Рубрикатор

Культура Вечкемадо история
Вечкемадо история

Те эрямонь историянть коряс пароль бу снимамс цела сериал ды лемдемс «Вечкемадо история». Ансяк  кинот  минь а снимсетяно, ялатеке бажатано, кода машттано, невтемс тенк газетань лопатнень лангсо зярыя ломанень уцяскань пелькст, конатне сюлмавсть вейс ды тейсть вейке покш семия. Эйсэнзэ тынь несынк аволь ансяк геройтнень вейкест-вейкест вечкеманть, истя жо ризнэма ды талнома эрьванть эсензэ тиринь ёнксонть, масторонть, тиринь раськенть кисэ. Ули меленк содамс седе ламо? Сестэ, ялгат, озадо чевте таркинес, саеде кедезэнк тантей прякине марто чай ды ушододо ловномо…

 

Васенце сериясь.

Вастовома

Ютазь пингень 70-це иетнестэ Покш Игнатбуень Ташто Чамза эрзянь велентень састь важодеме Грузиянь Хечили велестэ зярыя осетинт: мазыйть, сэрейть, кортакшовт. Сынь весе ульнесть вейкест-вейкест марто роднякс-раськекс. Седе сыретне саизь мартост цёраст, лелятне – ялаксост. Ледстнетядо, нать, сеть шкатнестэ ламот покш колхозтнэ тердильть кудонь, фермань, утомонь строямо кедьчелькев ломанть лембе ёнкстнэстэ. Истя тейсть «8 Марта» Ташто Чамзань велень колхозонь прявттнэяк. Од строицятне эрясть, кода мерить, велень хозяйствань предприятиянть квартирасо ды важодемадо мейле бажасть кизэнь лембе чокшнетнестэ якамс клубов. Тосо невтсть Индиянь кинот ды ютавтневсть дискотекат. Осетинтнэнь лангс сельмест кайсесть весе велень од тейтертне, Чамзань цёратнень жо пеест чикордсть – секень вант, весе вадринькатнень манясызь. Минек героентень Валериан Макиевнень истя жо вечкевсь вейке тейтерька – Надежда Сундукова. 17 иесэ тейтересь ансяк прядызе школанзо, вечкиль морсеме ды пеедькшнеме, ансяк вана Валерианонь малав эзь нолда. Ракси-теи вейсэнь компаниясо ды оргоди кудов. Надянь тандавтсть осетинэнть иензэ, марявсь сырекс уш (кадык цёрантень ульнесть ансяк 24 иеть) ды аволь эсензэ раськень ломанеськак марявсь лия планетасто сазекс. Валериан жо чарькодсь сеске,  Надя эрзянь тейтересь – те сонзэ уцясказо, ды нолдамс те «морыця нармушканть» мелезэ арасель. Секскак шкань апак таргсе пурнась лелянзо-ялаксонзо марто Надеждань чиямо. Састь, нама, цярка марто, мейсэ пек солавтызь тейтеренть тетянзо Захаронь седеензэ. Тонась гармошкаяк таргась, Надя жо яла пеедькшнесь ды согласия эзь максо. Чокшнес эйсэнзэ Валериан кортавтсь, ды, окойники, маризе «лисян экшезэть» пек учовиця валрисьменть. Теке кизэстэнть од ломантне налксесть Ташто Чамзасо свадьба, ды мирдть-нить сёксня тусть Грузияв. Од роднятне Надеждань васня вастызь коня алга, пек уш сон эзь моле раужо рунго осетинкатнень ёнов: ашо черь, ёлганя, овсе вишка эйкакш, кодамо эйстэнзэ урьва. Ансяк одирьвась курок солавтынзе весень седеест: ульнесь Надюша кортыцякс, важодицякс, кунсолыцякс. Обуцязо пек шождаль, ды шкань ютазь Валерианонь тетязо-авазо лемдилизь урьванть «минек тейтерекс». Тенень лездась од куляськак – Надя пекиясь. Стакасто кандсь васенце эйдиненть. Велинесь, козонь ускизе мирдезэ, аштесь покш пандопрясо, тосо лексемскак ульнесь стака, коштось теке ловсоль, ды весе тевтнень савкшнось теемс кудоюткова  кедьвийсэ. Пекень кандомась эзь олякстомто важодемадонть: Надежда муськсь понкст-панарт кельме пандонь лейсэнть, томбась пильгесэнзэ виноградт, судонь пекстазь совсесь кевень мацтс винань таргамо. Весть истя совась, ансяк лекстясь, сеске прась винань кошттонть ёжовтомо. Вадря, парыязо вакссонзо ульнесь, куроксто таргизе.

