Рубрикатор

Культура
Ольга Дорофеева: «Бути ули мелеть – весемесь топавтови»

Кортыть, ёроков ломанесь ёроков эрьва мейсэ. Те ёвтамось пек лади неень шкань од ломантненень. Сынь превейть, эрязат ды колт эрьва тевсэнть. Сынь маштыть эрямо истя, штобу кенеремс эрьва ков ды эрьва мейсэ. Истятнэнь юткс апак кавтолдо эряви кандомс эрзянь тейтеренть Ольга Дорофеевань. Сон эйкакшткак тонавты, кенярксчитькак арси-ютавты, эсь тиринь велень эрицятнень культурной ды спортивной мероприятиятнесэяк кенярдовты. Зярдо теевинь содавиксэкс те ёроков тейтеренть марто, пек дивинь сонзэ эрязачинтень ды бажамонтень улемс свал тевсэ ды ломань ютксо. Ансяк весемеденть мельга-мельцек.




Ольга чачсь-кассь Отяжелень райононь Селища велесэ. Тесэ ютась мелявкстомо эйкакшпоразо, прядызе средней школанть ды мейле тусь тонавтнеме Саранскоев. 2008 иестэ тейтересь кармась Н.П.Огарёв лемсэ МГУ-нь филологиянь факультетэнь финно-угрань отделениянь студенткакс. Тонавтнесь венгрань келенть.

– Студентэнь иетне ютасть, теке ливтязь ливтясть. Те ульнесь истямо кенярксов ды а стувтовикс шка: од ялгат, од вастовомат ды овсе од эрямо, – ёвтни Ольга. – Монь койсэ, те шкась свалшкас кадови эрьванть превс-седейс, кие варчизе студентэкс улема танстенть.

Университетэнть прядомадо мейле тейтересь ниле ковс якась Венгрияв, ютась тосо стажировка. Теке марто седе парсте кемекстынзе эсь содамочитнень, эдь венгрань келень кандтниця ломантнень ютксо эрязь, те кельсэнть эсь кортамонть ламоксть седе вадрялгавтсак.

Велявтсь тосто эсь тиринь Отяжелев, кармась роботамо культурань ёнкссонть. Тевесь ульнесь а берянь, ансяк вана мельтне свал чарасть школасо важодеманть перька. Ды пельиешкань ютазь вешнесь эстензэ робота республикань школатнестэ. Истямо тарка муевсь Саранскоенть маласо, Зыковань школасонть. Ольга Дорофеева кармась эрзянь ды мокшонь кельтнень тонавтыцякс.

– Тонавтыцянь тевентень кундынь истямо покш мельсэ, эстеньгак эзь кемеве, – корты тейтересь. – Эйкакштнень марто куроксто муинь кель-вал ды эрьва уроконть ютавтынь истя, штобу вечкевель сыненст, штобу занятиятнес якавольть покш мельсэ. Кавто иеть ульнинь тонавтыцякс, мейле аравтымизь завучонь таркантень, ансяк тонавтоманть эзия кадо, истя жо ветинь тиринь келень уроктнень.

Зярыя шкань ютазь Ольгань эрямосо лиссть сехте кенярксов ды учовикс тевтне, сон кармась никс ды авакс.

– Эрьва тейтерь-аванть туртов эйкакшонь чачтомась – истямо тев, зярдо тон целанек полавтоват. Тон ней весе шкат алтат эсь эйкакшонтень, эсь седейпелькскентень. Нама, эсеть лангс шкась а кадновкшныяк. Чамаваноманть малава ютамояк пелят, бажат эсь рунгонь полавтоматнень а неемс, – пейди Ольга. – Эдь зярдо роботат, тон свал ломань ютксо, бажат улемс вадрякс, мазыекс. А эйкакш марто аштемстэ теде стувтат. Ды истя эрси эрьва од аванть марто. Веенст тень кадыть мельтеме, лият путыть весе вийтнень полавтоматненень. Мон арсинь-ванынь ды кемекстынь эстень – эрявить полавтомат.

Интернетстэ Ольга кармась содамо Саранск ошонь «Огарёв-Плаза» центрань од проекттэнть, кона кандтнесь «Перезагрузка» лементь. Тейтересь сёрмадызе эсь историянзо, ёвтнесь, мекс бажи полавтовомс. Те сёрманть кучизе электронной адресэнтень ды зярыя шкань ютазь сонзэ тердизь проектс. 

 – Те проектэсь монень макссь пек ламо, – ёвтни Ольга. – Васняяк, мон карминь вечкеме эсь прянть. Вечкеме истямокс, кодамо улян. Проекттэнть мейле  карминь марямо эсь прям седе кеместэ. Лоткинь прясон кирдеме сень, мезе кармить арсеме ланган лиятне. Проекттэнть мейле мон карминь явомо седе покш мель сенень, кода ванстомс ды теемс эсь прянть мазыекс, тонадынь кочкамс монень ладиця оршамотнень. Ды ней мон пек парсте содан, кода туемс мельс эсь вечкевикс мирдентень.

Теке марто проектэнь шкастонть теевинь содавиксэкс ламот тейтерь-аватнень марто, кинь эсест историяст, конась мейсэ-бути малавикс монсенть марто. Ды ней пек парсте содан, декретэсь – те истямо шка, зярдо можна теемс пек ламо. Улезэ ансяк мелеть.

