Рубрикатор

Культура Пётр Ключагинэнь «Эрямонь вайгельпензэ»
Пётр Ключагинэнь «Эрямонь вайгельпензэ»

Пётр Андреевич Ключагин… Те лементь парсте содасызь аволь ансяк минек республикасо, сонзэ томбалеяк. Содасызь аволь ансяк кода учёноенть, кона ламо иень перть важодсь Н.П.Огарёв лемсэ МГУ-нь филологиянь факультетсэ, тонавтсь-анокстась сы шкань журналистт. Пётр Андреевич Ключагин – эрзянь содавикс писатель, кинь сёрмадовксонзо муизь эсь таркаст минек литературань сырнень паргосонть.

 

…«Эрзянь правдасо» важодемстэ ламо-мезде сёрмалинь. А вана эрзянь кельсэ сёрмадейтнень  (прозаиктнень, поэттнэнь) шкинемаст «токшинь» аволь истя сеедьстэ, кода бу эрявсь. Аволь арасель мелем. Видькстан, пелинь кундсемс те тевентень.  Арсинь, покш писательтнень творчествадост кадык сёрмадыть лият, седе превейть ды сёрмадома тевсэнть седе чарькодицят.

Пётр Андреевич Ключагинэнь творчествадонзояк ульнесь кинень сёрмадомс. Весе сень, мезе лиснесь сонзэ кедь алдо, сельмест икельде эзизь менстне эрзянь содавикс учёнойтне В.И.Дёмин, М.И.Ломшин. Сынь оно кить! А мон киян?

Курок лиссь истямо тев: кармавтымизь сёрмадомо «Карязонь трокс» рубрикадонть, кона лиснесь «Эрзянь правдасо» ютазь пингень кодгемень иетнестэ, зярдо редакторокс ульнесь В.Кувакин. Видьстэ меремс, монсеньгак мелем покшоль седе ламо содамс сеть ломантнеде, кить ветясть те рубриканть. Секс кундынь те тевентень паро мельсэ. Ды курок прясто-пильгс «ваинь» сонзэ потс. Кепединь «Эрзянь правдань» се шкань подшивкатнень ды превень натой чаракадсть. Кодат ломанть сестэ важодсть минек газетасо! Кода сынь апак пеле сёрмадсть весе седе, мезесь эзь ладя се шкань эрямонтень! П.Сурков, И.Вечканов, П.Нуянзин, Е.Пятаев, А.Пятайкин, И.Пузаков, Г.Агейкин, А.Левкин, О.Молошкин, С.Храмов, В.Цыганов, Е.Радаев,  В.Локтионов, Д. Учаев, Н.Алтаев, М.Сергеев, Е.Зотов, Т.Якушкин, Н.Акимов, И.Бояркин, Г.Тюгаев, М.Лёшин…  Весень лемест, паряк, а ледстявитькак. Сынст ютксоль Пётр Ключагингак! Ловнылинь «Карязонь трокс» лем ало лисниця фельетонтнэнь, мизолкстнэнь ды – «вах-ох» – седеем кочкаряс валгиль. Вана косот минек национальной журналистиканть кепедицятне! Вана кить алкуксонь журналисттнэ!

Ледстясынек, «Карязонь трокс» рубриканть ало лиснесть сехте пшти фельетонтнэ, конатнесэ лангс ливтевсть эрямосо весе «чопода» ёнкстнэ, башка ломантнень берянь, аксун обуцяст, сеть тувталтнэ, конатнень кувалма майсесть велень, ошонь эрицятне. Икелеяк, нейгак арсян, се шкань фельетонтнэнь ютксо башка, весемеде неявикс таркасо аштить П.Ключагинэнь фельетононзо. Эсь произведениятнесэ сон лангс ливтсь сеть асатыкстнэнь, кодат ульнесть се шкасто велень эрямосонть, колхозонь производствасонть. Сон «каряз ланга» чавсь сеть ломантнень, кить эзть машто ладямо тевтнень, кинь чумост кувалма эзь паролгадо ды эзь сюпалгадо колхозонь эрямось, сялдсь ды кардась мельтемечинть, азортомочинть.

