Рубрикатор

Культура Артистэнть марто колмо вастовомат
Артистэнть марто колмо вастовомат

Эрямонок моли куроксто, сон пешксе эрьва кодамо тевде ды вастовомадо. Шкань ютазь ламо мезесь стувтови. Ансяк эрямосонть эрсить нурька эли вишка кивчкадемат, конат кадовить мельс свалшкас. Самай истямокс мон лован Илларион Максимович Яушевень марто колмо вастовоматнень.
Яушевде соды весе республикась, ансяк вана улемс вакссонзо, кортамс мартонзо сценадо башка эрямодонзо савкшнось аламонень. Ламо иеть ютасть се чистэнть, зярдо чатьмонезевсь морыцянть виев вайгелезэ. Сон тусь эрямостонть 1961 иень маень 31-це чистэ.

 

Арась, мон эзинь ардтне Илларион Максимовичень марто гастрольга, араселинь сынст кудосо паро инжекс. Эрямось васодевтимизь апак учне… Мольсь 1958 иень кизэсь. Монень макссть средней образованиядо аттестат. Ромодановань культурань отделэсь ладимим Малые Березники велень клубонь прявтокс. Сестэ эзть сатно культроботникень кадрат. Прявттнэ кемсть, монень, кемзисемге иесэ цёрынентень, те таркась лади.
Важодемань омбоце чистэнть районсто пачтясть: ванды концерт марто сы содавикс артистэсь Илларион Яушев, кона гастроль марто ардтни республикань велетнева. Самай се кизэстэнть сон сась эрямо Саранскоев. Ков бу аволь са Илларион Максимович, эрьва ломанесь бажась понгомс концертэзэнзэ.
Мон теде икелеяк марсия Яушевень вайгелензэ радиова, дивсинь сонзэ морамонь ёрокчинтень. Ды ней истямо казне: мон ды минек велень эрицятне несынек ды марясынек эсензэ, ковгак апак ардтне. Велень клубось ульнесь чувтонь вишка зданиясо, секскак концертэнть арсинек ютавтомс колхозонь тинге лангсо, кона уш анокстазель од сюронь урядамонтень.
Сценанть таркас кие-бути мерсь ладямс ЗИС маркань (сестэ сехте покш грузовикень) кузовонть. Каизь бортонзо ды тейсть куземка-валгомка. Ломантне прядызь колхозонь важодемаст, теизь кудонь тевест ды капшазевсть концертс. Сестэ велесэнть эрясть малав тёжа ломанть. Те чокшнестэнть, арсян, кияк эзь кадово кудосо аштеме. Ваныцятнень туртов аравтозельть эземнеть, нама, сынь весенень эзть сато, ды ломантне ойсесть луга лангс. Гастролирующей группастонть кие-бути лездась Илларион Максимовичнень куземс сцена лангс. Ды сон ушодсь морамо…
Кортыть, Россиясь – бас вайгельтнень чачома тарка. Яушевень кунсоломсто чарькодинь, те алкукс истя. Илларион Максимовичнень эрямось максызе весементь – мазый, гайтев, чевте ды виев вайгеленть, покш ды кеме рунгонть, лембе варштавксонть. Сон бажась весе виензэ, ёрокчинзэ, покш оймензэ максомс ломантненень, кунсолыцятненень, конатнень кисэ эзь пеле ардомо сехте васоло велев.
Се а стувтовиця концертэнть Илларион Максимович ушодызе эрзянь раськень моротнень морамсто. Теде мейле морась рузонь, украинань, ветькень, татаронь, маринь кельсэ. Весе покш мельсэ кунсолость эрьва кодамо кельсэ гайгиця мазычинть.
Малав пелевес сон морась ды морась. Концертэнть шкасто ваныцятне венстнесть сценанть ёнов конёвнеть, косо энялдсть морамс те эли тона моронть. Марявсь, арась истямо моро, конань сон а содасы! А ёвтавияк, кодамо ёжо копачимизь весень минек. Покш трагизма марто морызе «Бродяга» народной кезэрень моронть. Сондензэ мейле И.М.Яушев, кецнезь ды элякалезь, аламодо прок киштезь, морызе «Ой, Дунай, мой Дунай» моронть. Те пейдемань моросонть сон парсте невтизе атянть-балагуронть образонзо, кона мелявты, кода муемс тензэ мельстуиця ни… Морыцясь бажась невтемс моронть пейдемань смустензэ. Те шкане сонзэ чамазо, ёжов вановтозо киньгак эзизь кадо мельтеме! Теде мейле таго контраст. Сон морызе Масснень «Элегиянть». Басось теке бархат: гайги сэтьместэ, чудезеви виолончелекс, ускови-таргави нусманя скрипкакс. Вайгелень эрьва гайтесь – ломанень покш оймень невтема ды панжома. Монень марявсь, Илларион Максимович сонськак кецнесь минек марто вастовомантень.
И.М.Яушевень омбоцеде вастыя 1960 иень ушодкссто, сестэ тонавтнинь Саранскоень медицинской училищасо. Студенттнэнь секе-тев сайнинь театрав, эрьва косто сыця артисттнэнь концертэв. Сехте покш мелем ульнесь таго кунсоломс Яушевень. Ды весть тевесь удалась, Илларион Максимович карми морамо студенттнэнь-медиктнень икеле. Училищань зданиясь сестэ аштесь Коммунистической куронь ды Ленинэнь проспектэнь киулосонть. Аволь покш залонь стенатне, теке мерят, келейгадсть ды потмозонзо кельгсть зняро ломанть, натой лексемс ульнесь а мейсэ.
