Рубрикатор

Культура Инжекс Волгоградонь эрзятнень ды мокшотнень кедьсэ
Инжекс Волгоградонь эрзятнень ды мокшотнень кедьсэ

Кода журналист ды кода «Ламзурь» ансамблясо    морыця   ламо таркасо савсь   улемс,    ламо    неемс,  ламо  ломань  марто   вастневемс.  Марявсь тень, монь уш мезеськак   а дивавтсамам,  мезеськак   а токасы  седеем.  Ды пек манявинь.   Меельце вастовоматне седейсэнь сыремтсть  истят    ёжомарямот,  конат  а  стувтовить зярдояк.  Ды   аволь ансяк   монь, весень седейтнесэяк,  кить    панжиковонь  23-26-це   читнестэ   якасть    Волгоград   ошов.  Делегациянок   аволь пек покшоль. Эйстэнек весемезэ кавксо ломанельть. Неть: Регионъютконь эрзя-мокшонь раськень вейсэндявксонь  прявтось  Ю.А.Мишанин,  О.В. Дулкин,  А.С.Пушкин  лемсэ   библиотекасо важодицясь  В.И.Пронина,  журналисттнэ  В.В.Лазарев, «Мордовия»  ГТРК-сто И.Данилов телеоператор  марто,  мон  ды бусонь  ветицясь.

 

 

Видькстан, те ошсонть  мон  васенцеде,  куш  мелесь  пачкодемс  тов  талновтсь  эйсэнь  умок.  Ды   вана   ней апак  учо  прась  тень  уцяска  молемс  Волгоградов,  неемс   сеть  таркатнень,   косо   Ине   войнань  шкасто  мольсть  виевдеяк  виев   тюремат,  маштовсть сядот  тёжат  ломанть ды   косо  стявтозь  весе   масторлангонть   келес  содавикс  «Мастор-авась терди»   кеврунгось. Те якамонть кисэ сюконян Регионъютконь   мокшонь-эрзянь раськень вейсэндявксонь прявткуронтень,  конань  ушодксонзо   коряс пачколинекак  Волгоградов.  Эряви   меремс, истят вастовомат те вейсэндявксось  эрьва  иестэ ютавтни  аволь  аламо.  Ульнесть, ловт, Россиянь   весе регионтнэсэ, косо эрить  эрзят  ды мокшот.  Меельце шкастонть ушодовсть мокшэрзянь раськень VII Инекужонтень   анокстамотне, кона карми  2019   иень  ожоковсто (октябрясто).   Тень кувалма лия регионсо   эриця эрзятнень   ды мокшотнень марто вастневематнень  кармасть  ютавтнеме   седеяк  сеедьстэ. 

Волгоградов   молемантень   ульнесь лия тувталгак.  Тосо эри, кода   ки   лангов сыргамсто  пачтясь  Регионъютконь   мокшонь-эрзянь  раськень  вейсэндявксонь    прявтось  Юрий Александрович   Мишанин,   пек   паро  ломань,  конань  кедензэ   алкуксонь  сырнень.   Те – Кшнякин Владимир   Павлович.   Чувто  ланга  керсиця,   машты   эрьва  мезень   тееме.  Ды эрьва теевксэсь   – искусствань  алкуксонь  произведения.   Паро   ладсо истят   ломантнеде  эряволь  бу  сёрмадомс  ды  ёвтнемс  эрьва  косо.  Ансяк, кода свал, минь а   содатано   мезеяк.   Мордовиясояк те   лементь содасызь   бути    ансяк    сонзэ роднятне ды малавикстнэ, конатнень  ютксо  «Октябрьская»  агрофирмань   прявтось  И.С.Андин.  Видькстан, Иван Семенович пек покш лезкс макссь Волгоградов  якамонть  топавтомасо.  Васняяк, транспорт, конань  эйсэ   усксимизь  товгак, мекевгак.

