Рубрикатор

Культура «Эрзянь правдантень» – 98 иеть
«Эрзянь правдантень» – 98 иеть

 

Таштамковонь 26-це чистэ «Эрзянь правда» газетань прявт редакторонь нупалесь ульнесь инжень вастома таркакс. Сынь сакшность аволь теваразде. Васняяк, тедеде «Эрзянь правда» газетантень топодсть 98 иеть.  Омбоцекс,  од редакторонть Марина Николаевна Девятовань пингстэ тосо ладявсь паро  кой: тердтнемс сыре ломантнень, кить важодсть «Эрзянь правдасо»  ламо иень перть.  Сакшность  кадык аволь весе, кить тердезельть (кинень аютколь, кить  эзть саво  лавшо шумбрачист кувалма). Тень лангс апак вано, вастовомась ютась пек лембестэ. Тантей каванявкс марто морга экшсэ кувать мольсть седейшкавань кортнемат,  ютазь шкань тевтнеде ледстнемат.  Паро ды лембе валсо кундазельть сеть ломантнень лемест, кить тусть эрямосто. Ютксост икелень редактортнэ П.П. Борейкин, Н.И. Петрушкин, ответственной секретаресь Е.Н. Госткин, журналисттнэ Н.Ф. Майоров, Н.М. Симдянов, В.И. Демин, Н.В. Кулавский ды лият.  Одтнэнь покшоль мелест содамс, кода эрясь «Эрзянь правдань» коллективесь икеле, кода топавтсть журналисттнэ эсест тевест, кодамо стакачи марто савкшнось тенст вастневемс.  Ульнесь мезе ёвтнемс тень коряс Т.С. Баргованень, Т.Д. Рябованень, Н.И.Ишуткиннэнь, кинень савсь аволь вейке кемень иеть  лакамс «Эрзянь правда» газетань ютазь шкань тевтнесэ. Седеяк ламо сатотсь печтямс эрзянь умонь журналистэнтень Татьяна Михайловна Ковалеванень, кинь эрямозо «Эрзянь правда» газетанть марто сюлмавозь 1960 иестэ саезь.  Эряви меремс, Татьяна Михайловнань Пазось казизе валдо превсэ. Иензэ лангс апак вано, сон нейгак кирди эсензэ мельсэ-превсэ весе сень, мезе ульнесь сонзэ эрямосо икеле.  Кинь марто савсь тензэ важодемс, кинь марто вастневемс, кинь марто мезе лиснесь, весе теде сон часонь час ёвтневель ды аволь сизе. Кодамоль сонсь, кода журналист, кода редакторонь полавтыця, ёвтнетяно течинь номерсэнть. 




Сёрмадомань ёрокчись сонсь а сакшны?

Художникть, скульпторт, архитекторт, артистт, инженерт, писательть, лия профессиянь ломанть – сындест ламо сёрмадыть газетасояк, нолдтнить передачат радиосояк, телевидениясояк. А вана сеть, кить весе тень теить, сеедьстэ кадовить апак редя, кода мерить, “за кадром”. Журналистэнь тевесь тень эйсэ, нать, явовияк,– сёрмадомс ды ёвтнемс лиятнеде. Кода эри, кодамо уцяска сатотсь эстензэ, весе теде соды ансяк сонсь ды малавиксэнзэ.

Стака ёвтамс, зяро статьят, репортажт, очеркть сёрмадсь Татьяна Михайловна Ковалева (тейтерькс Живаева) ниленьгеменде ламо иетнень перть, зярс сон ульнесь сюлмавозь национальной журналистиканть марто (30 ламо иеть важодсь “Эрзянь правда” газетасо, малав 10 иеть – “Сятко” журналсо). Мейлеяк, зярдо тусь пенсияв, эзизе кадно ды а кадны сёрмадома тевензэ.





