Рубрикатор

Развитие АПК АЛЕКСАНДРОВКА ВЕЛЕНТЬ ВАКССО...
АЛЕКСАНДРОВКА ВЕЛЕНТЬ ВАКССО...

 

 

…Лямбирень райононь Александровка веленть вакссо паксясь. Тесэ байтяк тракторт, автомашинат, комбайнат, велень хозяйствань инвентарь. Ды аволь ансяк минсенек – омбомастороньгак. Тей ардыть ды ардыть ломань марто автомашинат, автобуст… Сынь капшить республикань агропромышленной комплекссэ важодицянь кенярксчинтень – «Паксянь чинтень».

«Паксянь чись» ушодовсь 13.00 чассто. МР-нь Правительствань Председателесь В.Ф.Сушков ды сонзэ васенце полавтыцясь, Велень хозяйствань ды продовольствиянь министрась В.Н.Сидоров ванкшноманть ушодызь велень хозяйствань ракшатнестэ, конатне кирдевить республикань вельхозпредприятиятнесэ. Весе ракшатне справнат, шумбрат.

«Паксянь чинтень» сыцятне ды В.Ф.Сушков кувать аштесть Ковылкинань райононь «Крутенькое» велень хозяйствань предприятиянь теевкстнэнь вакссо. Те предприятиядонть парсте содыть аволь ансяк минек республикасо, сонзэ томбалеяк. Хозяйствась иестэ иес виензы. Тесэ ламо кирдевить скалт. Ловсонть стякодо а миить. Хозяйствасонть теезь переработкань паро комплекс. Тесэ ули оень теемань предприятияст, колбасань нолдамонь цехест. Истя, течи «Крутенькое» предприятиясь нолды 32 лемень продукция. Хозяйствань прявтось – Р.Х.Чураков.

Масторонь келес истя жо содавикс Рузаевкань райононь «Ривза» хозяйствась. Тесэнь ловсонть, сывеленть лия продукциянть рамсить Санкт-Петербургонь, Самарань, Ульяновскоень, Нижней Новгородонь ды лия региононь эрицятне.

МР-нь Правительствань Председателесь В.Ф.Сушков ды «Паксянь чинтень» сыцятне кувать аштесть республикань ветеринароной службань техниканть, оборудованиянть  вакссо. Сынь тонавтнесть кода важоди те эли тона оборудованиясь, кона пек лезды ванстомс ракшатнень апаро орматнеде ды зяро ломанть важодить ветеринаронь постсонть. Теде ды лиядо евтнесь Республикань ветеринаронь службань прявтонь тевень топавтыцясь В.Г.Соколов.

Мейле «Паксянь чис» сыцятне ванкшнызь техниканть, кона важоди республикань паксятнесэ. Васенцекс понгсть ламбамо якстерькаень таргамонь комбайнатне, конатне кирдевить «Ромодановосахар» предприятиясонть. Генеральной директоронть А.И.Атласовонь валонзо коряс, комбайнатнень питнепест арась. Сынь чизэнзэ таргить 40 гектарт лангсто ламбамо якстерькай. Колмо комбайнатне – гусеничнойть. Весемезэ «Ромодановосахар» предприятиясонть ламбамо якстерькаень таргамонь вете комбайнат.

МР-нь Правительствань Председателесь В.Ф.Сушков покш мельсэ ванкшнынзе трактортнэнь, конатнень нолды Саранскоень экскаваторонь заводось. Сынь овсе а явовить омбомасторонсетнеде. Текенень, Мордовиянь экскаватортнэ ней роботыть аволь соляркасо – газсо. Истят тракторт уш нолдазь кеменде ламо.

Истя жо кенярдовтыть Саранскоень автосамосвалонь заводонь автомашинатнеяк. Од самосвалтнэс теезь мультилифт гидравликанть вельде. Сон шождынестэ кепеди ды каи 5 тоннатнень. Кецявтыть заводонь автовышкатнеяк. Мерема, Саранскоень самосвалтнэ ды автовышкатне омбо масторонсетнень эйстэ аволь питнейть.

Велень хозяйствань техникань эрьва выставкасонть, конатне ютавтневить Мордовиясо, свал эрсить Санкт-Петербургонь «Кировец» предприятиясто. «Паксянь чистэнтькак» сынь кецявтызь пурнавозтнень. «К-700» покш тракторонть питнепезэ арась велень хозяйствань покш предприятиясо. Те тракторось соки, види, уряды паксят. Виде, питнезэяк аволь вишкине – 8 миллионт.

Экспонаттнэнь ванкшномадо мейле МР-нь Правительствань Председателесь В.Ф.Сушков кузсь сцена лангс ды панжизе «Паксянь чинть». МР-нь Прявтонть В.Д.Волковонь пельде евтась агропромышленной комплекссэ важодицятненень поздоровт,  арсесь кеме шумбрачи ды тедеде паксятнестэ саемс ламо сюро, ламбамо якстерькай.

