Рубрикатор

Развитие АПК Лембе валт велесэ важодицятненень
Лембе валт велесэ важодицятненень

 

Ютазь пецясто Республикань Культурань Кудосо ютавтозельть покш промкс ды кенярксчинь концерт, кона алтазель Велень хозяйствань ды перерабатывающей промышленностень чинтень. Те чистэнть велень трудий ломантнень  чествовасть республикань прявттнэ, Мордовиясо Прявт федеральной инспекторось М.С.Сезганов. Кенярксчинтень ламо инжеть сакшность Россиянь регионтнэстэ – Мордовиянь крестьянтнэнь партнёртнэ.

Республикань агропромышленной комплекссэ важодицятненень поздоровт ёвтась МР-нь Прявтось В.Д.Волков. Сон тешкстызе,  тедеде республикань аграрийтне важодсть виевстэ. Те  иень вейксэ ковс велень хозяйствань ды вейсэнь секторсо продукциясь ламолгадсь 9,5 процентс. Пищевой ды перерабатывающей промышленностень предприятиятне нолдасть продукция мелень коряс 12 проценттэ седе ламо.

 

Велень хозяйствасо весе важодицятне весементь тейсть седе ламо сюронь саемга, ламбамо якстерькаень кастомга, ламо ловсонь потявтомга. Истя, кода зярдояк, пурназь 1 миллион 300 тёжат тоннат сюро, мезесь мелень коряс  13 проценттэ седе ламо, эрьва гектарсто саезь 29,3 центнерт сюро, эли 3,7 центнердэ мелень коряс седе ламо. Тень коряс Равчиресэнть минек  республикась саи васенце  тарка. Ламо сюро сайсть Рузаевкань райононь «Исток» ды «Агро-Союз-Красное Сельцо», Отяжелень райононь «Сабанчеевское» (те предприятиянь прявтось Д.Н.Игушкин казезь «МР-нь Государственной премиянь лауреат» почётонь лемсэнть) велень хозяйствань предприятиятне, косо эрьва гектарсто сайсть 50 центнерт, Инсаронь райононь индивидуальной предпринимателень хозяйстватне – эрьва гектарсто 70 центнерт сюро!

Покш изнявкст таштасть зёрнакс кукурузань кастыцятне. Тедеде эрьва гектарсто саезь 75 центнерт. Те невтевксэнть коряс республикась истя жо сехте вадрятнень ютксо: Россиясо – 8-це таркасо, Равчиресэнть – омбоце. Весемезэ пурназь 192 тёжат тоннат, мелень коряс 54 проценттэ седе ламо. Эйстэст 72 тёжат тоннатне од технологиянь коряс ванстомс каязь полиэтиленэнь рукавс, косо ванстовить весе питательной элементтнэ. Ламо зёрнакс кукуруза – 41,5 тёжат тоннат, эрьва гектарсто 103 центнерт, саезь Лямбирень райононь «Агрофирма «Октябрьская» предприятиясо. Весемеде ламо зёрнакс кукуруза, 125 центнерт, саезь Ицялонь  райононь «Дружба» велень хозяйствань предприятиясо.

Кецявтыть эсь важодемасост ламбамо якстерькаень кастыцятне. Тедеде эйстэнзэ таргазь 1 миллион 160 тёжат тоннат, эрьва гектарсто саезь 467 центнерт ламбамо якстерькай. Те – Равчиресэнть весемеде ламо. Ламбамо якстерькаень кастыця 25 регионтнэнь ютксо Мордовиясь урожайностень коряс кавксоце таркасо. Те невтевксэнть таштамосо покш таликаст «Мордовское агропромышленное объединение» агрохолдингенть, Ицялонь райононь «1 Мая» ды «Сельхозтехника» велень хозяйствань предприятиятнень. Нолдазь 5 тёжат 300 тоннат  пиже кснав. Тесэ явовить Лямбирень райононь «Нива» велень хозяйствань предприятиясо важодицятне. Сынь эрьва гектарсто сайсть 43 центнерт.

