Рубрикатор

Развитие АПК
«Восток» МАПО-сь» изнявкстнэнь лангс а лоткси

 

 

Умок ульнесь меленек пачкодемс Отяжеле ёнксонь Ламбаське велев ды теевемс содавиксэкс сень марто, кода важодить «МАПО «Восток» велень хозяйствань предприятиясонть. Неть читнестэ гайневтинек хозяйствань прявтонтень А.В.Трошиннэнь ды ёвтынек меленек-арсеманок.

Садо, карматано учомонк, – мерсь Александр Владимирович.

Ды вана минь Ламбаське велесэтяно. Сон минек вастымизь лембестэ. Ушосо чись, мерят, аволь сёксень – кизэнь. Чипаесь калясь вадрясто. Васняяк содавтынек А.В.Трошинэнь. Сон ёвтнесь эседензэ, хозяйствадонть.

«МАПО «Восток» велень хозяйствань прявтонь тевтнень топавтомо ушодсь аволь умок. Вейке иеяк эзь юта.



А.В.Трошин велень хозяйствань алкуксонь специалист. Тенень алтызе весе эрямонзо. Сон чачсь 1970 иестэ Чаунзань райононь Апраксина велесэ. Тесэнь средней школанть прядомадо мейле тонавтнеманзо поладызе Мордовской университетэнь Аграрной институтсонть агрономия специальностенть коряс, косо прянзо невтизе вадря студентэкс.  Трудонь васенце  эскелькстнэнь теинзе Чаунзань райононь «50 лет ВЛКСМ» колхозсонть. Зярыя шкань ютазь ушодсь важодеме директоронь полавтыцякс теке райононь «Рассвет» велень хозяйствань предприятиясо, кона Покш Маризь велесэ. Те тевенть топавтсь 2010 иес. 2010 иестэ саезь кармась те хозяйствань директорокс.

«МАПО «Восток» хозяйствась теевсь 2007 иестэ, – ёвтни А.В.Трошин. – Эйзэнзэ совить Отяжелень райононь Трокскужонь, Ламбаськень, Целпановань, Аловелень, Пенькозаводонь; Ицялонь райононь Пардале, Вечкезьвеле, Инелей, Тарханова, Ведянь, Калиновка, Резоватова, Лада, Маркина велетнень модатне. Весемезэ мельганок кемекстазь 18 тёжат гектарт мода. Лангсонзо кастано 10,500 тёжат гектарт сюро, 2,600 гектарт ламбамо якстерькай, 500 гектарт силосокс кукуруза, 100 гектарт зёрнакс кукуруза, 320 гектарт вейке иень тикше ды 1,500 гектарт ламо иень тикше, 2019 иестэ  видинек 270 гектарт рапс. Хозяйствасонть важодить малав кавтосядот ломанть. Сынь пек вечксызь эсь тевест. Мартост эрьва мезесь топавтови шождасто.

Александр Владимировичень валонзо коряс, хозяйствасонть эрямос совавтови велень хозяйствасо одось. «МАПО «Восток» велень хозяйствань предприятиясь рамась кавто од сеялкат, конатне тевс нолдавить сокамстояк, видемстэяк. Видемстэ эйсэст усксить виев тракторт. Те тееви летькенть ванстомга. 2019 иень тунда видезельть зярыя паксят ды сынь удаласть. Истя, шужонь урядамсто эрьва гектарсто саезь 45 центнерт сюро. Товзюронть урядамсто эрьва гектарсто саезь 25,5 центнерт сюро.

Весемезэ саинек 29 тёжат тоннат сюро, – ёвтни «МАПО «Восток» ООО-нь прявт агрономось Н.И.Слугин. – Сюро видинек истят сортонь: «Московская-39», «Зазерский-85», «Скипетр». А мезть сёпомс, тедеде сюрось удалась.



Подробнее...
 
