Рубрикатор

Культура
Равось – ояксчинь лей!

«Волга – река мира. Диалог культур волжских народов» Раськеютконь этнокультурной 18-це экспедициясь-фестивалесь ютась медьковонь 15-19-це читнестэ. Таго Рав леесь пурнынзе вейс сеть ломантнень, конатне бажить ванстомс Российской Федерациянь раськетнень коест-кирдаст ды теить весементь сынст этнокультуранть кастоманзо-кемекстамонзо туртов. Экспедициясь тедеде алтазель ожоковсто ютавтовиця Эрзянь ды мокшонь раськетнень Регионъютконь общественной организациянть 7-це Инекужонтень ды темаськак ульнесь «Мордовский (мокшанский и эрзянский) народ в едином культурном коде многонациональной России». Фестивалесь  ушодовсь Нижней Новгород ошсто, косо «Александр Свешников» теплоходось саинзе круизс 90 участниктнень. Сынь ульнесть аволь ансяк Мордовиясто, истя жо Саратовасто, Пензасто, Ульяновскойстэ, Московсто, Санкт-Петербургсто, Нижней Новгородсто ды оштё зярыя регионсто. 



Кода икеле иетнестэяк, те экспедициянть-фестиваленть анокстыцятне: Раськетнень тевест коряс федеральной агентствась, МР-нь Культурань, раськень политикань ды архивень тевень министерствась, «Поволжский центр культур финно-угорских народов» НА-сь, Эрзянь ды мокшонь раськетнень Регионъютконь общественной организациясь.

Ниле чис делегациясь ютась колмо республикат: Татарстан, Чувашия, Марий Эл ды пачколесь Нижней Новгород ёнксонь Макарьева велес, Чебоксары, Казань, Болгары ды Козьмодемьянск оштнес. Эрьва ошсонть «Волга – река мира. Диалог культур волжских народов» этноэкспедициянь участниктне вастозельть пек лембестэ: кши-сал марто, киштезь-моразь ды тердезельть оштнень достопримечательносттнень ванкшномо. Эрьва чистэ, экскурсиятнеде башка, ютавтозельть культурной мероприятият, сессият, тренингт-семинарт, кругловой стольть, панельной дискуссият. Теплоходонь палубатнесэ панжозельть зярыя выставкат. Экспедициянь программась пек сюпаволь ды мельстуицяль.

Фестиваленть панжизе Нижней Новгород ёнксонь Лукояновань райононь «Эрзяночка» фольклорной коллективесь. Весенень поздоровт экспедициянть ушодоманзо кувалма ёвтась МР-нь Культурань, раськень политикань ды архивень тевень министрань васенце полавтыцясь А.И.Карьгин. Сон истя жо пачтясь шумбракстнемань валт Мордовиянь Прявтонть В.Д.Волковонь ды МР-нь Культурань, раськень политикань ды архивень тевень министранть А.М.Чушкинэнь пельде.

Васенце чистэнть истя жо ютась «Мордовский народ в российском социуме: этническое и гражданское самосознание» стратегической сессиясь, конань модераторокс ульнесть Эрзянь ды мокшонь раськетнень Регионъютконь общественной организациянь прявтось Ю.А.Мишанин ды МР-нь Культурань, раськень политикань ды архивень тевень министрань васенце полавтыцясь А.И.Карьгин. Ю.А.Мишанин ёвтнесь, кода сынь анокстыть Эрзянь ды мокшонь раськетнень 7-це Инекужонтень, зяро пурнавить делегатт, косо карми ютамо покш вастовомась, кодат секцият кармить панжозь Инекужосонть. Эсест тевдест, мелявкстост-кеняркстост ёвтнесть лия регионтнэсэ эриця эрзятне ды мокшотне: Саратовасто – В.И.Кривошеева, Нижней Новгород ёнксонь Лукояновань районсто – М.К.Голодова, Санкт-Петербургсто – В.И.Родькин, Московсто – В.И.Каяцкая, Пензасто – Е.В.Бакалова ды В.Е.Гусаров.

«Поволжский центр культур финно-угорских народов» НА-нь прявтось Р.И.Акашкина тренингсэнть-семинарсонть ёвтнесь, кода саемс РФ-нь Президентэнь грантонть социально-эрявикс проектэнь топавтомс.

Омбоце чистэнть МР-нь Культурань, раськень политикань ды архивень тевень министрань полавтыцясь С.Н.Баулина ютавтсь «Реализация национального проекта «Культура» в Республике Мордовия: первые результаты и опыт региона» кругловой столь. «Родной язык в поликультурном образовательном пространстве» дискуссиянть ветясть М.Е.Евсевьев лемсэ МГПИ-нь тиринь келень ды литературань кафедрань доцентэсь, филологиянь наукань кандидатось С.В.Богдашкина ды Чаунзань райононь  Комсомольский посёлкань 1-це № школань прявтось Н.Н.Бабуров. Эсест важодемадост ёвтнесть истя жо Мордовиянь ды шабра регионтнэнь тиринь келень ды литературань тонавтыцятне.