Ки лангов  сыргинек  вензэ лангс.  Кись, меремс, аволь берянель. Ансяк пек васололь. Савсь ардомс  кемгавтово,  а,  паряк,  седеяк  ламо  част. Веньперть чары лангсо ды   апак удо   ардомадонть мейле  марят  эсь  прят  стомавозекс.     Истя  ульнесь семс,  зярс  эзинек  пачкоде    Волгоградов,  седе   виде  ули меремс,  Волжскоев,  косо  эри   В.П.Кшнякин.   Те карми седе тов.  Васня эряви ёвтамс, Волгоградсо  эйсэнек  вастасть  эрзянь-мокшонь  тосонь  вейсэндявксонь   теицятне ды кирдицятне  В.Н.Кияев,  В.Н.Учаев,  В.Т. Фомичёв.    Вейсэ арсезель, ков   молемс васня,  ков – мейле.   Васенце  вастовомакс  кочказель  В.П.Кшнякин.

 

Валерий Тарасович Фомичёв – ламонь

содый ломань

 

Кшнякиннэнь  пачкодинек   аволь сеске.  Эрявсь ардомс малав весе Волгоградонть  пачк,  кона  таргави  сядодо  ламо  вайгельпень  тарка.   Волжскоесь ашти Рав леенть тона ёно,  эрьва  ёндо  пирязь  ведьсэ.  Ардомсто  Волгоградонть  историядонзо ламо  мезе  ёвтнесь   Валерий  Тарасович Фомичёв.  Сон  –  технической   наукань  доктор, Волгоградонь  государственной  технической  университетэнь профессор. Теке марто   пек парсте  содасы  весементь,  мезесь   сюлмавозь  Волгоградонть  марто.   Сонсь Валерий Тарасович чачсь Мордовиясо, Кочкурбуень Сурвелесэ (Сабаевасо). Тетязо, Тарас Григорьевич Фомичев, 1939 иестэ   кучозель Сурвелев  больницянь  панжомо.  Тосо  вастовсь  аванзо,  Елизавета Ефимовна Белявкинань,  марто.  Ютксост сыремсь вечкема. Истя лиссь, Сурвелестэ  сынь тусть  васня Кочкуровав,  мейле  –  Волгоградов.  В.Т.Фомичев те ошсонть  эри  1960  иестэ  саезь.  Мельганзо тей  эрямо састь  аванзо  марто тетязояк.   Сынь ней уш арасть.  Ансяк а стяко  кортыть, ков  илязат  туе, седеесь  ялатеке  терди  чачома  таркав. Неть  валтнэнень  кемевтемакс  ульнесь  В.Т.Фомичевонь пачтямозояк:   авазо,  Елизавета  Ефимовна,  куломадо  икеле   пек энялдсь  калмамс  чачома   велесэ.                                                

Эрзятне ды мокшотне Рав  чирева   эрясть  свал.  Волгоградонь  моданть  лангсояк  сындест  ульнесть   пек ламо.  Петр I инязоронть  шкасто (XII-XIII пингетнестэ),  зярдо  мольсь   Рав ды  Дон лейтнень  вейсэндямось,  лиякс  мерезь, Волгодон каналонть  чувомась,  тей   мерезель   панемс  ломанть,   кить улевельть  аволь  крепостноекс, улевельть,  лия валсо,   государственноекс.   Истямокс   лововсть эрзятне-мокшотне.   Сынь   муезельть.  Кить   састь  ськамост,  кить   – семиянек. Каналонть чувомазо педе-пев  эзь прядово   туркатнень  марто войнанть   кувалма.   Чувицятне   орголесть, кармасть  эрямо  Рав  чирева  модатнень  лангсо.  Истя теевсть  зярыя  велеть.  Шкань ютазь,  тосонь  эрицятне  рузыясть,  ёмавтызь  чачома келест.   Кавтотнесэ, неть:  Вере (Горный)  Балыклей  ды Ало  (Нижний) Балыклей,  нейгак,  Фомичевонь  валонзо коряс,  кортыть  эрзякс.  Меельцесэнть 1958  иенть  самс    эрзянь келенть тонавтсть школасо. Ульнесь,  марят,  пек покш совхоз, лемезэль «Крепь». Эйсэнзэ  эрясть  эрзят.  Ней истя  жо  ёмавтызь  келест.  А вана Разгуляевка   велесэ,  кона  ашти  седе  васоло,  нейгак   кортыть  эсест  кельсэ.  Тосо  эрицятне,  келя,   кеме рунго,  шумбра  ломанть. Паряк, сынст  покштянь  покштяст  ульнестькак  каналонь  чувицякс.

