Рубрикатор

Культура Эрьва тевенть топавты весе седейсэ
Эрьва тевенть топавты весе седейсэ

Январень 19-це чистэ 85 иень юбилеензэ тешкстызе минек содавикс театроведэсь, режиссёрось, педагогось, РФ-нь культурань заслуженной важодицясь Василий Сергеевич Брыжинский. Комсь иень перть сон важодсь телевидениясо, мейле 25 иеть – Н.П.Огарёв лемсэ МГУ-со. Теезь-топавтозь ламо тевть: сон снимась фильмат ды телеспектаклят, панжсь факультет ды тонавтсь студентт. Ули мезе ледстнемс ды ёвтнемс. Секскак чачома чиде икеле минь вастовинек ды седейшкава кортынек мартонзо. Васенце кевкстеманок ульнесь истямо: кода велень ломаненть потсо вельмесь театрантень ды искусствантень вечкемась?

 

В.С.Брыжинский чачсь 1934 иестэ Кочкурбуень Од Тягловка велесэ. Ней тосо кадовсть кавто-колмо кудот. Сестэ жо эрямось лаказь лакась.
– Велесэнек ульнесь ансяк начальной школа, косо тонавтнесть пек ламо эйкакшт, ве классонть – 30. Парта экшсэ аштинек колмонь-колмонь ломанть. Велесэнть Культурань кудо арасель, школась ульнесь клубокс ды пурнавома таркакс. Ломантне пек парсте морыльть эрзянь моротнень, ламо вайгельсэ. Сынь сынсь содасть, кинь васенце, кинь омбоце вайгелесь. Сцена лангсо эрьва покшчистэнть – концерт. Школасо тонавтницятне свал мезеяк анокстасть. Мон пек вечкилинь кунсоломс ды ваномс неть представлениятнень. Ульнесть спектакляткак. Налксесть од ломантне. Явсть мель бытовой пьесатненень. Парсте мольсь Ф.М.Чесноковонь «Калдоргадсть ташто койтне» пьесась, мейле – К.С.Петровань «Ташто койсэ», конань ламоксть путнизь. Весень мельс пек тукшность спектаклятне. Неть невтематне совасть потмозон.
Войнадо мейле, зярдо тонавтнинь Семилеень средней школасо, тосо ульнесь пек паро драмкружок, конань ветясь Саранскоень тонавтыцясь Валентина Локтяева. Путсь мартонок пьесат. Ледстнян, минь тонавтнинек 9-це классо, сон саизе «Два капитана» аволь шожда пьесанть. Монень савсь тосо налксемс мик кавто рольть. Эрьва ие районсо ульнесть школань олимпиадат. Минек школась свал невтсь спектаклят.
Весть эйкакштне арсесть путомс спектакля, кодаяк эзть муе пьеса. Сестэ Василий Сергеевич мерсь: «Ужо, мон вейке пьеса неинь, кандса». Мезеяк эзь нее, сонсь арсесь сёрмадомс пьеса. Сёрмадызе. Весенень тусь мельс. Лемезэль – «Комсомольской билет». Фамилиясь, нама, лия ульнесь. Мейле патязо сёвнызе, мекс сёпизе лемензэ. Се шкасто саезь минек героесь сёрмалесь кой-мезть эсензэ туртов. Театрань тевесь пек вечкевсь тензэ. Мельсэнзэ ашти, кода тунда, зярдо тикшесь стадатненень зярс арасель, скалтнэнь ды реветнень ваныльть чаво паксява. Сестэ сынь ялганек стада ваномсто марилизь эсь пряст алкуксонь артистэкс: налксесть эрьва кодат рольть. Сынсь арсильть пьесат, сеедьстэ саилизь войнань теманть, косо ульнесть офицерт ды немецть, артыльть эстест погонт.
10-це классонь прядомадо мейле пек бажась молемс театрань институтов. Ансяк эзь саво… Эрявсь туемс Московов, эрявсть ярмакт, косто сынст саемс ламо эйкакшонь триця семиянтень?
– Лелям мерсь: «Ков? Кодамо эйстэть артист? Школав сыргак!» Минек семиясо весе тонавтыцят: кавто патян, лелям, уряжом. Истя монгак карминь тонавтнеме Саранскоень учителень институтсо. Анокстасть эйстэнек рузонь ды эрзянь келень тонавтыцят. Тонавтнема шкасто налксинек спектаклясо. Кавто иеть тонавтнинь. Прядомадо мейле туинь Самара ёнксонь Покш Толканов. Вейке ие роботынь. Школадо башка, путнинек концертт ды спектаклят, сёрмадынь инсценировкат. Иень ютазь саимизь армияв, служинь колмо иеть. Армиясояк савкшнось налксемс военной пьесасо.
Армиядо мейле Василий Сергеевич велявтсь кудов. Важодсь Кочкурбуень Од Мурзань школасо, ветясь рузонь кель ды литература. Мейле ульнесь обкомонь инструкторокс, ветясь политкружок. Потсонзо свал ульнесь мелесь варчамс прянзо театрань институтсо. Сон сыргась Ленинградов, косо вете иень перть (1959-1964) тонавтнесь театрань, музыкань ды кинематографиянь институтсо. Мартост важодсть пек превей, эсь тевень содыця педагогт. Се шкане Василий Сергеевич сёрмадсь «Возвращение» покш пьеса. Макснизе ловномс тонавтыцятненень. Сынст мельс тусь, мерсть максомс путомс студентэнь театрантень, сон тень каршо ансяк визделгадсь…