Журналистэкс П.Ключагин теевсь 1960 иестэ, зярдо Мордовиянь госуниверситетэнь филологиянь факультетэнть прядомадо мейле сась важодеме «Эрзянь правдав», косо сон зярыя иеть ульнесь собкорокс васня Ицялонь, мейле Орданьбуень куротнесэ. Те кармась тензэ покш школакс творчествань эсензэ кинть вешнемасо, эрзянь кельсэ паро сёрмадыцякс теевемасо.

Журналистэкс улемстэ эрьва кодамо велева яказь, ломань марто вастневезь ды кортнезь, П.А.Ключагинэнь икелев эрямось кармась панжовомо седеяк келейстэ ды эрьва ёндо. Сон тонадсь аволь ансяк ломантнень кунсоломо, сынст мелявксост чарькодеме, тонадсь нееме-редямо ды лангс ливтеме весе сеть асатыкстнэнь, кодат ульнесть се шкань велень хозяйствасо. Тень теемс ульнесь пек а  шожда. Велетнесэ сестэ эрямось пек стакаль. Колхозтнэсэ тевтне мольсть «адя, кодаяк». Модань сокицятненень-видицятненень, ракшань трицятненень ярмакт эзть пандо. Тень таркас макснесть коморо-кавто зёрна ды весе. Эряк, кода маштат. Весе неть стакачитнень кувалма ломантне кармасть орголеме велестэст, тукшномо ошов. Велесэ эрямось седеяк стакалгалесь. Од, шумбра, виев цёратне ды тейтертне тукшность лия таркава, велетнесэ кадновсть сыретне, нузякстнэ. Эрьва косо сельмс эцесть азортомочись, мельтемечись. Кода журналист, кона весементь, мезе неи, нолды седеензэ малава, кинь туртов васенце таркасо свал аштесь видечинть ванстомась, сонзэ кисэ аштемась, Пётр Ключагин эзь ютне неть асатыкстнэнь вакска, невтсь эйсэст эсензэ материалтнэсэ.

Истя П.А.Ключагин чалгась юмористэнь-сатирикень кинть лангс. Сатирань ды юморонь васенце произведениякс ульнесть фельетонтнэ ды мизолкстнэ. Сынь кармасть лиснеме национальной газетасо ды журналсо. Васняяк, «Эрзянь правда» газетасо, косо, кода уш меринек, панжозель од рубрика, конанень максозель те жанрантень седе а ков ладиця лем – «Карязонь трокс» (те лементь арсизе газетань се шкань журналистэсь М.Лёшин).

П.Ключагинэнь ёрокчизэ,  кода журналистэнть, кода юмористэнть-сатирикенть, келейстэ панжовсь истят фельетонтнэсэ: «Сталмозо 10 килограммат, питнезэ 10 целковойть…» («Э.п.» 1961 иень февралень 26-це чи), «Жарков ялганть онозо», «Раужо ой», «Пейтне седеяк чулксетить», «Персональной алаша», «Картежной турнир», «Тувотне чумот», «Эх, мушко, мушко» ды ламо лиятнесэ. Истямо жанрань ламо произведениянзо совасть «Од пингес кить-янт» (1977), «Пирявкс» (1979), «Меельце кулят» (1990) сборниктнес.

Седе мейле, зярдо П.Ключагин монь туртов панжовсь кода юморист-сатирик, арсинь седеяк ламо содамс те ломанденть, сонзэ творчествадо. Карминь ловномо ёвтнеманзо, валморонзо. Ды курок сынь истямо мельс: П.Ключагин – сёрмадей, конань творчестванзо а човорясак лиятнень марто. Сонзэ эсензэ сёрмадомань тешксэзэ ды лувозо, эрямонть лангс эсензэ вановтозо. Эсензэ произведениятнень туртов геройтненьгак сон эзь вешне ды а вешни костояк васолдо ды а саи сынст эсензэ превстэ-удемстэ, а салы  кинь-бути лиянь кедьстэ. Сынь, неть геройтне, эрить перьканок, малаванок, вакссонок. Эряви ансяк маштомс редямост, сынст обуцяст чарькодеме ды невтеме. Ключагин маштсь тень тееме. Секс произведениянзояк шождасто ловновикст ды чарькодевикст. Саемс «Нарьгазь ломань», «Те ульнесь Пичегайсэ», «Манявсь», «Апаро он», «Сокор сюло», «Понкстомо» ды лия  ёвтнематнень. Истят ломанть, кодат невтезь эйсэст, вастат эрьва косто.