Сцена лангс сон лиссь раужо фраксо, чамасонзо – чевте мизолкс. Ламот неизь васенцеде ды дивазевсть, ульнесь теке богатырь. Се чокшнестэнть сон мизолдсь ды пейдсь. Морась од ломантнень туртов ды сонськак теке одкстомсь. Яушев сестэ ульнесь Мордовской Республикань народной артистэкс ды Россиянь заслуженной артистэкс.
Виев цяпамотне пештилизь залонть свал, кода ансяк сэтьмелгадыль Илларион Максимовичень вайгелесь. Сон сюкониль ды таго лисиль одс ды одс.
Весе минь, од кунсолыцятне, чарькодинек, икеленек аволь ансяк паро артист, икеленек – вадрядояк вадря ломань. Содынек, сон – Мордовиянь музыкальной культурань теиця, макссь весе виензэ, ёрокчинзэ ды содамочинзэ. Яушев певтеме вечксь народной музыкальной творчестванть. Те редявсь сеньсэ, кодат морот кочкась морамс. Сон морась бытовой, лирической, свадьбань, трудовой, солдатонь, исторической морот ды балладат. Те чокшнестэнть И.М.Яушев морынзе эсензэ вечкевикс произведениянзо. Гайгсть «Родина», «Бурлацкая», «Эй, ухнем», «Вдоль по Питерской» моротне.
Морамонь гайттнесэ Илларион Максимович тейсь, теке мерят, живописень картинат. Келейстэ ды виевстэ зэрнесь вайгелезэ. Мезе ульнесь залонть марто! Студенттнэ эзть нолда Яушевень, ды сон яла морась ды морась: «Сурвелесь», «Вирь чиресэ», «Самсон леляй», «Умарина»…
Тиринь моротнень гайтесь копачимизь минек. Малав весе эйстэнек састь тонавтнеме Мордовиянь велетнестэ. Пек содавикс ды чарькодевикс гайттне мольсть а ёвтавикс лувсо, меленек ульнесь кунсоломс апак лотксе. Морыцянть полавтовиль чамазо, вановтозо, прянь ветямозо, зярдо яволявтылизь седе тов молиця моронть. Седеяк пек, зярдо морось весёлаль, сельмесэнзэ кирвазильть толнэть, истямо лувсо невтсь моронть смустензэ.
Концертэнь кавто частнэнь перть морыцясь прок ютавтсь тенек мельстуиця «экскурсия» музыкань эрьва кодамо стилень, шкань коряс. Малав комсь морот морась бис лангс, ансяк сетне, кить кунсолость васенцеде, теке эзть маря шканть, энялдсть морамс эштё ды эштё. Ды тесэ Яушев сонсь энялдозевсь, яволявтызе меельце номерэнть – «Удынь, удынь, ялганякай» моронть. Те ульнесь нурсемань моро. «Паряк, мон те моронть марто чачиньгак, – кортась сон, – авань сэтьме вайгелень гайтенть марто». Чевте, нурсевтиця интонациятне мольсть оймень потмакссто. Прядызе моронть Илларион Максимович сельведь марто, мерсь нолдамс чумонзо ды састо ёвтась: «Истя авам нурсесь эйсэнь лавсьсэ».
Концерттэ мейле весе, кить ульнесть залсонть, лиссть ушов ильтямонзо. Сестэ эзинь арсеяк, зярдояк а маряса те ине ломаненть вайгелензэ сцена лангсо, куш мейле вастовкшнынек эштё весть, ансяк больницясо.
Минек группанок (студенттнэ-медиктне) ютась практика республикань больницянь терапиянь отделениясо. Весть, практикань ветиця врачось валске марто саимизь сэредицятнень варштамо (обходонь ютамо). Вейке палатастонть неия И.М.Яушевень. Эрси истя, сэредицятне а кемить студенттнэнень-практиканттнэнень. Илларион Максимович вастымизь парсте. Сон мартонок кортась, ансяк ормадонзо бажась а ледстнемс.
Кода сёрмады И.М. Яушевде эсь мелензэ-арсеманзо Н.И.Воронина музыковедэсь, морыцясь пек вечксь народной творчестванть. Сон сёрмадынзе ды кадынзе сы шкань ломантненень эрзянь, мокшонь, башкирэнь, татаронь, ветькень, маринь моротнень талновтыця мелодиятнень. Сонзэ вайгеленть вельде чарькодят, мезе те ды кодамо алкуксонь музыкальной народной творчествась.
Сон вечксь эрямонть. Эрясь моротнесэ ды капшась кецявтомс ломантнень. Богатырень виезэ – келей оймесэнзэ ды морамосонзо. Эрзянь моротнень теинзе минек масторонь весе раськетнень сюпавчикс, сынст вельде кепедизе эсь раськенть…
«Мон эрян ды ламо ломантненень панжан музыкань сюпав масторонть, кона мазылгавты эрьва чинь эрямонть», – прядызе минек марто кортамонть Илларион Максимович.
Яушев эрясь малав 60 иеть. 40 иетнень перть сон макссь малав кемень тёжат концертт, бути ловомс, иезэнзэ – 250 выступленият. Эйстэст ансяк кавтотнесэ ульнинь монгак. Мельтне, ёжотне, ледстнематне кадовсть весе эрямом перть!
Саранскоень Славань скверсэ ашти И.М.Яушевнень кеврунгось, сонзэ лемензэ кандтни вейке курось. Сехте покш памятесь – моронзо, конат ванстовить фонотекань фондтнэсэ, сынст ютксо «Мордовия» ГТРК-сояк. Сонзэ фильмотекасо ули телевизионной передача, кона алтазь И.М.Яушевнень. Ды зярдо радионь эли телевидениянь ветицясь яволявты: «Моры Илларион Максимович Яушев…», эрьвась кадсы тевензэ ды карми кунсоломо вечкевикс морыцянть, дивсеме сонзэ вайгелентень.