Кизэнь чись ие анды

                                         

«Элеком»

АПО-нь

алкуксонь

профессионалтнэ

 

Кадык пертьпельксэсь неть читнестэ а кенярдовты лембесэ, ялатеке велень хозяйстватнесэ августонь меельце читне ды сентябрянь ушодксось – сехте пси шка. Кие бажи прядомс сюронь урядамонть, кие уш сыргась паксятнень соксеме ды озимойтнень видеме. Тевтне лаказь лакить Ромодановань райононь «Агропромышленное объединение «Элеком» ОАО-нь «Трофимовщинское» отделениясонтькак. Тов минь пачколинек кизэнь меельце читнестэ. Вастымизь «Элеком» АПО-нь велень хозяйствань производствань коряс прявтось Иван Александрович Базакин. Те таркасонть Иван Александрович аволь умок, ялатеке агропромышленной отраслянть марто сон сюлмавозь малав комсь иеть. 2000 иестэ, Н.П.Огарёв лемсэ МГУ-нь Агроинститутонть прядомадо мейле, зярыя шка важодсь тиринь Орданьбуень райононь Куцян велесэ, мейле тукшнось аламошкас Москов ёнксов ды курок велявтсь. «Тиринь модась тердимим мекев», – корты Базакин. Од зоотехникесь поладызе роботанзо «Октябрьская» Агрофирмасонть, кассь отделениянь управляющеекс. Тедедень тунда Иван Александровичнень сась энялдома «Элеком» АПО-стонть, куватьс апак арсе, согласясь. Тевесь содавикс, вечкевикс, ансяк ней Базакинэнь лавтов лангсонзо ниле покш отделеният: Ромодановань райононь Трофимовщинасо, Алтары, Курмачкасы ды Ицялбуень Береговые Сыреси велетнесэ.

Ромодановасо «Элекомонь» офисстэ Иван Александровичень а мусак, сон свал чары лангсо, чинь-чоп ардтни отделениятнень паксятнева ды ферматнева. Кадык а пек васолот отделениятне, ялатеке вайгельпетнеде чизэнзэ ламо пурнавить. Вастовозь мартонзо, сон сеске сыргавтымизь килангов. Чись псиль, кода корты валмеревксэсь, самай кизэнь истят читне ие андыть. Паксятнева тия-тува неявсть комбайнат ды тракторт. Пачкодинек вейкенть малас. Валерий Валентинович Борисов механизаторось ансяк улкоть прядызе неть таркатнева комбайнасо товзюронь пивсэманть, ней уш аноксты моданть озимоень видемс, курок уш ушодыть чиньжарамонь пивсэмеяк. Валерий Валентинович – Ицялбуень Селища эрзянь велень цёра, механизаторокс важоди 1988 иестэ саезь. Истят ломантнеде мерить: «алкуксонь профессионалт» ды рузкс – «трудоголикть». Роботы В.В.Борисов сменасо, ве чи сон, омбоце чистэнть – напарникезэ. Сменазонзо эряви сокамс 60-80 гектарт. Весемезэ жо хозяйствасонть озимойтнень алов арсить кадомс 3 тёжат гектарт.

Кодашка кемечи, вий эряви неть ломантненень, минь неинек эсенек сельмесэ. 30 градусто ламо пси, пуль, тракторонь гайть… Кеменьшка минутань перть тосо улезь, сы мель напустямс тосто сэтьме ды экше таркав. Валерий Валентиновичень рунгованзо ливезесь чудезь чуди, раужо пуль марто чисэнть калязь чамасонзо ансяк пейтне ашолдыть. Ялатеке мизолды ды каштансто ёвтни аволь эсензэ – кавто цёранзо ланга, конатне тусть тетяст киява: «Кавонест цёран прядызь Саранскойсэ Агроинститутонть, тонавтнесть агрономокс ды технологокс. Уш вишкапингстэ саезь бажинь сынст а кирдемс тевтеме. Эрьва кизэнь каникулатнестэ сайнинь паксяв, роботасть комбайнеронь лездыцякс, ильтинь армияв, кадык тосояк тонадыть цёрань алкуксонь тевентень – тиринь масторонь ванстомо ды идеме. Ней васенценть, Андрей марто, важодтяно вейке предприятиясо, сон комбайнер. Авасоло тесэ пивсы «ДОН-1500» комбайнасонть сюро. Омбоцесь, Олег, роботы Саранскойсэ «МАПО-Транс» ООО-сонть, МАЗ-нь ветницякс. Строи кить, ускси машинасонзо чувар, кевть ды сень, мезе эряви».

