Рубрикатор

Развитие АПК Николай Константинов: «Од виесь» максы кемема вандынь чинтень»
Николай Константинов: «Од виесь» максы кемема вандынь чинтень»

 

Николай Яковлевич Константинов чачсь-кассь Орданьбуень райононь Луньга велесэ 1957 иестэ. Тесэнь кавксо классонь школанзо прядомадо мейле сон тусь тонавтнеме трактористэнь тевентень Орданьбуень училищав, конадонть мейле саизь армияв. Служась Нижней Тагилсэ.

Армиясто велявтсь тиринь велев, сеске совась тесэнь «Наша Победа» колхозонь прявтонтень Дмитрий Николаевич Архиповнень роботань кувалма. Хозяйствань прявтось, нама, эзь отказа.

Автомашинат-мезть витнесь зярыя иеть. Зярыя шкань ютазь Н.Я.Константиновонь аравтызь мастерскоень прявтонь тевтнень топавтомо. Важодсь парсте, тень редизь ялгатнеяк. Николай Яковлевич весе содамочинзэ, весе ютко шканзо макссь вечкевикс тевезэнзэ: хозяйствасонть важодевельть трактортнэ, комбайнатне, автомашинатне.

– Содатадо, советэнь шкастонть минек велесэ важодсть тёжадо ламо ломанть, – видькстась Н.Я.Константинов. – Колхозось сюпаволь, виевель. Мельганзо кемекстазельть малав 2000 гектарт мода. Лангсонзо кастынек сюро. Эрьва гектарсто сайнелинек 23-24 центнерт.

2000-2004 иетнестэ Н.Я.Константинов  топавтсь «Наша Победа» колхозонь прявтонь тевтнень. Топавтсь аволь мельде-валдо. Тень редизь велесэ эрицятне. Эрьва иестэ Луньга велень  эрицятненень максневсь сюро.

Хозяйствасонть кирдевсть 1500 скалт, эйстэст 560  – потявтовицят. Райононть келес содавикст ульнесть скалонь потявтыцятне Е.В.Судакова, Анна Харитонова, Р.И. Малышева. Хозяйствасонть ансяк паро валсо кортыть прявт механиктенть В.Ф.Аношкиндэ, агрономдонть С.Ф.Татаровдо, тракторонь бригадань прявттонть Г.Т.Татаровдо.

«Наша Победа» колхозонть юрсо Луньгасо важоди «Од вий» велень хозяйствань  предприятия, конань прявтсо Н.Я.Константинов. Тедеде Николай Яковлевичнень  паро роботань кисэ казезь МР-нь Почетонь грамотасо. Течи сон минек инженек.

Николай Яковлевич,  зярдо теевсь «Од вий» предприятиясь ды мекс истя лемдинк?

– «Од вий» велень хозяйствань предприятиясь теевсь «Наша Победа» колхозонть юрсо. 2006 иестэ «Межрайгазонь» прявтось Владимир Семёнович Винтовкин арсесь теемс велень хозяйствань предприятия. Лементь муизь Орданьбуень райононь народной образованиянь икелень прявтось Галина Явкина ды «Межрайгазонь» прявтось В.С.Винтовкин. Мерян, те од лемесь пек вечкевсь райононь эрицятненень. Ды моненьгак вечкевсь! «Од вий» лемесь гайги виевстэ ды весенень максы кемема вандынь чинтень.

Николай Яковлевич, «Од вий» велень хозяйствань предприятиянть зяро модазо?

– Минек мельга кемекстазь 352 гектарт мода. 250 гектартнэнь саинек велень эрицятнень пельде. Тень кисэ эрьва иестэ сеть эрицятненень, кинь пельде саинек арендас модатнень, макстано сюро. Мезе паро, течинь чис хозяйствасонть тевтне молить вадрясто.

Тынь покш мель явтадо скалонь трямонтень. Хозяйствасонк ракшатнеде ламо-аволь?

– «Од вий» велень хозяйствань предприятиясонок лововить 97 скалт. Эйстэст 63 – потявтовицят. Мерян, скалтнэнь мельга пштистэ ваныть райононь ветеринаронь службань важодицятне. Минек эсенек арась истямо важодиця. Мельганок кемекстазь ветеринаронь службань врачось Галина Михайловна Любушкина. Сон весементь теи хозяйствасонть  ракшатнень шумбракс улемга.

Николай Яковлевич, тынк «Од вий» предприятиясонк зяро важодицятнеде?