 

Владимир Павлович Кшнякин   ды сонзэ «викшневксэнзэ»

 

Кортнезь ды Фомичевонь кунсолозь, пачкодинек   Волжскойсэ се куронтень, косо  ашти  В.П.Кшнякинэнь  кудозо.  Сонзэ потс  апак сова  уш – ой-вай  ды  – вай-ой!  Истямо мазычи   эзинь некшне зярдояк.   Ды аволь ансяк   мон.  Понгинек теке   ёвксонь масторов, косо   весемесь дивавтнесь эсензэ мазычисэ.   Кудо конясь аламо  меремс   мазылгавтнезель,  сон  викшнезь  викшнезель.  Истят викшневкстнэде  пештязь   весе  кудо   потмоськак.  Эрьва   кува понгавтнезь «викшневкссэ» мазылгавтозь рама потсо чамаварчамот (зеркалат), пейзаж ды  ломанень  чама  марто  артовкст.  Вейкесэнть Россиянь Президентэнть В.В.Путинэнь чачозо. Киякска  стявтнезь  эрьва    кодат   вазат,  чакшт-вакант. Сельмс   сеске  каяты  покш   кечесь.   Мастерэсь  сонзэ  теизе   эрьбань   коське  тарадсто, конатнень  муинзе   вирьстэ,  ды эсь  теевксэнзэ  лемдизе   «Илья Муромецэнь кечекс».                                                                                                                         

Кода вельмесь  цёранть  седейсэ  чувто  ланга керсемантень  вечкемась,  те  кевкстеманть  лангс  сонсь  В.П.Кшнякин  мерсь истя:  «Вишка  пингстэ   Инечистэ   вечкинь    нурсеме  нурямосо  ды ваномо   велень  аватнень  лангс.  Седейгам  валовиль  лембе  ёжо, зярдо  сынь, эсест  мазый  панарост  оршазь,  лиснесть  ушов  ды  серьгелесть  морот.  Ды  нейгак, зярдо  тевем  а   пек   молить,  ледстнян   сеть шкатнень».                            Кшнякин чачсь  Атюрьева буень  Сарга велесэ.  Сеедьстэ  яксиль Красновка велев, костоль  тетязо.   Эрямось  аволь  шождаль.  Секс  тетянстэнь  савсь  туемс Пермской  областев  вирень  керямо.  Истя  Кшнякинтнэ,  таркадо-таркас   яказь,  понгсть  Волгоградов.                             Эстензэ   Владимир   Павловичнень  художникекс  тонавтнемс  эзь саво. Вишка     пингстэ  вечкиль  тейнеме  налкшкеть  пластилинстэ.  Сибирьсэ  сеедьстэ  яксиль  вирев.  Тосо  улемстэ  седейсэнзэ  сыремсь  мелесь  ушодомс  чувто   ланга   керсеме. 

Шкань  ютазь   эсензэ  вейке  выставкасо  вастовсь   Александр  Сергеевич  Махов   художникенть  марто,  кона   тензэ  лездась  муемс  шкинемасо  эсензэ  ёнксонть:  тейнемс  викшневкссэ  мазылгавтозь  рамат.  Те   тевесь мейле   тееви  Кшнякинэнь   эрямо  коекс. Курок сонзэ  кедьсэ  теезь  произведениятне  ламолгадсть.  Ды  сынь  Людмила  нинзэ   марто   сайсть  мель  панжомс  музей. Эряви меремс, музейсэ пурназь  экспонаттнэнь  лангс  варштамо   сакшныть  аволь  ансяк Волгоградсто,   лия таркастояк.  Ды весе, кода миньгак,    кадовить  паро  ёжосо.   Вейкесь  аламодо   нусмакавтсь  эйсэнек: мастерэнть   арась  поладыцязо.  Эйкакшонзо   кочкасть лия тев.  Цёразо, Давид, теевсь   фермерэкс,   бажи   улемс  тетянзо  лелянть    И.С.Андинэнь  кондямокс.  Козейканзо, Татьяна марто  кирдить   40  скалт.