Кенярдтано, улить оштё минек велетнесэ алкуксонь цёрат, конатне сынськак роботадо а пелить ды тонавтыть тенень эйкакшосткак.

«Неть ломантнень лангсо, кода Борисов, кирдевитькак велень хозяйстватне. Сыненст меремс кавксть а эряви, весементь, мезес кундыть, тейсызь куроксто ды тевень содазь. Ломанесь а симиця, чарькодиця, ответственной. Ярмактнеяк сынст туртов урожаень пурнамо шкастонть пандовить а берянть», – ёвтни И.А.Базакин. Весе техникась хозяйствасонть сюлмавозь ГЛОНАСС системанть марто, ансяк сон трактортнэсэ ды комбайнатнесэ ашти аволь механизатортнэнь мельга пштистэ ванноманть туртов. «Трофимовщинское» отделениясонть нузялгалицят арасть, мекевлангт, тесэ весе важодицятне бажить теемс сюронь урядамонь сезонстонть седе ламо. «Эдь эрьванть зарплатазо ашти сеньстэ, зяро сон важоди ковозонзо», – тешксты Иван Александрович.

Борисов механизаторонть марто кортамодо мейле сыргинек авасоло важодиця «Джон Дир» тракторонть малас, конань песэ поводезель теке содавикс фирманть видемкась. Трактористэнтень Алексей Викторович Гогулиннэнь ды видицянтень Владимир Валерьевич Селивёрстовнень самай ускокшность Агрофирманть столовойстэ обед. Минь арсинек сынст а токшемс оймсема шкастост ды И.А.Базакин марто саинек курс се таркантень, косо эрьва чистэ колмоксть велень тружениктненень пидевить-паневить ды усковить паксяв ярсамо- ды симемапельть.

 

Важодемась – важодема, обедэсь жо – аравтозь шкань коряс

 

«Элеком» АПО-нь столовоесь ашти Трофимовщина велесэнть ды тосонь азораватне – кавто ават: прявтось – Надежда Ивановна Сальникова ды пидицясь – Вера Николаевна Винокурова. Сынь кавонест эрьва чистэ андыть-симдить малав сядо ломанть. Столовоесь роботы ансяк се шкастонть, зярдо ушодовить тевтне паксятнесэ. Тов ярсамо сыцятнеде а пек ламо, бути машинань ды тракторонь парконь важодицятне, весе пидевкстнэ-паневкстнэ жо ильтявить паксяв специальной фляжкасо, конась кирди ямонть-кашанть псинзэ. Обедэнть ды ужинэнть аватне усксить эрьва чинь 12 ды 17 чассто.

«Течи, саемга, каванясынек цёратнень сывель марто капста ямдо, кснавонь кашадо, голубцадо, умарень компотто. Кияк зярдояк оштё эзь музгорде, весенень вечкеви», – ёвтни Надежда Ивановна. А оштё столовоенть менюсо эрсить котлетат, эрьва кодат кашат, рисэнь плов, рестазь алт, куяронь ды помидоронь салатт. Минеккак эзимизь кадо обедтэме неть чевте седей, панжадо ойме аватне. Тантейть пидевксэст-паневксэст! Неяви сеске, роботыть оймень путозь! Весе эмежтнень канды эсензэ пирестэ сонсь Н.И.Сальникова, нама, а стяко, договоронь коряс. Секскак эрьва тунда сон путы эмежтнеде кавксть седе ламо. Сывеленть ды ловсонть жо комбайнертнэнь, трактористтнэнь андомс максы АПО-сь, кшиськак паневи «Элекомонь» паникудосо.

