Рубрикатор

Культура Кирилл Патриархонть Мордовиясо улемазо
Кирилл Патриархонть Мордовиясо улемазо

Кода уш пачтинек газетань лопатнесэ, аволь умок минек республиканть архипастырень визит марто содавтызе Московонь ды весе Русень Патриархось Кирилл. Колмо чинь перть Рузонь Православной Церьковань Прявтось вастневсь республикань эрицятнень марто, панжсь ды светясь храмт, паломникень-просветителень центрат, чанстясь ломантнень паро тевс.

Макаровкасо панжовсь паломникень центра

Эрзя-мокшонь моданть лангс самсто Патриархось васняяк якась Иоанно-Богословской монастырев, косо Мордовиянь прявттнэнь марто вейсэ панжсь паломникень-просветителень центра (гостиница).

Тешкстасынек, те ниле этажсо покш ды валдо од зданиянтень ве шкасто кельгить сядодо ламо ломанть. Тов сыцятнень туртов ули весемесь: сюпав библиотека, трапезной, ознома тарка. Паломникень центранть икеле васня ульнесь моравтома. Седе тов якстере парсеенть керямодо мейле, инжетне совасть центранть потмонзо ванкшномо.

Свято-Феодоровской Кафедральной соборонтень –

5 иеть

Те датантень алтавсть покш чинь каршо озноматне, конатнень ветясь Московонь ды весе Русень Патриархось Кирилл. Тосо истя жо ульнесть МР-нь Прявтось Н.И.Меркушкин, МР-нь Госсобраниянь Председателесь В.В.Конаков, МР-нь Правительствань Председателесь В.Д.Волков, Саранск ошонь округонь Администрациянь прявтось В.Ф.Сушков ды республикань ламодояк ламо Пазнэнь кемицят, конат малавгак эзть кельге соборонтень. Сынст туртов ушосо ладязельть покш экрант, косо неявсь службанть ютамось.

Торжественной службанть ушодовомадо икеле Патриархось сюконясь иневанькс праведной Феодор Ушаковонь мощатненень конат ванстовить те соборсонть.

Службанть прядовомадо мейле Епархиянь духовенстванть, Мордовиянь весе эрицятнень пельде Патриархонтень сюкпрянь вал марто пшкадсь Московонь Патриархиянь тевтнень коряс Управляющеесь Саранскоень ды Мордовиянь митрополитэсь Варсонофий.

Феодор Ушаковонь праведной воинэнть канонизациянь вете иень топодеманть коряс Варсонофий Владыкась Рузонь Православной Церьковань Патриархонтень казсь те святоенть ликензэ марто Пазава.

Теде мейле Патриархось евтась ламо лембе, седейстэ молиця валт службас сыцятненень ды республикань весе эрицятненень. Башка мель явсь Варсонофий Владыкантень ды МР-нь Прявтонтень Мордовиясо ломантнень духовной сюпавчист кастоманть, ламодояк ламо храмтнень стявтоманть коряс. Святейшиесь истя жо тешкстынзе сеть паро полавтоматнень, конатнень рединзе республикасонть. Патриархось Кафедральной соборсо улемадонзо ледстнемга священнослужительтненень казсь кезэрень Евангелия, весе пуромозтненень – Феодор Ушаковонь святой праведной воинэнть ликензэ марто пазават.

Панжовсь ды светявсь

храмось

Июлень 21-це чись Мордовиянь духовенстванть ды республикань весе эрицятнень туртов кадови ледстневицякс Казанень Пазонь Авань пазаванть лемсэ храмонь панжоманть ды светямонть коряс. Светотехстроень эрямонь районсонть истянь зняро ломанть эште вестькак эзть пурнавкшно, истямо мазычи эзь саво неемс. Кенярдовтыть варштавкс валдо сэнь тюссо артозь виде, прок штатол пандо прясо аштиця храмось, пертьпельганзо мазый цецят, сэрей кузтеманть крайга од тейтерть ды церат эрзя-мокшонь оршамопельсэ, ашосо оршазь недлячинь ды эйкакшонь музыкальной школань тонавтницят. Истя жо те покш чинть коряс сакшность тенек Московсто комендантонь 154 номер отдельной полконь Почетонь караулонь ротас совицятне.

Ушось маней, сэтьме. Малав комсь тежат ломанть учить покш инжетнень самост. Те шканть перть пуромозтненень евтневи собортнэнь панжомань ды светямонь лувдост.

Талновтыця шка… Вана храмонь сэрей ды кувака кустеманть малав састь: Московонь ды весе Русень Патриархось Кирилл, МР-нь Прявтось Н.И.Меркушкин, Московонь Патриархиянь тевтнень коряс управляющеесь Саранскоень ды Мордовиянь митрополитэсь Варсонофий, МР-нь Госсобраниянь Председателесь В.В.Конаков, МР-нь Правительствань Председателесь В.Д.Волков, МР-нь Прявтонь Администрациянь руководителесь Н.С.Крутов, Саранск ошонь округонь администрациянь прявтось В.Ф.Сушков.