Лембе валт, седейшкавань  кортнемат,  морот, конатнень  морынек  миньгак,  сонсь  Владимир  Павловичкак. Тесэяк сон невтизе  прянзо творческой  ломанекс.  А зяро кеняркст,  зяро  сюкпрят   сон ёвтась  казнетнень кис,   конатне  тензэ   пачтязельть  Мордовиясто.  Келя,  истямо   покш   мель   мон  зярдояк  эзинь  сода  костояк.   Ней, кемевтсь  Ю.А.Мишанин,  Кшнякинэнь  шкинемадонзо  кармить  содамо  аволь ансяк  Волгоградсо,  лия таркатневаяк.  Ды алтась,  сыця  Инекужонтень  В.П.Кшнякинэнь  тердемс    Мордовияв выставка   марто.                                                                          

 

Василий Никифорович Кияев  ды сонзэ 

тевензэ

 

Секе чистэнть вейке  музейстэ  понгинек   омбоцес.  Сонзэ эйсэ  экспонаттнэ    лият.  Седикелень музыкальной  седямопельть   (гуслят,  духовой    трубат,  эрьва  кодат  гармоният,  патефон  ды лият),  утюгт,    част, лорнетт   ды    пенснэть,  театрасо   спектаклянь  ваномс  биноклят,     чакшт-вакант,   мейстэ  ярснесть  инязоронь  шкасто  сюпав   ломантне.  Ули  натой   «Зингер»   стамонь    машинка.                                                                     

      Музеень  азорось  –  Кияев  Василий  Никифорович. Те лемесь пек содавикс  кода   Волгоградсо,  истя  васолга  сонзэ  томбальгаяк.    Тосо  сонзэ  ловить  пек  покш   политикекс,  предпринимателекс.  «Югканат» ООО-нь прявт, аволь  весть  кочказель  Волгоград  ошонь  Думань  депутатокс.    В.Н.Кияев – Волгоградонь ёнкссо     Казахстанонь   ды Мордовиянь   микшнемань-рамсемань тевтнень  ветиця. Ды  ялатеке  Василий  Никифоровичень  эйсэ   весемеде   питнеесь  аволь  содавиксэкс улемась.  Лиятнень  эйстэ,  кить    таго-зярдо  тусть  чачома  велестэ  ды  стувтызь  сонзэ,  яви се: сон  эзь  перьгеде   эсензэ  родонь-раськень ундокстнэстэ.  Чачсь Василий Никифорович Кочкурбуень  Сурвелесэ.  Кавксо  иесэ  кадовсь   урозокс.  Трямс-кастомс  саизь  роднянзо,  кить  эрясть  Кривой   Рог   ошсо.  Секс савсь  кадомс  чачома   веленть. Тонавтнесь Волгоградской политехнической   институтсо.  Комсте ламо  иень  перть  важодсь Волгоградонь сталепроволочноканатной  заводсо. 2000 иестэ саезь – «Югканат» ООО-нь прявт.     Нинзэ, Светлана Михайловнань  марто    вейсэть  колоньгеменде    ламо   иеть.   Кавто  эйкакшост,  нуцькаст,  весе,   ловт,   эрить вакссост.  Лиякс  мерезь,  Кияевтнень  семиясь  Волгоградсо  нолдась  кеме  ундокст.