Столовоесь велесэнть ней теевсь аволь ансяк важодицятнень андома таркакс, меельце иетнестэ Трофимовщинань эрицятне ютавтнить тесэ эрьва кодат мероприятият: свадьбат, юбилейть, ледстнемань чить. Райцентрав оштё ардомс эряви, тесэ жо весементь анокстамс лезды столовоень прявтось: цётасы, зяро продуктат эрявить, кодат ярсамопельть васняяк эрявить пидемс-панемс, бути чачома чи – тонавты, мейсэ мазылгавтомс залонть… Ансяк кенярксчитнеде Трофимовщинасо ютавтнить кавксть седе аламо меельце килангов ильтямотнень коряс. Чами велесь, школавгак тедеде ансяк 11 эйкакш тусь, ризны седеесь тесэнь эрицятнень мазый, икеле пек сюпав велест кувалма. Вадря, ули косо важодемс, Агрофирмань отделениясь мельспаросо васты весень, кинь ули мелезэ роботамс.

Кавто сазорт – кавто

уцяскат

                                                                          



Надежда Ивановна Сальникова марто кортамсто столовоентень совась оштё вейке ава. Малав сазь, абунгадынек, вай, ды те омбоце Надежда Ивановна?! Карминек содавиксэкс: те сонзэ сазорозо Вера Ивановна, сынь кавтаськеть, кавто эрзянь ават. Вера Ивановна Давыдова важоди «Элеком» АПО-сонть ловсонь фермань прявтокс. Бажинек содамс неть мазый аватнень уцяскаст: костонь сынь, эдь Трофимовщина велесь ванькс рузонь?

Аватнень чачома ёнксост Ицялбуень Кенде велесь, школань прядомадо мейле кавтаськетне овсе эзть арсе явовомс вейкест-вейкест марто ды тонавтнемеяк тусть Кемлянь велень хозяйствань техникумов зоотехникекс. Практикавгак састь вейсэ Трофимовщина велев, мирдененьгак лиссть ве иестэ, Вера умарьковсто, Надежда сеске мельганзо – таштамковсто. Сынст кавтонь-кавтонь эйкакшост: Вера Ивановнань кавто тейтерть, Надежда Ивановнань – тейтерь ды цёра. Трофимовщинань колхозось сестэ покшоль, виевель, гайнесь весе республиканть келес. Саизь Верань ды Надянь важодеме зоотехникекс, васенценть МТФ-в, омбоценть – СТФ-в. Надежда Ивановна зярыя иень ютазь тусь тосто калонь кастома хозяйствав технологокс, мейле таго велявтсь. Ней сон, кода уш содатадо, столовоень прявт, тельня жо роботы утомсо.

Вера Ивановна жо роботамо тарканзо эзизе полавтне, зоотехникстэ ладизь МТФ-нь прявтокс ды ней уш 35 иень перть сон валске рана капши-чии скалонзо-вазонзо ваксс. Ловсонь ферманть зярыя иеде теде икеле ютавтызь Уришка шабра велев ды дояркатнень усксить специальной транспортсо расписаниянь коряс. Фермасонть Вера Ивановнань прявтсо роботыть кавксо дояркат ды вейке сынст полавтниця. Малав весе пенсиясот. Саемга, Н.М.Гурьянова те фермасонть важоди уш колоньгемень иеть. Вера Ивановнань мирдезэ, Михаил Александрович, МТФ-со механик, истя жо малав 40 иеть тосо. Скалтнэ фермасонть а свал кирдевить кардосо, майстэ сынь паневить калдав ды велявтыть кудов ансяк сентябрясто. Истямо лувось, корты Давыдова, седе паролгавты ловсонть танстензэ, эдь «бурёнкатне» якить-пакить пиже луганарга, порнить эрьва кодат тикшеть-люкшот. Самай те ловсонть Вера Ивановнань фермась ильти Саранскоень консервной заводов, косто эйстэнзэ теить «сгущёнка». Ней карматадо содамо ярсамсто, кинень ёвтамс «сюкпря» те ламбамопеленть кисэ!

Вера Ивановна сазоронзо марто оштё эсест хозяйстваткак кирдить. Кода весе велень эрицятне, трить-кастыть вазт, тувот, саразт, путнить эмежть. Ней оштё вейке мелявксост – кода весе помидортнэнь, куяртнэнь банкава пекстнемс, ков теемс умартнень ды сливатнень, ков максомс модамартнень, конатне тедеде пек покшт чачсть-кассть? Кортыть теде кавто сазортнэ ды мизолдыть: «Паро, ули мезе пештямс-таштамс, вейсэ весе мелявкстнэнь изнясынек, эдь а стяко чачинек кавтаськекс!»