Казанень Пазонь Авань пазаванть лемсэ храмонть светямодо ды Пазонь Литургиянть ютавтомадо мейле Кирилл Патриархось, Н.И.Меркушкин, Саранскоень ды Мордовиянь митрополитэсь Варсонофий лиссть ушов, ков састь ламодояк ламо Мордовиянь эрицят.

Весе пуромозтнень пельде Н.И.Меркушкин евтась покш сюкпря Патриархонтень ломантненень покш мелень явоманть кисэ. Николай Иванович ледстинзе Святейшеенть Мордовияв аволь весть самонзо, минек лемс евтазь паро валонзо-арсеманзо.

МР-нь Прявтось пачтясь республиканть туртов ледстневиця кенярксчитнеде: Саранскоень ды Мордовиянь епархиянтень – 20 иетнень топодемаст, Феодор Ушаковонь праведной воинэнть канонизациянь 10 иетнень тешкстамост ды Кафедральной соборонть 5 иетнень светямонь шкасто ледстямост.

Н.И.Меркушкин евтась ламо лембе валт Кирилл Патриархонтень эрзя-мокшонь раськенть Россиянь лия раськетнень марто вейсэндявомань 1000 иетненень анокстамонь ды тешкстамонь Оргкомитетсэ лездамонть кис. Седе тов МР-нь Прявтось пачтясь седе, кода ветявсть тевтне храмонть кепедемстэ. Лездасть весе: велень хозяйствань, промышленной предприятиятне, бизнесэнь ветицятне, башка ломантне.

Кирилл Патриархось пуромозтнень лангс ваномсто мерсь, келя, оймесэнзэ течи Инечи. Пастырень валсонзо эрицятнень тердинзе вейсэнь лезэс седейшкава важодеме, келя, ансяк сестэ изнявить весе стакачитне. Истя жо Святейшеесь ломантненень толковизе мезень кисэ стявтовить храмтне: аволь неень шкань оштнень мазылгавтомга, штобу светязь собортнэ аштевельть музеекс, а, васняяк, ломантненень ознома таркакс, духовной сюпавчист кастомс.

Патриархось тешкстызе, Мордовиясь Россиянь регионтнэнь ютксо ашти васень таркасо храмтнень ламочист коряс. Сон истя жо евтась сюкпрянь валт весенень, кить стявтсть ды мазылгавтсть те храмонть, макссь казнеть теемстэнзэ сехте пек важодицятненень, а весе сыцятненень – баславамонзо – Казанень Пазонь Аванть ликензэ.

Покштянзо-бабанзо валдо лемест ледстямга

Светотехстройсэ од храмонть панжомадо мейле Кирилл Патриархось якась Саранск ошонь округонь 2 номер калмолангов, косо калмазь раськензэ. Тосо Святейшиесь служась лемест ледстямонь лития. Истя жо тов пуромкшность Патриархонть раськензэ, конат эрить Мордовиясо ды республикань томбале. Службанть прядовомадо мейле эрьванть баславизе, а теке чинь чокшнестэнть мартост вастовкшнось.

* * *

… Обедтэ мейле Саранск ошонь куншкакуросо Славань Мемориалонть вакссо Кирилл Патриархонть учость Ине Отечественной войнань участниктне, тылэнь тружениктне. Святейшеесь путсь цецят Ине Отечественной войнасо маштовозтнень памятникентень. Истя жо цецят путсть: МР-нь Прявтось Н.И.

Меркушкин, Московонь Патриархиянь тевтнень коряс управляющеесь, Саранскоень ды Мордовиянь митрополитэсь Варсонофий, МР-нь Госсобраниянь Председателесь В.В.Конаков, МР-нь Правительствань Председателесь В.Д.Волков, Саранск ошонь округонь администрациянь прявтось В.Ф.Сушков. Теде мейле Кирилл Патриархось явсь мель ветерантнэнень.

Пуромозтненень пшкадемстэ Святейшеесь кортась фронтсо маштовозтнень валдо лемест а стувтомадо, од ломантнень патриотизманть лувсо кастомадо.

ВАНЫНЗЕ

райононь ЦЕРЬКОВАТНЕНЬ

Мордовиясо улемань колмоце чинь валскестэнть Рузонь Православной Церьковань Предстоятелесь ульнесь Ромоданова поселкасо. Тосо Казанень Пазонь Аванть лемсэ пазавань храмсонть, конань тееманзо Патриархось баславакшнызе Смоленскоень ды Калининградонь митрополитэкс улемстэ, учость те енксонь эрицятне. Ангелэнь оршамопельсэ аштиця эйкакштне вастасть православиянь темас стихотворения ды моро марто.

