Рубрикатор

Развитие АПК Стакачиде сон а пели
Стакачиде сон а пели

 

«Нива» МР-нь Крестьянонь-фермерэнь хозяйствань ассоциациянь исполнительной директорось В.И.Данейкин вастовоматнестэ вейкесэнть кода-бути тешкстась: «Государствась покш мель яви хозяйствованиянь вишка форматненень. «Поддержка начинающих фермеров» программанть эрямос совавтомсто республикань фермертнэнь юткс састь 236 крестьянонь хозяйствань 236 од азорт. Государственной гранттнэнь вельде сынь рамасть 2580 скалт, тень ютксо – 1000 потявтовицят, кадовикстнэ  сывелекс трявиця породань. Таштазь МТЗ-нь эрьва кодамо маркань 62 тракторт. «Развитие семейных животноводческих ферм на базе крестьянско-фермерских хозяйств» проектэнть лувсо колмо иес кочказь крестьянонь-фермерэнь 50 хозяйстват. Гранттнэнь ды эсь ярмактнень тевс  нолдазь, фермертнэ строить ды парсте витнить скалонь 10, ревень колмо, тувонь кавто, лишмень кавто фермат, куркань сывелень нолдамонь коряс кавто фермат ды истя седе тов».

 

В.И.Данейкин ёвтынзе крестьянонь-фермерэнь хозяйствань азортнэнь, конатне уш зярыя иеть важодить виевстэ, эйстэст содыть республикань томбалеяк. Ютксост «Од Азор» хозяйствань азорось А.И.Кандрашкин (Отяжелень район), В.Ю.Кабаев  (Покш Игнатовань район), Ю.Н.Семёнов (Покш Березникень район), А.Б.Кудашкина (Орданьбуень район), А.А.Афанасьев, М.Л.Чугунов (Дубёнкань район) ды ламо лиятне.

Фермерэнь тевсэнть пильге лангс кеместэ стясь Покш Березникень райононь Судосева велень эрицясь  А.М. Пантилейкин. Сон три-анды сывелекс ракшат. Ды те тевсэнть важоди аволь умок.

Неть читнестэ арсинь-теинь вастовомс Анатолий Михайлович марто. Велень администрациясо ёвтызь тень фермерэнть кудонзо. Секскак сонзэ муинек куроксто.

Зярдо кудазорось панжизе кенкшенть, мон абунгадынь: поровтонть трокс ютамсто кияксось пешксель эйкакшонь карсемапельде. Весе сынь ваньксэльть ды путнезельть вейке-омбоце мельга. Мерят, понгинь эйдень кужос. Тень редямсто кудазорось А.М. Пантилейкин эзь кирдеве:

– Те весе карсемапельтне монь эйкакштнень. Эйстэст – кавксо. Нилетне якить школав. Покшонтень 13 иеть. Лемезэ – Диана. Сон аванстэнь, Валентина Петровнанень, эрьва мейсэ лезды: пиди-пани, ваны вишкинетнень мельга. Колмо цёрынькан. Меельцесь, конань лемдинек Тимофеекс, чачсь аволь умок. Весементь теян эйкакштнень шумбрасто кастомга, авольть сода кодаткак стакачить школасо тонавтнемстэ, обуцянь кемекстамсто.

А.М.Пантилейкин чачсь-кассь 1985 иестэ Инсаронь райононь Морд. Паевка велесэ. Тесэнь 9 класстнэнь прядомадо мейле тонавтнеманзо поладызе Инсаронь профтехучилищасо. Тонавтнесь трактористэнь тевентень. Пек уш вечксь тракторсо важодеме. Сокась тиринь ёнксонь модатнень.

2004 иестэ училищанть прядомадо мейле Анатолий Пантилейкин козяйканзо марто сась инжекс малавиксэнзэ туртов Судосева велев. Тесэнь мазыйдеяк мазый таркатне, ломантне пек вечкевсть тенст, ды сынь кадовсть тезэнь эрямо. Рамасть кудо. Муевсь важодема таркаяк. «Надежда» велень хозяйствань предприятиянтень пек эрявкшность тракторсо важодицят. Секскак, зярдо Анатолий Пантилейкин совась хозяйствань прявтонтень П.В.Першиннэнь тев мельга, Пётр Васильевич пек кецязевсь:

– Тев мутано.

А.М.Пантилейкин зярыя иеть сокась-видсь Судосева велень модатнень. Ансяк те важодемась мель эзь вите. Пек аламо пандсть. Текенень, секе-тев полавтневсть велень хозяйствань предприятиянь прявттнэ. Ды Анатолий Михайлович теевсь башка предпринимателекс: строи кудот, витни-петни покш кудонь квартират. Ды истя парсте! Сонзэ тердтнить аволь ансяк минек республикань эрицятне – Москововгак, Нижней Новгородовгак пачколи.