Ды Ольга тень пек парсте невти. Сонзэ арась вейкеяк чизэ, штобу аштевель тевтеме. Кизэнь перть покш мельсэ кенярдовты эсь Селища велень эрицятнень. Куш кодамо кенярксчинтень арси-аноксты культурной ды спортивной мероприятият.

– Кизна велесэнть пек ламо эйкакшт ды покш ломантькак, веенст каникуласот, лиятне отпускост тиринь ёнкссо ютавтыть. Сынст меленть кепедемга арсянгак эрьва кодат пелькстамотнень. Истя аваненьгак лездан. Сон роботы велень Культурань кудонь прявтокс, – тешксты Ольга.

Истя, аволь умок Семиянь, вечкемань ды вейке-вейкенень кемемань чинтень алтавсь покш мероприятия, конань лувсо ульнесь велопарад, артовксонь пелькстамо, налксемат ды концерт. Эряви меремс, велопарадонь весе участниктненень эрявсь анокстамс эсь транспортонть – мазылгавтомс сонзэ. Мероприятиянть лувсо кочкавсь сехте мазый велосипедэсь ды сонзэ азорозо тешкставсь казнесэ.

– Умарьковонь 3-це чистэ ютавтынек Селищань школань прядыцятнень вастовома. Нама, пек ризнэвти, школась ней уш а роботы. Ансяк вастовомась ютась пек парсте ды лембестэ, ульнесть ламо ледстнемат, кортамот, – ёвтни Ольга. – Умарень Спасонтень истя жо арсетяно кодамояк мероприятия.

Теде башка, Ольга эсь ёрокчинть ды содамочитнень кенери невтемс Саранскойсэяк. НТМ телеканалсонть сон вети передача, косо максы эрзянь келень уроктнень. Эрьва пецясто ды субутасто яки Ленинской райононь ЗАГС-ов, косо важоди распорядителекс. Васты урьвакстыцятнень ды венчицятнень.

– Монень пек вечкеви ваномс од ломантнень лангс истямо чистэнть, зярдо сынь весе седейсэ кенярдыть ды вечкить. Лангозост ванозь, свал ледстнян, кода монсь ризнынь те чистэнть, зяро паро ды валдо мельть ульнесть, – корты тейтересь.

Тень весементь топавтомга эряви аволь ансяк покш мель, эряви пек ламо шкаяк. Нама, зярдо тонь ули овсе оштё вишка эйкакшот, лиснить аволь аламо стакачитькак. Тесэ Ольганень пек лездыть малавиксэнзэ.

 – Покш сюкпря Александр мирденень, тетятненень-аватненень ды ялгатненень. Сынь свал чарькодить монь ды лездыть весемесэнть. Монь ули кинь лангс кемемс, ули кинь пельде учомс лезкс. Мон содан, аволь ськамон. А те неень шкане пек эрявикс ды покш тев, – кемексты Ольга.

Ольга Дорофеевань кондят од ломантнень марто вастовомадонть мейле арсезеват, кода бу полавтоволь минек эрямось, улевлинекак эрьвась истямокс.

Юлия Еремина

 
Мокшэрзянь раськень VII Инекужонтень

Малавгали шкась, зярдо весе Россиянь келес эриця эрзятне ды мокшотне  таго пуромить Саранскоев эсест тевдест кортамо, эсест икелев од  кинь-янонь  аравтомо. Эрьва косо прядовсть делегатонь кочкамотне. Мезе марто сынь сыть  мокшэрзянь раськень VII  Инекужов, мезесь весемеде пек талновты эйсэст ды мезе сынь учить те покш промксонть пельде, кортнинек зярыя ломань марто. Мон сынст марто вастневинь «Равось – ояксчинь лей» экспедициясо улемстэ, кона вана уш кемгавксовоцеде кода ютавтозель медьковонь 15-це чистэ саезь 19-це чинть самс. Вейксэньгемень ломантнень ютксо (зняро эйстэнек ульнесть экспедициясонть) зярыя ломанть сакшность Россиянь сеть таркатнестэ, косо эрить эрзят ды мокшот: Московсто, Ульяновскойстэ, Татарстансто, Пензасто, Саратовасто ды лиясто.

Эйкакштне – минек сы шканок

Анна Петровна Нуянзина

 Ульяновской ёнксонь Димитровград ошсто. Важоди  тосонь 6 №  «Антошка» эйдень кужонь прявтокс. Теде башка, топавты  те ошонь мокшэрзянь автономиянь прявтонь тевтнень. 



     

– Анна Петровна, тон кочказят  мокшэрзянь раськень  VII Инекужонь делегатокс. Мезе  учат  сонзэ пельде, кодат кевкстемат арсевлить кепедемс тосо, кодат мелявкст кирдят седейсэть?

– Мон важодян эйдень кужосо. Секс покш мелем вастовомс истят ломантнень марто, кить топавтыть тев, кона сюлмавозь вишка эйкакштнень тонавтомаст  марто. Вастовомс, кортнемс мартост, кодамо программань коряс сынь ветить эсь важодемаст. Минек эйдень кужосо арась эрзянь келень тонавтомань коряс башка программанок. Ули кружоконок. Сонзэ лемезэ «Вастома». Тов сакшныть Димитровград ошсо эриця эйкакшт эрьва косто.

- Димитровградсо, содан,  эрить ламо эрзят. Тон эзить лово, зяро сындест весемезэ?