 

Марина Девятова

 
Сюрось се, конась утомсо

 

 

… Ансяк совинек «МАПО и К» ТНВ ООО-нь прявтонть Н.В.Ютяевень кабинетс, Николай Всеволодович видькстась:

– Ялгат! Шкам ламо арась, ансяк зярыя минутат!

– Миненек ламо шка а эрявияк, ансяк мереде ков тенек ардомс ды кинь марто вастовомс, кие бу ёвтневель седе, кода течи тевтне молить сюронь паксятнесэ, –  каршо валсо ёвтынек меленек.

Зярыя минутас Николай Всеволодович толковизе тенек ков  ардомс ды кинь марто вастовомс.

Видькстатано, течи, зярдо эжди чипаесь ды зярдо моли сюронь урядамось, минь эзинек арсеяк велень хозяйствань  прявтонть Н.В.Ютяевень муемс кабинетстэ. Паро, кундынек нарядонь шкасто. Пси порастонть хозяйствань прявттнэ тосот, косо моли тедедень урожаень кис бороцямось. Истя сыргинек Чаунзань райононь «Ремезенское» ООО-в.



Подробнее...
 
Тевтне молить велувсо

Течи велесэ эрямось аволь сахар. Ды сон зярдо сокицятнень-видицятнень ульнесь ламбамо? Важодемань чись ушодови рана валске, прядови позда чокшне, тевтнеде ды мелявкстнэде свал певтеме. Ней бути велесэнть ули паро хозяйства, косо шкастонзо максови зарплатась ды мелявтыть важодицятнеде, бути топавтовить весе социальной ёнкстнэ ды ули важодема тарка од ломантненень, истямо эрямонть берянекс а ловсак. Тень минь неинек эсенек сельмсэ, зярдо ульнинек Сабанцелесэ, косо велень эрицятне ды шабра веленсетнеяк важодить «Сабанчеевское» велень хозяйствань предприятиясо.



– Александр Иванович, лоткак аламос! Журналистт састь, мартот мелест ули кортамс! – «Сабанчеевское» велень хозяйствань предприятиянь прявтонь васенце полавтыцясь Борис Николаевич Игушкин ахолдась кедьсэнзэ, лоткавты 5-це паксясто сюро марто ардыця «КамАЗ»-нть.

Александр Кузоваткин шоферэсь а мельсэ панжизе автомашинань вальманть ды кабинасто серьгедсь:

– Борис Николаевич, шкам арась, ардомс эряви!

– Александр Иванович, эряви кортнемс, куш зярыя минутат. Тон жо минек сырнень фонд.

– Тон монь нучк-пачк содасамак, ёвтник сень, мезе содат.

Б.Н.Игушкинэнь валонзо коряс, «Сабанчеевскоень» сырнень фондс совить велень  сехте вадрясто важодицятне, производствань икеле молицятне, кить предприятиясонть важодить аволь вейке кементь иеть. Кузоваткин – сынст ютксо. Сон тиринь велень хозяйствасонть важоди умок. Эсь тевень алкуксонь специалист. Машиназо свал тевсэ, мерят, овсе а яжавкшны, Кузоваткинэнь туртов сон теевсь тиринсекс.



Подробнее...
 
Горяйновка веленть маласо...

