8 миллионт саразт, 46660 тувот, частной секторсо – 631 скал, эйстэст 152 – потявтовицят, 10000 саразт, 1157 тувот, 1631 реве, 8 лишметь. Мельгаст кеместэ ваныть Чаунзань райононь ракшань апаро орматнень каршо бороцямонь коряс станциясо важодицятне, конатнень прявтсо В.В.Сайгушкин.

 

Владимир Васильевич райононь прявт ветеринарной врачонь тевенть топавты 2016 иестэ саезь. Тей сась Отяжелень районсто, косо важодсь МР-нь ветеринарной службань Государственной ветеринарной инспекторокс.

Течи В.В.Сайгушкин минек инженек.

– Владимир Васильевич, инескеть, зярыя валт ёвтак эсь прядот: косо чачить, косо кемекстык обуцят, косо тонавтнить ветеринарной врачонь тевенть вечкеме?

– Мон чачинь-касынь Отяжелень райононь Сабанцеле велесэ. 1982 иестэ Сабанцелень средней школанть прядомадо мейле эстензэ тердимим «Путь Ильича» колхозонь икелень председателесь Владимир Петрович Бухаркин. Сон колхозонть пельде кучимим тонавтнеме Казанень государственной ветеринарной институтов, конань прядомадо мейле сынь важодеме тиринь велень колхозов. Уш сестэ Владимир Петрович Бухаркин эзь важоде колхозонь прявтокс. Ульнесь Атюрьевань КПСС-нь райкомонь васенце секретарекс. Ансяк мартонзо сюлмотнень эзинь кадо. Сеедьстэ вастневинек велень хозяйствань важодицянь промкстнэсэ, кенярксчитнесэ. Течияк эрятано кеме ояксчисэ. Аволь умок Владимир Петрович Бухаркиннэнь топодсть 70 иеть. Тень кувалма ёвтынь поздоровт, арсинь кеме шумбрачи, кувака пинге.

– Владимир Васильевич, зярдо сыть важодеме Чаунзань райононь ракшань апаро орматнень каршо бороцямонь коряс станциянь прявт ветеринарной врачонь тевенть топавтомо, полавтомат-мезть теить?

– Ламо полавтомат эзинь тее. Коллективесь, косо лововить кодгеменде ламо ломанть, трудонь дисциплинанть эзь колсе. Важодить весе вадрясто. Вастымизь лембестэ. Кода кортыть, коня алга ваныцят арасельть. Сеске меринь: «Ськамонзо кияк мезеяк а теи. Ансяк вейсэнь вийсэ таштавить изнявкстнэ».

– Кить тонь кеме нежеть?

– Нама, трудонь ветерантнэ. Сынь куш кодамо шкане, погодане анокт ардомс тевест топавтомо – велень эрицятненень, велень хозяйствань предприятиятнес. Ютксост ветеринарной врачтне В.И.Трубкин, Т.А.Васина, Л.Н.Кильдяева, С.В.Малинкина, И.С.Тараканова, А.А.Краснова.

Райононь эрицятне парсте содасызь А.А.Красновань. Сон пенсиясо, ансяк вечкевикс тевензэ а кадны. Сонзэ топавты уш колоньгеменде ламо иеть. Александра Алексеевна сеедьстэ вастневи сеть эрицятнень марто, кить эсь кардазсо кирдить скалт, реветь, тувот, саразт. Толкови тенст ракшань орматнеде, седе, кода сынст каршо бороцямс.

Александра Алексеевна – эпизоотической отрядонь прявт. Мартонзо важодить ветеринарной врачтне Л.Г.Кондыкова, В.В.Налейкин. Сынь нучк-пачк ютызь райононь велетнень. Сынь тосот, косо кастыть ракшат.

Шнаса од специалистэнть Валентина Глуховань. Сон миненек сась Кемлянь аграрной колледженть прядомадо мейле. Специальностесь: «ветеринария». Валентина сеске кель-вал мусь станциянь важодицятнень марто. Ардтни райононь велетнева, вастневи тосонь эрицятнень марто. Сонензэ лездыть Анна Семеновна Малкина, Татьяна Анатольевна Васина.

Валентина Глухованень, кода од специалистэнтень, анокстатано эрявикс документт льготань получамс. Максовить подъёмнойть ды зарплатас зярыя тёжат целковойть.

Тешкстаса, меельце шкасто районсонть ветеринарной врачтнень тевест ламолгадсть. Тень кемевтемга, станциясонть пек сеедьстэ тейневить катканень, кисканень ды лия ракшанень операцият.

Нурькинестэ, райононь эрицятнестэ ламотне кудосост, скалтнэде, реветнеде, сеятнеде башка, ушодсть кирдеме кискинеть.

– Владимир Васильевич, республикань кой-кона велетнесэ ламолгадсть азортомо кискатне. Лиясто сынь каявкшныть эйкакш лангскак. Истят, койсэнь, улить Чаунзань районсояк. Мезе тейтядо азортомо кискатнень аламолгавтомга?