Мокшэрзянь литературасо васенце эскелькстнэнь сон теинзе 1950-це иетнестэ саезь. Чалгамс литературань кинть лангс П.Ключагинэнь кармавтызь васняяк эрямонть смустензэ чарькодеме бажамось, эрзянь келенть вечкемась, сонзэ уцясканзо кисэ мелявтомась ды весе сеть ёжомарямотне, конат палозь палсть седейсэнзэ ды вешсть ливтемс сынст оляс, конёв лангс.

Виде, Пётр Ключагинэнь творчестванзо а ловсак пек покшокс ды келеекс. Сон, кода эрявсь учнемскак, эзь сёрмадо покш романт, эзь кундсе драматургиянь жанрасо сёрмадома тевентеньгак. Сон вешнесь литературасо эсензэ тарканть, эсензэ жанранть. Ды те курок муезель: лирической ёнкс марто юморонь ды сатирань нурька ёвтнемат. Теке марто Пётр Ключагин сеть писательтнень ютксто, кить а капшить седе куроксто сёрмадомс вейке произведения ды сеске кундамс омбоцентень, зярдояк эзь ульне ансяк строчканзо кисэ сёрмадыцякс ды конёвонь пацькицякс. Сехте покш вешемакс эрьва писателенть туртов сон лови – сёрмадомс аволь вейке-кавто чинь произведеният, сёрмадомс истят произведеният, конат зярдояк аволизь ёмавто эсест эрявиксчист ды питнейчист. (Теде седе а ков парсте сёрмадсь эсензэ вейке ёвтнемасонзо, конань лемезэ  «Костязь пангт»).  Секскак, паряк, книганзо аволь пек ламо, ансяк вете. Васенцесь – «Од пингес кить-янт», лиссь 1977 иестэ. Кавто иень ютазь, 1979 иестэ, аноколь уш омбоце книгазо, конась лиссь истямо лем ало – «Пирявкс». Седе тов ловныцятненень пачкоди «Меельце кулят» книгазо (1990 ие). Мордовиянь книгань издательствась 1997 иестэ нолдызе «Цёканька» книганзо. Таго вейке пусмось («Ожо цецят. Кстыйть») нолдазь В.Алтышкин марто. Теде башка, пейдемань ёвтнеманзо лиснесть вейсэнь ламо пусмосо. «Сэмень» судрявкст» пусмонтень (1994 ие) совасть кавксо ёвтнеманзо. Зярыя ёвтнеманзо совасть «Эрямонь вайгель» антологиянтень, конань нолдамонзо лездась Финляндиянь М.А.Кастренэнь вейсэндявксось.

Ды вана аволь умок маринь паро куля: лиссь Пётр Ключагинэнь таго вейке книгазо.  Лисни, те – котоце. Курок те од книгась, кона лиссь «Кочказь произведеният» лем ало, пачкодсь монь кедьскак. Сон икеле лисезтнень коряс седе эчкине. Лангозо валдо-пиже тюсонь, куншкасонзо артовкс –  кенерезь товзюронь олгине. Ды сеске прязон чийсь арсема: «Ванта, артыцяськак чарькодизе сень, мезенть П. Ключагин лови эрямосонть весемеде питнеекс. Кенерезь товзюронь олгось – те кши».