 

Омбоце сериясь.

Альбина

Иень ютазь чачсь Альбина. Кото иес тейтерькась кортась ансяк осетинэнь кельсэ, мейле авазо кармась тонавтомо рузонсентеньгак. Альбинанень мекс-бути эзь ладя тосонь климатось, сеедьстэ сэредсь, ды тетясь-авась сайсть мель велявтомс Мордовияв, паряк, тосо лотки майсеме седейпелькскест. Валерианонь туртов, нама, туемась ульнесь пек стака арсемакс – пек вечкилизе сон тиринь ёнксонзо. Надежда жо истя тошнакадокшнось тетянзо-аванзо кисэ, што салавине, прянь апак невте, морсесь ды ловнось читнень туемантень. Алкукскак, Альбинань ёжозо Ташто Чамзасо паролгадсь, теке мезеяк мартонзо арасельгак: чийниль ульцява, налксиль, весе марто теевсь ялгакс ды кавтошка ковс тонавтнизе эрзянь келенть. Нина сырькаезэ яла пейдиль: «Вантака, кода кирнявтни минек вере пандонь сеинесь!» Альбина сонзэ ульнесь омбоце нуцькинезэ, ды бабась певтеме вечкилизе, кода Альбинаяк сонзэ. Ниле иесэ тейтерькась зярс-бути эрясь велесэ бабанзо кедьсэ (ильтякшнызь Грузиясто шумбрачинь паролгавтомо) ды мейле туемстэ истямо «концерт» невтекшнесь весенень: арасель мелезэ туемс сырькаенть эйстэ, натой савкшнось бабантькак Грузияв саемс, ансяк бу оймаволь.

Альбина Макиева Ташто Чамзасо тусь тонавтнеме васенце классос. Тейтерькась сеске невтизе эсензэ обуцянзо: киненьгак пря эзь максо, свал ульнесь икелев молицякс ды весень мельганзо ветицякс. Пек «псить» ульнесть кавто раськень вертне: осетинэнть ды эрзянь аванть. Те пси вересь эзь максо удомс осетинэнть туртовгак, тердсь Валерианонь тиринь ёнксов, кода кортыть, исторической масторов – Северной Осетияв.

 

Колмоце сериясь. Кудов велявтома ды тосто оргодема

Макиевтне эрясть Ташто Чамзасо ниле иеть. Се шкантень сынст уш чачсть эште кавто цёрынест: Саша ды Вова. Надеждань кортамотнень-энялдоматнень лангс апак вано, Валериан сайсь мель туемс Северной Осетиянь Моздоконь райононь Виноградное велев, козонь уш велявтокшность Грузиясто сонзэ лелянзо-ялаксонзо ды ялганзо-оянзо. Курмонь-кармонь пурназь, семиясь таго сыргась килангов. Виноградное велесь ульнесь содавикс весе СССР-нть келес, тосонь совхозсонть кастсть тёжадо ламо гектарт виноградникть ды маласо заводтнэсэ тейсть Кавказонь алкуксонь винат. Валериан мусь тосто паро важодема тарка, Надежда трясь-кастсь эйкакшт. Ютасть зярыя иеть. Валерианонь тетязояк-авазояк састь эрямо Северной Осетияв, ансяк Владикавказ ошонть малав, Змейская станицав. Макиевгак арсесь самс роднянзо-раськензэ малас ды таго семиянек сынь тусть од таркав. Альбинанень сестэ топодекшнесть кеветее иеть. Тейтересь венстизе сэрензэ, панжовсь, теке мазый цеця, каштан корось седеяк те шкастонть кассь. Од таркасонть мазый тейтерьканть сеске редизь, ды школадо мейле цёрынетне тюрезь-тюрсть: кие течи моли ильтямонзо. Тетязо жо пек ванстсь тейтеренть ды чинь-чоп пансесь «алужтнень» крыльця пестэ. Од цёрынетне, нама, эзть талновто эйсэнзэ, мольсть кортамот лиядо, келя, Альбинань арсить саламс. Салазь тейтеренть жо одов осетинэнь семиясь а сайсы, коень коряс, саволь кадовомс тоско. Теде пельсть Альбинаяк, тетязояк. Лисемс а вечкевикс цёранень 15 иесэ тейтеренть мелезэ овсе арасель. Кемемс власттнень лангс, паряк, сынь идетядызь, ютазь пингень 90-це иетнестэ Кавказсо ульнесь ракамонь тевекс. Тосо ушодовкшность вейкень-вейкень ютксо сёвноматне ды тюрематне. Валериан Надежда марто арсесть ильтямс вейкине тейтерест таго Мордовияв, кадык эри васоло, ялатеке ули шумбра ды уцяскав.