Патриархось пуромозтненень пшкадсь паронь арсема марто ды макссь казнеть од храмонтень ды весе пуромозтненень. Истя жо Святейшеесь содавтызе Ицял енксонь Ульянка велесэ Дмитрий Ростовский святителенть лемсэ аволь умок теезь храмонть.

Седе тов сон ульнесь теке енксонь Оброчное велесэ. Тосо ули кудо, косо зярдо-бути эрясть Святейшиенть покштязо-бабазо священникесь Василий ды Параскева Ивановна Гундяевтне. Кудонть ванкшномадо, малавиксэнзэ марто чайде симемадо мейле Патриархось якась Оброчное велень калмолангов, косо калмазь покштязо священникесь Василий Гундяев ды служась тосо лемень ледстямонь лития.

Ицялсо улемстэ Московонь ды весе Русень Святейшей Патриархось Кирилл совсесь Архистратигенть Михаилэнь лемсэ храмонтень, конань марто сюлмавозь эйкакшпингень ледстнеманзо. Ламо иень перть тов озномо якась покштянзо семиясь.

Кемля поселкасо Святейшеенть вастасть Ицялонь муниципальной райононь ды поселкань администрациянь прявттнэ, те райононь Пазнэнь кемицятне. Те енксонь эрицятнень марто вастовомсто Патриархось седейшкава евтнесь сеть паро полавтоматнеде, конатнень рединзе эрзя-мокшонь моданть лангсто.

Васняяк Патриархось ледстизе, кодат стака шкат ульнесть республикань ломантнень туртов. А ней допрок а содавиксэкс теевсть паксятне, сынь соказь-видезь, лангстост а неят вейкеяк зыянов тикше. Святейшеесь кармавтсь икелепелевгак кирдемс те лувонть, одтнэнень мерсь а туемс велестэ, кадовомс важодеме тиринь таркатнес, косо эрьва чистэ эрямос совавтовить од ды икелев молиця тевтне.

Сехте эрявиксэкс Святейшеесь евтызе эрзя-мокшонь раськенть рузтнэнь марто ояксчисэ эрямонть, тиринь фольклоронть, келенть, койтнень-кирдатнень ванстоманть.

Теке жо чистэнть Святейшей Кирилл Патриархось якась Орданьбуесэ аволь умок теезь епархияв.

Мейле содавтызе те енксонь Тургенева поселкасо Казанень Ключевской пустынень монастыренть, конань территориясо панжовсь ды светявсь паломникень-просветителень центра.

Колмо чинь перть, косо бу аволь уле Московонь ды весе Русень Святейший Патриархось Кирилл Мордовиянь эрицятне вастасть седейшкава, пси цяпамосо, ламот кемицятнень ютксто кенярксонь сельведь марто.

Валентина Юдина

 

Новости

Конституциясь – прявт закон

Исяк, декабрянь 12-це чистэ, тешкставсь Россиянь Федерациянь Конституциянь чись – минек масторонь государственной прявт кенярксчитнестэ вейкесь.

1993 иень те чистэнть минек масторсо кемекстазель РФ-нь Конституциясь. Весе текстэсь максозель «Российская газета» изданиясонть 1993 иень декабрянь 25-це чистэ. 1994 иестэ, Россиянь Президентэнть Указонзо коряс, декабрянь 12-це чись ёвтазель государственной кенярксчикс. Зярыя иень перть те чись ульнесь официальной оймсема чикс. Ансяк 2004 иень декабрясто Госдумась совавтсь полавтомат РФ-нь Трудонь кодексэнтень. Оймсема чись полавтовсь, а сонсь кенярксчись кандозь Россиянь ледстнемань читнень юткс.

Подробнее ...
 
Косто рамамс куз?

Декабрянь 15-це чистэнть республикасонть панжовить кузтнэнь ды пичетнень микшнемань базартнэ. Саранскойсэ тень туртов кемекстасть 22 площадкат (микшнема таркатнеде жо весемезэ 77).

Подробнее ...
 
Краснослободскойсэ – од прявт

Ноябрянь 29-це чистэ Краснослободскоень муниципальной районсо ютась Депутатонь райононь советэнь 13-це  сессиясь. Мордовиянь Прявтонть В.Д.Волковонь кармавтоманзо коряс сессиянть роботасо примась участия Мордовиянь Правительствань Председателесь В.Ф.Сушков. Чинь повесткасонть ульнесь вейке кевкстема: райононь од прявтонть кочкамось.

Подробнее ...
 
Фан-зона

Саранскойсэ Футболонь коряс масторлангонь чемпионатонть ютавтомсто прявт ошонь куншкакуросо карми улеме фан-зона.

Подробнее ...
 
Кочкадо сехте мазый район

Саранскойсэ ютавтови онлайн-вайгелень максома, сонзэ вельде редяви, ошонь кона районось весемеде мазыйстэ наряжазь Од иень кенярксчитнес. Теде пачтясть ошонь Администрациясто.

Подробнее ...