Вузонь прядомадо мейле од ломанесь сась тиринь ёнксов. Тесэ ушодсь важодеме ансяк панжозь телевидениясо режиссёрокс. Роботась эйкакшонь ды литературно-драматической редакциятнесэ. Тосо весе ульнесть од ломанть, эрьвась содылизе эсь тевензэ. Кармасть путнеме спектаклят: Ф.М.Чесноковонь «Кавто киява», П.С.Кирилловонь «Учительница», К.Г.Абрамовонь «Найман», «Ломантне теевсть малацекс», «Качамонь пачк» трилогиязо ды ламо лият. Брыжинский путсь малав кеветее спектаклят. Меельце важодемазо – А.Я.Дорогойченконь «Большая Каменка» содавикс произведениянть коряс.
Сехте покш питне ваныцятне макссть К.С.Петровань «Ташто койсэ» спектаклянть туртов. Савкшнось налксемс аволь ансяк артисттнэнень. Аламо ульнесть келень содыцят. Сестэ тердсть од ломанть университетэнь национальной отделениясто, кинь ульнесь мелезэ налксемс. Студенттнэ эзть явово профессиональной артисттнэнь эйстэ. Спектаклясь мольсь кавто чокшнеть. Кармасть сакшномо сёрмат: невтинк эштё весть. Записьсэ мезеяк арасель, весе ютась видьстэ эфирсэ! Те стака, роленть эряви содамс педе-пес. Студиясь вишкинель, ансяк 22 квадратной метрат, пелензэ сайсь телевизионной покш камерась. Шкань ютазь Василий Сергеевичень ладизь главной режиссёрокс.
В.С.Брыжинский, спектаклятнеде башка, анокстась телеочеркть ды содавикс ломантнеде кинофильмат. Саемга, писательтнеде К.Абрамовдо, П.Левчаевде, И.Пиняевде, артыцядонть В.Илюхиндэ ды ламо лиятнеде.
Теде мейле Василий Сергеевичень эрямосо ушодовсь од пелькс. Сон сёрмадсь эрзянь ды мокшонь раськень театранть коряс диссертация. Кармась важодеме Н.П.Огарёв лемсэ МГУ-нь эстетикань кафедрасо.
Се шкане эрзянь ды мокшонь ломантне пурнавкшность васенце Инекужос. Мольсть покш кортамот эсенек театрань панжомадо, тиринь искусстванть кепедемадо. Вейке чистэ рана валске Василий Сергеевичень кудосо гайгезевсь телефонось. Гайневтсь Н.П.Огарёв лемсэ МГУ-нь сестэнь ректорось А.И.Сухарев, кона тердизе кортамо. Сон кортась од факультетэнь панжомадо, кона бу анокставоль эрзянь ды мокшонь искусствантень ды культурантень ломанть. В.С.Брыжинскиень седеезэнзэ прась те мелесь, те тевесь пек паро. Сон ёвтызе мелензэ лемдемс тонавтнемань од тарканть национальной культурань факультетэкс. Истя панжовсь од факультет, косо деканокс ладязель Василий Сергеевич. Сон састыне пурнась перьканзо ломанть, тонавтыцят. Панжозельть хоронь, хореографиянь, музыкальной, библиотечной отделениятне. Василий Сергеевич пек бажась панжомс актёронь отделения. Сон панжовсь. Вете иес весть пурнасть од ломанть. Сонзэ важодемстэ ульнесть кавто выпускт. Валонзо коряс, тонавтницятне ульнесть эрзят ды мокшот, содылизь тиринь келест. Факультетэсь нолдась ламо киштицят, морыцят, библиотекарть. В.С.Брыжинский пек ризны, кода молить тевтне неень шкане ней уш Национальной культурань институтсонть.
В.С.Брыжинский нолдась аволь аламо монографият, книгат, научной важодемат. Неть: «Народный театр мордвы» (1985), «Мордовская народная драма» (2003), «Сиянь рисьминеть. Мордовские народные игры и хороводы» (2002), «Мордовские народные игры» (2009, 2016), «Актёр классической школы» (2007). Неявикс таркасо ашти колмо томсо «Каргонь кинь ломанть» сагазо, косо 25 пьесат. Весе сынь эрзянь кельсэ. Шкась невтеви Пугачёвонь восстаниянть шкасто саезь течис. Эрьва пьесась алтазь кодамояк шкантень. Событиятне молить эрьва косо. Василий Сергеевич видькстась, те покш произведениянть алты минек национальной театранть туртов, конань арась мелезэ путомс сонзэ коряс спектакля. Сон ризны, театрасонть (весе шканзо перть) зярдояк арасель эсенек режиссёр, келень, коень-кирдань содыця. Свал савкшны тердемс путыця костояк ве ёндо… Муемс паро, чарькодиця режиссёр а шожда.
Василий Сергеевич Брыжинскийнень театранть ды телевидениянть лезэс покш путовксонзо кисэ максозь Россиянь ды Мордовиянь культурань заслуженной роботникень лемтне, аволь весть лиснесь МР-нь Государственной премиянь лауреатокс. Сон – лия ёнов а молиця, превей, алкуксонь ломань. Раиса Никоновна нинзэ марто эрить сэтьместэ ды апак сёвно. Тедеде топодить 50 иеть, кода сынь вейсэ. Кастсть кавто эйкакшт. Сергей эри Пермь ошсо, важоди военноекс. Марина – Саранскойсэ, сон, кода авазояк – врач. Улить Настя ды Кирилл нуцькаст. Эйкакшост ды нуцькаст кувалма Брыжинскийтне аштить мельспаросо ды каштанчисэ.
«Эрзянь правда» газетань коллективесь ёвты В.С.Брыжинскийнень 85 иень юбилеензэ кувалма лембе валт. Уледе шумбра, кадык вакссонк свал улить малавиксэнк, эждить эйсэнк лембечисэст ды паро валсост!
Т.Маторкина


