Рубрикатор

Культура Мордовиянь заповедниксэ ютась «Пятнистый фест» фестиваль
Мордовиянь заповедниксэ ютась «Пятнистый фест» фестиваль

Сентябрянь 8-це чистэ П.Г.Смидович лемсэ Мордовиянь заповедниксэ ютась «Пятнистый фест» гастрономической колмоце фестивалесь. Тёжа ломанть пурнавкшность Темникова ёнксонь Пушта посёлкасо. Коень коряс, тей тердезельть инжеть лия регионсто: сакшность «Чёрные земли» Калмыкиянь, Воронежский ды Хопёрский Воронеж ёнксонь, «Волжско-Камской» Татарстанонь, «Воронинской» Тамбов ёнксонь заповедникстэ. Эрьвась анокстась ярсамопелень выставкат.

Фестиваленть панжомсто лембе валт ёвтасть «Заповедная Мордовия» вейсэндявксонь прявтось А.Б.Ручин, РФ-нь Госдумань депутатось С.В.Чиндяскин, Темниковань райононь прявтось С.Н.Кизим ды лият.

Сцена лангсто гайгсть заповедникень ды фестивалень гимнатне. Кодамо покшчи моровтомо? Чинь перть тесэ морасть Ширингушинь школань-интернатонь тонавтницятне, Темниковань искусствань школань эйкакштне, Темникова ёнксонь артисттнэ. Аволь васенце ие фестивалев сакшны «Казачьи зори» Рузаевкань вокальной ансамблясь. Ламонень вечкеви сынст творчестваст. Истя жо тесэ морась «Морденс» национальной оркестрась, «Alma Mira» группась ды «Letto music band» ВИА-сь.

Ули меленек содавтомс тынк фестивалень инжетнень марто. Тамбов ёнксонь «Воронинской» государственной пертьпельксэнь заповедникесь панжовсь 1994 иестэ. Сонзэ трокс чуди Ворона леесь, истя жо улить Рамза ды Кипец эрькть. Заповедниксэнть касыть черешчатой тумот, ули калень роща, конанень сядо иеть. Мазый таркакс лововить Барской пандось ды Бобровской утёсось.

Воронеж ёнксонь «Хопёрской» заповедниксэнть малав 400 эрькть. Касыть 1200 эрьва кодат тикшеть. Вирьсэнть эрить идем ракшат: сярдот, косулят, пятнистой оленть, идем тувот, верьгизт, ривезть, барсукт. Ды натой рузонь выхухоль, кона совавтозь РФ-нь Якстере книгас. Заповедниксэнть вастовить нармунень 236 видт. 23 видтнэ совавтозь Якстере книгас, истятнэ, кода орлан-белохвост, сапсан, скопа, беркут, могильник, дрофа ды стрепет.

Татарстанонь Волжско-Камской заповедникесь ашти кавто пельксстэ: Раифской ды Саралинской. Сон панжовсь 1960 иестэ. Тесэ ванстыть лия ёнов а молиця природной ландшафтонть. Раифской участкасонть – умонь вирь, сон ловови Европасо сехте ташто вирекс. Сонзэ эштё лемдить панжадо менель ало вирень музеекс. Саралинской таркась ашти Равонть ды Каманть вейс прамосо, тосо кода вирь, истя жо Куйбышевань водохранилищась. Самай неть таркатнесэ вастневи орлан-белохвост нармунесь, кона совавтозь Раськеютконь Якстере книгас. Заповедникень инжетне невтизь фестивальсэнть татаронь раськень ярсамопельтнень.

«Чёрные земли» Калмыкиянь заповедникесь теевсь 1990 иестэ. Тесэ ваныть, кода ванстомс чуросто вастневиця ракшатнень ды нармунтнень. Инжетне пачтясть калмыкень ярсамопельтнеде. Сынь каванясть махан шелтягандо, ламбамо борцокто, джомба чайде.