Татьяна Михайловна сеть аламотнень ютксто, кить весе оймева-седейга “сэредить” эсест раськест, сонзэ уцясканть кисэ, весе виест путыть тиринь келенть ванстоманзо, сонзэ сюпавчинть кастоманзо лезэс. Вейкенть сень кис, кодамо путовкс сон тейсь национальной журналистиканть туртов, лемензэ ладяволь пингеде-пингес совавтомс эрзянь раськень сехте содавикс ломантнень юткс. Эсензэ эрямодонть, седе, кодамо покш ды келей ки сон ютась, мезе тень пингстэ савсь тензэ печтямс, мезе цидярдомс, аволь очерк ды повесть, сёрмадомаль роман ды аволь вейкеяк.

Зярдо а зярдо, паряк, сынь улить сёрмадозь. Вейкесь виде, эсензэ Ковалевадо седе парсте те а тееви киненьгак. Секс миньгак пек васолга, кода кортыть, а карматано якамо ды эцнеме, терявтсынек сёрмадомс седе, мезе содатано превейдеяк превей те журналисткадонть, токамс эрямонь ды творчествань сеть таркатнень, конат седе малавикст ды редявикст...

Татьяна Михайловна Ковалевань туртов сатотсь войнань толсо киртазь эйкакшпинге. Ниле иеть тензэ топодекшнесть, зярдо минек масторонок лангс чилисема ёндо каявсь куломань кандыця чопода виесь. Весе сеть стакачитнень, майсематнень эйстэ, кодат эсь мартонзо кандсь ютазь войнась, эзь мене Живаевтнень семиясткак. Цидярдомс неть стакачитнень ськамонзо эриця ломанентеньгак а шождаль, сындест аванзо ульнесть кемень (!) ды вейкесь омбоцеде вишкинель. Сехте веженсесь Шура чачсь самай се иестэнть, зярдо ушодовсь войнась.

“...Вишка пингстэ саезь – тевть, аволь эйкакшонь мелявкст ды свал превсэнь аштесь арсемась ярсамс пекень пешкедемс...” – видьксты сон мейле эсензэ статьясонть, конань лемдизе “Большая семья” ды кона совавтозель “Частица Родины великой”  вейсэнь пусмонтень (1987 ие).  Статьясонть ёвтневи, кодат стакачить, майсемат кирдсть ломантне. Сехте пек велетнесэ. Кода эрьва косо, Отяжелень райононь Таразбуе велесь, косо чачсь Татьяна Михайловна, войнань шкасто чамкшнось пеледензэ ламос. Цёратне ятонть каршо тюреме тукшность. Кадовсть ансяк сыретне, аватне ды эйкакштне.

Сельведеть туить, зярдо ловнат, кодамо стакачинь пачк савсь ютамс Живаевтнень семиянтень. Андомс кемень эйкакштнень паро шкастояк ойметь лисевель. Тесэ оно мезть мольсть. Татьяна Михайловнанень эстензэяк сеедьстэ стака эрси ёвтамс, кода сынь цидярдсть. Тетявтомо (сонзэяк войнав ильтякшнызь), аванстэнь лездыцякс ульнесть сыре покштяст ды сынсь эйкакштне. Весе тевтнень тейнильть вейсэ. Тикше ледильть, эмежть кастыльть, розь нуильть, пенге мельга вирев якильть. Покштне сыргить, ниле иесэ Таняньгак мартост сайнилизь. Сонгак, козонь сатотсть виензэ, лездыль.

Неть ледстнематнень ловномсто седеесь верьсэ валови. Нельгезь-колазь эйкакшпинге. Зяро ломанть тень пачк ютасть?! Войнась сехте вишкинетненьгак тейсь покшокс. Сыненст налксемаль ды чийнемаль, тень таркас кедть тапасть, карязт яжасть паксясо, пиресэ, кудосо. Сехте покш сталмось, чарькодеви, пракшнось аванзо лавтовтнень лангс.

