Рубрикатор

Культура Тонавтомась – эрямонь тевезэ
Тонавтомась – эрямонь тевезэ

Ожоковонь 5-це чистэ масторонть келес тешкставсь Тонавтыцянь чись. Кода свал, те чистэнть минь ледстнетяно эсь тонавтыцятнень, кить макссть тенек домка содамочить, кить панжизь минек икеле покш эрямов кинть. Ледстнетяно сетнень, кить те а шожда тевентень – эйкакштнень тонавтомантень – алтызь весе эрямост. Кода кортави, улемс тонавтыцякс – те призвания. Ды лиякс а кода!
Минек республикасо ламо содавикс тонавтыцят, конат эсь вечкевикс тевентень алтызь весе пингест. Сынст ютксо Юлия Сергеевна Дорожкина. 40 ламо иеть сон важодсь школасо, тонавтсь рузонь кель ды литература. Ней Юлия Сергеевна ютась уш 94 иетнень трокс, ансяк школасо важодемань шканть зярдояк а стувтни. Сонзэ кудозо, мерят, нейгак теке литературань кабинет. Книгатнеде тесэ а ёвтавияк зяро.

 

Ю.С.Дорожкина чачсь Ковылкина ёнксонь Чекашевы Поляны велесэ тонавтыцянь семиясо. Сонзэ тетязо ды авазо весе пингест перть ульнесть тонавтыцякс. Чекашевы Поляны велесэнть содамочитнень максыцякс ульнесть ансяк кавонест, секскак эсь тонавтницякс сынь ловсть весе велень эрицятнень. Эсь а шожда ды эрявикс тевенть кисэ кавонест казезь Ленинэнь орденсэ. Эряви меремс, Советской Союзсо те ульнесь государственной сехте покш казне. Сень лангс ванозь, кода кандовсть велесэнть сынст тетянтень-авантень, эйкакштнеяк, патят-сазорт колмонест, кочкизь тонавтыцянь тевенть. Юлия Сергеевнань кавто сазоронзо весе пингест перть важодсть велень школасо. 

Чекашевы Поляны велень школанть Юлия Сергеевна прядызе 1941 иень кизэстэнть, зярыя чиде икеле, кода ушодовсь зыянов войнась. Нама, кияк эзь сода, мезе учомс, кияк эзь сода, кода весемесь велявты. Ансяк тейтересь бажась поладомс тонавтнеманзо седе тов, сонзэ ульнесь покш мелезэ сыргамс тетянзо-аванзо кияванть ды улемс тонавтыцякс. Кувать апак арсе, сон кандынзе конёвонзо Мордовиянь педагогической институтов ды уш сёксня кармась келень ды литературань отделениянь студенткакс.
А шожда шкас прасть тейтеренть тонавтнемань иетне.
– Пек стака ульнесь войнань шкастонть, – ёвтни Юлия Сергеевна. – Эрсесь истяяк, колмо чинь перть, ведте башка, кургс каямскак ульнесь а мезе.
1945 иестэ Юлия Сергеевна прядызе институтонть ды зярыя шкань ютазь лиссь мирденень вадря, ёроков цёранть Михаил Дорожкинэнь экшс. Ды лиссь истя, мирдеськак сюлмавозь тонавтыцянь тевенть марто. Сестэ сон важодсь ошонь комсомолонь обкомсо. Теде икеле жо зярыя иень перть роботась Сыре Шайговань сисем иень школасо историянь тонавтыцякс, мейле теке жо райононь Темяшевань аволь полной средней школасо директорокс.
Эряви тешкстамс, М.В.Дорожкин минек республикасо ломанесь содавикс. 1948-1950-це ды 1967-1978-це иетнестэ сон ульнесь Мордовской АССР-нь Министрань Советэнть юрсо Келень, литературань ды экономикань НИИ-нь прявтокс, 1950-1960-це иетнестэ – Мордовской АССР-нь Просвещениянь министракс, 1960-1967-це иетнестэ – Н.П.Огарёв лемсэ МГУ-нь историко-филологической факультетэнь деканокс, КПСС-нь историянь кафедрань прявтокс.
Зярдо Михаил Васильевич топавтсь министрань тевтнень, од семиянтень макссть кудо ошонь Республиканской куросонть. Кода ёвтни Юлия Сергеевна, сындест икеле те кудосонть эрясь масторонь содавикс учёноенть, академикенть В.П.Филатовонь семиязо.
– Войнань шкасто тесэ аштиця кудотнень таркасо ульнесть окопт, ды маласо кудотнесэ эрицятне кандыльть тезэ весе аэрявикс шукшонть. Зярдо минь семиянек тей сынек эрямо, весементь савсь ванськавтомс эстенек. Зяро сестэ шукш савсь урядамс ды пултамс. Ваньксчи теинек, ансяк кудонть перька таркась марявсь тень чавокс, мезе-бути эзь сатно. Аламонь-аламонь озавтынек эрьва кодат чувтот, кассь цела сад. Мон свал озавтылинь цецят ды весе кизэнть перть кудонок малава ульнесь а ёвтавикс мазычи, – ледстни Юлия Сергеевна.
Кудонть перька садось ули течияк, ансяк вана сонзэ мельга якиця азор арась. Юлия Сергеевна эри ськамонзо, ошсонть пек малавикс ломанензэ арасть. Веженсь цёразо зярыя иеде икеле тусь эрямостонть. Покшось, Александр Михайлович, эри Нижней Новгородсо. Сонзэ эрямозо истя жо сюлмавозь науканть марто. Сон – Н.И. Лобачевский лемсэ Нижегородской государственной национальной исследовательской университетэнь философиянь кафедрань профессор. Поладызе тетянзо-аванзо тевест.
Шкась юты а марявияк, иетне, мерят, ливтязь ливтить. Ансяк бути ломаненть весе эрямонзо перть ульнесь вечкевикс тевезэ, сыречиськак а максы оймамо. 2015 иестэнть тешкставсть М.В.Дорожкинэнь чачома чистэ 100 иетне. Юлия Сергеевна вейсэ философонть Д.Е.Фролов марто анокстасть очерк (3 пельксстэ), косо домкасто ёвтнесть РСФСР-нь школань заслуженной учителенть Михаил Васильевич Дорожкинэнь эрямонь ды важодемань кидензэ. Юлия Сергеевна покш каштанчисэ ашти теезенть коряс. Сон топавтызе эсь ламо иень мелензэ – ёвтнесь ломантненень эсь сехте малавикс ломанденть, Мордовия Республикань ине тонавтыцядонть ды научной деятельденть.

