Рубрикатор

Культура Викшневкстнэнень путы оймензэ
Викшневкстнэнень путы оймензэ

Аволь умок Московсо, Государственной Думань кудосо ютасть Мордовия Республикань читне. Депутаттнэнень ды тосо роботыцятненень невтнезельть республикасонок нолдавиця продукциясь, народной промыслатне... Невтневиця экспозициятнень ютксо покш тарка занякшность исторической наукань кандидатонть Вера Васильевна Ковалевань викшневкстнэ: раськень викшнезь оршамопельтне, нардамотне. Аламот кить ютасть те мазычинть вакска. Башка мель неть викшневкстнэнень явсть Госдумань политической партиянь прявттнэ В.Жириновский ды Г.Зюганов.

 

Эстедензэ, викшневкстнэнь азордонть, можна меремс, Вера Васильевна Ковалева алтызе эрямонзо искусствантень, тонавтнизе викшнеманть научной лувсо ды путы те тевентень оймензэ. Роботанзо-викшнеманзо а ёвтавитькак зяро. Ламотне ваныцятненень туекшнесть мельс ды покш мельсэ сынст рамасть.
Ней ламот кевкстнить, кода сон сась искусствантень?
– Эште вишкапорасто, – ёвтни Вера Васильевна, – артокшнынь картина. Ламот эзть кеме, тень теекшния покштнень лезкстэме. Савсь тень кувать аштемс эсь видечинть кисэ. Сёрмадстыя прям эйкакшонь художественной школас. Тонавтнемась вечкевсь. Школань прядомадо мейле ушодынь тонавтнеме Ф.В.Сычковонь лемсэ художественной училищасо. Искусствань ёнкстнэнь тонавтнемстэ чарькодинь, те монь тевесь.
Ёвтасынек, Саранскоень художественной училищасо тонавтнемстэ Вера Васильевнанень савкшнось а весть улемс этнографической экспедициятнесэ, косо тонавтневсть мокшэрзянь викшневкстнэ. Од тейтеренть оймезэнзэ сынь кадсть пек домка тешкст. Самай секскак эсь творческой ды педагогической роботасонзо ней Вера Васильевна яви те искусствантень сехте покш мель.
Тонавтнемадо мейле зярыя иеть роботась Культурань министерствань научно-методической центрань отделсэ методистэкс. Те шкастонть савкшнось а весть тейнемс народной промыслань выставкат. Ошонь покш мероприятиятнесэ Советской площадьстэ А.С.Пушкин лемсэ культурань ды оймсемань парков валгомсто фонтантнэнь кувалма свал ютавтневи «Город мастеров» выставкась. Васенцеде сон ютавтозель 1988 иестэ ды теньсэ покш таликазо Вера Васильевнань. Сон те тевенть ушодыцязо. Истямо выставкатнесэ сон участвови нейгак.
Кода Народной творчествань кудонь методист, сонензэ савсь ардтнемс республикань келес ды сонзэ томбалевгак. Эрьва истямо молемасонть сон снартнесь муемс мезеяк од мокшэрзянь викшневкстнэстэ. Ды, бути истятнэнь тензэ максылизь, снартниль тонавтнеме кодамонь-викшнемань весе ёнкстнэнь.
1992 иестэ уставась роботамо тонавтыцякс Саранскоень республиканской культурань училищасо. 2002 иестэ прядызе М.Е.Евсевьев лемсэ МГПИ-нь педагогикань факультетэнть. Мейле тонавтнесь аспирантурасо. 2006 иестэ идизе исторической наукань кандидатонь диссертациянть. Теке жо иестэнть саезь роботы Н.П.Огарёв лемсэ МГУ-нь национальной культурань институтсо тонавтыцякс.
Мертяно, эсь туртов викшнеманть Вера Васильевна Ковалева умок уш явизе сехте вечкевикс тевекс. Те искусстванть историязо пек домка. Пингеде-пингес ломантне паролгавтсть узортнэнь, сынст тюстнэнь, снартнесть максомс тенст раськень лув.
– Викшнемантень а эрявить кодаткак питней кедьёнкст, – ёвтни Вера Васильевна. – Ули салмуксот, суреть ды се, мезенть ули мелеть викшнемс. Кадовиксэсь ашти эсеть эйстэ. Бути те тевесь седеентень а вечкеви, иля снартнеяк, паро мезеяк а лиси.
Вера Васильевнань валонзо видеть. Ваномскак сонзэ викшневкстнэнь, сеске неяви, ломанесь путызе роботатненень оймензэ.
Эряви меремс, Вера Васильевна опытэнзэ эсь потсо а кирди, снартни тонавтомс те тевентень тонавтницянзояк. Сон сеедьстэ невтни мастер-класст эйкакшонь кужосо, школатнесэ. Аволь умок якась Суоминь масторов. Финляндиянь зярыя ошсо тосонь эрицятненень сон невтнесь мокшотнень ды эрзятнень викшневкстнэнь, кода ушодови те тевесь, викшнемань техниканть. Вера Васильевнань валонзо коряс, ламотне, те мазычинть лангс ванозь, саекшнесть мель варчамс вийтнень истямо викшнемасо.
Вера Васильевна – оймамонь а содыця ломань. Викшнемась лездась тензэ теемс покш исследования мокшонь, эрзянь ды татаронь оршамопельтненень, эдь эрьва узорось ды тюсось канды кодамояк смусть ды свал мездеяк ёвтни. Теде башка, вети покш робота Мордовиянь декоративно-прикладной искусствань исследованиятнень коряс. Теде сон сёрмадсь комсь научной ды кавто учебно-методической пособият, конат ней лездыть течинь студенттнэнень тонавтнемс раськенек историянть.
Кода специалист-викшниця, Вера Васильевнань покшт сюлмонзо финно-угрань ды Равчирень республикатнень тонавтнемань заведениятнень марто. Мордовиянь Н.П.Огарёв лемсэ госуниверситетэнь финно-угрань культурань научно-исследовательской лабораториясь Венгриянь Лоранд Этвеш лемсэ университетэнть, Будапешт ошонь этнографической музеенть ды Финляндиянь Хельсинки ошонь университетэнть марто вейсэ ютавтсть «Традиции и обрядовая культура мордовского этноса» раськеютконь экспедиция. Вера Васильевна ульнесь те экспедициясонть. Неень шканеяк сон республиканской ды раськеютконь весероссиянь научно-практической конференциятнень свалшкань участница. Свал тейни докладт, выступленият. Вера Васильевнанень сеедьстэ пшкалить ошонь творческой коллективтне лезкс эли оршамопелень коряс. Сон киненьгак а отказакшны, эрьванть марто мукшны кель-вал.
Вера Васильевна Ковалева – «Кой» этношколань участница. Ульнесть ламо выставканзо. Бути сынст ловомс, суроткак а сатыть. 2012 иестэ Московсо «Незабытые традиции» прикладной искусствань V раськеютконь фестивальсэ тензэ макснесть 3-це степенень диплом. Паро ды ламо иень перть важодемань кис Вера Васильевна Ковалева казезь Мордовиянь Культурань министерствань Почётонь грамотасо ды дипломсо, «За межнациональное согласие» медальсэ.
Н.Евдокимов


