Рубрикатор

Культура Мадагаскарось – те аволь кинотеатра
Мадагаскарось – те аволь кинотеатра

Мордовиянь ламо эрицятнень туртов Мадагаскарось – те Саранскоень вейке Микшнемань центрасо кинотеатра эли мультипликационной содавикс фильма. Петер Мосань туртов жо, кона сась Мадагаскарсто, те – масторлангсо сехте вечкевикс тарка. Тесэ, Ихуш вишка ошсонть, сон чачсь ды кассь. Петерэнь алкуксонь лемезэ – Моса Петер Бернар. Сон ней тонавтни Н.П.Огарёв лемсэ МГУ-нь «Журналистика» отделениясо. Теевтяно содавиксэкс сы шкань журналистэнть марто ды кевкстнесынек минек оштонть ды сонзэ эрицятнеде мелензэ-арсеманзо.

 

Ламот дивсить, зярдо марить, омбо масторонь студентэсь сась Мадагаскарсто. «Сынь арсить, те усия (остров), косо эрить ансяк идем ракшат, – ёвтни Петер, – истят мельтне «Мадагаскар» мультфильманть ваномадо мейле. Мадагаскар Республикась – те мастор, конань эсензэ экономиказо ды культуразо. Кода Мордовиясояк, косо эрить эрзят ды мокшот, тосо лововить этнической зярыя группат. Масторсонть 22 регионт ды 18 раськеть. Вейкест-вейкест эйстэ явовить кельсэ, койсэ-кирдасо».
Петерэнь валонзо коряс, васняяк Россиясо тензэ пек стакаль. А шождаль тонадомс ломантненень. «Монь туртов Россиянь эрицятне ульнесть весе ве чамас, – пейди од цёрась. – Лемтнеяк ламонь вейкеть. Кодаяк эзинь чарькоде, мекс истя ламо Наташат, Дашат, Анят… Теде башка, монь талновтсь тынк ломантнень потмура чамаст. Мадагаскаронь эрицятне пек весёлат, вастовомсто ды ломантнень марто кортамсто свал мизолдыть. Тень коряс самай монь марто лиссь тамашань тев. Кода-бути весть кортазевинь од содавиксэм марто, монсь мизолдан. Тона апак учне лоткась кортамо ды мери: «А мезть пейдемс сень лангсо, мезде мон кортан!» Минек, мекевлангт, инженть потмура, нусманя эли кежей вановтось покорды эрицятнень». Чопода киське марто мадагаскарецэсь те шкас эзь тонадо, зярдо ваныть лангозонзо ошонь эрицятне. «Мон пек виздян, маряви, мартон мезе-бути аволь истя».
Саранскойсэ, Петердэ башка, эрить эштё колмо мадагаскарецт. Сынь вейсэ тешкстыть Од иенть, Роштованть, Независимостень чинть. 1960 иес Мадагаскарось ульнесь Франциянь колониякс.
«Васень шкасто, кода сынек Саранскоев, пек стакаль, – ледстни цёрась, – тунь эзинек сода келенть, натой «привет» валонтькак. Пелинек ёмамс-кадовомс, эзть ловново сёрмадовкстнэ, эзинек сода, кода ардтни общественной транспортось, а содылинек, кода кевкстемс ломантнень. Свал якинек вейсэ ды лездынек вейкень-вейкень туртов. Зярдо ушосо мартонок кортазевильть, минь мезеяк эзинек чарькоде. Лиясто бажасть кортамс мартонок англань кельсэ, ансяк минь сонзэ беряньстэ содасынек. Минек масторсо кавто официальной кельть: малагасийской ды французонь. Тонавтнемс рузонь келенть монень стакаль. Сехте стакакс марявсь кирдемс мельсэ приставкатнень: еду – приеду, заеду; режу – разрежу, отрежу... А шождаль кочкамс валонь виде форманть».
Шкань ютазь од ломантне тонадсть. Ней сынь парсте кортыть рузкс. Содасызь минек «шумбрат» валонтькак. Кармасть вечкеме прявт ошонть. «Саранскоесь тукшны мелезэнь ваньксчисэнзэ, сэтьмечисэнзэ. Тесэ эрямось моли састыне. Арась истямо а чарькодевикс капшамо, кода Московсо эли минек Антананариву прявт ошсонть. Тесэ карминь вечкеме чокшне ланга ошонть куншкакурова ды паркка якамотнень, телень ульцятнень, Од иеде икеле кенярксчинь учоманть. Вечкевикс таркатнень эйстэ вейкесь – Пушкинэнь паркось. Минек улить паркт, ансяк сынь аштить аволь ошонь куншкасо, косояк ошонть маласо, ды арасть карусель марто аттракционт, кода тесэ. Минек парктне пек покшт, 2000-3000 кв. метрат, косо касы тусто вирь, чудить покш лейть, тосо вастат покш ракшат. Нама, улить оймсемань таркат, пляжт».
«Пси шкане минек весе оймсить, – полады ёвтнеманзо Петер, – сиестась юты 12:00 чассто 14:00 часос. Те шкане лавкатне ды лия таркатне пекставить: кие-бути сырги кудов оймсеме, кие-бути оймси кафесэ, кие жо моли экшелямо».
Мадагаскарсо арасть покш трассат ды килангот, тосо мереви ардтнемс велосипедсэ. Саранскоесь, кода ловить омбо масторонь инжетне, велопрогулкатненень а маштови. Секскак Петер ялганзо марто велосипедсэ зярс а ардтнить.
Россиясо Петернэнь те шкас маряви стака эрьва ковсто пандомс жилищно-коммунальной услугатнень кис квитанциятнень (кода Россиянь эрицятнененьгак). Мадагаскарсо ломантне эрить частной кудосо ды пандыть ансяк электричестванть ды веденть кисэ. Кудотнесэ газ арась, сонзэ рамсить баллонсо. «Васня кодаяк эзь чарькодеве, мезекс пандомс эрьва ков Капитальной ремонтонь фондов. Минек эрьва эрицясь сонсь витни-петни кудонзо», – пачти Мордовиянь инжесь.