Омбоце чистэнть этнокультурной экспедициянть-фестиваленть мельспаросо вастсь Казанесь ды Татарстан Республикань общественностень ды государственной властень представительтне. Чак-чакто каванямотнеде, морамотнеде-киштематнеде башка, делегациясь якась Ине Отечественной войнань Героенть М.П.Девятаевень калмолангс, ванкшнозель Казанень  Кремлясь, эрзянь ды мокшонь оршамопельсэ наряжазь, раськень моронь морсезь, участниктне ютасть те ошонь сехте кувака Бауманонь ульцяванть.

Колмоце чистэ валске рана теплоходось пачкодсь Болгар кезэрень ошонтень, косо весе участниктне ванкшнызь Болгаронь цивилизациянь музеенть ды городищанть. Теке жо чистэнть ютавтозельть колмо дискуссият. Тиринь кельсэ художественной литературадонть ды СМИ-тнеде кортасть А.С.Пушкин лемсэ Национальной библиотекань краеведениянь отделэнь прявтось Н.В.Бочканова ды «Мокшень правда» газетань обозревателесь В.И.Нестеров. Эрзянь-мокшонь раськень просветительтнеде ёвтнесть Ю.А.Мишанин ды «Императорское православное Палестинское общество» МОО-нь Мордовиянь отделениянь секретаресь Т.П.Реброва. МР-нь медиатортнэнь Ассоциациянь Президентэсь Н.П.Любушкина ютавтсь «Медиация как эффективный способ урегулирования межнациональных конфликтов» тренинг-семинар. Чокшне ютась мельстуиця вастовома Мордовиянь театрань актёртнэнь Сергей Адушкинэнь, Владимир Буралкинэнь  ды Павел Михайловонь марто.

Нилеце чистэ минек вастымизь гайтев моросо Чувашиянь Чебоксары (чуважокс Шупашкар) ошось ды тосонь Эрзянь-мокшонь культурной центрань прявтось В.П.Седойкин. Ошканть экскурсиядонть мейле «Александр Свешников» теплоходонть палубасо панжозельть творческой мастерскойть ды «Чилисема» эрзянь эйкакшонь ды од ломанень журналонь прявт редакторонть, фотохудожникенть Н.И.Ишуткинэнь фотовыставка. Мастер-класст невтсть  Орданьбуень райононь Орозбие велень  Культурань кудонь прявтось Н.Н.Аксёнова (тонавтсь понань кемень викшнеме), Рузаевкасто декоративно-прикладной творчествань мастерэсь С.Ф.Сараева тонавтсь кодамо каркст ды стамо някат, Теньгушевасто мастерэсь Т.И.Щербинкина тонавтсь артомо матрёшкат ды кодамо варьгат, Саранскоень 2-це № художественной школань тонавтыцясь, художникесь Х.И.Бикбаев артсь Рав леень пейзажт ды ломанень портретт.

Чокшне ёнов С.Н.Баулина таго ютавтсь «Развитие национальной культуры через событийные мероприятия. Национальные творческие коллективы: создание, развитие и продвижение» теманть коряс кругловой столь. Тесэ ёвтазель оштё паро куля: таштамковсто Саранскойсэ юты «Шумбрат!» покш фестивалесь. Седе тов ютавтозель экспедициянь-фестивалень меельце промксось, ёвтазельть сонзэ итогтне, сюкпрянь конёвт явшезельть сехте эряза участниктненень. Кенярдовтыця концерт невтсть «Росичи» морамонь театрась, МР-нь заслуженной артисткатне Любовь Князькова ды Вера Каяцкая.

Теке жо чистэнть минь пачколинек Козьмодемьянск ошов ды якинек инжекс пандонь маритнень (горные марийцы) менель ало этнографической музеев.

Медьковонь 19-це чистэ теплоходось ёртызе якорензэ Нижней Новгородсо. Седейс жо кадовсть од вастовоматне, од ялгатне ды оймень сюпалгавтыця содамочитне.

Вастомазонок, Рав, ояксчинь лей!

