Рубрикатор

Культура «ЭТНОШКОЛАСЬ» ОСЬКИНА ВЕЛЕСЭЛЬ
«ЭТНОШКОЛАСЬ» ОСЬКИНА ВЕЛЕСЭЛЬ

Пурнамс килангов – монень а тонадомс. Весе эрямом, ловт, юты килангсо. Корреспондентэкс улемстэяк эрявсь якамс эрьва кува. Лия таркасо важодемстэяк свал яла ардан тов, ков тердьсамизь. Ды вана таго сась тердема Равлангонь финнэнь-угрань раськетнень культурань центранть пельде, конань ушодксонзо коряс зярыя иеде теде икеле сыргавтозель «Кой» Этношкола» Регионъютконь проектэнть топавтомазо. Сонзэ юрокс ашти – пурнамс творческой группа, ков совавольть минек вузтнэсэ, школатнесэ тонавтыцят, культурасо важодицят, ды якамс Мордовиянть томбале аштиця оштнева ды велетнева, косо эрить эрзят ды мокшот. Тосонь эрицятнень марто ютавтнемс вастневемат, теемс сынст содавиксэкс весе сень марто, мейсэ эри минек республикась неень шкасто, кодамо ёжосо минек тиринь келесь, целанек культурась, максомс лезкс тиринь келень тонавтыцятненень, библиотекатненень. Проектэсь невтизе эсензэ лезэнзэ. Секс арсезель поладомс сонзэ седе товгак.

 Истямо ладсо проектэнь топавтыцятне якасть эрьва кува. Аволь весть пачколесть Ульяновскоень ёнксонь велетнескак. Ды, нама, эзть ютне Инзаньбуенть вакскаяк. Ды, меремс, тов сакшномс сонсь Пазось мерсь. Неть таркатнесэ кезэрень пингестэ саезь эрясть ды нейгак эрить эрзят. Теде кортыть лейтнень, велетнень лемтнеяк: Сюксюм, Тияпина, Аргаш, Труслейка, Чумакина, Челдаева. Инза лемеськак, келя, теевсь эрзянь «инзей» валстонть. Инза леенть чирева, кортыть, кассть инзеень курот. Секс сонзэ лемдизьгак Инзакс. Тень кемевтемга, Инзасо панжсть Инзеень музей, косо пурназь экспонатт. Сынь ёвтнить те ошонть эрямопингедензэ, кона ушодови 1897 иестэ саезь. 

Сундерьковонь 16-це чистэ сыргинек таго Инза ёнов, конань маласо ашти эрзянь кезэрень велесь – Оськинась. Сонзэ эрямопингезэ седеяк кувака. Васенце эрицятне тей састь, кода кортыть кезэрень ламо сёрмадовкстнэ, натой 1671 иестэ. Ды сынь ульнесть эрзят. Лемдизь веленть Оськинакс се ломаненть лемсэ, кона васенцекс тейсь тезэнь кудоюрт.
Велесь ловови сехте покштнестэ вейкекс аволь ансяк Ульяновской ёнкссо. Сонзэ кондят ней аламо кадовсть весе масторонок келес. Икеле, нама, сон седеяк покшоль. Эрицянзо кавто тёжадо ламольть. Перестройкась пачкодсь товгак ды весе сень, мезе ульнесь теезь ды таштазь Советской властенть пингстэ, пувсинзе варма мельга ды нолдынзе тюшумбар. Эрицятнеяк икелень коряс пек аламолгадсть. Кить кулсесть, седе одтнэ тукшность лия таркава: эсест велесэ а косоль ды а мейсэль трямс прянть. Тень лангс апак вано, велесь допрок эзь чамо. Эрицятнеде, келя, вейке тёжа ветесядто ламо. Эйкакшткак улить. Школасо тонавтницятнеде 146 тейтернеть ды цёрынеть.
Оськинав пачкодезь, ёжонок паролгадсь. Кудотне парт. Веленть куншкакуросо аштить школась, Свято-Никольской храмось, вакссонзо Культурань кудось, косо ютаськак вастовомась. Вастымизь сонзэ прявтось Е.В.Вишнякова. Весемева неявсь, Культурань кудось одкстомтозь аволь умок. Сон ушо ёндояк, потстояк витнезь-петнезь, артозь-мазылгавтнезь. Елена Владимировна эзь сёпо, сынь алкукс ламо вий путсть Культурань кудонть одс чачоманзо туртов. Сёрмалесть проектт, пшкалесть лезкс мельга Ульяновской ёнксонь губернаторонтень. Ды ней сынст лангс сельмест сявадыть натой ошонь кой-кона Культурань кудосо важодицятненьгак. Е.В.Вишнякованень ульнесь мейсэ шнамс прянть лия тевсэяк. Культурань кудосо эрямось, марят, лаказь лаки. Тесэ панжозь эрьва кодат нупальть. Сындест 22. Морыцянь ды киштицянь куротнеде кеменьшка. Улить эрзянь моронь морыця ансамбляткак. Вейкенть лемезэ «Лейне». Эйсэнзэ 14 ломанть. Вейкесь омбоцеде мазыйть. Вайгелесткак гайгить – цёков визделгады сынст кунсоломсто. Ялатеке сыненст эряви лезкс, кода седе парсте ладсемс вайгельтнень. Фольклоронь коряс мастер-классонь ютавтомо якась МГПИ-стэ преподавателесь Т.А.Козлова. Лия эйкакштне пурнавкшность теке жо вузонь тонавтыцянть Н.В.Матвеевань перька. Сон эйсэст тонавтсь конёвсто някань тееме.
Секе шкастонть седе покш залсо пурнавозтнень туртов васня невтезель «Мордовия – мой дом» документальной фильма. ПЦКФУН-нь координаторось Т.Т.Чекушова явшесь Шнамо конёвт ды питней казнеть сеть ломантненень, кить ламо теить раськень культуранть лезэс. Сынст ютксо Оськинань школань прявтось Ю.А.Вишняков, конань вийсэ тонавтомась ладязь национальной ёнкстнэнь мельс саезь. Эрзянь келесь тесэ тонавтови паро ладсо. Виде, сынсь эйкакштне эсест юткова кортыть рузкс. Кевкстемам лангс: кортыть-арась косояк тиринь кельсэ, весе ве вайгельсэ мерсть: «Кортатано». Те макссь кемема. Покш мельсэ эйкакштне кунсолость Саранск ошонь 26 № лицеень эрзянь келень тонавтыцянть С.Ю.Дмитриевань, кона толковась, мекс эряви содамс чачома келенть.
Мейле ушодозель кортамо седе, ков молемс од ломантненень тонавтнеме. Содазь, Мордовиясо истят таркатнеде ламо. Университеттэ башка од ломантнень учи М.Е.Евсевьев лемсэ пединститутось. Кодат специалистт анокстыть минек вузтнэсэ, ёвтнесть М.Е.Евсевьев лемсэ МГПИ-нь педагогической ды художественной образованиянь факультетэнь деканось Т.Н.Приходченко, Н.П.Огарёв лемсэ МГУ-нь Аграрной институтсо тонавтыцясь Ф.П.Пильгаев, ВГУЮ-нь Средне-Волжской институтсто гражданской ды арбитражной процессэнь кафедрань доцентэсь В.Н.Сеничева.
Вастовомась прядозель моросо, конатнень пурнавозтнень туртов казизь Саранскойстэ «Ламзурь», Ульяновскойстэ «Оят-ялгат» ансамблясо морыцятне ды тосконь од артисттнэ.