– Димитровград ошсо эрзятнеде ды мокшотнеде колмо тёжадо ламо. Зяро эйстэст Мелекесской районсо, стака ёвтамс. Содан, минек буесэ ули эрзянь покш веле – Александровка. Тосонь эрицятнень марто минь кирдтяно кеме сюлмот.  Вейсэнь вийсэ ютавтнетяно эрьва кодат вастовомат: «Тундонь ильтямот», тельня – Од иень чокшне. Беряньстэ эриця семиятненень лездамга ютавтнетяно «Лездак эйкакштненень  пурнамс  школав» акцият. Тешкстынек минек вейсэндявксонтень вете иень топодемань чинть. Эсенек ошсо  пек покш илань ютавтомс виенек а сатны. Тень таркас покш мельсэ якатано Ульяновскоев, косо меельце шкастонть эрьва иестэ юты «Шумбрат» фестивалесь.

–  Ульяновской областенть пельде, тондеть башка, зяро делегатт  кочказь мокшэрзянь раськень VII Инекужов?

– Ульяновской областенть пельде делегаттнэде весемезэ кемголмово. Весе сынь содавикс ломанть. Эйстэст эрьвась, ков сатыть виензэ, бажи кандомс лезэ  эсензэ раськентень. Эсень ёндо меревлинь истя: эйкакштне – минек сы шканок. Секс сень эйстэ, кодамо мель карматано явомо сыненст, ашти ды карми аштеме эрьва раськенть уцясказо.



Васенце меленть – тиринь

келентень!

     

Раиса Михайловна Иванова –

Бугульма  ошонь 8 № школасо эрзянь келень тонавтыця,  Татарстан Республикань  мокшэрзянь  национально-культурной автономиянтень совиця.

 



– Раиса Михайловна, кодат  кевкстемат, тонь койсэ, эрявить кепедемс  мокшэрзянь раськень VII Инекужосонть?

– Инекужосонть васенце таркасо  улезэ  кевкстемась, кона сюлмавозь тиринь келенть марто. Эряви ладямс сонзэ тонавтнеманзо школатнесэ. Те тевесь а карми  молеме парсте, а карминдеряйть сонзэ лангс мель явомо минек масторонь прявттнэ. Ськамонок  те тевесь а изняви. Улезэ лезкс верде.

– Кодамо лезкс учат масторонь прявттнэнь пельде?

– Сехте покш лезксэсь – кемекстамс нормативной конёвт. Сынь кармить юрокс тиринь келень тонавтома тевсэнть. Омбоцесь – тиринь келень уроктнень ветямс аволь факультативсэ, кода тейтяно ней. Тиринь келенть эряви совавтомс школань программатнес. Сестэ сонзэ тонавтомась карми молеме седе виевстэ. Сестэ эйкакшонок, сынст эйкакшост седе парсте кармить содамо келенть, кона тенст максови аваст ловсо марто. Истя ванстови минек келесь, сонзэ марто весе раськеськак.

– Арсемась паро. Ансяк кода тень теемс ды мейстэ ушодомс?

– Кеменде ламо иеть Бугульма ошсо топавтан  мокшэрзянь национально-культурной вейсэндявксонь прявтонь тевтнень. Ды комсь иеть кода ветян эрзянь келень урокт  Бугульма ошонь 8 № школасо. Мезе истямось уроктне? Уроктне – те чачома мастор, тиринь ёнкс. Неть чарькодематнень васенце таркас саезь, минь кирдтяно кеме сюлмот кудораськетнень марто. Мезе истямось кудораськесь? Кудораськесь – те тарка, косо ванстови тиринь келесь, косто ушодови эрьва пакшанть покш эрямов кизэ. Мезе марто эйкакшось туи покш эрямов? Кодат мельть-арсемат сон кирди превсэ-удемсэ? Те весе путови семиясо, тетятнень-аватнень пельде. Теке марто кудораськенть коряс онкстнить аволь ансяк раськенть ламоксчинзэ. Сонзэ  вийсэ касы-покшолгады весе раськесь. Секс сонзэ лангс эряви явомс седе покш мель. Эряви ванстомс сонзэ, лездамс тензэ эрьва ёндо. Карми эрямо семиясь, кармить эрямо келесь ды раськеськак.

 

Эрзянь келень тонавтоманть

арсить ладямс…  Пенза ошсо

     

Елена Викторовна Бакалова –

Пенза ошонь эрзянь-мокшонь культурной автономиянь прявт.

     



– Елена Викторовна, Пенза ёнкссо ютасть  мокшэрзянь раськень VII Инекужов делегатонь кочкамотне?

– Кочкамотне ульнесть. Видькстан, мон эзинь понго делегаттнэнь юткс. Тень кувалма аламодо тень а ён.

Содан,  Пенза ёнкссо эрить пек ламо эрзят ды мокшот. Монськак аволь весть тосо ульнинь. Саемс Шемышейской, Сосновоборской, Бессоновской  буетнень. Тосо пек ламо эрзянь ды мокшонь велеть. Тон Пенза ошсто. Ёвтак, инескеть, тосо улить-арась  истят школат, косо ветявольть бу эрзянь ды мокшонь кельтне?

– Эрзянь  ды мокшонь кельтнень тонавтомась Пенза ошсо ды весе Пензань ёнкссо – те покштояк покш асатыкс. Тень туртов пек стака муемс келень содыця тонавтыцят. Аволь умок кенярдовтымизь паро кулясо: тедеде сентябрянь 1-це чистэ саезь минек автономиянь аштема кудосо (сон Володарской куросо, 31 кудосо) кармить ютамо занятият эрзянь келенть тонавтоманзо коряс. Сынст карми ветямо Мария Атякшева, кона прядызе  Н.П. Огарёв лемсэ Мордовской государственной университетэнть. Сон алтась самс тонавтомо.