Кшись, ансяк сон, весементь лангсо прявт. Тень Петя Ключагин чарькодизе вишка пингстэ саезь. Чачсь сон 1936 иень июнень 18-це чистэ Мордовиянь Отяжеле ёнксонь Кулязбуе велесэ сокицянь-видицянь семиясо. Эйкакшпингезэ савсь стакадояк стака шкантень, зярдо моданок лангсо зэрнесь сюдозь-азозь войнась. Тетязо, Андрей Сергеевич Ключагин, войнань васенце читнестэ уш тусь ятонть каршо тюреме. Ды сынь колмонест – вейкесь омбоцеде вишкине – Акулина Фёдоровна  аваст марто кадовсть ськамост. Кода се шкастонть велень лия ломантнеяк, сыненст савсь ютамс весе сеть стакачитнень ды майсематнень пачк, конатнень эсензэ марто кандынзе войнась. Пельсвачо, пельсштапо эйкакшпингесь сонзэ туртов эрямонзо перть кадови стака онокс, ды сондензэ ледстнематне зярдояк а нардавить пря удемстэнзэ.

Эйкакшпингень стака шкатненень писателесь мейле алты аволь вейке произведения. «Ожо цецядо» башка, те – «Апак прядо моро», «Цярахман», «Нумолкай», «Горець», «Кеж», «Аниська» ды ламо лият. Эйсэст се, мезенть савсь цидярдомс эстензэ писателентень. Седей ризкстэ ды оймень сэредькстэ пештязь «Аниська» ёвтнемазояк. Эйсэнзэ невтезь ломантнень майсемаст войнань иетнестэ. Фронтсо ятонть каршо тюремстэ ломантне чавовсть, тылсэ – кулсесть вачодо.

Неть произведениятне войнань шкань весе эйкакштнень пельде, кинень сатотсь войнасо киртазь эйкакшпинге, кинень тунь эзь саво улемс вишкинекс ды содамс, мезе истямось эрямонь кенярксось, мезе истямось тетянь ёжонь лембесь. Ды весе сынь («сехте виев новелланзо, ёвтнеманзо, стихензэ, статьянзо, конат сёрмадозь ламо иень перть») совасть од книгантеньгак.  «Сынст эйсэ авторось кепеди неень шкань сехте талновтыця тематнень. Шны мазычинть, видечинть, парочинть, сялды эрямонь берянь ёнкстнэнь – манчеманть, саламонть, пайстомо ломантнень покордамонть», – неть валтнэнь эйстэ уш, конат максозь книганть ушодкссо, ловныцясь карми чарькодеме, мезесь ашти васенце таркасо Ключагинэнь сёрмадомань шкинемасонзо. Сон эрямонзо перть тюрсь ды тюри авидечинть каршо, сялды сетнень, кить манчить, салыть, ветить пряст эйсэ амазыйстэ, вечкить «чапамодо» копорямо. Обуцянь те ёнксось сонзэ эйсэ ков ие яла виензась ды кемекстась, мезесь лездась а кадомс сёрмадома тевенть. Куш истят бажамот вельмекшнесть сонзэ превсэ-седейсэ. Ды аволь вестькак.

Ды вана сёрмадовкстнэ, конатнень П.Ключагин кенерсь ливтемс конёв лангс, ней пурназь вейке пусмос. Паро се, авторось сынст явинзе, истя мерьсынек, кувтёлонь кувтёл. Седе икеле сёрмадозь ёвтнематне (сындест 25) молить васенцекс. Кувтёлонть лемезэ «Эрямонь вайгельпеть».  Статьятнень, ледстнематнень, арсематнень совавтынзе «Лейпрясто-Суралеев» кувтёлонтень. Седе тов туить валморотне. Сындест пурнавсть 20. Бульчом, валморокс ладить ловомс лирикань миниатюратненьгак, конат совасть «Цюцевнеть» кувтёлонтень. Тосо эрьва произведениясь («Чахра», «Тарад ды цёков», «Чачома», «Пиже озяз», «Килейтенсть») канды пек домка смусть, кармавты арсеме, мезе истямо эрямось, кодамо тарка эйсэнзэ максови эрьва тикшинентень, чувтынентень, нармунентень, ломанентень. Эрямосонть арасть лишной ломанть, арасть а эрявикс раськеть. Сынь весе питнейть, весе эрявикст. Теке марто пшти сардокс стякшны кевкстемась: мекс минек, эрзятнень, эйсэ, допрок кулось эсь раськентень, тиринь келентень вечкемань ёжось («Эрзянь кель», «Лемтеме чувто»).