 


Июнень 28-це чистэ панжозель Сокамонь коряс Россиянь 8-це чемпионатось, конасонть эсь ёрокчист невтизь Россиянь 39 регионсто 49 трактористт. Почетной инжетнень ютксо ульнесть РФ-нь Велень хозяйствань министерствань растениеводствань, механизациянь, химизациянь ды касовкстнэнь ванстомаст коряс департаментэнь директорось Роман Некрасов, Сокамонь весемирэнь организациянь председателесь Колин Миллер.  Теке чистэнть РФ-нь Госдумань аграрной кевкстематнень коряс комитетэнь председателесь Владимир Кашин, РФ-нь велень хозяйствань министрань васенце полавтыцясь Джамбулат Хатуов, «Росагролизинг» АО-нь генеральной директорось Павел Косов, РФ-нь Госдумань депутаттнэ, МР-ва главной федеральной инспекторось М.С.Сезганов,  велень хозяйствань техникань содавикс нолдыцятнень представительтне МР-нь Прявтонть В.Д.Волковонь марто ванкшнызь выставкатнень, конат теезельть Саранск ошонь округонь Горяйновка веленть вакссо.

Тесэ инжетне ванкшнызь велень хозяйствань техниканть ды оборудованиянть, республикань муниципальной районтнэнь, пищевой ды перерабатывающей предприятиятнень ды лиятнень продукцияст. Весень мельс пек тусь «Березниковский» велень хозяйствань перерабатывающей кооперативенть продукциязо. Сынь нолдыть ансяк паро сосискат, сарделькат, эрьва кодамо сортонь колбаса, колмо видэнь тушенка – тувонь, скалонь, куркань сывельстэ, мраморной сывельстэ шашлык ды лия мезе. Кооперативесь, косо лововить 10 ломанть, важоди уш кавто иеть. Сонзэ прявтсо ашти М.В.Струёнков.

Михаил Владимирович видькстась, колбасань-мезень анокстамсто производствас сывельде башка мезеяк а кайсеви. Тень мельга кеместэ ваны технологось Григорий Наумкин.

Мордовиянь инжетне кувать аштесть «Сыродельный комбинат «Ичалковский» предприятиянь палатканть вакссо. Тесэ инжетне ды участниктне ванкшнызь «Пармезан», «Монгал» ды лия сортонь сыратнень.

«Агрофирма «Октябрьская» нармунень фабрикань прявтось И.С.Андин инжетнень содавтынзе продукциянть марто, конань нолдыпредприятиясь, ды, нама, микшневи аволь ансяк минек республикасо, сонзэ томбалеяк. Аволь умок нармунень фабрикась ушодсь нолдамо мороженой. Течи сонзэ нолдыть 11 видэнь.

Джамбулат Хатуовонь валонзо коряс, Россиянь велень хозяйствань министрась Николай Патрушев мель явсь сеть невтематненень, конатнень таштынзе республикась. Региононть а берянь экспортозо. Паро изнявкст таштазь животноводствасо ды растениеводствасо. Переработкасо тевс нолдавить неень шкань технологиятне. Целанек Мордовиянь агропромышленной комплексэсь важоди пек виевстэ.

МР-нь Прявтонть В.Д.Волковонь валонзо коряс, республикань велень хозяйстванть виегавтомасо те турнирэсь лездась теемс эскелькс икелев.

Паро, те площадкасонть невтневи весе вадрясь, мезе ули Россиянь АПК-со. Тесэ ламо од ломанть, конатне карзень кувалма кенярдомс, эдь минь нолдатано весементь, мезе теить велень хозяйствасо масторлангсонть, Россиясо. Ды отраслясь ловови сехте технологичнойтнестэ вейкекс, –  тешкстызе Владимир Дмитриевич.

Истя жо В.Д.Волков ледстизе, «Росагролизингенть» марто вейсэ Дубенкань районсо строяви 6,5 тёжат потявтовиця скалс комплексэсь, кона карми Россиясо сехте покштнестэ вейкекс.

Кода мерсь Владимир Кашин, РФ-нь Госдумань аграрной кевкстематнень коряс комитетэнть республикав самось анокстазель загодь. Аравтлувсост васенце таркасоль Мордовиясо Сокамонь коряс Россиянь чемпионатонть ютавтомась. «Те анокстамонть лувсо теезь ламо, те течи тесэ неяви. Сетнень туртов, кить важодить велесэ, профессиянтень, корьмаентень мелень явома. Техникась, конась нолдави масторсонок, кецявты. Минь толковасынек сень, мезе эряви велентень, штобу парсте, емавкстомо ютавтомс видематнень ды паксянь урядамотнень. Покш меленек – велесэ эрямось паролгадоволь», – тешкстызе Владимир Кашин.