– Те паро кулясь. Ансяк муевить-арась эйкакшт, конат саевельть мель тонавтнемс эрзянь келенть? Паряк, покш ломантькак кармить сакшномо?

– Эйкакшт муевить. Покштнень юткстояк ламот арсить самс тонавтнеме.

– Тень кисэ кармить пандомо тонавтыцянтень?

– Зярс тейтересь саизе мелензэ тонавтомс тиринь кель ярмаконь апак пандо. Мейле карматано арсеме, кода улемс. Арсян, седе тов ярмакткак мутано пандомс тензэ.

– Те кулясь моньгак кенярдовтымим. Тынк ёно сеедьстэ ульнинь ды неинь. Кеменьшка иеде икеле тынк тосо  «општ» ульнесь. Эрзятне ды мокшотне, теке мерят, удость пингень удомасо.

– Те истя. Но меельце иетнестэ минь карминек тевенек ветямо седе виевстэ ды келейстэ. Кадык минек вейсэндявксось ловови Пенза ошонь. Тень лангс апак вано, минь тевенек ветятано буетнесэяк: Бессоновскоень, Шемышейскоень, Сосновоборскоень.  Саемс, Городищенскоень буесэ умарьковонь 3-це чистэ карми улеме «Эряк, веле, эряк!» покшчи, кона вана уш сисемеце ие кода ютавтневи Вышелей велесэ. Сонзэ анокстамосо ды ютавтомасо лезкс вешить  минек вейсэндявксонть пельдеяк.  Минь покш мельсэ анокт максомс те лезксэнть.

– Сюкпря.

 

Кевкстематнень макснесь

Раиса Щанкина

 

 

 
Инекужось пурнасынзе масторонь келес эриця эрзятнень ды мокшотнень

Неть читнестэ Печатень кудонь Пресс-центрасо республикань журналисттнэнь марто вастовкшность Регионъютконь мокшэрзянь раськень общественной вейсэндявксонь прявтось Ю.А.Мишанин ды исполкомонь прявтось А.С.Лузгин. Кортамось алтазель Мокшэрзянь вейсэндявксонь VII Инекужонтень анокстамонтень.

 

Ледстясынек, Инекужось ютавтови те иень ожоковонь 23-25-це читнестэ Саранск ошсо. Сонзэ темазо – «Мордовский (мокшанский и эрзянский) народ в едином культурном коде многонациональной России».

– Те иень сёксня минек республиканть ды целанек масторонть туртов ютавтови покш вастовома – Регионъютконь мокшэрзянь раськень общественной вейсэндявксонь промксось. Ледстясынек, сон ютавтови вете иес весть, – толковизе Юрий Мишанин. – Эрзятнень ды мокшотнень туртов те инекужось пек эрявикс. Эдь минек раськень ломантне эрить покш масторонть келес, малав эрьва регионсонть. Ды сынст марто вастовоматне невтить: ломантнень ули мелест кортамс эсест раськень ломантнень марто, ванкшномс талновтыця кевкстематнень, явомс мель стакачитненень. Невтемакс, Саратовань областьсэ, овсе Казахстанонть марто границянть лангсо, ули мокшонь веле. Сынст чачома ёнксост – Краснослободской райононь Колопино велесь. Аволь умок сынь сакшность тей кенярксчинь ветямо. А сёпса, ломантне прасть кумажа лангс ды палсесть тиринь моданть. Ды истят невтевкстнэде пек ламо. Те оштё весть невти Инекужонь ютавтомань эрявиксчинть.

Тешкстазель, VII Инекужонтень анокстамось ушодовсь те иень якшамковсто. Ютавтовсь вастовома республикань Прявтонть марто. В.Д.Волков тешкстась «О содействии в подготовке и проведении VII съезда мордовского (мокшанского и эрзянского) народа» Указ, пурназь оргкомитет.

– Инекужонь темась тешксты, васняяк, минек раськенть улить лиятнень ёнов а молиця культураст, коест-кирдаст. Эрзятне ды мокшотне –  Россиянь раськенть ды Россиянь государстванть пельксэзэ. Минь содатано, весе шкатнестэ, сехте стакатнестэяк, минек ломантне лия раськетнень марто вейсэ аштесть тиринь Отечестванть аявомачинзэ ды олячинзэ кисэ, – тешкстызе Ю.А.Мишанин.

Неень шкане Саранск ошсо, республикань весе ёнкстнэсэ, истя жо сеть регионтнэсэ, косо эрить эрзятне ды мокшотне, моли Инекужов делегаттнэнь кочкамось. Весемезэ учови 750 ломантнень самось масторонь 45-50 регионтнэстэ. Сехте покш делегациясь, 21 ломань, учови Самарань областьстэ, истя жо Пензасто ды Ульяновскойстэ. Республикасонть жо сехте покш делегация пурнави Зубова-Полянань районсто – 15 ломанть, Саранск ошонь Октябрьской ёнкссто – 30.