Ракшань трямосо коромонь базанть кемекстамга тедеде анокстазь, кода меляткак, 1 миллион 350 тёжат тоннат сенаж ды силос, весемезэ эрьва скалс анокстазь 30 центнерт кормовой единицат. Республикань аграрийтне кеме юр тейсть 2017 иень урожаенть алов. Видезь 182 тёжат гектарт  озимойть. Сатышка каязь яровой культурань видьмекст – 65 тёжат тоннат.

– Растениеводствасо истят покш результаттнэ таштазь, нама, велень хозяйствань вадря техниканть вельде, – тешкстась МР-нь Прявтось В.Д.Волков. – Хозяйстватнесэ тракторонь паркось иестэ иес покшолгады. Течи велень хозяйствань предприятиятнесэ лововить 3 тёжат  тракторт, сюронь урядамонь 1 тёжа комбайнат, коромонь урядамонь 250 комбайнат, 1,5 тёжат сталмонь усксиця автомашинат. Тедеде республикань аграрийтне рамасть 50 од тракторт ды 40 комбайнат.

Аволь умок Московсо ютавтозель «Агросалон – 16» выставкась. Тосо участвовасть Мордовиянь прявттнэ, республикань велень хозяйствань покш предприятиянь прявттнэ. Ютавтозельть техникань нолдыцятнень марто переговорт. Тень кувалма 2017 иестэ Мордовиясь получи аволь покш питнесэ «Акрос-595» классонь сюронь урядамонь 40 комбайнат.

А кода а ледстямс цецянь кастоманть. 2016 иестэ Кадошкина велесэ теплицань комплекссэнть ютавтозель покш витнема. Ушодозь газогенерационной подстанциянь строямось. Сы иестэ арсеви витнемс Теньгушевань теплицанть, кона зани 3 гектарт, истя жо ушодомс од теплицань строямонть.

Велень хозяйствань предприятиятнесэ животноводствань продукциясь ламолгадсь 10,6 процентс. Весе категориянь хозяйстватнесэ ракшань  ды саразонь сывелень нолдамось иезэнзэ карми 265 тёжат тоннат. Те – 6,4 % седе ламо мелень коряс. Сывелень нолдамонть ламолгавтызь «Чамзинская» нармунень фабрикась – 25%, «Агрофирма «Октябрьская» предприятиясь – 11%. Тувонь сывелень нолдамось ламолгадсь 15 процентс. Теньсэ покш таликазо «Мордовский бекон» агрохолдингенть. Учневи саемс 1 миллиард 425 миллионт штукат алт.

Мордовиянь велень хозяйствань предприятиятнесэ 13 тёжат тоннас ламолгадсь ловсонь саемась ды ней миезь 337 тёжат тоннат. Вейсэнь секторсо зняро ловсо саезь арасель 22 иеть. Эрьва скалсто учневи потявтомс малав 5570 килограммат, ютазь иенть коряс ловсось ламолгадсь 300 килограммас.

Уш зярыя иеть весемеде ламо ловсо потявтыть Ицялонь районсо. Тесэ вейксэ ковс потявтсть 2500 тоннат, мелень коряс седе ламо. Истя жо мелень коряс седе ламо ловсо потявтозь Сыре Шайговань, Чаунзань, Инсаронь, Дубенкань, Отяжелень ды Лямбирень районтнэсэ. Весемеде ламо ловсо потявтсть Ицялонь райононь «Дружба» (8262 килограммат), Рузаевкань райононь «Агро-Мир» (7365 килограммат), «Исток» (7040 килограммат) ды велень хозяйствань лия предприятиятнесэ.

МР-нь Прявтонть В.Д.Волковонь валонзо коряс, поладови племенной животноводствань кеме базань теемань коряс важодемась. Тедеде скалтнэнь арсеви ламолгавтомс 18 тёжат пряс. Государственной племенной регистрасо регистрировазь скалонь ды тувонь трямонь коряс племенной заводт. Целанек республикань касомань эскелькстнэ вадрят. Тедеде строязь Ковылкинань районсо «Мордовский племенной центр» тувонь комплексэнь омбоце очередесь, Ицялонь районсо «Агро-Мир» хозяйствасо потявтовиця 500 скалс фермась. Эрямос парсте совавтовить Лямбирень райононь «Агрофирма «Октябрьская» нармунень фабрикань инвестициянь проекттнэ – бройлерэнь кастомань колмо площадкань строямось. Те иень 1 кварталсто Пензяткасо тевс нолдазь бройлерэнь кастомань васенце площадкась. Прядовома лангсо Болотникова велесэ омбоце площадкань строямось.