Кода-бути А.М.Пантилейкиннэнь гайневтсь велень администрациянь прявтось Любовь Ивановна Чудайкина. Корты: «Анатолий Михайлович, ванды Судосева велев Саранскойстэ сыть инжеть. Неть – МР-нь Велень хозяйствань ды продовольствиянь министерствань специалистэсь Дмитрий Николаевич Исайкин ды «Нива» МР-нь Крестьянонь-фермерэнь ассоциациянь исполнительной директорось Виктор Иванович Данейкин».

– Эдь якинь вастовомас. Тосо кортамось мольсь фермерэнь тевденть, – ёвтни А.М.Пантилейкин. – «Ушодыця фермер» проектэнть эрямос совавтомантень максовить ярмакт. Монень те вечкевсь. Теде ёвтыя эсь мелем-арсемам инжетненень. Сестэ кирдинь эсь кардазсо 11 туво, кавто скалт, кавто букинеть, МТЗ-82 трактор, эйзэнзэ велень хозяйствань инвентарь.

Велень администрациясо вастовомадо мейле Саранскойстэ инжетне якасть сонзэ «хозяйстванзо» ваномо. Сынь ульнесть фермасонть, косо кирдевить скалтнэ, тувонь кардосонть. Ды эрьва косо неяви алкуксонь азорксчи. Те, нама, пек вечкевсь Д.Н.Исайкиннэнь ды В.И.Данейкиннэнь. Ды мезе? МР-нь Велень хозяйствань ды продовольствиянь министерстванть лезксэнзэ вельде М.М.Пантилейкиннэнь, Анатолий Михайловичень ялаксонзо туртов, явозельть 900 тёжадо ламо целковойть. Тевтнень жо вети Анатолий Михайлович. Неть ды эштё эсест ярмак лангс Анатолий ды Михаил Пантилейкинтнэ, ушодыця фермертнэ, рамасть комсь букинеть, тикшень-мезень пурнамс пресс-подборщик, эрьва мезень усксемс тележка ды истя седе тов.

Ялакстнэнь-фермертнэнь мельга кемекстазь 150 гектарт мода. Тезэнь сынь виднить шуж, тикше, товзюро. Истя, малав кавто ды пель иес важодемань перть Анатолий ды Михаил Пантилейкинтнэ мисть малавикстнэнень, велень эрицятненень, райононь столовойс малав 7 тоннат сывель. Кода кортыть, весе продукциясь вадря. Ракшатнень андомсто минень-сюнонь добавкат-мезть коромс а кайсить.

Фермерэнть Анатолий Михайловичень валонзо коряс, весе тевтнень хозяйствасонть топавты ялаксонзо Михаил Михайлович марто. Лезды, нама,  Валентина Петровнаяк, Анатолий Михайловичень низэ.

Фермерэсь А.М.Пантилейкин пек виевстэ важодсь тедеде. Эрьва гектарсто сайсь малав 30 центнерт сюро, весемезэ – 100 тоннат. Сюронть сеске миизь, эстест кадсть фуражокс ансяк саезь букинетненень, ней эйстэст 20 прят, кармить, келя, 30. Анокстазь пек ламо тикше. Эрьва гектарсто саезь 100 центнерт.

– Букинетнень рамсетяно Рузаевкань райононь Плодопитомник посёлкасто, – ёвтни А.М.Пантилейкин. – Истя жо Ицялонь райононь Кергуды велень «Дружба» велень хозяйствань предприятиясто. А течи-ванды Михаил ялаксом марто сыргатано Саранскоев, «Союзбелагронь» валномкань рамамо. Сонзэ пек шныть гербицидсэ касовкстнэнь валномсто.

Республикасонок коекс теевсть продовольственной рынкатне. Сынст ютавтнить аволь ансяк Саранскойсэ – республикань районтнэсэяк: Отяжелесэ, Орданьбуесэ, Дубенкасо, Краснослободскойсэ, Покш Березниксэ. Меельце кавто иетнень перть Покш Березникень райононь рынкатнес лиснить А.М. ды М.М.Пантилейкинтнэяк.  Сынь, сывельденть башка, микшнить тикше. Истя, вейке чис сынь ильтить шабра ды эсенек райононь эрицятненень зярыя кементь тоннат тикше.