«Росагролизингень» генеральной директорось Павел Косов ледстизе, предприятиясь

ловови АПК-нь рынкасо сехте эрявикстнэстэ вейкекс, истя жо сон – Россиянь велень хозяйствань техникань сехте виев рамиця ды микшниця.  «Мордовиясь – сехте малавикс ды умонь партнёронок.  Секс покш мель явтано республикантень, сонзэ прявттнэнень. Минь тей ламо ярмакт явинек», – тешкстызе Павел Косов.

Тешкстасынек, июнень 28-це чистэ Сокамонь коряс Россиянь чемпионатонть лувсо ютавтозельть зярыя мероприятият, тень ютксо: «Обновление парка сельхозтехники: опыт, практика, перспектива» пленарной конференциясь, Кадошкина поселкасо «Мир цветов» тепличной хозяйстванть ванкшномась, истя жо Ковылкина райононь Кочелаева велесэ РФ-нь Госдумань аграрной кевкстематнень коряс комитетэнь выездной заседаниясь, конань темазо ульнесь истямо: «Сельские территории в пространственном развитии страны: потенциал, состояние, перспективы (на примере Республика Мордовия).

«Обновление парка сельхозтехники: опыт, практика, перспективы» пленарной конференциянть панжомсто, МР-нь Прявтось В.Д. Волков мерсь: «Мордовиянть туртов пек паро, што сон кочказь Сокамонь коряс Россиянь чемпионатонь ютавтомань таркакс.

Те решениянть кис покш сюкпря РФ-нь велень хозяйствань министерствань ды «Росагролизинг» государственной компаниянь прявттнэнень. Минь кецятано, мероприятиясь лиссь пек покшокс, тей састь Россиянь ламо регионсто. Тей пурнавсть государственной ды общественной организациянь прявттнэ, авторитетной эксперттнэ, покш предприятиянь ды фермерэнь хозяйствань азортнэ, сень кисэ, штобу муемс кить-янт аграрной отраслясо талновтыця кевкстематнень изнямосо».

Течи Мордовиясо лововить 3 тёжадо ламо тракторт, вейке ды пель тёжат сюронь ды коромонь урядамонь комбайнат, малав 3,5 тёжат видемань ды велень хозяйствань инвентарь.

РФ-нь Госдумань велень хозяйствань кевкстематнень коряс комитетэнь председателесь Владимир Кашин промкссонть тешкстызе, республикасо эрямос совавтовить паро проекттнэ. Сонзэ валонзо коряс, розень кастомасонть ды сырань нолдамосонть теезь виев эскелькс, АПК-нть виевгавтомасо республиканть опытэсь тонавтневи Россиянь лия регионтнэсэ.

Истя, кавто чить пелькстасть трактористтнэ Сокамонь коряс Россиянь чемпионатсонть. Раськеютконь судьянь коллегиясь, конань составс совасть Европейской сокамонь федерациянь ды масторлангонь сокамонь организациянь члентнэ, изницякс ёвтызе Пензань областень трактористэнть Сергей Захаровонь. Сонензэ максозь главной казнесь – Петербургонь тракторонь заводонь  «К-424» тракторось.

Чемпионатонь призёрокс кармасть Орловской областень трастористэсь Виктор Устинов ды Ивановской областень трактористэсь Сергей Телегин.

Неть пелькстамотнесэ пек бажась изнямс Мордовиянь трактористэсь Сергей Митрофанов, но изницятнень юткс сон эзь понго.

Мордовиянь лия представителесь Алексей Киреев (Покш Березникень район), эсь ёрокчинзэ невтизе «Трактор-шоусо» ды тесэ саизе колмоце тарканть.