– Пек ламот бажить понгомс те покш вастовомантень. Неень шкантень кочказь 407 делегатт. Сынст ютксо тонавтыцят, культурасо важодицят, ветерант, кить аштесть Регионъютконь мокшэрзянь раськень общественной вейсэндявксонть ушодкссо ды якасть васенце Инекужонтень, истя жо од ломантькак, – толковизе Юрий Мишанин. – Инекужос понгомадо яволявтоматне яла сыть. Карминек содамо, Якутиясо ули «Васедема» раськень культурань вейсэндявкс. Ёроковсто кармасть важодеме Рязаньсэ эриця мокшотне ды эрзятне. Весе сынь сыть Инекужонтень.

Регионъютконь мокшэрзянь раськень общественной вейсэндявксонь исполкомонь прявтось А.С.Лузгин башка тешкстызе, регионтнэ явить покш мель те покш вастовомантень.

– Ульяновской областень губернаторось С.И.Морозов кучсь сёрма Мордовиянь Прявтонть В.Д.Волковонь лемс, конасонть энялдсь Инекужонь ютавтоманть лувсо седе келейстэ невтемс-максомс сеть материалтнэнь, конат сюлмавозь учёноенть, просветителенть, тонавтыцянть А.Ф.Юртовонь юбилеензэ марто, – мерсь Александр Степанович. – Ульяновскойсэ путозь кеврунго минек содавикс скульпторонтень Степан Эрьзянень. Ней ванкшнови Юртовнень кеврунгонть путомадо кевкстемась.

А.С.Лузгин тешкстызе, Инекужосонть покш мель явови тиринь келенть, койтнень-кирдатнень ды культуранть ванстомантень. Ёвтызе, ламо юты семиясто, косо эйкакштне теевить содавиксэкс покштяст-бабаст келенть ды культуранть марто. Ёвтызе, Инекужонть юрсо тенень алтави башка секциясь –  «Семейные традиции и современные демографические процессы».

Ёвтазель, Инекужонтень анокстамонть лувсо ютавтовсь «Равось – ояксчинь лей» раськеютконь этнокультурной экспедициясь. Истя жо ветявить «Историческая память как основа сохранения культурного кода мордовского (мокшанского и эрзянского) народа и единства российской нации» республикань научно-практической конференциясь, «Шумбрат» раськень фольклоронь кенярксчись, эрзянь ды мокшонь раськень од ломантнень покш промксось ды зярыя лия вастовомат, косо лангс ливтевить сеть пшти кевкстематне, конатнень эрявить кортамс-ванномс мокшэрзянь вейсэндявксонь VII Инекужосонть.

 

Татьяна Аксенова

 
Евгений Ледяйкин: «Велесь вельми вейсэнь тевсэ»

 Масторонь келес вишка ды покш велетнень вельмевтемга, тосо ломантнень эрямост паролгавтомга РФ-нь Президентэсь В.В.Путин те иенть ушодовомсто кемекстась грантонь пелькстамо. Минь тиринь газетань лопатнесэ ушодынек ловныцятненень пачтямо седе, кода республикасонок юты грантонь ярмактнень ютавтомась, мезе тееви таркатнесэ велетнень одкстомтомаст ды кезэрень койтнень вельмевтемаст коряс.

Седе икелень номертнэсэ пачтинек, кода аштить тевтне Мордовиянь кезэрень ошсонть – Темниковасо.

Аволь умок вейсэ Общероссийской народной фронтонь региононь отделенияс совицятнень марто ульнинек Покш Березникень районсо, косо тевс нолдави «Мейстэ ушодови тиринь таркась?» («С чего начинается Родина?») проектэсь.

Кода уш пачтинек газетань икелень номертнэнь лопатнесэ, Мордовиясо РФ-нь Президентэнть грантонь пелькстамосонть изницякс лиссть кемгавксово аволь коммерческой общественной организацият. Изницятнень ютксо «Од веле» велень территориянь виевгавтомань региононь общественной организациясь, сонензэ макссть 2 миллионт 157 тёжат целковойть. Те организациянть прявтсо эрзянь цёрась, МР-нь Общественной палатас совицясь, социологической наукань кандидатось Евгений Евгеньевич Ледяйкин. Тешкстасынек, Мордовиясо сонзэ ушодксонзо коряс васенцеде тееви «Коень-кирдань ванстомань кудо» («Музейно-культурный центр «Дом традиций»).



Те разнэ Парынзэле велентень самонь тувталтнэде ульнесть ламо, сехте эрявиксэсь: кода те веленть теемс содавиксэкс республикань ды масторонь эрицятненень, панжомс этнокультурной программанть коряс туристэнь китнень-янтнэнь, сынст вельде вельмевтемс ды ванстомс минек покштятнень-бабатнень койтнень-кирдатнень. Тень вельде муемс важодемань таркат тосо эрицятненень.

Те разнэ Покш Березникень районов инжетнень ютксо ульнесть: Мордовия Республикань ОНФ-нь исполкомонь прявтось Наталия Сайгачева, те общественной организациянть сопредседательтне Олег Каштанов ды Людмила Нарбекова, ОНФ-нь региононь отделениянь экспертэсь, искусствоведениянь кандидатось Виктор Махаев, С.Д.Эрьзя лемсэ музеень декоративно-прикладной искусствань отделэнь прявтось Наталья Челмакина. Истя жо ульнесть инжеть Темниковань ды Рузаевкань районтнэстэ, кить састь тей тонавтнеме. Сынь истя жо бажить тиринь ёнксост теемс содавиксэкс эрьва ёндо тенст сыця туристтнэнень.