Чаунзань райононь Вишка Маризь велесэ «Юбилейное» ООО-сь строясь ды тевс нолдась площадка, конасонть 14 корпуст, весемезэ кармить кирдевеме 9800 саразт. Неень шкасто истямо площадка строяви Сырятина велесэ.

Течи кецявтыть тевтне пищевой ды перерабатывающей промышленностьсэ. Те иень вейксэ ковс сынь эсь продукция мисть 45,6 миллиардт целковоень питнес, эли 16 процентс седе ламо мелень коряс.

В.Д.Волков шнынзе мясоперерабатывающей отраслясо важодицятнень. Сынь нолдасть 16,3 миллиардт целковоень питнес продукция. Колбасань нолдамось ламолгадсь мелень коряс 18 процентс ды лиссь 70,8 тёжат тоннат.

Кецявтыть ловсонь переработчиктнеяк. Продукция нолдасть 8,3 миллиардт целковоень питнес, нолдазь 12 тёжат тоннат сыра, скалоень нолдамось ламолгадсь 12 процентс.

Тешкстасынек, республикань аграрийтне покш мель явить аволь ансяк продукциянь ламолгавтомантень, истя жо сонзэ вадрячинтеньгак. Кевейкее предприятиятне уш получасть права нолдамс эсь продукцияст «Бренд товаров РМ» знаконть ало. Велень хозяйствань продукциянь нолдыцятне свал участвовить раськеютконь ды весероссиянь покш выставкатнесэ ды конкурстнэсэ. Аволь умок Московсо «Сырнень сёксь» Весероссиянь выставкасо минек промышленной предприятиятне сайсть 36 медальть, эйстэст 26 сырнень ды 10 сиянь. Теде башка, кавксоце ие мельцек республикантень максови Гран-прись – те престижной выставкань сехте покш казне.

В.Д.Волков истя жо покш мель явсь велетнесэ эрямонть вадрялгавтомантень, хозяйстватнес од специалисттнэнь анокстамонтень.

– Минек масторось кодамо стакачи марто бу аволь вастово, кодат бу покш задачат авольть аште икеленек, кемтяно, велесь ульнесь ды карми улеме Россиянть кеме нежекс, – тешкстызе МР-нь Прявтось В.Д.Волков.

Мордовиянь аграрийтнень кенярксчисэнть теезельть районтнэнь ды АПК-нь предприятиятнень, велень администрациятнень, студентэнь велень хозяйствань отрядтнэнь ютксо пелькстамонь итогтне. Казнетнень макснесть МР-нь Прявтось В.Д.Волков, МР-нь Госсобраниянь Председателесь В.В.Чибиркин, МР-нь Правительствань Председателень васенце полавтыцясь – Велень хозяйствань ды продовольствиянь министрась В.Н.Сидоров, МР-нь Профсоюзонь федерациянь прявтось Мария Голиченко. Истя, «Район эффективного ведения сельскохозяйственного производства» номинациясонть изницякс лиссь Чаунзань районось, «Район-победитель отрасли растениеводства» номинациясонть изницякс лиссь Лямбирень районось. Эсь зонасонть истя жо лиссь Покш Игнатовань районось. «Район-победитель среди производителей молока» изницякс лиссь Сыре Шайговань районось. Ламбамо якстерькаень кастыцятнень ютксо изницякс лиссть Ицялонь ды Отяжелень районтнэ. «За эффективное ведение сельскохозяйственного производства среди сельхозпредприятий» номинациясонть изницякс лиссь «Агрофирма «Октябрьская» предприятиясь. Прявтонтень И.С. Андиннэнь максозь покш казне ды «За возрождение села» МР-нь Прявтонь почётной призэсь. Истямо жо призэсь максозь 15 ломаннень.