Лезкс од ломантнень пельде

Эрьва иень ожоковсто, сыре ломантненень алтазь ковстонть, республикань «Молодая гвардиянь» активисттнэ ютавтыть «Лембе кудо» акциянть. Ковонь перть од ломантне лездыть ськамост эриця пенсионертнэнень: шлить ды лембелгавтыть вальматнень, ванськавтыть кудонть, рамить эрявикс ярсамопельть.
Ожоковонь 5-це чистэ, Тонавтыцянь чистэнть, од ломантне содавтызь Юлия Сергеевна Дорожкинань. Кода уш ёвтнинек икеле, авась 40 ламо иеть роботась рузонь келень ды литературань тонавтыцякс. Эсь иетнень коряс, сонензэ уш 94 иеть, Юлия Сергеевнанень пек стака теемс кудоютконь тевтнень. Истя, ськамонзо эриця сыре ломанентень лезкс марто састь «Молодая гвардиянь» активисттнэ.
Васняяк од ломантне ёвтасть Юлия Сергеевнанень лембе поздоровт профессиональной кенярксчинть коряс, кандсть казне. Активисттнэ лездасть пурнамс умартнень, конат те шкас ульнесть чувтотнень прясо, шлизь-нардызь кудотнень.
– Неень шкане сыре ломантненень пек а сатокшныть седейшкавань кортамот. Седе пек ськамост эрицятненень. Мон свал пек кенярдан, зярдо содавтомон ды лездамо сыть од ломантне, – тешксты Юлия Сергеевна.
Кудазоравась ёвтнесь од ломантненень школасо важодемань шкатнеде, войнань а шожда иетнеде. Активисттнэ алтасть содавтнеме сонзэ седе сеедьстэ ды лездамс весе эрявикссэнть.

Ю.Еремина


09.10.2018

 

Новости

В «Единой России» проверят состояние детских площадок по всей России
До конца июня 2019 года активисты партпроекта «Единой
России» «Народный контроль» проведут проверку состояния детских
площадок в 85 регионах - насколько они соответствуют нормативам и
безопасны для жизни и здоровья детей. Информация о выявленных
нарушениях будет передана в администрации муниципалитетов,
управляющим
компаниям,
товариществам
собственников
недвижимости с требованием устранить выявленные недостатки. Об
этом заявила координатор партпроекта «Народный контроль»,
депутат Госдумы Анна Кувычко.
Подробнее ...
 
Аршинова направила в Правительство РФ пакет предложений для включения в программу «Земский учитель»
В целях реализации Послания Президента Владимира Путина
Федеральному Собранию в регионах активисты партпроекта «Новая школа»
организовали широкое обсуждение проекта программы «Земский учитель» с
привлечением представителей профильных ведомств и институтов развития
образования, ведущих экспертов, педагогического и родительских
сообществ. По их итогам был выработан комплекс важных предложений для
включения в программу «Земский учитель», которые были отправлены на
имя вице-премьера Правительства РФ Татьяны Голиковой. Об этом заявила
координатор партпроекта «Новая школа», член комитета Госдумы по
образованию и науке Алена Аршинова.
Подробнее ...
 
Жители Мордовии обратились к главному федеральному инспектору за содействием в решении проблем

В соответствии с поручением полномочного представителя Президента России в Приволжском федеральном округе Игоря Комарова 22 мая 2019 года в приемной Президента Российской Федерации в Республике Мордовия состоялся прием граждан. Провел его главный федеральный инспектор Михаил Сезганов.


Подробнее ...
 
Госдума приняла во втором чтении поправки «Единой России», разрешающие продажу театральных билетов без кассовых аппаратов
Депутаты Государственной Думы поддержали во втором чтении
поправки, разработанные депутатами от «Единой России», в закон «О
применении контрольно-кассовой техники», которые в том числе
предусматривают освобождение распространителей театральных билетов от
обязанности использовать кассовые аппараты с 1 июля 2019 года.
Подробнее ...
 
Медведев поддержал предложения участников Форума сельских депутатов «Единой России»
Председатель «Единой России», премьер-министр Дмитрий Медведев
поддержал предложения участников Форума сельских депутатов, который
прошел 21 мая в Воронеже.
Подробнее ...