Раиса Щанкина


21.11.2018

 

Новости

Изнямонь чинь диктант


«Единая Россия» политической партиянь Генеральной Советэсь сайсь мель ютавтомс маень 7-це чистэ Изнямонь чинь диктант. Теде пачтясь журналисттнэнень апрелень 22-це чистэ Мордовиянь «Единая Россия» партиянь региональной отделениянь председателесь В.В.Чибиркин.

Диктантось юты «Историческая память» проектэнть топавтомга масторонок зярыя регионсо ды 22 омбо масторсо. Участниктненень сави отвечамс 20 кевкстематнень лангс Ине Отечественной войнань историянть коряс. Неть кевкстематнень ней аноксты Россиянь исторической вейсэндявксось.

Подробнее ...
 
Турчак подвел итоги первого экологического форума «Единой России»
Секретарь Генерального совета «Единой России» Андрей Турчак подвел итоги Всероссийского
экологического форума «Единой России» «Чистая страна». В частности, он предложил органам власти
провести проверку того, как регионы соблюдают законодательство в части установления тарифов за
обращение с отходами.
Подробнее ...
 
«Единая Россия» предложила Правительству усовершенствовать систему целевого набора в вузы
Премьер-министр Дмитрий Медведев поддержал предложения
фракции «Единой России» в Государственной Думе, озвученные ее
руководителем, вице-спикером Сергеем Неверовым. В частности,
одобрена идея пересмотра программы целевого набора в вузы,
введения сбалансированного питания в школах и сохранения
региональных и муниципальных телеканалов при переходе на
«цифру».
Подробнее ...
 
7 мая в Мордовии пройдет Диктант Победы
Региональный организационный комитет по проведению Всероссийского
исторического диктанта подержал решение Генерального Совета «Единой России» о
проведении «Диктанта Победы»
Подробнее ...
 
Кортавсь шукшонь пурнамонь реформадонть ды «Экология» национальной проектэнть тевс нолдамодо

Неть читнестэ Саранскойсэ ютавтовсь «Единой Россиянь» региональной дискуссионной площадкань васенце промксось. Сонзэ лувсо кортавсь коммунальной шукшонь пурнамонь реформадонть ды республикасонть «Экология» национальной проектэнть тевс нолдамодо. Промксонть важодемасо ульнесть «Ремондис Саранск» региональной операторонь прявттнэ, республикань Жилищно-коммунальной хозяйствань, энергетикань ды эрицятнень гражданской ванстомань, Вирень ды охотямонь хозяйствань, Эрицятнень социальной ванстомань, трудонь ды занятостень министерствань важодицятне, тарифень коряс республиканской службань специалисттнэ, ОНФ-нь ды общественной организациятнень члентнэ.

Подробнее ...