Васенце содавтома таркакс минек покш делегациянтень ульнесь Культурань кудось, конась ашти Парынзэле веленть куншкасо. Сон теезель ютазь пингень 50-60-це иетнестэ, се шкане икеле молиця «Паракинский» колхозонть вийсэ. Ламо иень перть сон вейсэндясь аволь ансяк те велень эрицятнень, истя жо тесэ парсте ютавтсть юткошкаст шабра велень эрицятнеяк. Эрямось, сехте пек вейксэньгеменце иетнестэ,  совавтсь ламо полавтомат, конатнеде мейле велетне кармасть цидярдомо аволь шожда шкат. Неть стакачитне эзть юта Парынзэлень эрицятнень вакскаяк. Кие соды, паряк, те шкас ансяк цянавт бу ливтневельть Культурань кудонь ташто зданиясонть (сынст вейке пизэнть те шкас кадызь сонзэ ванськавтыцятне-витницятне).

Потсто витнезь, ванськавтозь ды, ков виест сатотсть, мазылгавтозь Культурань кудосонть, конанень кодгеменде ламо иеть уш, «Парынза» ды «Штырма лей» ансамблятне вастымизь гайтев моросо, каванимизь те велень эрицятнень кедьсэ панезь тантей прякадо.

Экскурсоводокс тенек ульнесь «Парынза» ансамблясо морыцясь Елена Ледяйкина. Сон тенек невтинзе тосо пурназь кезэрень оршамопельтнень. Вейке парсеень пацянтень, сонзэ пачтямонзо коряс, кавтосядт иеть. А кодат мазыйть нардамотне, конатнень викшнизь сынсь Парынзэлень тейтерь-аватне!

Актовой залонть истя жо кода маштсть мазылгавтызь, Покш Березникень Культурань кудонть одкстомтомсто максызь тенст ташто креслатнень. Виде, одкстомтомань тевтнень ютавтомс знярс ярмакост арасть, кемить республикань властень кирдийтнень лангс. Эдь ушодксось путозель те велень эрицятнень бажамост вельде.

Кода тенек пачтясь Елена Ледяйкина, оштё колмо иеде икеле те зданиясь эзь уштово, вальматне ды кенкштне аразь мартольть. Культурань кудонь артисттнэ пурнавкшность чокшне ланга ды оймсема читнестэ школас.

Клубонть ванськавтомадо мейле арсезевсть сонзэ витнемадо-мазылгавтомадо. Истя, идезель 500 тёжат целковойс Президентской васенце грантось, конань лангс рамазель звуковой ды видеоаппаратура. Виде, те макссь кемема велень эрицятненень, сехте пек акемицятненень, тевтнень паро ёнов полавтомантень.

Теде мейле сынськак ломантне кармасть, кие ярмаксо, кие мейсэ маштсь, лездамо аволь ансяк Культурань кудонть витнемасо, истя жо туристэнь маршрутонть теемасо.

Парынзэленть эйстэ а васоло ашти покш сёлт, ков аволь ансяк тосонь эрицятне, шабра велетнестэяк якить калонь кундамо. Сонзэ эйстэ а васоло, сэрей пандо алдо, мусть сисем лисьмапрят. Кортыть, эйсэст ведесь шумбрачинь витиця, симемань явавтыця. Вере пандонть тёкшсо стявтозь крёст. Кортыть, ламо пингеде икелень шкасто саезь тей сакшность озномо минек покштятне-бабатне. Алкукскак, ведесь лисьмапрятнесэ пек тантей, а пандо прясо таркась седеень оймавтыця, ламодо арсеме кармавтыця.

Те таркастонть аволь васоло, тагояк сэрей пандо прясо, сельмень кенярдовтыця таркасо ули оймсема тарка, конась лемдеви «Ашо лисьмакс». Те лисьмапрянтень, конась канды ведензэ крута пандонть алдо, истя жо теезь паро валгома тарка. Вере, оймсема таркасонть, стявтозь покш лисьма, кодат икеле ульнесть малав эрьва велесэ.

Неень шкане Парынзэлесэ ютыть  Коень-кирдань ванстомань кудонть витнемань тевтне. Те велень эрицятне анокт лездамс: кандыть кудосост ванстовиця кезэрень ули-паронть, покштяст-бабаст фотографият.

Кода кортыть, эсь сельмесэ неинек, кода Дубенкабуень кедьчелькев ломантне витнить-одкстомтыть те кудонть. Удалце кудос ташто каштомонть таркас стявтсть од, косо тов сыця туристтнэ аволь ансяк эрьва ёндо ванкшносызь, истя жо тенст карми меревеме эйсэнзэ пидемскак-панемскак. Икельце кудосонть истя жо ванстовсь весемесь, кода ульнесь 50-60-це иетнестэ, потолоконтень арсить понгавтомс лавсь.

Эрьва чинь мелявкстнэнь-тевтнень топавтомсто минь чуросто арсезевтяно сень коряс, мезень кисэ минь чачинек-касынек, весе-аволь теинек эйкакшонок трямсто-кастомсто тиринь келенть, раськенть, моданть вечкеме тонавтомасонть ды содамосонть. А свал арсезевтяно сень коряс, кодамо нурькине минек эрямось ды мезе кадтано масторлангс сонзэ ютамодо мейле. Неть арсематне седеяк пек виевгавтовсть аволь умок Покш Березникень Парынзэлесэ улема шкасто тесэнь эрицятнень вийсэ полавтоматнень редямсто.