– Паро, районсонок эште улить ломанть, кить эсь кардазсо кирдить ракшат, – видькстась Анатолий Михайлович. – Эйстэст а весень ули тракторост, тикшень ледемкаст. Сыненст минь лездатано. Ёвтаса: рынкасонть тикшенть микшнетяно аволь питнейстэ.

А.М.Пантилейкинэнь валонзо коряс, фермерэнь а шожда тевсэнть эряви мельсэ кирдемс весементь, кинь марто важодят, кодат шабратне. Нурькинестэ, эряви кенеремс эрьва ков.

Ды, кода нетяно, А.М.Пантилейкин кенерькшни эрьва ков. Талновтыця тевензэ коряс вастневкшны МР-нь Правительствань Председателень васенце полавтыцянть – Велень хозяйствань ды продовольствиянь министранть В.Н.Сидоров, «Нива» МР-нь Крестьянонь-фермерэнь ассоциациянь исполнительной директоронть В.И.Данейкин марто. Толкови мартост течинь ды вандынь тевтнеде, кода седе парсте важодевельть республикань крестьянонь-фермерэнь хозяйстватне, виест улевель Мордовиянь агропромышленной комплексэнть виевгавтомасо.

Анатолий Михайлович фермерэсь эри аволь ансяк эсензэ мелявкстнэсэ, топавты общественной тевтькак. Сон – Судосева велень администрациянь советэнь депутат, весементь теи веленть иестэ иес сюпалгавтомга, мазылгавтомга. Сонензэ сеедьстэ пшкалить велень эрицятне те эли тона ульцянть мазылгавтомасо. А.М.Пантилейкин киненьгак зярдояк а отказы. Анатолий Михайлович велень администрациянтень лездась велень кой-кона китнень теемасо, Ине Отечественной войнасо маштовозтненень кеврунгонть витнемасо ды истя седе тов.

– Обуцям аволь истямо – аштемс ве ёно велень талновтыця тевтнень эйстэ, – видькстась А.М.Пантилейкин. – Косо эрят, тосо зярдояк иля покшкавтне.

Тень марто а кода вемельс а прамс.

Пётр Зиновьев.

Покш Березник ёнкс

 

Новости

Студентэнь Парад

Россиянь студенчествань парадось – те Россиясо ды весе масторлангонть келес студентэкс алтамонь сехте покш, лия ёнов а молиця од ломанень кенярксчи, конась вейсэнди кементь тёжат студентт Россиянь ламот оштнесэ. Студенчествань васенце парадось ульнесь Московсо 2002 иестэ ды кемголмово иень перть ютавтовсь минек масторонь прявтошсонть.

Подробнее ...
 
Кросс

Сентябрянь 16-це чистэ Мордовиясо, кода масторонь лия регионтнэсэяк, тешкставсь Чиемань весероссиянь чись. Тень лувсо ютавтовсь «Нациянь кросс». Саранскойсэ стартонтень лисекшнесть малав 4,5 тёжат эрицят. Ютксост ульнесть виев спортсмент, общеобразовательной школатнесэ тонавтницят, вузонь, ссузонь студентт ды Мордовиянь муниципальной районтнэстэ чийнемантень мелень явицятне. Советской площаденть лангсо пелькстамотнесэ участвовицятненень лембе валт ёвтасть Мордовия Республикань Спортонь ды физической культурань министрась Владимир Киреев, Саранскоень Администрациянь физкультурань ды спортонь управлениянь прявтось Роман Дубровин, пелькстамотнень директорось Михаил Храмов ды прявт судьясь Вячеслав Мочалов.

Подробнее ...
 
Полицейскойтненень – автомобильть

Саранскоень Советской площадьсэ ютась Мордовиянь МВД-нь сотрудникень развод. Торжественной церемониясонть республикань полицейскойтненень максозь 49 од автомашинат. Участникекс ульнесть В.Д.Волков ды внутренней тевень министрась Юрий Арсентьев.

Подробнее ...
 
Ардомань картат

Н.П.Огарёвонь лемсэ МГУ-нь студенттнэнь ды аспиранттнэнь туртов полавтовсь ардомань картань получамонь лувось. 2017 иень сентябрянь 1-це чистэнть саезь сынь максовить справкань коряс, конась кемексты ардомань картань получамонь праванть.

Подробнее ...
 
Ветеранонь хоккей

Ютазь оймсема читнестэ Саранскойсэ ютась хоккейсэ налксема. Вастовкшность «Ветераны Мордовии» ды «Легенды хоккея» командатне.

Налксемадонть икеле участниктненень поздоровт ёвтась Владимир Волков.

Подробнее ...