Марина Девятова

 

 

 

 
СЕДЕЯК КЕМЕКСТАЗО ОЯКСЧИНЬ СЭДЕСЬ




Вайгельпе   мельга  вайгельпеть  онкстни ташто «Волгась», конань  эйсэ минь аштемковонь 29-це чистэ таго сыргинек васоло  ки лангов. Минь – неть:  Равчирень  финнэнь-угрань раськетнень культурань кужосо важодицясь Т.Т.Чекушова, Регионъютконь эрзянь-мокшонь раськень вейсэндявксонь прявткуронь  секретаресь О.В.Дулкин, А.С.Пушкин лемсэ библиотекасо важодицясь В.И.Пронина ды мон, кода журналист ды кода «Ламзурь» морокуронь прявт. Ардтано  кавто покш мероприятияв. Вейкесь  юты васенцеде Ульяновской ёнксонь Ульяновской буень Вышки велесэ «Шумбрат» лем ало.  Омбоцесь – Татарстанонь Тетюшской буесэ Кильдюшева  велесэ.   Те – «Валда  шинясь»  республиканской фестивалесь.  Истят покш мероприятияс паро улевель сыргамс седе ламоненек. Сынст ютавтыцятнеяк  учость  аволь ськамонь-ськамонь ломанть, учость седе покш коллективть. Ансяк тевесь лоткась ярмаконь аразьчинть лангс.

       

ТОСО, РАВ ЛЕЙ  ЛАНГСО…

Весе содыть, эрзятне  ды  мокшотне  косо  ансяк  а эрить.  Весемеде ламо  эйстэст   Рав  леенть  чирева  таркатнесэ.  Ды те чарькодеви – мекс. Самай Рав ды Ока лейтнень ютксо  модатнень  лангсо   Тюштянь пингестэ саезь  эрясть минек покштятне-бабатне. Те мейле ламо тувталонь кувалма   сынь кармасть  срадомо эрьва кува. Кить кадовсть чачома тарказост, ламот рузыясть, стувтнизь эсест ундоксост,  ловить эсь пряст аволь  эрзякс ды мокшокс. Ды ялатеке, кода невтить Россиясо  ютавтозь ловоматне (2002, 2010 иетнестэ)  Рав  чирева  эриця эрзятнень ды мокшотнень ютксто аволь весе перьгедсть эсест раськестэ. Седе  ламотне эрить  Самара ёнкссо – малав 80 тёжат, Ульяновскоень ёнкссо – 50 тёжат.  Неть регионтнэсэ а беряньстэ  ладязь  раськень койтнень ванстомань ды седе тов кемекстамонь тевтне, конатне топавтовить национально-культурной автономиятнень вийсэ. Ульяновскойсэ автономиянь  прявтонь тевтнень  зярыя иеть кода вети  Софонов Владимир Анатольевич. Эряви меремс, те ломанесь ламо вийть путы Ульяновскоень эрзятнень ды мокшотнень «сыргозтемаст» туртов.  Эрьва  иестэ  тесэ ютавтневить покш илат. Масторлангонть келес содавиксэкс  теевсь «Масторавань  морот» фестивалесь. Тедеде  котоцеде ютавтозель «Шумбрат» фестивалесь Ульяновск ошсо.  Теке жо лементь ало фестиваль анокстасть ютавтомс  Ульяновской буень Вышки велесэяк.  Те кенярксчисэнть пурнавозтнень туртов лембе валонь ёвтамо кучозель О.В.Дулкин.  Миненек эзь саво тов понгомс. Седе пек учость эйсэнек  Татарстанонь Тетюшень буень  Кильдюшева (Килдеш) велесэ. Секс делегациянок явовсь кавтов. Олег Владимирович кадовсь Ульяновской ёнкссо, минь туинек седе тов.

 

ТЕРДИМИЗЬ

«ВАЛДА ШИНЯСЬ»

Зяро эрзят ды мокшот эрить Татарстансо, теде муинь аволь вейкеть цифрат. Веенст сёрмадовкстнэсэ  тешкстазь 30 тёжат, омбонстнэсэ – 15 тёжат. Виде,  нама, аволь  омбоцесь.  Эсенек раськенть аламолгавтано минськак.  Те лисни тагояк  секень кувалма: ламот   сёпить,  кодамо раськестэ лиссть.  Эрзятне  эрить   седе  васолга: Лениногорской, Черемшанской, Альметьевской  буетнесэ.  Мордовиянтень  седе  маласо  аштиця  Тетюшевань  буесэнть  седе ламо мокшонь велеть: Урюм, Киртели, Кильдюшева.

Эряви  меремс, 2000  иенть самс Татарстансо эрзятне-мокшотне, истя мерьсынек,  «чатьмонсть» ды пряст  косояк эзть невтне.  Лиякс мерезь, тосо апакольть  ладя  тевтне, конат улевельть сюлмавозь минек раськень культуранть вельмевтеманзо марто.  Ды ансяк 2001 иестэ  теезель национально-культурной автономия, конань прявтокс кочказель  ученоесь  С.В.Новиков.  Те вейсэндявксонь башка  курот секе жо иестэнть  теезельть Лениногорской ды Тетюшской буетнесэ. Секс, паряк, неть буетнесэ седе парсте молить  тевтне минек раськень койтнень вельмевтемаст ды ванстомаст коряс.  Кой-кона школатнесэ  ветить тиринь келень урокт. Ютавтневить раськень койтнень коряс  покшчить. Лениногорской  буень Кармалка  эрзянь   велесэ эрьва иестэ пурнакшныть Балтай  фестиваль. А вана Тетюшевань буень Кильдюшева велесэ теевсь коекс ютавтнемс «Валда шинясь»  лем ало фестиваль.