А.Давыдов,
Россиянь Журналистэнь союзонь член
(Ледстнематнесэ тевс нолдазь Н.И.Воронинань «И.М.Яушев» книгастонть материалтнэ).


31.01.2019

 

Новости

Эрицятнень сёрмадстомантень анокстамотне ушодовсть



Малав ие кадовсь эрицятнень Весероссиянь сёрмадстоманть самс. Аволь умок МР-ва Федеральной службань государственной статистикань территориальной органсонть ютавтовсь вастовома, конанть шкасто видео-конференциянь лувсо ветявсь кортамо Росстатонь прявтонть Павел Малков марто. Вановсть сёрмадстомань шкатне ды невтевсь официальной тешксэсь.


Подробнее ...
 
В Мордовии собрано более 700 подписей на запрет «наливаек»
 
В Республике Мордовия завершились мероприятия по сбору информации и
подписей в поддержку инициативы об ограничении работы питейных заведений,
расположенных на первых этажах многоквартирных домов и придомовых
территориях в Республике Мордовия.

Подробнее ...
 
Награждение победителей акции «Здоровое питание - активное долголетие»
 
  Уже сегодня, 17 октября,  34 ученика из Мордовии отправятся на 12-ю  смену  
Международного детского центра «Артек». Победителей акции, их наставников и кураторов 
поприветствовал  секретарь Регионального отделения «Единой России» Владимир
Чибиркин. Он  подчеркнул, что пропаганда  здорового образа жизни и оздоровление нации 
являются одними из ведущих направлений деятельности «Единой России», акция 
реализуется в рамках партийного  проекта «Здоровое будущее».  Это дает свои плоды - с
каждым годом в нашей стране увеличивается  число неравнодушных людей,  которые 
начинают сами вести здоровый образ жизни и ведут за собой других.

Подробнее ...
 
В республике успешно реализуются социально значимые проекты первичных отделений «Единой России»
 
Первичные отделения поселка  Ромоданово и поселка  Зубова Поляна   успешно
реализуют на практике  свои социально  значимые проекты, удостоенные грантовой
поддержки по итогам конкурса проектов первичных отделений, инициированного 
«Единой Россией»
  Цель проекта  «Мы рядом», реализуемого в Ромоданове - помощь пожилым людям и 
инвалидам, имеющим  заболевания опорно-двигательного  аппарата.   Прокат технических 
средств реабилитации  организован на бесплатной основе для граждан пожилого возраста, не 
имеющих группы инвалидности, но,  в силу возрастных изменений или перенесенных 
заболеваний, травм, потерявших способность свободно передвигаться. В июле этого года в 
Ромодановском  местном отделении партии прошла  презентация проекта.  Открывая
презентацию,  секретарь  Ромодановского местного отделения Партии  Наталья Хомякова  
отметила, что  основная  задача проекта   помочь людям в трудный для них период 
реабилитации.


Подробнее ...
 
Баталина: Предложение Минтруда о новых правилах выплаты пособий по уходу за ребёнком создаст проблемы родителям
 
Предложение Минтруда, согласно которому претендовать на выплату 
пособия по уходу за ребенком до полутора лет может только тот, кто 
фактически ухаживает за ребенком, избыточно и может создать лишние 
проблемы родителям. Не исключено, что Фонд социального страхования при 
назначении будет требовать документально подтвердить, что именно 
заявитель (мать или отец ребенка) фактически за ним ухаживает. Об этом 
заявила первый заместитель секретаря Генерального совета «Единой России»
Ольга Баталина.
Подробнее ...