Аванстэнь Анна Ильиничнанень аволь ансяк Ава-героинянь лем максомаль, кеврунго стявтомаль. Тетяст Михаил Иванович кудов велявтсь войнанть прядомадо мейле, зярдо покш патяст Ольга сёрмадсь сёрма Всесоюзной старостантень Михаил Иванович Калининнэнь: кудосо эйкакштнеде ламо, весе тонавтнить парсте, ансяк оршамс-карсемс а мейсэ, тетявтомо пек стака. Ды сонзэ нолдызь. Кавонест сынь аволь ансяк шумбрасто-парсте тризь-кастызь кемень эйкакшост, весень туртов макссть паро образования: весе кеменнест прядсть школа, мейле тонавтнесть вузсо. Кодамо профессиянь ломанть ансяк эзть лисе сынст кудосто: тонавтыцят, врачт, экономистт, строительть, сюронь кастыцят, телевидениянь дикторт, юристт. Кемень эйкакштнень ютксто кавтотне теевсть журналистэкс. Татьяна Михайловнадо башка те канстонть эсензэ лангс саизе лелязо Виктор Живаев.  Виде, сон васня прядсь А.В.Луначарский лемсэ Театральной искусствань институт. Таго-зярс ульнесь драматической театрань артистэкс. Мейле тееви Мордовской АССР-сэ СССР-нь Гостелерадионь собкорокс.

 

Арсесь-арась Татьяна Михайловна улемс журналистэкс? Паряк, истят мельть кой-зярдо сакшностькак превезэнзэ. Ансяк сень, Мордовской университетэнь историко-филологической факультетэнть прядомадо мейле (те ульнесь 1960 иестэ) кучсызь роботамо “Эрзянь правда” газетав, – эзь учнеяк. Аволь сень кувалма: вузсо эрзянь кель эзь тонавтне, секс, паряк, сакшность пелемат: сон а изняви тензэ? Эрзянь келенть марто а кармить кодаткак стакачить, тень коряс Татьяна Михайловна зярдояк эзь кавтолдо. Кода сонсь а лоткси кортамодо: келесь, сонзэ чарькодемась максовить вишка пингстэ саезь, поте ловцо марто вейсэ. Татьяна Михайловнанень эзь эряво одс тонавтнемс эрзянь келенть, сы шкань журналистэсь сонзэ содылизе истя жо парсте, кода рузонсенть.

“Эрзянь правдань” редакциясо, кода мейле Ковалева видькстась эсензэ вейке интервьюсо, вастызь аволь покш мельсэ. Дипломозояк “якстерель”, опытэзэяк кой-кодамо ульнесь: университетсэ журналистикань курсав яксесь. Ды, нать, эзть кеме: ава ломань, эйкакшт туить. Саизь аволь литсотрудникекс, кода мерезель, – ученицакс. Зарплатаськак лиятнень коряс пек седе алкинель. Кучизь типографияв сэредиця подчитчицань таркас. Васня апаркстомкшнось, мекс истя аломанькс вастызь. Мейле чарькодевсь: те а берянельгак. Неизе, кода тееви газетась. Ве шкане ялатеке туиксэль. Марясь: творческой роботас нолдамонзо эзть бажа, редакциясо, секень вант, киненьгак эзь эряво. Мольсь народной образованиянь ошонь отделс учителень таркань вешеме. Тосояк эзь муе чарькодема. Савсь кадовомс “Эрзянь правда” газетань редакциясо. Текень пес, эйкакшозо чачсь, мейле – омбоце. Истя кадовськак тоско, пенсияв туемс.