«Кедькоморсо мазый кевнеть» – истя авторось лемдизе кувтёлонть, ков совасть нурькине валморынеть. Сынст эйсэ кавто-ниле валрисьмесэ невтеви пертьпельксэнть мазычизэ. Ловныцянть туртов лезэкс карми ледстямс нармунтнень, ракшатнень лемест, конатнень ламот стувтызь. Саемс, мезе истямось катарлась (руз. боярышник), нерьгазось (руз. барсук), кажварчось (руз. хомяк), псакань прякась (руз. бессмертник), пакся тастась (руз. стрекоза), ды истят валтнэде пек ламо. Паро улевель, неть валморынетнень нолдамс башка книгас.

Комсь ёвтнематнень, конат лия книгатнесэ лиснесть эрзякс, П.Ключагин сайсь мель максомс рузонь кельсэ. Арсян, те виде. Кадык рузонь ломантнеяк теевить содавиксэкс сонзэ творчестванзо марто.

Нама, те книгантень совасть аволь весе произведениянзо. Содан, П.Ключагинэнь валморонзо ды ёвтнеманзо  ков седе ламо. Сынст юткс лади совавтомс фельетононзо ды мизолксонзояк. Сындесткак пурнавить байтяк. Арсян, учови тенек шкась, зярдо лиси П.Ключагинэнь од, седеяк покш книгазо.

А кода а ёвтамс седе: сёрмадомадо башка П.Ключагин пек ламо тейсь мокшэрзянь филологиянь науканть туртов. Аспирантуранть прядомадо мейле, 1983 иестэ, идизе кандидатонь диссертациянзо, конась алтазь Мордовиянь периодической печатенть ды литературанть чачомантень ды касомантень. Лемекскак саезь секесь: «Мордовиянь периодической печатесь ды литературась (1917-1941)».

П.А.Ключагин, кода Н.П. Огарёв лемсэ МГУ-нь журналистикань кафедрань доцент, ламо иеть макссь од ломанень тонавтомантень. Сови Россиянь Писателень союзс (1991 иестэ саезь). Мокшэрзянь литературанть ды науканть туртов покш путовксонзо кисэ П.А.Ключагиннэнь максозь «Мордовиянь культурань заслуженной роботник» лемесь (1994 ие), казезь СССР-нь Министрань Советсэ Печатень коряс комитетэнь «Отличник печати» значоксо.

П.А.Ключагинэнь произведениянзо зярдояк а ёмавтсызь эрявиксчист ды питнейчист. Сонзэ книгатне лездыть ванськавтомс эрямонок весе кеженть ды апаронть эйстэ, валдомгавтомс ломантнень оймест. Арсетяно тензэ од изнявкст, творчествасо келей ды кувака ки, од ды маней васолкст.

Раиса Щанкина

 

 

Новости

Повышение уровня занятости на селе – один из приоритетов «Единой России»
На XVIII Съезде «Единая Россия» предложила дать возможность расширения
рынков сбыта для личных подсобных хозяйств (ЛПХ).
 В рамках обсуждения на дискуссионной площадке XVIII Съезда Партии, 
посвященной вопросам сельского хозяйства, было предложено дать 
возможность применения добровольной патентной системы 
налогообложения для крупных личных подсобных хозяйств (ЛПХ). Тех, что 
намеренны выйти на более широкие рынки сбыта, нежели фермерские 
ярмарки.  «Но для этого им сейчас нужно оформляться в качестве 
фермерского хозяйства или индивидуального предпринимателя. Это уже 
другая отчетность и налогообложение.  подача деклараций и заполнение 
нескольких видов отчетностей. Мы предлагаем дать  возможность 
владельцам ЛПХ, которые этого захотят, приобрести патент. Если у вас есть 
личное подсобное хозяйство, вы реализуете излишки, и не планируете 
выходить на уровень более широкой торговой деятельности, то и 
приобретать патент не нужно», - пояснил заместитель Председателя
Госдумы, руководитель фракции «Единая Россия» Сергей Неверов.
Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...