ВАСОЛОТНЕ

МАЛАВИКСТ

Кода  васоло  илязт  эря минек раськень ломантне, сынст ялатеке сеске  редясыть.  Аволь истя чачонь,  кода  обуцянь коряс.  Саты   ёвтамс, кода  сынь вечкить ды маштыть  инжень вастомо. Маряви, весе оймест путсызь, весе ули-парост таргасызь.  Истя ульнесь «Валда шиня» фестивальсэяк. Эзинек кенере пачкодеме, гайневтсть телефонсо:  пек, келя, учотано эйсэнк.  Алкукс  учость.  Сеске ушодсть каванямонок.  Мейле – выставкатнень ванномат. Сыньгак оймесэнек раштасть паро ёжо. Тесэ  кезэрень шкасто кудоютконь эрьва   кодат  курмот-кармот, мазылгавтнезь  налкшкеть ды лият-мезть.

Фестивалень ютамо кужосонть  ве ёно – эйкакштнень туртов налксема таркат, нурька  моронь морыцятнень ды киштицятнень туртов   ужинеть.  Башка тарка пирязь раськень спортсо пелькстыцятнень туртов. Тосо  вишкинетне виест варчнесть тодовсо вачкоемасо, седе шумбратне веенст  кепсесть, омбонст ёртнесть  чочкот.  Седе тов ютазь, сельметь икелев сти велень   кудось. Потс совазь, понгат кезэрень шкантень. Тесэ весемесь кортась,  кода  седикеле  эрясть минек покштятне-бабатне. Човарт-петькельть,   пряхат-штереть, стуворт-эземть. Куншкасо поводезь эйдень лавсь.  Кудосто лисят, а васоло толпандя лангсо  аравтнезь котелт, косо пидесть  штюрьба.  Сельмс каятыть озамо таркатнеяк. Сынь теезь кезэрень ладсо: кавто   мукорь лангс ладязь  чачков  керязь  чочкосто лаз.

Лембе валт, казнень казнемат. Ды вана окойники ушодовсь сонсь фестивалесь. Кода  сон ютась, эсеть сельмсэ апак нее ды эсеть пилесэ апак маря, а ёвтневи. Он – а он, ёвкс – а ёвкс.  Весемеде пек дивавтнесь ушодксось. Сон  теезель  театрализованной  невтема ладсо, конань перть пурнавозтнень туртов  невтезель  неть таркатнесэ эрицятнень весе эрямопингест.  Васня лиссь Валдо шинясь – эрьва ёндо цитниця ожо оршамосо  сэрей ды мазый ава.  Прязонзо путозь чипаень налсо мазылгавтнезь   каштаз. Сон, мерят, аволь   мольсь   мастор ланга, прок  валгсь менельстэ. Весе мазый ды шнамо  валтнэ алтазельть сонензэ.

Седе тов  седеяк мелеть сыль ваномс. Лиссть  эйкакш марто цёра ды ава. Те – кудораськесь, конань эйстэ  тусть лия эрицятнеяк. Мейле вейке картинась  полавтови  омбоцесэ. Модань сокицятнень-видицятнень полавтыть тикшень ледицятне-нуицятне, сынст таркас лисить – калонь кундыцятне,  ракшань трицятне, мекшень кирдицятне. Нурькинестэ, невтезель весе се, кода эрясть ды мейсэ седикеле трясть пряст тесэнь ломантне.

Тевтне  прядовильть,  пурнавильть  вейс оймсеме. Оймсемстэ  кода моровтомо ды киштемавтомо? Тесэяк  моротнеде гайгсть  апак лотксе!  Моронь кужонть ушодызь азортнэ. Морыцятнеде эсесткак  аволь аламо: Кильдюшева велестэ – «Лаймоне», Тетюшевасто – «Келуня», «Вайгель». Киртели велестэ – «Чивганя», Урюм велестэ –  «Ялгат», «Умарина», «Русская душа»,  Бессоновкасто – «Чиньжарамо»,  Алексеевской  буестэ – «Садовый умарь» морокуротне.  Сакшность  морыцят  Казань ошсто (Юлия Рахманюк, «Кудоатя» арт- группась),  Ульяновскойстэ («Эрзянь койть», «Пичечуля»), Оренбургсто («Сельская глубинка»), Краснодарсто («Белая акация») ды лия ёндо. Ниле морот морынек миньгак (В.Пронина ды мон). Весемеде пек ломантнень  мельс  тусь «Эрзят-мокшот» морось, конань  эйсэ  морави чачома тарканок мазычиде,  ломантнень ютксо  вечкемадо,  ояксчисэ эрямодо.

