Теевсь паро коекс «Живое общение» этно арт-студия» проектэнть вельде ютавтомс вастовомат сыре ломанень кудотнесэ, пансионаттнэсэ. Меельце истямо вастовома ютась Покш Березникбуень сыре ломанень ды инвалидэнь кудосонть-интернатсонть. Сонзэ анокстызе МР-нь Раськетнень ояксчинь кудось.

Васняяк ушодовсь концертэсь. Сыре ломантне, кить марить пряст парсте, пурнавсть актовой залс. Тесэ сынст туртов морасть МР-нь Народной артисткась Анна Атласова, МР-нь Заслуженной артисткась Галина Макшева, «Крыница» украинань народной ансамблянь солистэсь Владимир Мельник. Гайгсть эрзянь, мокшонь, рузонь, украинань кельсэ моротне.
– Минь тей сынек аволь васенцеде. Весе седейстэ арсетяно тенк кеме шумбрачи, паро эрямо, илядо сэреде, илядо сыреде, уледе весе шумбрат! – кортась сцена лангсто Анна Атласова.
– Ламо савкшны ардтнемс ды эрьва косо ульнемс. Тынк кудосонть-интернатсонть свал ваньксчи, паро ёжо, маряви, бабинетне ды атинетне аволь кадозь. Мельганк пштистэ ваныть, – пачтясь Равчирень финнэнь-угрань раськетнень культурань центрань важодицясь Т.Т.Чекушова. Сон казсь кудонтень-интернатонтень мазый част-картина ды ламбамо казнеть.
Те чистэнть чачома чинзэ тешкстась тесэнь эрицясь Ю.В.Поверинов. Сонзэ туртов ульнесь башка казне. Теде мейле весе тердевсть мастер-классов, косо тейнесть панксонь някат ды артсть матрёшкат.
Покш Березникбуень сыре ломанень ды инвалидэнь кудосонть-интернатсонть эрить 139 ломанть. Тесэ аволь ансяк сыреть, улить од ломантькак, конатне инвалидт. Сынст мельга якить малав сядо важодицят: квалифицированной врачт, медсестрат, санитаркат. Ули отделения, косо ломантне а стякшныть таркастост. Кить пильге лангсо, сетне эрить 2-3 ломаньс нупальсэ. Улить телевизорост, холодильникест.
Людмила Николаевна Илюшова важоди тесэ медсестракс кемголмово иеть. Сонзэ валонзо коряс, важодемс кудосонть-интернатсонть аволь шожда. Эрьванть марто эряви муемс кель-вал, кортамс чевтестэ, а пижнемс. Ламотне сыре ломанть. Мартост кортама стамбарнэ, оймавтомат. Улить инвалидт, конатнень кадызь тетяст-аваст. Ламот пильгевтеме, кельмевтизь ушосо. Седеяк пек мелявтыть сеть эрицятне, конатнень ускизь тей эйкакшост. Кинь жо арасть малавиксэст, мельгаст а кинень ваномс.
Эрицятнень туртов свал ютавтовить эрьва кодат кенярксчить. Келейстэ тешкстыть Сыре ломанень ковонть, самай те шкане сакшныть ламо инжеть: Покш Березникбуень средней школань тонавтницятне, Шугур велень ансамблясь, ветеранонь хортнэ, Саранскоень морыцятне. Вастыть Од иенть ды Мастянть. Сынст анокстыть тесэнь эрицятне ды важодицятне.
Зярыя иень перть тесэ прявтокс важоди Александр Петрович Акайкин. Сон ёвтнесь тенек тесэнь эрямодонть, невтизе кудонть-интернатонть, ютавтсь экскурсия. Коень коряс, шумбракстнесь эрьванть марто, кевкстнесь, кие кода мари прянзо, кода моли эрямось. Истя сон якси ды ванкшны эрьва чистэ.
Интернатсонть улить пандуст, лифт, душевойть, ваннат. Тесэ ламотне аякицят, аштить инвалидэнь коляскасо. Стакасто сэредицятнень усксить больницявгак, бути эряви операция эли лия мезе. Ули ознома нупалест ды эсест калмолангост.
Кемтяно, те сёксень чистэнть сыре ломантне маризь пряст аволь кадозекс. Тенст сакшность инжеть, мартост кортасть, казсть концерт.
Т.Маторкина

09.10.2018