Аволь сеске састь тензэ изнявкстнэ. Васня савсь аволь вейке пондо ливезь валомс. Журналистэнь кшись аволь ламбамотнестэ. Командировкав кучсызь, веледе велес ялго яказь, рудазонтькак, ловонтькак савсь тензэ шешкемс доволь. Эрсесь, васоло таркавгак кучилизь. А стувтовиксэкс кадовсь тензэ Каменец-Подольскоев командировкась, косо теизе подвигензэ ды чавовсь эрзянь цёрась Иван Кудашкин лётчикесь. Зярдояк а стувтсы сеньгак, кода веть, вальма лангсо сёрмалесь 70-це иетнестэ Марийской Республикасо Мордовиянь культурань читнеде репортажтнень. Чить позда чокшнес ардтнесь ды ломань марто вастневсь, веть весе тень конёв лангс тешкстылизе, валске марто уш телефон вельде редакцияв пачтиль. Неть командировкатне, ве ёндо, пек ламо макссть, омбоце ёндо, сайстькак аволь аламо: шка, вийть, шумбрачи. Косо илязо уле, свал превсэнзэ кирдсь кевкстеманть: кода тосо, кудосо? Паро, мирдесь (Николай Максимович – строитель, те тевентень макссь малав 40 иеть) чарькодицяль: апак музгорде нолдтнилизе командировкав. Текень пес, ававтозояк  паро ломанель. Надежда Тимофеевна сонсь вете эйкакшт трясь-кастсь, теде башка, зяро нуцькат вансь! Татьяна Михайловнань эйкакштнеяк сонзэ кедь лангсольть. Зярдо ков туиль, содыль: эйкакшонзо а кармить лытамо кува понгсь, сынь свал кармить симдезь-андозь, оршазь-карсезь. Эсест ютксояк ававт-урьват свал мукшность вейкине кель-вал. Комсьветее иень перть вейсэ эрязь, зярдояк эзть сёвно, коня алга эзть вано вейкест-вейкест лангс.

Сёрмадома ёрокчись сонсь а сакшны. Сонзэ эстеть эряви кастомс. Тень туртов эряви тонавтнемс, тонавтнемс ды тонавтнемс. Татьяна Михайловна те тевенть эзь кадно зярдояк. Васня тонавтнесь седе сыретнень пельде. Журналистиканть содамонзо коряс весемеде ламо сайсь Николай Михайлович Симдяновонь пельде, кона сестэ ульнесь партотделэнь прявтокс. Покш лезкс тензэ макссть умонь журналисттнэ Н.Ф.Майоров, Н.М.Кавкайкин.

Покш школакс тензэ кармась се шкась, зярдо газетань редакторокс путызь Пётр Прохорович Борейкинэнь. Сонзэ пингстэ редакциясо теевсть пек покш лиякстомат. Од редакторось сеске кундась дисциплинань кемекстамо. Кой-кинь туевтинзе, кой-кить сынсь тусть. Пётр Прохоровичень обуцязо, аламо меремс, казямоль. Киньгак пря ланга эзь вадяша. Эрьва валозо – закон. Варчик а топавтомс мереманзо-кармавтоманзо, сеске кармат вешнеме кабинетсэ ветеце уголонть. Аволь весень сатотсть виест кирдемс коронзо, ваномс мелензэ. Татьяна Михайловна сеть аламотнень ютксоль, кинь лангс од редакторось кемсь лиятнеде седе пек. Литсотрудникстэ курок сон “кепедезель” старшей корреспондентэкс, отделэнь прявтонь полавтыцякс. П.П.Борейкинэнь пингстэ Ковалева теевсь сонзэ ветеце полавтыцякс ды те таркасонть ульнесь икелень нилетнень вейсэ саезь шкадост кувать – 18 иеть. Кода мейле сёрмады “Кавто редакторт” очерксэнзэ, кадык савськак тензэ ламо мезе кирдемс прявтонть пельде (кевкстиль пельдензэ цёратнеде казямосто, эрсесь, а мезень кис покордылизеяк), Борейкинэнь лангс кеж зярдояк эзь сайне. Мекевлангт, ёвты ансяк сюкпрянь вал. Ды, васняяк, сеть паро лиякстоматнень кис, кодат теевсть сонзэ пингстэ: полавтовсь газетанть чачозо, лиякстомсь вёрсткась, чачсть од рубрикат, редакторось вешсь мукшномс кулят ды нолдамс сынст печатьс “исяк” валонть марто. Но сехте питнеесь, мезе ульнесь Борейкинэнь эйсэ: сон алкуксонь журналистэль, газетчикель, маштсь одонть редямо, коллективенть од тевс тердеме, вешнеме, дисциплинань кирдеме. Сетнень эйстэ, кить ютызь Борейкинэнь школанть, эзь лисе вейкеяк берянь журналист. Маштовсь те школась ды пек лездась Ковалеваненьгак.