Весе неезенть ды марязенть эйстэ мельспаросо кадовсть аволь ансяк тосонь эрицятне,  лия  ёндо  сазь  ломантнеяк. Сехте покш инжетнень ютксоль   Финляндиясто   содавикс  актерось Вилле Хаапасало, кона налксесь «Особенности национальной охоты», «Кукушка»  фильматнесэ.  Сеть читнестэ съемочной группанзо марто Татарстансо  снимасть фильма седе, кода эрить весе раськень ломантне те республикасонть.

Покштояк  покш  кенярксонть кисэ, конань весень туртов казизе «Валда шинясь» фестивалесь, а кода а ёвтамс  седейшкавань лембе валт весенень, кинь вийсэ анокстазель те илась. Васняяк, Татарстанонь губернаторонтень Р.Н.Миннихановнень. Те сонзэ ушодксонзо коряс Татарстансо  яволявтозель   грантонь пелькстамо, конань эйсэ изницякс лиссть «Валда шинясь» проектэнь сёрмадыцятнеяк.  Идезь  ярмактне сатотсть  зярыя  фестивалень ютавтомс. Паро улевель,  минек республикасояк  ютавтомс  истямо пелькстамо!

Фестиваленть  ютавтома тевсэнть  аволь  аламо  вийть путсть Тетюшева  буень  прявтось Р.Х.Сафиуллов, Кильдюшева  велень прявтось В.С.Исаев. Весемеде пек савсь чийнемс Тетюшень буень культурань управлениянь прявтонтень Ю.В.Сиякиннэнь,   Татарстанонь мокшэрзянь национально-культурной автономиянь  Тетюшень буень  отделениянь ветиентень  И.И.Николаеванень.  Весень лемест а ёвтавить. Мелявкстнэ сатотсть  аволь ансяк  Кильдюшева велень эрицятненень.  Лездасть  тенст лия велень ломантнеяк. Теньсэ  истят покшчитнень   лезэст  ды питнест. Сынь  малавгавтыть  ломантнень, кемекстыть  сынст ютксо ояксчинть. Те, эсь ёндо, касты весе раськенть виензэ.

 

Раиса Щанкина,

Мордовия, Татарстан

 
«Меремась» вельмевти кезэрень моротнень

Течи те морокурось содавикс республиканть, масторонть келес ды омбо масторонь ламот ёнкстнэсэ. Сонзэ юрс совить эрзянь ды мокшонь культурань ды фольклоронь вечкицятне. Эсь прявт тевекс сынь ловить раськень койтнень-кирдатнень, кезэрень моротнень вельмевтеманть ды ванстоманть. Эсь ловныцятненень минь ёвтнетяно «Мерема» этнографической фольклорной студиядонть ды сонзэ пурныцянть-арсиц янть Екатерина Модинадо.

 – «Мерема» морокурось пурназель-теезель 2010 иень таштамковсто. Сонзэ теемадо мелесь сась апак учне. Мон сестэ ульнинь Н.П.Огарёв лемсэ МГУ-нь Раськень культурань институтонь меельце курсонь тонавтницякс. Весть кода-бути вастовинь «Ладушка» ансамблянь икелень прявтонть марто, кортазевинек. Сон кевкстимим, ули-арась мелем арамс те коллективенть ветицякс? Мон кувать эзинь арсе, сынь. Саранскоень Культурань кудонь прявтокс се шкастонть ульнесь Анна Петровна Чигажёва. Вастымим пек парсте ды мерсь, «Ладушканть» юрсо пурнак эсеть морокуро, – ёвтни «Мерема» этнографической фольклорной студиянь прявтось Екатерина Модина. – Мон чачинь Пенза ёнксонь Сосновоборской райононь Вачелай эрзянь велесэ. Секскак покш мелем ульнесь пурнамс эрзянь-мокшонь морокуро. Вешнинь ёроков од ломанть университетэнь Раськень культурань институтонь студенттнэнь ютксто ды 2010 иень таштамковонь 1-це чинтень пурнавсь од коллектив.

Зярыя шкань ютазь, 2014 иестэ, ансамблясь лемдявсь этнографической фольклорной студиякс. 2017 иестэ «Меремантень» максозель народной лемесь. Составось аволь весть полавтневсь, сеедьстэ сыльть од морыцят,  а полавтовиксэкс свал ульнесь вейкесь – раськень койтнень вельмевтемась ды ванстомась. Неень шкане «Меремасонть» морсить кото морыцят. Весе сынь морамонть ловить эрямонь прявт тевекс. Коллективень прявтось – Екатерина Модина, прядсь А.А.Архангельский лемсэ Пензань музыкальной училища, Н.П.Огарёв лемсэ университетэнь Раськень культурань институтонь дирижёрско-хоровой отделения. Теде башка, сон Н.П.Огарёв лемсэ МГУ-нь Раськень культурань институтонь раськень музыкань кафедрань тонавтыця. Истя жо коллективсэнть Анна Шулугина (сонзэ ловить морокуронь оймекс), Сергей Фудин, Анна Фёдорова, Анастасия Старцева ды Наталья Дворянцева. Малав весе сынь Н.П.Огарёв лемсэ университетэнь Раськень культурань институтонь икелень ды неень студентт.