23.01.2019

 

Новости

Изнямонь чинь диктант


«Единая Россия» политической партиянь Генеральной Советэсь сайсь мель ютавтомс маень 7-це чистэ Изнямонь чинь диктант. Теде пачтясь журналисттнэнень апрелень 22-це чистэ Мордовиянь «Единая Россия» партиянь региональной отделениянь председателесь В.В.Чибиркин.

Диктантось юты «Историческая память» проектэнть топавтомга масторонок зярыя регионсо ды 22 омбо масторсо. Участниктненень сави отвечамс 20 кевкстематнень лангс Ине Отечественной войнань историянть коряс. Неть кевкстематнень ней аноксты Россиянь исторической вейсэндявксось.

Подробнее ...
 
Турчак подвел итоги первого экологического форума «Единой России»
Секретарь Генерального совета «Единой России» Андрей Турчак подвел итоги Всероссийского
экологического форума «Единой России» «Чистая страна». В частности, он предложил органам власти
провести проверку того, как регионы соблюдают законодательство в части установления тарифов за
обращение с отходами.
Подробнее ...
 
«Единая Россия» предложила Правительству усовершенствовать систему целевого набора в вузы
Премьер-министр Дмитрий Медведев поддержал предложения
фракции «Единой России» в Государственной Думе, озвученные ее
руководителем, вице-спикером Сергеем Неверовым. В частности,
одобрена идея пересмотра программы целевого набора в вузы,
введения сбалансированного питания в школах и сохранения
региональных и муниципальных телеканалов при переходе на
«цифру».
Подробнее ...
 
7 мая в Мордовии пройдет Диктант Победы
Региональный организационный комитет по проведению Всероссийского
исторического диктанта подержал решение Генерального Совета «Единой России» о
проведении «Диктанта Победы»
Подробнее ...
 
Кортавсь шукшонь пурнамонь реформадонть ды «Экология» национальной проектэнть тевс нолдамодо

Неть читнестэ Саранскойсэ ютавтовсь «Единой Россиянь» региональной дискуссионной площадкань васенце промксось. Сонзэ лувсо кортавсь коммунальной шукшонь пурнамонь реформадонть ды республикасонть «Экология» национальной проектэнть тевс нолдамодо. Промксонть важодемасо ульнесть «Ремондис Саранск» региональной операторонь прявттнэ, республикань Жилищно-коммунальной хозяйствань, энергетикань ды эрицятнень гражданской ванстомань, Вирень ды охотямонь хозяйствань, Эрицятнень социальной ванстомань, трудонь ды занятостень министерствань важодицятне, тарифень коряс республиканской службань специалисттнэ, ОНФ-нь ды общественной организациятнень члентнэ.

Подробнее ...