Тонавтнесь сонсь, курок кармасть тонавтнеме эсензэ пельдеяк. Школасо, вузсо парсте тонавтнемась, книгань ловномо вечкемась, ламонь содамо бажамось эзть юта стяко. Арасель, мерят, истямо тев, мейсэ сон аволь чарькоде. Кие мезе эзь сода, эзь машто, васняяк чиильть сонензэ. Кодамо кевкстема марто авольть пшкаде, эрьванть лангс муиль виде толковамо. Сонензэ истя мерстькак – “якиця энциклопедия”. А уш сень, мезе эрявсь содамс газетанть нолдамонзо коряс, Татьяна Михайловна тонавтнизе нучк-пачк ды педе-пев. Бути ансяк машинкасо печатамо эзь машто. Лия тевтнесэ сондензэ седе парсте чарькодицят редакциясо, ловт, арасельть. Озавтылизь ответственной секретарень таркас, эзь эряво  толковамс, кода теемс макетэнть, козонь кодамо материал эцемс. Сон сонсь весе тень сельмень конязь невтевлизе.

Зяро савсь рузонь кельстэ эрзякс ютавтомс (тененьгак тонадсь), а лововияк. Кодак Московсо мезеяк покш тев ютавтыльть эли коммунисттнэ эсест сехте покш форумов (съездэв) пуромильть, секень учок, роботасто велявтат омбоце чинь валске. Кить кортасть съездсэ, весе тень эрявсь ютавтомс эрзякс ды сеедьстэ вейке чис.  Телетайпсто се чистэнть качамо мольсь. Пракстань праксташка конёвтне сядо ломанень тапардамс сатовольть. Переводчиктнень сельместкак лиснесть “коське” тексттнэнь рузонь кельстэ эрзякс ютавтомсто. Кинь озавтомс тенст лездамо? Чарькодеви кинь. Татьяна Михайловна свал аноколь тень теемс. Ды валскестэ саезь пиже вес аштят, зярс меельце валось а ули печатазь. Теде мейле таргозезь удемтнень недля эрявсь таркаваст аравтнемс.

А зяро лия конёвт савсь сёрмалемс! Минень-сюнонь справкат, характеристикат, сёрмат, лия документт – весе сынь тагояк ютыльть Татьяна Михайловнань кедьга. Сыненст поладыть лия сёрмадыцятнень мельга ловномкатнень. Сонзэ пингстэ газетас печатамс эзть максне апак ловно вейкеяк материал. Сон васня ютыль аволь вейке ломанень кедьга. Журналистэнть мельга отделэнь прявтось васня витевкст теиль, мейле, секень вант, секретаресь эсензэ превть совавтыль. Машинисткатненень секе материалонть одс печатамс кавксть, а, паряк, колмоксть лиясто кандылизь. Кона материалось ютыль Ковалевань кедьга, сень ансяк весть сатоволь печатамс. Татьяна Михайловна материалтнэнь истя маштыль витнеме, ламот эзть редяяк, кона таркасо теезь витевкстнэ. Тень пингстэ “верек”, лавшо материалоськак теевель виевекс, домкакс.