 

Материалонть анокстызе

Валентина Юдина

 
Мордовияв сакшнось Московонь ды весе Русень Иневанькс Патриархось Кирилл

Московонь ды весе Русень Иневанькс Патриархось Кирилл медьковонь 31-це чистэ сакшнось Мордовия Республикав. Тиринь моданть лангсо сонзэ вастызь Мордовиянь Прявтось Владимир Волков, Саранскоень ды Мордовиянь митрополитэсь Зиновий, Ицялонь райононь прявтось Валентина Дмитриева. Сынст марто вейсэ покш инжесь якась Ицял ёнксонь Оброчное велев. Тесэ Иневанькс патриархось ютавтсь ледстнемань служба покштянзо – Василий Гундяев священникенть калмонзо лангсо.



Василий Степанович чачсь 1879 иестэ Астраханьсэ. 1903 иестэ сынст кудораськест сась эрямо Нижегородской губерниянь Лукоянов ошов, косо Василий кармась важодеме чугункань кинь депосо машинистэкс-механикекс. Тесэ сон урьвакстсь Ицял ёнксонь Лада велесэ чачозь тейтеренть Параскева Ивановнань лангс, конань марто вейсэ сынь трясть-кастсть кавксо эйкакшт. Эрьва кизна сынь семиянек сакшность Оброчноев, косо ульнесь Василий Степановичень тетянзо-аванзо кудост.

Василий Гундяев ульнесь Пазнэнь пек кемицякс, малав весе ярмаконзо кучнесь Афононь Иневанькс Пандонтень, косо сынст кудораськест кисэ озность зярыя монастыртнесэ. 1921 иестэ, большевиктнень пингстэ, сон пекстазель ды комсь иеде ламо ютавтсь тюрьматнесэ. 1950-це иетнень прядовомсто, ламо иетнень перть стака цидярдоматнеде мейле, Василий Степановичень кедезэ путозь священникень санонтень ды зярыя иень перть сон служась Башкириянь вейке храмсо. Уш сырестэ, зярдо оймсеме нолдызе сонсь Иневанькс Патриархось Алексий I, Василий Гундяев иереесь велявтсь Оброчноев, косо 1969 иень ожоковсто кулось, сонензэ ульнесть 90 иеть.

Мирдензэ куломадо мейле Параскева Ивановна сась эрямо Саранскоев. Сон тусь эрямосто мирдензэ кулома чистэ – 1974 иень ожоковонь 31-це чистэ, 90 иетнень топодемс кадовкшность кемень чить. Иневанькс Патриархонть сырькаезэ калмазь Саранск ошонь Ключаревской калмолангонтень.

1980-це иетнестэ саезь Гундяевтнень кудосонть эрясть лия ломанть. 2011 иестэ, зярдо Патриархось сакшнось Мордовияв, сон совсесь те кудонтень, кортась од азортнэнь марто. Самай сестэ чачсь мелесь теемс кудонть истямокс, кодамокс сон кадовсь нуцькатнень мельтнесэ-ледстнематнесэ.

Ансяк топавтомс тень ульнесь аволь шожда. 2017 иестэ кудонть рамизе Саранскоень епархиясь, сонзэ витнизь ды ванстовозь фотографиятнень вельде одкстомтызь кудопотмонть. Важодемась пек покшоль – весементь удалась вельмевтемс, меельце эскинень пес. Ламонть кудосонть полавтызь икелень азортнэ. Невтемакс, калавтозель каштомось, конань савсь вачкамс одс, сон мейсэяк а явови икеленсенть эйстэ.

Зярдо Иневанькс Патриархось чалгась поровтонть трокс – абунгадсь. Теке мерят, эзь кеме эсензэ сельметнес. Теке апак учо чалгась ютазь иетнень трокс, одс велявтсь эйкакшпингентень, зярдо сон ютавтсь каникуланзо покштянзо ды бабанзо кедьсэ.

Предстоятелесь пек дивазевсь. «Вана те да! Тесэ весемесь истя ульнеськак! – рангстась сон окойники. – Кенкштнеяк, стенатнеяк, дивантнэяк, удомань нупальтнеяк – весемесь. Алкукс! Вана тесэ мон удынь, кашлангсо, бабань вакссо. Вана горобиясь. Истямо жо. Бабам тосо ванстсь нуцькатнень туртов ламбамопельть. Кодамо покш важодема тынь топавтыде!»

Гундяевтнень кудораськень пизэнтень велявтсть семиянть ули-паронзояк. Сынст ютксо – кезэрень пазавась, конань Патриархось саизе покштянзо кудосто сонзэ куломадонзо мейле, истя жо бабанзо, Параскева Ивановнань, библиотекасто книгась – А.П. Чеховонь 1946 иестэ нолдазь произведениянзо покш пусмось.

Кудосонть одкстомтомань тевтнень топавтомсто строицятне мусть кекшема тарка – XVIII пингень причастямонь туртов церьковань кедьёнкст.

«Сынст покштям ванстсь сехте стака шкатнестэ», – стакасто лекстязь мерсь Патриархось.

Кекшема таркась теезель потолоксо. Дивавты, кода сонзэ эзизь муе ламоксть ютавтозь вешнематнень пингстэ. Питней муевксэсь, кода кемекстазель, максови Московонь Свято-Даниловской монастырьс.