Бути кортамс ярсамопельтнеде, лия масторсто сыцятненень сынь эзть чарькодеве. Мадагаскарось ашти тропиксэ, тосо иень перть касыть фруктат ды эмежть. Минек лавкатнестэ а муят мангот, папайят, апалбеть, снефть, летшат. Арасть вадря фруктат. Савсь стувтомс ансяк кундазь калтнэнь ды крабтнень. Мадагаскарсо весе ярсамопельтнень анокстыть кокос марто. Сонзэ човорить аволь ансяк десерттнэс, истя жо сывельс ды калс. Петер ёвтнесь, кода сазорозо тантейстэ аноксты кокосонь ловсо марто сывель. Ламбамотнеде Мадагаскарсо вечкить «Гуджу-гуджу» пирожнойтнень, тосо истя жо кокос ды рисэнь почт. Те усиянть эрицятне сеедьстэ ярсыть скалонь сывельде, тувонь ды саразонь сывелесь седей питнейть. «Монень вечкеви вана мезе: Россиянь эрьва регионсонть ули кондитерской производства, микшнить эрьва кодат ламбамо ярсамопельть. Минек аволь истя. Масторсонок ансяк вейке фабрика», – ёвтни Петер.
Ломанесь эрьва мезентень тонады. Минек ярсамопельтнеде Петер вечки солянка, ярсы сондензэ ансяк раужо кши марто. Кода видькстась цёрась, зярдо васенцеде варчизе раужо кшинть, мелезэнзэ пек эзь туе, ней жо сонтемензэ а ярсни. Мордовиясо тонадсь чайде симеме.
Кода карминек содамо, Мадагаскарсо лавкатнесэ питнетне Россиянть коряс седе алкинеть. Саемга, тосо покш семиятне 100 доллар лангс эрить мездеяк апак мелявто ковонь перть.
Петерэнь валонзо коряс, Мадагаскарсо пек мазый пертьпельксэсь, климатось лембе. Бути кортамс политикадо, тосо сон аволь кеме, властенть потсо коррупция. Улить стакачить экономикасояк. Ломантне бажить туемс эрямо лия таркав, ансяк а шожда теевтемс виза. Теке жо шкане туристтнэнень, конат сыть усиянтень, сеске максыть виза аэропортсо. «Минек масторонть лангс те шкас лепшти Франциясь, – ёвтни Петер. – Мадагаскарось сюпав, тесэ ули сырне, сапфирт, палисандра. Весе сынь миевить Западов, васняяк Францияв. Предпринимательтнень кедьстэ лутыть покш налогт. А вана касомс-кепетемс омбо масторонь бизнесэнть туртов улить весе условиятне».
Те масторонь од ломантне бажить улемс инженерэкс, программистэкс, журналистэкс, лётчикекс. Ды кадык улияк дипломост, ялатеке стака муемс важодема тарка. Ризнэвти, дипломированной ламо специалисттнэ аштить кудосо. Омбо масторсто сазь ломантненень шождасто максыть важодема тарка. Сынст зарплатасткак седе покш.
Мадагаскарсо пштистэ ваныть школасо средней образованиянть мельга. Бути а пурнат 10-20 баллт, тонавтыцятнень эйстэ кияк а карми кунсоломот ды тонеть сави тонавтнемс эштё вейке ие. «Минек кемень балттнэ – те кода Россиясо «ниле» оценкась. Оценкатнень мереви витемс колмоксть. Бути тонавтницянть арасть покш баллонзо, сон кадови образованиявтомо. Парсте тонавтнемань кисэ государствась панды стипендия ды питневтеме кучи тонавтнеме омбо масторов. Минек школатнесэ ды вузтнэсэ тонавтнеманть кисэ пандомс а эряви. Весе студенттнэнь туртов эрьва ковсто пандыть стипендия. Монь койсэ, минек вузтнэсэ а сатныть практической занятият, студенттнэ тонавтнить ансяк теориянть», – пачтясь Петер.
«Мадагаскаронь ды Россиянь СМИ-тне, арсян, а явовить, – корты Моса. – Журналистэнь сёрмадовксонь жанратнесэ улить репортажт, интервьют, заметкат, газетань лопатнесэ муевить документально-художественной ды аналитической статьят. Минек журналисттнэ апак пеле теить материалт, косо сялдыть государстванть. Сеедьстэ частной СМИ-тнесэ лиснить пшти статьят, косо сялдыть властенть».
Мадагаскаронь студентэнть туртов Россиясо тонавтнемась – эрямонь покш опыт, кона, паряк, лезды тензэ седе тов эрямосонзо, журналистэнь тевсэнзэ. Кода тешкстызе сонсь Петер Моса: «Мордовиясо мон аволь ансяк пурнан содамочить, тееван содавиксэкс ломантнень эрямост марто, тонавтнян койтнень, бажан ваномс масторонть лангс лия сельмсэ».


Петер Моса,
С.Пивкина,
Т.Маторкина


28.11.2018

 

Новости

Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...
 
В рамках приема граждан Председатель ЕР поддержал социально значимые инициативы

Ряд социально значимых поручений дал Председатель «Единой России», премьер-министр Дмитрий Медведев в ответ на обращения, поступившие в рамках прима граждан, который прошел 30 ноября в Центральной общественной приемной Партии.

Подробнее ...