Эсензэ материалтнэнь лангсо сеедьстэ шкаяк эзь кадовкшно аштекшнемс. Татьяна Михайловна тень тейсь кудосо. Веть. Зярдо прядовильть кудоютконь тевтне, удомо мадстилинзе эйкакштнень, сестэ ансяк озыль столь экшс. Вейке материалонть велькссэ лиясто ашолгадомс “орожииль”. Васенце вешемакс тень пингстэ ловсь а нолдамс эйсэнзэ кодамояк манявкс, ломанень покордамо. Ды те вешеманть Татьяна Михайловна эзизе колсе зярдояк. Коекс теизе, эсензэ сёрмадовкстнэнь аволь сеске кандомс видьстэ секретариатов, васня макснилинзе киненьгак ловномс. Бажась содамс, мезе арсить се-тона очерктенть, репортаждонть, статьядонть лият. Сялдомань валт, чарькодеви, марямс тензэ эзь савкшно. Татьяна Михайловна сёрмады истя, кода мерить, карвось нерензэ а синдьсы. Арась истямо сёрмадовкс, косо авольть уле домка мельть-арсемат. Келезэяк мазый, чарькодевикс, шождасто ловновикс. Ды ялатеке мезе кинь мельс эзь тукшно, аволизе ютавто пиле вакска. Одов ловновлизе сёрмадовксонть. Муиль кодамояк асатыкс, апак кавтолдо витевлизе. Секс, паряк, мезде ды киде сон илязо сёрмадо (улезэ те очерк, зарисовка, репортаж), вейкеськак эйстэст эзь кадово апак ловно. Ловныцятне те шкас эзизь стувто очерктнень, косо Татьяна Михайловна ёвтни Г.Г.Вдовин композитордонть, С.Д.Эрьзя скульптордонть, М.Л.Попович авадонть-лётчиктенть, А.М.Лобанов строицядонть, Социалистической Трудонь Геройденть В.Д.Буровадо, А.Бузлаева агрономдонть. Мельсэ кирдить статьятнень, конат алтазельть оштненень-ялакстнэнень Саранскоентень ды Ботевградонтень (Болгария), Мордовиянь ды Прибалтикань раськетненень. Сёрмалесь аволь ансяк эрзякс, рузокскак. Кой-кона очеркензэ лиссть “Есть такая служба” (милициядо), “Жизнь в борьбе и труде”, “Частица Родины великой” книгатнесэ, зярыя буклетсэ. Вейкесь эйстэст – “Якстере тештень” ды “Эрзянь коммунань” икелень редактордонть Григорий Антонович Егоровдо.



Эрьва эсензэ материалсонть Татьяна Михайловна снартни кепедемс кодамояк пшти кевкстема, мезенть кис аволь свал шнасть. Теке марто авторось аволь весть тешкстазель ярмаконь премиясо, казезь Шнамонь коневсо. Ды уш кодаяк аволь стяконь кисэ ды аволь мазый сельмензэ кисэ сонензэ максозь Россиянь ды Мордовиянь Культурань заслуженной роботникень лемтне. М.Кастрен лемсэ финнэнь вейсэндявксонь премияськак, кона тензэ максозель 2002 иестэ, сась тензэ аволь чаво таркасто. Конкурсонь жюрись весемеде питнеекс ловинзе статьянзо, конатнень Ковалева алтынзе эрзянь кельсэ лисниця газетатненень, сынст чачомань алкуксонь историянтень. Эйсэст сон, кода свал, видечинть бажи невтемс истямокс, кодамокс сон ули. Видечинть кис тюремась – таго вейке ёнкс, конань Татьяна Михайловна канды эрямонзо перть. Паряк, тень ды видьстэ сельмс кортамонть кис сонзэ аволь весе вечксызь, аволь весень мельс тукшны. Кой-кить натой, кода арси сонсь Татьяна Михайловна, кежтькак тензэ снартнить пандомс. Теке марто тень коряс сонсь Ковалева корты истя: эрямонь паксяванть молемстэ ломанентень аволь ансяк валаня таркава савкшны ютамс,  губорьксткак, латкткак пильге алов понгонить. Вант ансяк, иля пупордя, иля пра. Татьяна Михайловна аволь истятнэстэ, кить шождасто тандавтовить. Истямокс, мезеньгак а пелицякс, эсеть превсэ эрицякс, свал икелев молицякс, тонавтызе авазо, кие сонзэ туртов свал кадови валдонь невтиця, кемемань максыця тештекс.