11-це классо Альбина Макиева сась тонавтнеме Покш Игнатовань райононь Андрелев. Эсест Ташто Чамзасо школась ульнесь ансяк начальной. Тесэ Альбинань учость лия мелявкст, киненьгак а вечкеви, зярдо классонтень сы од, мазый тейтерька ды карми прянь покшкавтнеме. Секскак стакаль мартост ладямс. Альбина те шкас ледстни Осетиянь ялганзо-оянзо, школасо тонавтнема шканть, ды пек паро, ней ули Интернетэсь ды социальной сеттне, конатнень вельде тейтересь шкань ютазь муинзе весе од порань ялгинензэ. Сынст марто Альбина арсекшнесь туемс тонавтнеме Владикавказонь культурань институтов, ансяк лиссь лиякс. Ялатеке Мордовиясояк сон теке меленть эзизе кадо ды школань прядомадо мейле «пель осетинкась-пель эрзянкась» максынзе документэнзэ Саранскоень культурань ды искусствань колледжев ды  саезель тонавтнеме режиссёрокс.

Кенярксов кулянть тешкстамо Ташто Чамзав састь тетязо-авазо ды ялаксонзо. Недлясь ютась теке вейке чи, валске рана Макиевтне сыргсесть мекев поездсэ кудов. Седеесь талнось. Телевизорсто марясть берянь куля: Северной Осетиясо ушодовсь покш конфликт ингуштнень марто, республикасонть яволявтозель чрезвычайной положения. Нама, неть тюрематне-сёвноматне, вейке-вейкень марто аладямотне ушодовсть аволь ве чистэ, ансяк кода-бути те шкантень кирдевсь берякшке ялгаксчи. Ней жо, кода кортыть, весе лондадсь.

Валериан куватьс апак арсе, ёвтызе мелензэ: кудов сон сырги ськамонзо, мисы квартиранть, курмотнень-кармотнень ды велявты Ташто Чамзав, конась ламо иень перть уш теевсь сынст семиянть ванстыця ды стака шкасто эждиця ёнксокс. Надежда Захаровнань саизь скалонь потявтыцякс фермав, ды колхозось сеске макссь тенст эрямо тарка. Валериан Владимирович Макиев кармась роботамо колхозсо строицякс.

 

Нилеце сериясь.

Койтнень-кирдатнень ванстомась

Макиевтнень кудокенкшест свал панжадольть инжетненень. Валериан Владимирович, осетинэнь койтнень коряс, кудозонзо совицянть а кадылизе каванямкавтомо. А уш Джеоргуыба раськень кенярксчистэнть свал пидиль сывель, таргиль эсензэ кедьсэ теезь вина ды тердиль тешкстамо шабранзо ды ялганзо-оянзо. Кирдиль сон ялгаксчить Мордовиянь лия осетинтнэнь мартояк, сеедьстэ яксиль мартост вастневеме Саранскоев. Те кенярксчистэнть слававиль Уастырджи осетинэнь пазось, конась ульнесь пек вечкевикс кезэрень осетинтнэнь ютксо, максыль лезкс цёратненень, васоло килангов сыргицятненень, кажовтненень ды сэредицятненень.  Сонзэ тешкстамо ковонтькак те раськесь лемдизе «Джеоргуыбайы май» – Джеоргуыбань ковокс. Кенярксчись моли цела недля, ды се читнестэ весе осетинтнэ озныть ды бажить ёвтамс сюкпрянь валт Уастырджи пазонтень. Сеедьстэ сон пры ноябрянь меельце читнес. Осетиясо весе бажить печкемс букат, Валериан Владимирович жо специальна кастыль ды печкиль покш саразт. Те недлястонть эзь мереве ярсамс тувонь сывельде ды пазонтеньгак жертва истямо сывельсэ а кандовиль. Надежда Захаровнань тевезэ жо се кенярксчистэнть ульнесь панемс осетинэнь прякат эрьва кодамо топо марто. Картофджинэсь – те модамарень пряка. Хабизджинэнть потс каяви осетинэнь сыра, фыдджинэсь паневи керсезь сывель марто. Надежда Захаровна васняяк паниль Уастырджи пазонть лемс. Кие некшнесь осетинэнь прякат, содыть, сынь кругловойть ды лововить чипаень (менелень), пазонь ды модань тешксэкс. Секскак прякатнеде улест колмо, сынь ладсевить вейкест-вейкест лангс, седе истя кирдеви лембечист. Бути прякатне паневить ломанень калмамсто эли ледстнема чистэ, сестэ эйстэст улест кавто, эдь чипаенть уш сон а несы.  Кавто прякат ней панси Надежда Захаровнаяк, эдь зярыя иеде теде икеле сон калмизе Валериан Владимировичень. Меельце энялдомазо сонзэ ульнесь пачкодемс куломадонзо мейле тиринь ёнксов – Северной Осетияв. Низэ ды эйкакшонзо топавтызь сонзэ мелензэ.