23.01.2019

 

Новости

«Единая Россия» возьмет на контроль реализацию закона о паллиативной помощи

Партия «Единая Россия» поддержит парламентский мониторинг за реализацией закона о паллиативной помощи. Об этом заявил член общественного совета партпроекта «Единой России» «Здоровое будущее», член комитета Государственной Думы по охране здоровья Юрий Кобзев. 

Подробнее ...
 
150 человек пройдут обучение в рамках модуля «Политический лидер» Высшей партийной школы «Единой России»

Первые занятия стартуют 25 февраля

Экспертной группой первого модуля Высшей партийной школы «Единой России» «Политический лидер» по итогам всех испытаний из более чем 6,6 тысяч участников были отобраны 150 слушателей. Из них 50 приступят к учебе уже с 25 февраля, еще 100 пройдут обучение в Высшей партийной школе в следующих потоках в марте-апреле. Конкурс на участие в проекте составил 44 человека на место.

Подробнее ...
 
Республикадонть – социальной сетьсэ

Печатень кудонь Пресс-центрасо аволь умок ютавтовсь мероприятия, конанть лувсо невтевсь социальной сеттнесэ Мордовия Республикань официальной аккаунтось. Пилотной нолдамось ульнесь уш даволковонь 1-це чистэ, секскак васень подписчиктне уш ванызь контентэнть вадрячинзэ.

Подробнее ...
 
Ловонть ускома шкастонзо

Неть читнестэ Саранскоень Администрациясо ютавтозь промкссонть башка мель явовсь ошсонть эйсюротнень, эенть ды ловонть урядамонь кевкстемантень. Ленинской райононь прявтось Александр Юткин ёвтнесь, управляющей компаниятне тагояк рамасть сал китнень ды ютамо таркатнень почодомс. «Эйсюротнень урядамонь коряс роботатне ветявить эрьва чистэ. Тевенть топавтыть верьга якицят ды специализированой техника», – пачтясь Александр Юткин.

Подробнее ...
 
Автобусонь од маршрут

Ошонь прявтось сонсь ловны эрицятнень сёрмаст, конат кучовить сонзэ лемс. Мэрэнть кедьсэ промкссонть Пётр Тултаев пшкадсь Транспортонь управлениянь прявтонь полавтыцянтень Елена Потапованень: «Сась пеняцямо, конасонть тешкстави, автобуссо эли троллейбуссо ардоманть кис карточкасо пандомадонть мейле ярмактне саевить аволь сеске эли аволь зняро эряви. Ломантне арсить те «Горэлектротранс» муниципальной предприятиянть вановтост ало. Ёвтадо: кие чумось ды ков пшкадема?»

Подробнее ...