Патриархонть малавиксэнзэ, кить састь Саранскойстэ ды Санкт-Петербургсто, пурнавсть тиринь кудос. Ледстнесть се валдо шканть, зярдо тесэ эрясть бабаст ды покштяст, зярдо кудонтень пурнавкшность эйкакштне ды нуцькатне. Ледстнематнеде эзть кирдеве сельведтне.  

Садпиресэнть вармась сорновтсь вишнянь лопатнень. Чувтотнень озавтызь тедеде, сетнень таркас, конатне кассть Василий Степановичень ды Параскева Ивановнань эрямо шкасто. Умарьпиренть одкстомтсть састыне, бажасть велявтомс икелень таркатнес эрьва чувтыненть. Иневанькс Патриархось аштесь умарьпирень кенкшкенть вакссо, вансь од чувтынетнень лангс.

Патриархось вастневсь аволь ансяк малавиксэнзэ, истя жо велень эрицятнень марто, конат пурнавкшность Василий Гундяевень кудонзо ваксс.

«Монь туртов свал покш уцяска – сакшномс тей, – мерсь Рузонь Православной Церьковань Предстоятелесь. – Ёвтан покш сюкпря республикань Прявтонтень Владимир Дмитриевич Волковнень, Зиновий Владыкантень ды весенень, кить бажасть вельмевтемс покштянь кудонть ды теемс сонзэ истямокс, кодамокс сон ульнесь. Тесэ весемесь теезь вечкема марто, весемесь ванькс ды мазый. Покш сюкпря тенк!»

Иневанькс Патриархось пачтизе эсензэ баславамонзо Мордовиянь весе эрицятненень, башка тешкстызе: «Бажатадо улемс уцяскавокс – ванстодо Пазонтень кемеманть ды эрядо сонзэ закононзо коряс. Сестэ весемесь ули вадря. Зярдо ломанесь колы неть законтнэнь, сестэ кармить лиснеме стакачить, семиясо эрямсто, эйкакштнень ды нуцькатнень марто. Эрядо Пазонть закононзо коряс – ды ули тенк парочи, ды карматадо куватьс эрямо масторлангсонть».        

 
<< Первая < Предыдущая 1 2 3 4 5 6 7 8 9 10 Следующая > Последняя >>

Страница 8 из 147

Новости

Эрицятнень сёрмадстомантень анокстамотне ушодовсть



Малав ие кадовсь эрицятнень Весероссиянь сёрмадстоманть самс. Аволь умок МР-ва Федеральной службань государственной статистикань территориальной органсонть ютавтовсь вастовома, конанть шкасто видео-конференциянь лувсо ветявсь кортамо Росстатонь прявтонть Павел Малков марто. Вановсть сёрмадстомань шкатне ды невтевсь официальной тешксэсь.


Подробнее ...
 
В Мордовии собрано более 700 подписей на запрет «наливаек»
 
В Республике Мордовия завершились мероприятия по сбору информации и
подписей в поддержку инициативы об ограничении работы питейных заведений,
расположенных на первых этажах многоквартирных домов и придомовых
территориях в Республике Мордовия.

Подробнее ...
 
Награждение победителей акции «Здоровое питание - активное долголетие»
 
  Уже сегодня, 17 октября,  34 ученика из Мордовии отправятся на 12-ю  смену  
Международного детского центра «Артек». Победителей акции, их наставников и кураторов 
поприветствовал  секретарь Регионального отделения «Единой России» Владимир
Чибиркин. Он  подчеркнул, что пропаганда  здорового образа жизни и оздоровление нации 
являются одними из ведущих направлений деятельности «Единой России», акция 
реализуется в рамках партийного  проекта «Здоровое будущее».  Это дает свои плоды - с
каждым годом в нашей стране увеличивается  число неравнодушных людей,  которые 
начинают сами вести здоровый образ жизни и ведут за собой других.

Подробнее ...
 
В республике успешно реализуются социально значимые проекты первичных отделений «Единой России»
 
Первичные отделения поселка  Ромоданово и поселка  Зубова Поляна   успешно
реализуют на практике  свои социально  значимые проекты, удостоенные грантовой
поддержки по итогам конкурса проектов первичных отделений, инициированного 
«Единой Россией»
  Цель проекта  «Мы рядом», реализуемого в Ромоданове - помощь пожилым людям и 
инвалидам, имеющим  заболевания опорно-двигательного  аппарата.   Прокат технических 
средств реабилитации  организован на бесплатной основе для граждан пожилого возраста, не 
имеющих группы инвалидности, но,  в силу возрастных изменений или перенесенных 
заболеваний, травм, потерявших способность свободно передвигаться. В июле этого года в 
Ромодановском  местном отделении партии прошла  презентация проекта.  Открывая
презентацию,  секретарь  Ромодановского местного отделения Партии  Наталья Хомякова  
отметила, что  основная  задача проекта   помочь людям в трудный для них период 
реабилитации.


Подробнее ...
 
Баталина: Предложение Минтруда о новых правилах выплаты пособий по уходу за ребёнком создаст проблемы родителям
 
Предложение Минтруда, согласно которому претендовать на выплату 
пособия по уходу за ребенком до полутора лет может только тот, кто 
фактически ухаживает за ребенком, избыточно и может создать лишние 
проблемы родителям. Не исключено, что Фонд социального страхования при 
назначении будет требовать документально подтвердить, что именно 
заявитель (мать или отец ребенка) фактически за ним ухаживает. Об этом 
заявила первый заместитель секретаря Генерального совета «Единой России»
Ольга Баталина.
Подробнее ...