 

Ветеце

сериясь.

Тиринь

кавто ёнкст

Велявттано мекев ютазь пингень 90-це иетнес. Альбина прядызе культурань ды искусствань колледженть ды велявтсь мекев эсензэ велев. Роботамо тарка тензэ лиссь специальностензэ коряс Покш Игнатовань райононь Культурань кудосто, ансяк тов ардтнемс савсь а куватьс. Лиссь мирденень эсензэ велень эрзянь цёрань экшс, чачтсь кавто тейтерькат-кавтаськеть: Янань ды Дианань. 2006 иестэ Ташто Чамзас строязель Оймсемань ды культурань од куншкакуро, ды Макиева (ней уж мирдензэ коряс Фролова) кармась тосо роботамо художественной прявтокс. Те таркасонть Альбина Валериановна важоди течинь чис. Весе мероприятиятне велесэнть анокставить сонзэ сценарийтнень ды пшти вановтонзо ало. А мезть кортамс, Ташто Чамзань клубось районсонть сехте вадрятнень ютксо. Кодат ансяк кенярксчить сынь а ютавтнить, велень эрицятне тесэ кольневтезь теньсэ. Вечкить сынь клубов якамо, кодамояк Интернет ды телевизор сонзэ а полавтсы. Чарькодеви, мекс? Кенярксчитнень анокстыцятне тесэ бажить сынст ютавтомс седейшкава, оймень путозь, костояк истят сценарийть тынь а нетядо – те «эксклюзив». Альбина Валериановнанень теньсэ сеедьстэ лезды ялаксозо, Валентина Владимировна Дыдыкина, конась Саранскойстэ сакшны эрьва покш чистэ, ды весе содыть, Алят-Валят бути вейсэндясть – Од иесь, Мастясь, Троицясь удалыть. А кодат спектаклят невтить Ташто Чамзасо – пекеть кундасак ракамодонть. Тедеде ютась «Весе эрямось – театра» райононь конкурс, тосо Ташто Чамзань актёртнэ невтсть «Любовь и голуби» содавикс фильмастонть пелькс, зярдо Раиса Захаровна сась Надюханень инжекс. Раиса Захаровнань роленть налксизе Альбина Фролова, Надюхань – Наталья Зайкина, ды сынь сайсть васенце тарка районсонть! А стяко Альбина Валериановнань фотографиязо ламо иеть аштесь райононь Почетонь лазсонть «Лучший по профессии» лементь ало, ды тедеде тензэ сонсь Мордовиянь Прявтось макссь Благодарность!

Вейкеяк райононь чи, Велень озкс, Раськень озкс а ютнить Ташто Чамзань культурань куншкакуронь аватневтеме ды сынст худруконть Альбина Фроловавтомо. Сынст велень палаткантень, косо покш читнестэ аватне невтнить эсест кедьсэ теезь паневкстнэнь-пидевкстнэнь, салтовкстнэнь-касовкстнэнь, а ютават, а эцеват. Эрзянь оршамопельсэ наряжазь Альбина Валериановна кецни весе сыцятненень. Весе бажить варчамс Альбинань кедьсэ панезь Осетиянь прякатнень, чебуректнень, хычинтнэнь, пидезь сыранть ды лия, минек эрзянь ёнкссо а вастневиця, каванямкатнень. Ламот снартнить неть прякатнесэ дивавтомс, ансяк истят тантейть, кода Альбинань, киньгак а лисить. Фролова а кекшни рецепттнэнь, а кирди салавачи, ялатеке сынст панемстэ теке сонсь осетинэнь Уастырджи пазось тензэ лезды. Аванзояк ней уш истят вадрят а лиснить, кода Альбинань. Паряк, алкукскак, ёвты чапаксонь теемстэ кодаткак, эстензэ ансяк содавикс, валт-озномат? Альбина монь кевкстемам лангсо пейди, келя, кодаткак раськень озномат а соды, сон православной ломанесь, якси церьковав. Ялатеке, штобу ярсамопелесь удалаволь, крёстасыяк, Уастырджи пазонть  кедьстэяк лезкс веши. Нама, рузкс, эдь сон ней уш стувтызе осетинэнь келенть, кудосо корты ансяк эрзякс, веёнга якамсто – рузонь кельсэ. Ялатеке осетинэнь келесь эри верьсэнзэ ды сеске ледстяви, зярдо Аля пачкоди инжекс Осетияв. Кортамс сонензэ стака, а вана чарькодемс роднянзо-раськензэ мелявкст арасть. Ансяк чуросто истят вастовомат эрсить. Меельцесь ульнесь ветешка иеде теде икеле, ды тосто Альбина усксь а ёвтавикс ды а стувтовикс ледстнемат: неинзе меельцеде сырькаензэ ды покштянзо, тетянзо лелянзо, эсензэ сазоронзо ды весе покш роднянзо-раськензэ. Ульнесь Альбина Северной Осетиянь Беслан ошсонтькак, косо террористтнэ маштызь 314 эрицятнень, юткстост 186 эйкакштнень. Те стакадояк стака кажось кадови весе осетинецтнэнь седейс пингеде-пингес.

