Рубрикатор

Развитие АПК Зярдо ули азорксчи
Зярдо ули азорксчи

Тедеде июнень 16-це чистэ Лямбирень райононь Владимировка веленть вакссо ютавтозель «Паксянь чи» республикань агропромышленной комплексэнь кенярксчись. Эйзэнзэ сакшность ламо инжеть – Нижней Новгородсто, Санкт-Петербургсто, Екатеринбургсто, Московсто ды лия регионсто. Тесэ мезе ансяк невтезь арасель! Кодат ансяк выставкат арасельть! Ды весе витсть мель.



«Паксянь чисэнть» эрьва ёндо прянзо невтизе «Центр практического обучения специалистов сельского хозяйства РМ» ОДПОА-сь, конань прявтсо велень хозяйствань наукань кандидатось Н.Ф.Буянкин. Тесэ эрьва кодамо мастер-класст невтезельть, эрьва кодамо комбикоромт. Республикань Велень хозяйствань специалистэнь практической тонавтомань куншкакуронь выставканть ванкшнызе ды шнызе МР-нь Прявтонь тевтнень нурька шкас топавтыцясь В.Д.Волков. Выставкась прядовсь «туволевксэнь чийнемасо». Тень туртов тонавтозь ниле туволевкстнэ, конатненень 30 чить, невтизь эсь ёрокчист башка теезь «тувоньдромсо». Изницякс лиссь сехте ёроковось – Цезаресь.

 

«Туволевксэнь чийнематнень» те иестэнть ютавтынек васенцеде, – толковась Н.Ф.Буянкин МР-нь Прявтонь тевтнень нурька шкас топавтыцянтень В.Д.Волковнень. – Выставкань ваныцятненень сынь пек вечкевсть. Эште весть мерян: истямо пелькстамот зярдояк арасельть!

Н.Ф.Буянкинэнь валонзо коряс, пек парсте важоди куншкакуронь тувонь трямонь-кастомань отделениясь, кона ашти Чаунзань райононь Комсомольской посёлканть эйстэ аволь васоло, косо управляющеесь С.Н.Кияйкин.

Неть читнестэ вастовинек Сергей Николаевич марто. Сон чачсь 1981 иестэ Дубенкань райононь Кочкурова эрзянь велесэ. Тосонь средней школанть прядомадо мейле тонавтнесь Мордовской университетэнь Аграрной институтсо. Специальностесь – «ветеринария».

Институтонь 3-це курсонть прядомадо мейле тонавтнесь индивидуальной программань коряс. Важодсь «Медаевский» велень хозяйствань предприятиясо ветеринарной врачокс.

Хозяйствань прявтось В.С.Киселев вадрясто вастымим, – ледстни С.Н.Кияйкин. – Сонзэ марто теинек индивидуальной программа. Сон лангозом пек кемсь. Те монь седеяк ветясь важодемань од изнявкстнэс. А шнамга, Виктор Сергеевичень зярдояк мелензэ эзия колсе.

Медаевасо С.Н.Кияйкин важодсь кавто иеть. Мейле саизь армияв. Служась Красноярской краень Абакан ошсо. Служамонь иесь эзь марявояк, кода ютась бойкасто. Тосто велявтомадо мейле С.Н.Кияйкин важодсь «Мордовский бекон» ЗАО-со, кона ашти Апраксина велесэ. Тесэ васня ульнесь фельдшерэкс, мейле – старшей ветврачокс. Седе тов топавтсь комплексэнь прявтонь тевтнень. Сергей Николаевич оймамо а соды. Сон аволь ансяк паро тевень ушодыця, истя жо кемексты коллективенть: важодицятне лездавольть вейке-омбоценень. Эдь ансяк вейсэнь вийсэ таштавить изнявкстнэ.

Истя уш лиссь, шкань ютазь С.Н.Кияйкин Татьяна Владимировна козяйканзо марто тусть эрямо Воронежской областень Павловск ошов. Тосонь «Агро-Экосо» нолдавсь тувонь од комплекс. Сергей Николаевич топавтсь управляющеень тевенть.