Оймамонь а содыця, свал тевсэ-мелявкссо лакиця, Татьяна Михайловна Ковалева истямокс кадовсь нейгак ды кадови эрямонзо перть. Алкуксонь журналистэнтень истямокс эряви улемскак!

Раиса Щанкина,

Россиянь Журналистэнь союзонь член.

 02.10.2019

 

Новости

Эрицятнень сёрмадстомантень анокстамотне ушодовсть



Малав ие кадовсь эрицятнень Весероссиянь сёрмадстоманть самс. Аволь умок МР-ва Федеральной службань государственной статистикань территориальной органсонть ютавтовсь вастовома, конанть шкасто видео-конференциянь лувсо ветявсь кортамо Росстатонь прявтонть Павел Малков марто. Вановсть сёрмадстомань шкатне ды невтевсь официальной тешксэсь.


Подробнее ...
 
В Мордовии собрано более 700 подписей на запрет «наливаек»
 
В Республике Мордовия завершились мероприятия по сбору информации и
подписей в поддержку инициативы об ограничении работы питейных заведений,
расположенных на первых этажах многоквартирных домов и придомовых
территориях в Республике Мордовия.

Подробнее ...
 
Награждение победителей акции «Здоровое питание - активное долголетие»
 
  Уже сегодня, 17 октября,  34 ученика из Мордовии отправятся на 12-ю  смену  
Международного детского центра «Артек». Победителей акции, их наставников и кураторов 
поприветствовал  секретарь Регионального отделения «Единой России» Владимир
Чибиркин. Он  подчеркнул, что пропаганда  здорового образа жизни и оздоровление нации 
являются одними из ведущих направлений деятельности «Единой России», акция 
реализуется в рамках партийного  проекта «Здоровое будущее».  Это дает свои плоды - с
каждым годом в нашей стране увеличивается  число неравнодушных людей,  которые 
начинают сами вести здоровый образ жизни и ведут за собой других.

Подробнее ...
 
В республике успешно реализуются социально значимые проекты первичных отделений «Единой России»
 
Первичные отделения поселка  Ромоданово и поселка  Зубова Поляна   успешно
реализуют на практике  свои социально  значимые проекты, удостоенные грантовой
поддержки по итогам конкурса проектов первичных отделений, инициированного 
«Единой Россией»
  Цель проекта  «Мы рядом», реализуемого в Ромоданове - помощь пожилым людям и 
инвалидам, имеющим  заболевания опорно-двигательного  аппарата.   Прокат технических 
средств реабилитации  организован на бесплатной основе для граждан пожилого возраста, не 
имеющих группы инвалидности, но,  в силу возрастных изменений или перенесенных 
заболеваний, травм, потерявших способность свободно передвигаться. В июле этого года в 
Ромодановском  местном отделении партии прошла  презентация проекта.  Открывая
презентацию,  секретарь  Ромодановского местного отделения Партии  Наталья Хомякова  
отметила, что  основная  задача проекта   помочь людям в трудный для них период 
реабилитации.


Подробнее ...
 
Баталина: Предложение Минтруда о новых правилах выплаты пособий по уходу за ребёнком создаст проблемы родителям
 
Предложение Минтруда, согласно которому претендовать на выплату 
пособия по уходу за ребенком до полутора лет может только тот, кто 
фактически ухаживает за ребенком, избыточно и может создать лишние 
проблемы родителям. Не исключено, что Фонд социального страхования при 
назначении будет требовать документально подтвердить, что именно 
заявитель (мать или отец ребенка) фактически за ним ухаживает. Об этом 
заявила первый заместитель секретаря Генерального совета «Единой России»
Ольга Баталина.
Подробнее ...