Альбина, ледстнематнеде башка, усксь тосто ламо рецептт, Осетиянь патянзо пельде казнеть ды салаваксчить: кода пидемс алкуксонь сыра, панемс прякат, теемс виноградонь ды ягодань настойкат ды винат. Мезень кувалма янкси Альбина – эзь уско тосто осетинкань оршамопельть. Ставтомс эстензэ платия ды пряс путомка ней сонзэ васенце мелезэ. Эште вейке покш мелезэ – пурнамс кавто ёндонь роднятнень-раськетнень вейс, эдь сон пек вечксынзе кода тетянзо ёндотнень, истя аванзосетненьгак. «Монь роднятнень-раськетнень, осетинтнэнь ды эрзятнень, ули вейке паро тешксэст: сынь весе пек вейке-вейкень вечкицят, стака шкасто лездыцят, кезэрень ундоксост а стувтницят. Бажан монгак истямокс улемс. Мордовиясо эрямстояк арсян ванстомс тетянь ёнксонь койтнень-кирдатнень, бажан теемс кудом ялаксом марто вастневема таркакс, эдь мон сехте покш семиясонть, монь лангс кемемаськак. Паряк, мелем – вейсэндямс кавто ёндонь раськетнень – топавтови, зярдо тейтерень макссынь мирденень ды весе сыть свадьбас. Ансяк сынь монь эште васенце курсонь студенткат, мирденень лисемадо тенст рана арсемс. Тедеде сынь ушодызь тонавтнемаст Саранскоень кулинарной техникумсо, кармить пидицякс-паницякс ды, арсян, кавто раськень коень-кирдань ванстыцякс ды поладыцякс».

Альбина Фроловань сеедьстэ кевкстнить: кодамо раськень ломанекс тон ловат эсь прят, эрзявакс эли осетинкакс? Сонензэ а максови виде каршо вал. «Тетянень улевель мельспаро, бути мон ёвтавлия прям осетинкакс. Седе одсто ловилия прям ванькс осетинкакс, ней жо, Мордовиясо эрязь ды эрзянь кельсэ кортазь, чарькодян, эрзянь раськень верденть эйсэнь истя жо пек ламо. Кодаяк прям а явови вейке пельксэв, бути эзган чуди кавто ине раськень верь!»

Марина Девятова

 

Новости

Повышение уровня занятости на селе – один из приоритетов «Единой России»
На XVIII Съезде «Единая Россия» предложила дать возможность расширения
рынков сбыта для личных подсобных хозяйств (ЛПХ).
 В рамках обсуждения на дискуссионной площадке XVIII Съезда Партии, 
посвященной вопросам сельского хозяйства, было предложено дать 
возможность применения добровольной патентной системы 
налогообложения для крупных личных подсобных хозяйств (ЛПХ). Тех, что 
намеренны выйти на более широкие рынки сбыта, нежели фермерские 
ярмарки.  «Но для этого им сейчас нужно оформляться в качестве 
фермерского хозяйства или индивидуального предпринимателя. Это уже 
другая отчетность и налогообложение.  подача деклараций и заполнение 
нескольких видов отчетностей. Мы предлагаем дать  возможность 
владельцам ЛПХ, которые этого захотят, приобрести патент. Если у вас есть 
личное подсобное хозяйство, вы реализуете излишки, и не планируете 
выходить на уровень более широкой торговой деятельности, то и 
приобретать патент не нужно», - пояснил заместитель Председателя
Госдумы, руководитель фракции «Единая Россия» Сергей Неверов.
Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...