Тень лангс  апак   вано,  Василий Никифорович  а стувтни  чачома велензэ.  Эрьва иестэ   сакшны  аванзо-тетянзо  калмост  лангс.  Эсензэ  пиресэ  озавтсь  чувтт,  конатнень  ускинзе  Сурвелестэ.   Кудонзо  икеле,  пиресэ,  кардазсо  –  ков  иля  варшта,  неят  тиринь  ёнкссто ускозь    ледстнемапельть:  седикелень  пряха,  кудоютконь  кедьгеть    ды    лият мезть.  Кудо   потсо  музейсэнтькак   башка   таркасо    понгавтозь  фотографият,  косо   снимазь  тетязо   ды   авазо,  чачома   велень   ломанть.   Весе экспозициянть мазылгавты  эрзянь  панарось,  кона  понгавтозь  неявома  таркас.  Кодамо мель   яви   сон эсензэ  раськентень,   весемеде   парсте  кортыть  машинанзо  лангсо  сёрмадовкстнэ: удало  – ЭРЗЯ   ды  СУРВЕЛЕ,  кавто   ёнга  –  тетянзо  портрет  марто – МОНЬ ТЕТЯМ  Кияев Никифор Васильевич.  Козонь сатыть  виензэ    лезды  эсензэ  велень  эрицятненень.   Сонзэ   ярмак   лангс одкстомтозель Ине войнасо  маштовозтнень  лемс  стявтозь   кеврунгось,  теезельть  ды  бусонь  лотксема  таркатнесэ   ладсезельть  эземнеть.  Аволь весть  лездасть  куринкава   китнень  витнема  тевсэнтькак.  Сонзэ лезксэнзэ вельде Сурвелесэ   одс  вельмевтезель  «Тундонь  ильтямо»  кезэрень  коесь.  Те малавгак аволь весе, мейсэ  лездась  ды,  кемтяно,  карми  лездамо  эрзянь  те  цёрась   эсензэ  раськень  ломантненень.  Улиндерявольть истят  ломантнеде   седе   ламо,  минек  велетнесэ  эрямось   улевель   ков   седе  паро,   сонсь  раськеськак  седе  кеместэ  аштевель  пильге  лангсо.

 

Сюконямо  таркат

 

Улемс  Волгоградсо   ды а  молемс  Мамаев  пандонть  лангс?!   Ютынек сонзэ педе-пев.  Совсинек   Ледстнемань   мемориалонть    потскак.  Ванкшнынек   стелатнень, косо сёрмадозь  маштовозтнень  лемест.  Сындест а лововитькак,  зяро.  Ламо   фамилиятнень  коряс   чарькодят:  весень  марто   тюрсть  ды    маштовсть  ламо  эрзят  ды   мокшот.   Войнань  шкасто,  зярдо  ятось  каявсь   Волгоградонть  лангс,   сонзэ  кис  стясть  ошонь  весе    эрицятне.   Арась  тарка,   кона  апак   начто   верьсэ.   Тюрематне   мольсть    эрьва  кудонть,  эрьва  пандыненть  кис.  Ансяк  васенце  чистэнть  маштовсть  43  тёжат  ломанть.   Валозь    веренть эйстэ,  келя,     якстерьгалесь  натой  Рав  леесь.  Весе тень неезь  ды  марязь,  а   кирдевить  сельведтне.   Эсензэ «Мастор-авась терди»  кеврунгонть  лангс  а  варштават  седеень  апак   ризнэ.  Ды сеске   пря потсонть   чачить Инешкипазонтень энялдома    валт: Инешкипаз,  сюконятано  пильгезэть, пшкадтяно  валдо оймезэть!  Макст ломантненень валдо превть. Кадык сынь   ванстсызь мода-масторонть.  Масторонок  лангсо  зярдояк   илязо  лисе   истямо  кажо!   Паз, чангодть!

 

Волгоградов 

якамось  кемемань  максыцяль

 

Мекев сыргинек истя   жо вензэ лангс.  Кись ялатеке   марявсь   седе шождакс ды   нурькинекс.    Паряк, тенень лездасть   Волгоградсо ды Волжский ошсо вастовоматнеде   валдо ледстнематне.   Истя улияк.  Эрьва косо эйсэнек вастасть седе а ков   лембестэ ды   седейшкава.   Волгоградов якамонть кувалма   мельспаросо   кадовсть  весе.  Ды весе   састь   вейкине   мельс: те   якамось   ульнесь лезэнь   кандыця   ды кемемань максыця.   Сон таго невтизе: эрзянь,   мокшонь  ломантне,   косо  иляст   эря,   маштыть  улеме  икеле  таркатнесэ.  Ансяк    неть ломантнень   эрявить  мукшномс  ды  таргамс  лангс.  Кадык весе содыть, кодат  виевть,   превейть  ды  эрьва  мейсэ   ёроковт  минек   раськень  ломантне.  Истямо ладсо седеяк   верев   кепедеви  весе  раськенть  лемезэ,  кемексты   сонзэ  нардезэ,  мезесь  улияк   сонзэ  ванстомань  ды  кастомань  юрокс.  