– Кецявты, Мордовиясо  течи ютавтови Агрохимической весероссиянь чись, – мерсь Владимир Федорович, – конасонть  ванкшновить сюронь кастомасо талновтыця кевкстематне. Выставкасонть невтневи минек масторонь 30 регионсто 70 компаниянь 180 техника. Тесэ жо невтневи одось, конань нолдыть Мордовиянь предприятиятне: «Автосамосвалось», «Сарэксэсь», «Агромашось»… Выставкась невти: улить вийть РФ-нь Президентэнть В.В.Путинэнь мереманзо топавтомасо.

Мейле В.Ф.Сушков ламо аграрийтненень максынзе МР-нь Прявтонь Благодарносттнень. Ютксост – Лямбирень райононь «Племзавод «Александровский» ОАО-нь главной агрономось А.Ф.Спицин, Рузаевкань райононь «Ключ-Сузгарьевский» СХПК-нь трактористэсь Н.Г.Сулеев, Ицялонь райононь «Сельхозтехника» ООО-нь трактористэсь И.А.Еделев, «Государственный центр агрохимической службы «Мордовский» ФГБУ-нь главной агрохимикесь Л.Л.Панькина ды лиятне.

«Паксянь чинтень» сыцятненень поздоровт евтась РФ-нь велень хозяйствань растениеводствань, механизациянь, химизациянь ды растениянь идемань департаментэнь прявтось П.А.Чекмарев. Агропромышленной комплексэнть виевгавтомасо  покш таликанть кисэ сиянь медальть  макссь Ицялонь райононь «Культура» ООО-нь прявтонтень С.Б.Быстровнень, Ельникень райононь Ильичень лемсэ ООО-нь прявтонтень И.А.Кидяевнень. Вана Темниковань райононь «Аксел» ООО-нь шоферэнтень максозь «Почетный работник агропромышленного комплекса РФ» почетонь лемесь.

Сцена лангс тердевить «Лучшее свеклосеящее хозяйство России 2015 года» конкурссо изницятне. Неть – Отяжелень райононь «Светлый путь» СХПК-нь прявтось Н.И. Рябов, теке райононь «Сабанчеевское» ды «Аловское» ООО-нь прявтось Д.Н.Игушкин, теке жо райононь «Сосуновская Нива» ООО-нь прявтось Ю.А.Евдокимов, Ицялонь райононь «Ичалки» ЗАО-нь прявтось А.В.Муромцев, теке райононь «Агропромсервис» ООО-нь прявтось В.И.Нужнов. Казнетнень максынзе Россиянь сахаропроизводителень союзонь Правлениянь председателесь А.Б.Бодин.

Мейле Весероссиянь Агрохимической паксянь чинть ды республикань Паксянь чинть эрзя-мокшонь моданть лангсо ютавтоманзо честьс максовсь салют.

Обедтэ мейле кенярксчись поладовсь. МР-нь Правительствань Председателесь В.Ф.Сушков ды пурнавозтне ванкшнызь республикань районтнэнь изнявкстнэнь. Владимир Федорович лотксесь эрьва райононь экспозициянть ваксс, кортнесь сынст прявттнэнь марто. Вана Покш Березникень райононь экспозициянть ванкшномсто весенень вечкевсть войнань ды трудонь ветеранонть Н.Г.Никитинэнь кодазь картне. Тесэ пурнавозтнень ежост витсь Шугурова велень «Эрзяночка» ансамблясь. Самодеятельной артисттнэ Ромашкина Мария, Ромашкина Вера, Семенов Юрий, Суняйкин Александр, Николаева Анна, Ромашкина Анна морасть эрзянь морот.

Тесэ вастневинек Отяжелень райононь «Од азор» крестьянонь-фермерэнь хозяйствань азоронть А.И.Кандрашкин марто.

– Мон те кенярксчинтень сакшнан эрьва иестэ, – евтни Александр Иванович. – Тесэ вастневан ялган марто. Тейнян ояксчинь сюлмот тракторонь, видьмексэнь нолдыця заводонь прявттнэнь марто.  Зярс тевем молить а беряньстэ. Тедеде путынек 180 гектарт модамарь. Арсетяно саемс эрьва гектарсто 330 центнерт. Хозяйствасонть важодить 12 ломанть.

Тесэль крестьянонь-фермерэнь хозяйствань азорось В.Ю.Кабаев, сон – Покш Игнатовань районсто. Мельганзо кемекстазь 2000 гектарт мода.

– Лангсонзо касттано сюро, кукуруза, – евтни Владимир Юрьевич. – Техниканок ули. Комбайнанок ансяк «Ниват». Маласо шкасто арсетяно сынст полавтомс.

Районтнэнь ванкшномадонть мейле весе пурнавсть паксянтень, косо эрявсь ледемс тикше. Пурнавозтне эсь сельмсэ неизь, кода важодить трактортнэ тикшень ледемасо, коромонь анокстамосо. Ульнесть ледицят пелюмасояк.

Истя жо ваннозель мелиоративной техникась.

…Чокшне енов «Паксянь чинь» аграрийтне ютасть важодеме Октябрьской райононь Озерной поселкав, «Тепличное» ГУП-в. Тесэ сынь ванкшнызь тепличной комплексэнть ды энергоцентранть.

 

Петр Зиновьев

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...