Тосо савсь виевстэ важодемс, – ледстни С.Н.Кияйкин. – Эрявсь аволь ансяк парсте ладямс комплексэнть важодеманзо, истя жо мукшномс кить-янт, оят-ялгат, ков микшнемс сывеленть. Важодицятнестэ ламотне ульнесть казахт. Те эли тона тевенть топавтомс сыненст савсь толковамс кувать. Тосо важодинь вейке пель марто ие.

Ней уш зярыя иеть С.Н.Кияйкин важоди Мордовиянь Велень хозяйствань практической тонавтомань куншкакуронь свиноводствань отделениянь прявтокс.

Тесэ велень хозяйствань специалисттнэнь эсь ёрокчист кемекстамонтень весемесь ули, – ёвтни Сергей Николаевич. – Кардосонок кирдевить 240 левксыиця тувот. Мельгаст якатано оймамонь апак сода. Тезэнь  ладязь неень шкань оборудования. Кедьвийсэ кодамояк тев а топавтови. Теньсэ, нама, покш таликазо куншкакуронь прявтонть Николай Фёдорович Буянкинэнь. Сон покш мель яви свиноводствань отделениянть виевгавтомантень. Ды те удалы.

Чаунза ёнксонь куншкакуронь свиноводствань отделениясо эсь ёрокчист кастыть Мордовской университетэнь Аграрной институтонь «Технология производства и переработки сельскохозяйственной продукции» 4-5-це курсонь студенттнэ, Кемлянь аграрной колледжень «ветеринария» специальностень студенттнэ, конат тонавтнить «Техническое обеспечение современных технологий в свиноводстве» программань коряс. Тесэ истя жо тонавтнить Краснослободскоень колледжень студенттнэ, кить кочкизь ветеринарной врачонь, зоотехникень тевтнень. Кенярксонтень, иестэ иес истямотне ламолгадыть.

Куншкакуронть ули эсензэ кудозо, косо эрить студенттнэ тонавтнеманть перть. Номертнэ, комнататне, овсе а явовить ошонсетень эйстэ. Студенттнэнь андыть чистэ колмоксть. Питнень апак сае.

Башка холлсо аштить компьютерт. Тесэ ули Интернет. А зняро методической литература!

Студенттнэнь марто важодтяно истя: рана валске тонавтнетяно теориянть, обедтэ мейле 17 часос сонзэ кемекстатано практической занятиятнесэ, – ёвтни С.Н.Кияйкин. – Тонавтнемань программась вечкеви студенттнэненьгак, преподавательтнененьгак.

Свиноводствань отделениясонть парсте тевест топавтыть тонавтыцятне, конатнень ютксо – А.А.Суворов, Д.П.Паршуткин, С.Н.Кияйкин. Сынь иень перть тонавтыть од ломантнень аволь ансяк зоотехникень, ветеринарной врачонь тевтнень вечкеме, истя жо покш коллективсэ важодеме.

Тешкстасынек, тонавтнема корпусонь актовой залсо ули телевизор, кинопроектор, доска, эрьва кодамо плакатт. Сынь лездыть студенттнэнень эсь ёрокчинть кемекстамосо.

Куншкакуронь свиноводствань отделениянь прявтонть кеме нежензэ: искусственной осеменениянь операторось А.А.Королева, ракшатнень мельга ваномань коряс операторось Т.А.Чиркина, коромонь анокстамонь коряс операторось В.В.Паркин, трактористэсь Г.П.Ганченков. Сынь кармавтома а учить. Содыть, мезе эряви теемс течи, ванды. Ды тень топавтыть.

Куншкакуронь свиноводства отделениясто сыргинек паро ёжосо. Куш течи студентт тестэ а вастат, занятиятне ушодовить сентябрянь 1-це чистэ, тесэ важодемась ладязь вадрясто. Весемесэ редяви азорксчись.

Пётр Зиновьев.

Чаунзань район

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...