 

Раиса Щанкина

Волгоград – Саранск

06.06.2019

 

Новости

К лету 2020 года в рамках акции «Единой России» по лесовосстановлению будет высажено более миллиона деревьев
В рамках акции «Единой России» по лесовосстановлению будет
высажено более одного миллиона деревьев до лета 2020 года. Первые
лесовосстановительные мероприятия начнутся уже в сентябре-октябре этого
года в регионах, климат которых наиболее благоприятен, и продолжатся
весной. Первыми участниками акции станут лесные регионы Сибири,
Дальнего Востока и Северо-Западного федерального округа: Хабаровский,
Забайкальский, Приморский, Красноярский и Алтайский края, Республики
Алтай, Бурятия и Карелия, Амурская, Иркутская, Омская, Томская,
Новосибирская, Архангельская и Новгородская области.
Подробнее ...
 
Партийцы Мордовии провели акцию «Лучший друг»
Акция организована активом сторонников регионального
отделения партии в рамках проекта сторонников партии « Центр
поддержки гражданских инициатив» совместно с
Благотворительным фондом Да Добро. Волонтеры передали в
приют для безнадзорных животных Саранска корм,
медикаменты, аксессуары для животных.
Подробнее ...
 
Александр Воробьев поздравил атяшевцев с Днем поселка
17 августа поселок Атяшево отпраздновал 125 лет со дня образования и 91-ю годовщину образования района. Праздничные мероприятия начались с выставки, на которой местные жители показали свое мастерство кулинарии, пчеловодства, овощеводства, резьбы по дереву. Гостями праздника стали депутат Госдумы РФ, член комитета ГД РФ по аграрным вопросам Александр Воробьев, депутаты Госсобрания РМ Александр Щемеров, Ринат Раимов.


Поздравляя земляков, Александр Воробьев отметил, что гордится своей малой Родиной и успехами местных жителей, и по сей день, даже достигнув высокого поста, продолжает жить на атяшевской земле. В этот день он передал денежные средства в дар поселковой школе. Ему вручили благодарственное письмо, диплом почетного гражданина за достижения перед родным районом и огромный вклад в его развитие.
В этот день награды получили жители Атяшевского района за профессиональные успехи.
Праздник закончился концертом, вечером для гостей был организован салют.
 
Партийцы провели мониторинг реконструкции здания детсада и парковой зоны в селе Большие Березники
Ремонтные работы проходят в рамках партийных проектов «Новая
школа» и «Городская среда»
В 2019 году на ремонтные работы и строительство дополнительного
корпуса к Большеберезниковскому детсткому саду «Теремок» выделено
около 53 миллионов рублей в рамках партийного и национального
проектов. Всего в районе 424 ребенка дошкольного возраста, в райцентре
Большие Березники проживает 326 детей. В электронной очереди на
получение мест в дошкольном учреждении стоят 77 ребят. В Больших
Березниках ждут открытия реконструированного детского сада с
нетерпением. Окончание работ запланировано на 31 октября. Депутат
Государственного Собрания республики Александр Акайкин,
представители районной администрации ,местного отделения партии
остались довольны качеством проведенных работ. Строящийся новый
корпус детского сада рассчитан на 60 мест. Здесь будут размещены
ясельные группы. Уже практически закончены строительно-монтажные
работы.
Подробнее ...
 
В День физкультурника в спортивных сооружениях Мордовии прошли Дни открытых дверей
День физкультурника широко отпраздновали в Саранске и районах республики. В этот день в физкультурно-оздоровительных комплексах и бассейнах, построенных в рамках реализации федерального партийного проекта «Строительство физкультурно-оздоровительных комплексов» в Республике Мордовия прошли спортивные праздники.


 
Подробнее ...