– Минек коллективесь аволь покштнестэ. Лововить 7 ломанть. Тесэ а кода а ледстямс трактористтнэнь Геннадий Иванович Татаровонь, Геннадий Иванович Князькинэнь. Сынь эрьва мейсэ докат.

Ёвтаса, Геннадий Иванович Татаров – тескень, Луньга велень. Сон чачсь 1958 иестэ. Тонавтнесь Орданьбуень автошколасо. Парсте тонавтнизе трактористэнь тевенть. Малав ниленьгемень иеть важоди МР-нь агропромышленной комплекссэнть. Те шканть перть Геннадий Иванович важоди эрьва кодамо тракторсо, комбайнасо.

 «Од вий» велень хозяйствань предприятиясонть умок важоди бухгалтерэсь Галина Алексеевна Судакова. Сон икеле потявтсь скалт. Течи – «Од вий» хозяйствань прявт бухгалтер.

Галина Алексеевна рузонь Анютина велестэ. Ней эрзякс корты истя парсте, велень эрицятнестэ овсе а явови. Мон, келя, пинге эрян Луньга велесэнть, те шканть перть домкасто тонавтнинь эрзятнень койтнень-кирдатнень. Ды мезе паро, сынь а стувтовить.

Николай Яковлевич, тедеде зяро гектарт явозельть сюротнень алов, зяро саиде гектарсто?

– Тедеде минь виднинек 393 гектарт сюро. Эрьвастонть саинек  20 центнерт. Те мелень коряс пек седе ламо. Весемезэ минек утомтнес ускинек 620 тоннат сюро.

130 тоннат сюро ускинек «Велень кемекстамонь» фондонтень. Сынст икеле ней минек долконок арась. Мезе кенярдовты, тедеде кавто иес максынек долконок велень эрицятненень.

Николай Яковлевич, содатано, тынь эрьва скалсто потявтадо ламо ловсо?

– Те виде. Тедеде кемень ковс эрьва скалсто потявтынек 3,259 килограммат ловсо. Иенть прядовомс потявкстнэ  ламолгадыть 3600 килограммас. Тешкстаса, тедеде потявтынек 182 тоннат ловсо. Эйстэнзэ ламонть максынек ловсонь-оень заводов, малав 100 тоннат. Кеме ояксчисэ эрятано «Исток» велень хозяйствань предприятиянть марто, конань прявтсо Алексей Юрьевич Сидякин. Сон ломанесь паро, валонзо кирди. Зярдояк а манятанзат. Истятнэнь марто  свал важодемс паро.

Николай Яковлевич, тедеде кода важодсть сюронь кастыцятне?

– Сеске мерян, вадрясто. Кода зярдояк. Велень хозяйствань ды продовольствиянь кенярксчисэнть, кона ютавтозель Саранскойсэ, минек хозяйствань важодицятнень шнызь республикань прявттнэ. Моньгак эзимизь стувто. Тень макссть Мордовия Республикань Почетонь грамота.

Тешкстаса, тедеде сюро миинек 1 миллион 200  тёжат целковоень питнес, ловсо – 1 миллион 766 тёжат целковоень питнес. Те, арсян, а берянь невтевксэсь.

Арсян, а берянь кеме база путыде сы иентеньгак?

– Алкукскак, истя. Ракшатненень теле лангс анокстынек 30 тоннат тикше, Чувашия Республикань Алатырьстэ раминек сенаж, Ромодановань райононь сахарозаводстонть раматано жом, лия мезе. Нурькинестэ меремс, ракшатне коромтомо а кармить аштеме.

А кода а ледстямс ракшатнень мельга якицятнень Николай Михайлович Гостяевень, Николай Геннадьевич Князькиэнь. Сынь тевест топавтыть пек вадрясто.

Николай Яковлевич, хозяйствасонк техникась паро-аволь?

– Паро. Тесэ «Е-303» тикшень ледемкась, «Дон-1500» зярыя комбайнатне, МИЗ-1221, МТЗ-80 трактортнэ. Неть трактортнэнь туртов улить велень хозяйствань инвентарь: сеялкат, модань кавшакавтыця культиваторт ды истя седе тов.

Тедеде сексня шкастонзо видинек 150 гектарт озимойть. 120 гектарт товзюро ды 30 гектарт розь.

Нурькинестэ меремс «Од вий» велень хозяйствань предприятиясь эри вандынь чиденть арсезь…

– Видестэ кортатадо.

Интервьюнть саизе

Петр Зиновьев       

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...