Кода ёвтни Екатерина, ансамблянть пурнамодо мейле ламо арсемат ульнесть лементь коряскак. Раськень ёнкс марто морокуронтень лемеськак эрявсь истямо.

Ды сон сась апак учо. «Мерема» – сон рузонь келенть мартояк сюлмави ды, васняяк, сон эрзянь. Мерема – ёвтамо. Прязон валось сась, карминь ваномо Интернетсэ сонзэ смустензэ. Ды понгсть сёрмадовкст, эстонтнэнь Меремась – те иневедь чирень Пазаванть лемезэ. Теке марто, истя мерильть Мария Пазонь авантень. Лемесь муевсь ды мельскак весенень тусь, – корты Екатерина Модина.

«Меремась» курок стясь пильге лангс, шождасто муинзе эсь кунсолыцятнень, раськень творчествань вечкицятнень. Тевесь, васняяк, тесэ сеньсэ – коллективесь морась ды нейгак моры эрзянь ды мокшонь кезэрень моротнень, конатнестэ ламот уш стувтовсть, лиятнень жо содасть ды морсесть ансяк сыре ломантне. Репертуарось пек покш ды свал сюпалгавтови од моросо.

Морокуронтень совицятне а аштить ве таркасо, свал тевсэть. Ардтнить эрзянь, мокшонь, шокшонь велетнева, кортнить сыре ломантнень марто ды сёрмадыть раськень кезэрень моротнень. Истят экспедициятнень покш тевекс кармась эрзянь кельсэ кезэрень моротнень марто дискень нолдамось. Те дискесь лиссь уш зярыя иеде икеле, сонзэ юрс совасть сеть моротне, конатнень кезэрень эрзятне морсесть свадьбатнесэ. Кода тешксты «Меремань» прявтось, те дискесь пек паро информационной ёнксонть коряс. Тесэ максови ламо эрявикс информация. Течинь чине морокуронть уш анок материалозо мокшонь кельсэ. Моротне пурназь, студиясо дискесь сёрмадозь, кадовсь ансяк нолдамс сонзэ. Ансяк кода содатано, тень туртов эрявить ярмакт ды аволь аламо. Студиянть сынь зярс арасть.

Минек, эрзятнень ды мокшотнень, пек мазый, сюпав ды лия ёнов а молиця культуранок. Ды бути сонзэ ланга седе ламо ёвтнемс, содыцятнеде ды вечкицятнеде кармить пек ламо, – тешксты Екатерина.

Тень туртов арсезель «Предания старины» фестивалесь, конань Екатерина Модина ютавты уш аволь вейке ие. Васень шкастонть фестивалень участникекс ульнесть ансяк эсенек республикань фольклорной коллективтне. Ютазь иестэ жо пелькстамосонть эсь раськень творчестваст невтизь Тувасто, Чувашиясто, Удмуртиясто, Архангельской областьстэ коллективтне.

«Меремась» свал тевсэ, свал вешнемасо. Овсе аволь умок морокурось эсь творчестванзо невтизе «Песни России» Весероссиянь XII-це фестивальсэнть-марафонсонть, конань ютавты «Русская песня» народной моронь театрась ды сонзэ ветицясь Надежда Бабкина. Фестивалесь Башкортостансоль.

«Мерема» этнографической фольклорной студиясь ламоксть изнякшнось регионъютконь ды раськеютконь пелькстамотнесэ, конат ютавтневсть Саранскойсэ, Пензасо, Набережной Челнысэ, Самарасо, Саратовасо, Ижевскойсэ, Сочисэ ды лия оштнесэ, истя жо Эстониясо, Суомисэ ды Австриясо. Теке марто, кавто иеде икеле морокуронтень максозь Russian World Music Awards премиясь «Лучший аутентичный коллектив» номинациясонть. Эсь творчестванзо коллективесь эрьва ие невтни Эстониясо, косо сонзэ ули фан-клубозояк. Ютазь иестэ «Меремась» тешкставсь «МИР Сибири» Этнической музыкань ды ремеслань раськеютконь фестивальсэнть, кона ютавтовсь Красноярской ёнксонь Шушенское велесэ.