Кенярксчисэнть важодсть ламо эрьва кодат таркат: каванясть раськень ярсамопельсэ, Нижней Новгородонь шеф-повартнэ анокстасть лия ёнов а молиця каванявкст, эйкакштнень туртов ютасть мастер-класст, важодсть кедьчелькев ломантнень выставкат. Теде башка, инжетнень тердсть пертьпельксэнь музеев, ютамс «Покштянь-бабань» кинть, варчамс тикшень чайть ды леднемс. Эрявсь эрьва ков кенеремс эли кочкамс сень, мезесь теть седе вечкеви.

Минь паро мельсэ ютынек кедьчелькев ломанень выставкава. Тесэ эсь важодемаст невтсть ды микшнесть кода Мордовиянь мастертнэ, истя жо лия региононь. Вирь ало Тавласто Александр Рябов невтсь чувтосто керсезь налкшкеть, Александр Занкин – гигерьстэ теевкст, Виталий Саранов – гончаронь искусстванть, Олег Буров – бондарень, Сергей Глухов – карть ды ленгестэ теезь ули-парот. Неть ломантне ёвтнесть эсь важодемадост, пачтясть, кода теемс сувенирт. С.Глухов тердсь эйкакштнень налксемс лапотьболсо: те футбол, ансяк пильгсэть карть ды оскаськак ленгень! Мезе парось, фестивальсэнть ульнесть ламо эйкакшт. Сынст туртов панжозельть фотозонат, налксемань кужот, мастер-класст.

Выставкасо-ярмункасо эсь теевксэст невтсть инжеть Нижней ёнкссто: Саровсто, Арзамассто, Вознесенскойстэ, Нижней Новгородсто. Саемга, Анастасия Батракова вети «Шкатулочка» сапонень мастерской. Сон пиди сапонь. Сельметькак а саевить те мазычиденть! Сонзэ сапонтне – цецят, фруктат, ракшат, улить сапонть-прякинеть, сапонть-бутербродт, куярнэть, арбузонь печтть, весе эрьва кодамо тюсонь ды тантей чине марто. А содат, рамамс шлямс эли мазычинь кис кирдемс.

Невтевсть керсемань чувтонь лазнэть, косо мазый, пейдевтиця артовкст ды мельстуиця сёрмадовкст: «Вастомазонок, диета!», «Тантей эрямось рунгонть а полавтсы», «Паро мирденть марто одксчинть а ёмавтсак» ды седе тов. Цёра ломантне чарасть пеельтнень вакссо. Сыньгак теезь кедьвийсэ.

Пек дивавтымизь полимерной сёвоньстэ теезь композициятне. Неть: вазасо цецянь пусмот, цецинеть, брошкат. Кемтядо, сынь теке алкуксонь! Питнест истят – тюльпанонь пусмось – 7 500, овтумарень, розань  тарадкесь – 4000, подснежникень пусминесь – 2000. Казнекс пек парт. Иень перть кармить цветямо. Брошкатне седе рамавить, сынь вишкинеть. Те мазычинть теить Саровонь мастертнэ.

Кинь ульнесь мелезэ, ютасть вирьга «Тропою предков» янганть Новенький кордонов. Ютамс савсь мода велькска теезь чувтонь кива. Тесэ ладсезь озамо таркат ды аштить эрзянь-мокшонь кезэрень пазтнэде стендт. Кордонсо важодсь Стрелецкой слобода, тосо невтевсь оружиянь, доспехень выставка. Каванясть самоварсто тикшень чайде. Эйкакштне капшасть ваномс кардазсо ракшатнень. Седе тов ютамс эрявсь Покш Вальза эрькентень. Весе кись – 2,5 вайгельпеть. «Пятнистый фест» фестивалесь совась «Топ-10 лучших событий России» рейтингентень, конань ютавтызе ТурСтат аналитической агентствась, ванновсть сентябрянь 8-9-це читнестэ ютазь покшчитне.

Т.Маторкина

 

 

 

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...