 

Пётр Зиновьев,

Саранск ошонь Октябрьской райононь

Горяйновка веле

 
<< Первая < Предыдущая 1 2 3 4 5 6 7 8 9 10 Следующая > Последняя >>

Страница 1 из 21

Новости

Съезд «Единой России» будет посвящен старту избирательной кампании в Госдуму в 2021 году
Предстоящий Съезд «Единой России» будет посвящен подготовке к
избирательной кампании в Государственную Думу в 2021 году и оценке
результатов прошедших выборов. На Съезде также предстоит обновление
партийных институтов с акцентом на электоральную составляющую. Об этом
заявил секретарь Генерального совета «Единой России» Андрей Турчак на
заседании Президиума Генсовета Партии.
Подробнее ...
 
В Мордовии стартовала акция «Круг добра»
Акция «Круг добра» проводится в рамках сотрудничества Центра
поддержки гражданских инициатив, сторонников «Единой России» и
благотворительного фонда «ДаДобро». Это еще один этап реализации
Календаря Добрых дел.

Подробнее ...
 
Кочкицятне ёвтызь мелест


Сентябрянь 8-це чистэ Россиясо ютасть кочкамот местной самоуправлениянь органтнэс. Тенень алтазель журналисттнэнь туртов пресс-конференциясь, конань сентябрянь 9-це чистэ Саранскойсэ, Союзонь кудосо ютавтызе «Единая Россия» политической партиянь региононь отделениясь. Журналисттнэнь кевкстемаст лангс отвечась МР-нь Государственной Собраниянь Председателесь, «Единая Россия» Мордовиянь региононь отделениянь прявтось В.В.Чибиркин.

Пачтязель, Мордовиясо истя жо ульнесть кочкамот. 407 мандаттнэнь кис снартнесть 1054 ломанть. Республикань келес вайгелест максомо сакшность 63 % эрицят. Вайгелест максомо сехте ламо сакшность Ромодановань районсо – 74,24 %. Аламодо эйстэст кадовсть Инсаронь райононь эрицятне. Тосо – 73,01 %. Вейке проценттэ аламо сакшность Отяжелень районсо. Ламо кандидаттнэнь ютксо 98 % вайгельтне максозь «Единая Россия» политической партиянь представительтнень кис. Ды те а стяко. Ламо шкань перть мольсь анокстамонь робота. Сехте паро кандидаттнэнь эрицятне тешкстакшнызь эштё маень 26-це чистэ, зярдо ютавтозель предварительной вайгелень максомась. Сондензэ икеле ютавтозельть эрицятнень марто вастовомат, конатнесэ ломантне теевсть содавиксэкс кандидаттнэнь ды сынст проекттнэнь марто. Сестэнь изницятне вастовоматнень поладокшнызь велесэ эрицятнень марто. Ютавтозельть 114 вастовомат. Эрицятнень ламо кармавтоматне топавтозельть.

Мордовиясо кочкамотне ютатсть закононь колсемавтомо.

Подробнее ...
 
Единороссы Октябрьского района вручили юбиляру поздравительное письмо от Президента Владимира Путина
10 сентября 90-летний юбилей отмечает жительница Октябрьского района
Новикова Мария Ивановна. Родилась женщина в Нижегородской области,
всю жизнь трудилась звеньевой бригады в колхозе. Военные и
послевоенные годы вспоминает со слезами на глазах: «Мы жили небогато,
растили детей, очень много работали, сил своих не жалели».


Подробнее ...
 
Александр Воробьев осмотрел ход строительства детского сада в Ромодановском районе


6 сентября депутат Госдумы РФ, член комитета по аграрным вопросам Александр Воробьев встретился с главой Ромодановского района Анатолием Гурьяновым. Они обсудили ход строительства детского сада на 160 мест в поселке Ромоданово, который строится в рамках национальных проектов "Демография" и "Образование". По словам Анатолия Гурьянова, на 80% возведение здания завершено, ведутся работы по устройству коммуникаций.
«Мы сумели ликвидировать некоторое отставание по срокам, которое возникло ранее, но теперь строители работают в соответствии с графиком», - отметил глава Ромодановского района.

Александр Воробьев подчеркнул, что детский сад строится по наказам избирателей. По демографическим показателям Ромодановский район занимает вторую строчку в регионе после Саранска, и на данный момент существует потребность в обеспечении малышей местами в детских садах.
Детский сад планируется сдать уже в декабре текущего года.