Те иестэ таго пурнатано невтемс эсь творчестванок «МИР Сибири» фестивальсэнть. Те фестивалентень анокстатано аволь ансяк минсь, анокстатано эсь инструменттнэньгак, – ёвтни Екатерина. – Аволь умок Сибирень вейке кедьчелькев ломань тейсь тенек эрзянь кезэрень волынка. Инструментэсь теезь Николай Бояркинэнь артовкстнэнь-тешкстнэнь коряс, ды сон пек моли кезэренсенть ёнов.

Теке марто, морыцятне эсь кедьсэ теить нюдитнень, кодыть-викшнить оршамотнень-мазылгавтомапельтнень. Ды эрьва экспедициястонть ускить эрзянь-мокшонь кодамояк кедьёнкс. Студиянь те сюпавчиденть пурназь цела музей. Тесэ седикелень оршамот, чакшт-парть, тейтерень мазылгавтомапельть, раськень някинеть ды ламо мезе лия.

Меельце шкастонть этнографической фольклорной студиясь пек кассь-раштась. Течи сонзэ юрс совить «Мерема», «Морама» ды «Жива» фольклорной ансамблятне ды «Меремчата» эйкакшонь ансамблясь. Вишкинетнень марто роботась ветяви пек покш.

Минь касттано эсь тевенек поладыцят, – пейди Екатерина. – «Меремчата» эйкакшонь ансамблясь эсь важодеманзо ушодызе 2017 иестэ. Ды васенце чистэ саезь минь тенст ёвтнетяно эрзянь-мокшонь культурадонть, койтнеде-кирдатнеде. Ды, эряви меремс, эйкакштненень неть ёвтнематне пек вечкевить. Эдь кортамотне ютыть минек музейсэнть-студиясонть, косо неть раськетнень культуранть можна неемс эсь сельмсэть.

Юлия Еремина

 
Анатолий Кондратьевень эрямозо сезевсь мазый шкасто

Киржеманось эли Трокскужось, истя лемдить те веленть Отяжелень райононь эрицятне – эрзянь веле, кона сови Отяжелень райононтень, ашти Нуя леенть чиресэ. «Список населенных мест Симбирской губернии» (1863 ие) документсэнть тешкстави: «Киржеманы  – село удельное, состоящее из 151 двора».

«Генеральная перепись мордвы Алатырского уезда» книгасонть сёрмадови: «В 1671 году деревня Киржеманы состояла из 20 дворов».

Лемезэ – антропоним. Киржеманы – аволь христианонь, алкуксонь эрзянь лем. Киржеман минек раськень цёрась ульнеськак неть таркатнес васенце кудонь стявтыцякс. (Саезь «Топонимический словарь Мордовской АССР» валксстонть, кона лиссь 1987 иестэ Саранск ошсо, Мордовской книжной издательствасо).

Подробнее...
 
Троицясто – «Одирьвань ютамо»

Орданьбуень Орозбие велесэ эрьва иень Троицясто – покш кенярксчи. Тесэ тешкстыть велень чачома чинть. Велень администрациясь аноксты тенень зярыя ковт. Орозбиесэ чачозь ломантне эрить эрьва кува. Троицясто весе бажить самс тиринь велев. Субутасто молить лемень кундамо тетяст-аваст, покштяст-бабаст калмолангов. Недлячистэ веленть куншкасо Культурань кудонть ды парконть вакссо ушодови кенярксчись.




Орозбиесэ ванстызь кезэрень коест. Те – «Одирьвань ютамо». Весе, кить лиссть мирденень меельце иестэнть, ютыть велеванть наряжазь. Нама, седикеле ульнесть пек ламо ютыцят. Ней аламо, ялатеке велесэнть бажить а ёмавтомс те коенть. Невтить эйкакштненень, инжетненень, кода ульнесь икеле. Мезе жо ванстовсь те шкас? Одирьватне оршить истя, кода Орозбиесэ: мазый тюссо цитниця панарт-юбкат. Пряс свал путыть цецянь каштазт. Ды сыргить моро марто веленть куншкава. Мельгаст молить эйкакшт, малавиксэст. Велева ютамсто эрицятне одирьватненень явшить ярсамопельть: сюкорот, прякат, умарть, алт, конфеткат, шоколадкат. Неть казнетне путовить паця потс ды эйсэст кандыть эйкакшт. Мейле вейсэ пурнавить веле куншкасо Манай эрькенть чирес. Коень коряс, каштазтнэнь эрявить ёртомс ведьс. Бути каштазось ашти ведь лангсо эли туи уезь – те парос. Тедеде ютасть кото одирьват, сындест ульнесть седе ламо, ансяк аволь весе савсть. Орозбиень цёратне муизь вечкевиксэст эсест ды шабра велестэ, истя жо республикань томбальдеяк. Одирьватне паро мельсэ кирдизь велень коенть.