Велень хозяйствань кой-кона прявттнэ казезь Славань II ды III степенень ордентнэсэ. Ютксост – Покш Игнатовань райононь «8 Марта» велень хозяйствань прявтось А.Н.Дорофеев.

Студентэнь механизированной отрядтнэнь ютксо изницякс лиссь МГУ-нь Механикань ды энергетикань институтонь «Нива» отрядось, косо лововить 15 ломанть, омбоце таркасонть – Торбеевань ловсонь колледжень «Импульс» отрядось, колмоцесэнть – Краснослободскоень аграрной колледжень «Механик» отрядось.

«Мордовский бекон»  холдингень генеральной директоронтень В.С.Бирюковнень максозь «РФ-нь велень хозяйствань заслуженной роботник» почётонь лемесь.

Мордовиянь аграрийтненень поздоровт ёвтасть инжетне. Неть – «Куйбышев-Азот» предприятиянь генеральной директорось Виктор Герасименко, Санкт-Петербургонь тракторонь заводонь представителесь М.С.Ляхов, «Росагролизингень» генеральной директоронь васенце полавтыцясь Л.И.Приданова, «Гомсельмаш» заводонь представителесь Ю.Л.Руденков, Нижней Новгородонь Законодательной Собраниянь АПК-нь коряс комитетэнь председателесь Н.П.Шкилев, лиятне.

Мордовиянь аграрийтненень РФ-нь Велень хозяйствань министранть А.Н.Ткачевонь поздоровонзо ловнызе тесэнь департаментэнь директорось Пётр Чекмарев.

Аграрийтнень кеме партнёртнэ велень хозяйствань предприятиятненень ды сехте вадря трактористтнэнень макссть питней казнеть.

Меельцекс невтезель концерт.

Пётр Зиновьев

 

Новости

Студентэнь Парад

Россиянь студенчествань парадось – те Россиясо ды весе масторлангонть келес студентэкс алтамонь сехте покш, лия ёнов а молиця од ломанень кенярксчи, конась вейсэнди кементь тёжат студентт Россиянь ламот оштнесэ. Студенчествань васенце парадось ульнесь Московсо 2002 иестэ ды кемголмово иень перть ютавтовсь минек масторонь прявтошсонть.

Подробнее ...
 
Кросс

Сентябрянь 16-це чистэ Мордовиясо, кода масторонь лия регионтнэсэяк, тешкставсь Чиемань весероссиянь чись. Тень лувсо ютавтовсь «Нациянь кросс». Саранскойсэ стартонтень лисекшнесть малав 4,5 тёжат эрицят. Ютксост ульнесть виев спортсмент, общеобразовательной школатнесэ тонавтницят, вузонь, ссузонь студентт ды Мордовиянь муниципальной районтнэстэ чийнемантень мелень явицятне. Советской площаденть лангсо пелькстамотнесэ участвовицятненень лембе валт ёвтасть Мордовия Республикань Спортонь ды физической культурань министрась Владимир Киреев, Саранскоень Администрациянь физкультурань ды спортонь управлениянь прявтось Роман Дубровин, пелькстамотнень директорось Михаил Храмов ды прявт судьясь Вячеслав Мочалов.

Подробнее ...
 
Полицейскойтненень – автомобильть

Саранскоень Советской площадьсэ ютась Мордовиянь МВД-нь сотрудникень развод. Торжественной церемониясонть республикань полицейскойтненень максозь 49 од автомашинат. Участникекс ульнесть В.Д.Волков ды внутренней тевень министрась Юрий Арсентьев.

Подробнее ...
 
Ардомань картат

Н.П.Огарёвонь лемсэ МГУ-нь студенттнэнь ды аспиранттнэнь туртов полавтовсь ардомань картань получамонь лувось. 2017 иень сентябрянь 1-це чистэнть саезь сынь максовить справкань коряс, конась кемексты ардомань картань получамонь праванть.

Подробнее ...
 
Ветеранонь хоккей

Ютазь оймсема читнестэ Саранскойсэ ютась хоккейсэ налксема. Вастовкшность «Ветераны Мордовии» ды «Легенды хоккея» командатне.

Налксемадонть икеле участниктненень поздоровт ёвтась Владимир Волков.

Подробнее ...