– А мезть сёпомс, районсонть улить азортомо кискат. Ансяк арасель истямо тев, штобу сынь каявольть ломань лангс. Мерян, жилищно-коммунальной хозяйствасо ули служба, косо тонавтнить ды ванкшныть азортомо кискатнень эрямо лувост.

– Владимир Васильевич, республикань зярыя районтнэсэ а важодить лабораториятне. Чаунзасо сон важоди парсте. Кие лади сонзэ важодеманзо?

– Маныть лабораториясонть ютавтозель покш витнема. Полавтозь потолокось, кияксось ацазь керамической плиткасо. Полавтозь оборудованияськак. Ней сон неень шкань. Лабораториянть прявтсо Владимир Иванович Трубкин. Тесэ важодить кавксо ломанть. Сынь эсь тевень алкуксонь специалистт. Сынст вановтост ало райононь велень хозяйствань ловсонь оборудованиясь, «Юбилейное» велень хозяйствань предприятиянь, «Чамзинская» нармунень фабрикань цехтне ды лия мезесь. Минек специалисттнэ истя жо пштистэ ваныть ракшатненень коромонь анокстамонть мельга. Рационсонть улест весе компоненттнэ: фосфорось, сахарось…

В.И.Трубкин Чаунзань райононь ракшань апаро орматнень каршо бороцямонь коряс станциясо важоди малав 13 иеть. Ветеринарной службасо – колоньгеменде ламо иеть. Те тевентень сон тонавтнесь, кода монгак, Казанень государственной ветеринарной институтсо, конань прядызе 1982 иестэ. Институтонь содамочитнень васня кемекстынзе «Юбилейное» велень хозяйствань предприятиясо. Ней жо важоди ветстанциясо.

– Районсонть эпизоотической коштось а талновты?

– А талновты. Сон вадря. Теньсэ, нама, покш таликаст  ветеринарной врачтнень. Сынь оймамонь а содыцят. Вечкевикс тевезэст путыть весе содамочист, юткошкаст. Сынь менельстэ, кода кортыть, тештеть а кундсить. Тевест топавтыть седейшкава, оймень путозь. Истя, кода мери седеесь. Седеесь берянь тевть а вечки.

– Владимир Васильевич, течи тонь седе пек мезе талновты?

– Талновты вана мезесь. Минек масторонь зярыя регионсо вастневить ракшань апаро орматне – тувонь африкань чумась, нармунень гриппесь, нодулярной дерматитэсь ды лия мезесь. Неть орматне кандыть покштояк покш зыян.

Пек паро, минек республикасо неть ракшань апаро орматне а вастневить. Эпизоотической коштось кецявты. Теньсэ, нама, покш таликаст МР-нь ветеринарной службасо важодицятнень.

– Течи кодат тевть аштить Чаунзань райононь ракшань апаро орматнень каршо бороцямонь коряс станциянь важодицятнень икеле?

– Масторсонок 2018 иень январень 1-це чистэ саезь эрямос совавтови законось, конась веши велень хозяйствань продукциянть, лия мезенть совавтомс «Меркурий» системас. Нурькинестэ меремс, продукциянть карми улеме электронной учётозо. Васенце этапонть минь ютынек. Вастневить, нама, стакачить. Но минь сынст печтясынек.

– Владимир Васильевич, мартот кортнетяно Россиянь Ветеринарной службань кенярксчиденть икеле. Мезе арсят республикань ветеринарной врачтненень?

– Республикань ветеринарной весе врачтненень ды мартост важодицятненень ёвтан поздоровт, арсян кеме шумбрачи, уцяска, важодемасо од изнявкст!

 

Кортамонть сёрмадызе Пётр Зиновьев.

Чаунзань  район

 

Новости

Повышение уровня занятости на селе – один из приоритетов «Единой России»
На XVIII Съезде «Единая Россия» предложила дать возможность расширения
рынков сбыта для личных подсобных хозяйств (ЛПХ).
 В рамках обсуждения на дискуссионной площадке XVIII Съезда Партии, 
посвященной вопросам сельского хозяйства, было предложено дать 
возможность применения добровольной патентной системы 
налогообложения для крупных личных подсобных хозяйств (ЛПХ). Тех, что 
намеренны выйти на более широкие рынки сбыта, нежели фермерские 
ярмарки.  «Но для этого им сейчас нужно оформляться в качестве 
фермерского хозяйства или индивидуального предпринимателя. Это уже 
другая отчетность и налогообложение.  подача деклараций и заполнение 
нескольких видов отчетностей. Мы предлагаем дать  возможность 
владельцам ЛПХ, которые этого захотят, приобрести патент. Если у вас есть 
личное подсобное хозяйство, вы реализуете излишки, и не планируете 
выходить на уровень более широкой торговой деятельности, то и 
приобретать патент не нужно», - пояснил заместитель Председателя
Госдумы, руководитель фракции «Единая Россия» Сергей Неверов.
Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...