Анокстазельть ламо выставкат. Сельмс каявсть тантей ярсамопелень каванявкстнэ. Орозбиень паро азораватне анокстасть покш прякат, оев сюкорот, пачалксеть, пидесть кулага, тейсть поза. Эрьва инженть каванясть пуштазь алдо, рестазь калдо, кашадо, чапамо ловсодо ды лия ярсамопельде. Ярсамопелень выставка пурнасть Кеченьбуе ды Ташто Орданьбуе шабра велетнеяк.

Иесэнть ули ансяк вейке истямо чи, зярдо ломантне свал сыть тиринь ёнксов. Те – Троицянень. Покшчисэнть вастовить малавиксэст, ве классо тонавтницятнень марто, кинь эзизь некшне ламо иень перть. Зяро кецямо ломантнень чаматнесэ ды валдо мизолкст!

Минек кенярксчинтень сакшность ламо инжеть. Пурнавозтнень туртов лембе вал марто пшкадсть велень администрациянь прявтось А.И.Аржаев, Орданьбуень райононь прявтось А.Н.Антипов, Орданьбуень ды Отяжбуень епархиянь епископось Вениамин ды лият.

Теде мейле ушодовсь покш концертэсь. Сцена лангс лиснесть кода Орозбиень морыцятне, истя жо Низовка велень «Цёковне» ансамблясь ды Орданьбуестэ сазь киштицятне-морыцятне.

Татьяна Маторкина

 

 
<< Первая < Предыдущая 1 2 3 4 5 6 7 8 9 10 Следующая > Последняя >>

Страница 10 из 147

Новости

Эрицятнень сёрмадстомантень анокстамотне ушодовсть



Малав ие кадовсь эрицятнень Весероссиянь сёрмадстоманть самс. Аволь умок МР-ва Федеральной службань государственной статистикань территориальной органсонть ютавтовсь вастовома, конанть шкасто видео-конференциянь лувсо ветявсь кортамо Росстатонь прявтонть Павел Малков марто. Вановсть сёрмадстомань шкатне ды невтевсь официальной тешксэсь.


Подробнее ...
 
В Мордовии собрано более 700 подписей на запрет «наливаек»
 
В Республике Мордовия завершились мероприятия по сбору информации и
подписей в поддержку инициативы об ограничении работы питейных заведений,
расположенных на первых этажах многоквартирных домов и придомовых
территориях в Республике Мордовия.

Подробнее ...
 
Награждение победителей акции «Здоровое питание - активное долголетие»
 
  Уже сегодня, 17 октября,  34 ученика из Мордовии отправятся на 12-ю  смену  
Международного детского центра «Артек». Победителей акции, их наставников и кураторов 
поприветствовал  секретарь Регионального отделения «Единой России» Владимир
Чибиркин. Он  подчеркнул, что пропаганда  здорового образа жизни и оздоровление нации 
являются одними из ведущих направлений деятельности «Единой России», акция 
реализуется в рамках партийного  проекта «Здоровое будущее».  Это дает свои плоды - с
каждым годом в нашей стране увеличивается  число неравнодушных людей,  которые 
начинают сами вести здоровый образ жизни и ведут за собой других.

Подробнее ...
 
В республике успешно реализуются социально значимые проекты первичных отделений «Единой России»
 
Первичные отделения поселка  Ромоданово и поселка  Зубова Поляна   успешно
реализуют на практике  свои социально  значимые проекты, удостоенные грантовой
поддержки по итогам конкурса проектов первичных отделений, инициированного 
«Единой Россией»
  Цель проекта  «Мы рядом», реализуемого в Ромоданове - помощь пожилым людям и 
инвалидам, имеющим  заболевания опорно-двигательного  аппарата.   Прокат технических 
средств реабилитации  организован на бесплатной основе для граждан пожилого возраста, не 
имеющих группы инвалидности, но,  в силу возрастных изменений или перенесенных 
заболеваний, травм, потерявших способность свободно передвигаться. В июле этого года в 
Ромодановском  местном отделении партии прошла  презентация проекта.  Открывая
презентацию,  секретарь  Ромодановского местного отделения Партии  Наталья Хомякова  
отметила, что  основная  задача проекта   помочь людям в трудный для них период 
реабилитации.


Подробнее ...
 
Баталина: Предложение Минтруда о новых правилах выплаты пособий по уходу за ребёнком создаст проблемы родителям
 
Предложение Минтруда, согласно которому претендовать на выплату 
пособия по уходу за ребенком до полутора лет может только тот, кто 
фактически ухаживает за ребенком, избыточно и может создать лишние 
проблемы родителям. Не исключено, что Фонд социального страхования при 
назначении будет требовать документально подтвердить, что именно 
заявитель (мать или отец ребенка) фактически за ним ухаживает. Об этом 
заявила первый заместитель секретаря Генерального совета «Единой России»
Ольга Баталина.
Подробнее ...