Рубрикатор

Культура Эрзянь ава – Дивеевасто
Эрзянь ава – Дивеевасто

Дивеева… Пазнэнь ознома, потмоёжонь оймавтома, лезксэнь вешема тарка весе православной ломантнень туртов. Тезэнь эрьва чистэ сыть ды сыть тёжадо ламо паломникть: кие превспутома мельга, кие сюкпрянь ёвтамо Иневанькс Серафим Саровскойнень ды Пазонь Авантень.

 

Татьяна Петровна Климушкина (тейтерькс Девятова) ледстни лия Дивееванть. Зярдо 1981 иестэ сон кучозель тей важодеме, Серафимо-Дивеевской авань монастыренть таркасо аштесть каладозь кудот, храмтнень потс панжозельть складт, эмежень ванстома таркат. Пазонь Авань Ине латкиненть потсо кассть пиципалакст ды кирмалавт.  Ансяк 80-це иетнень прядовомсто монастыренть кармасть витнеме-петнеме­ ды кепедеме верев. Троицкой храмонть прясо васенце крёстось стявтозель 1990 иень тунда. Иень ютазь Дивеевав пачтязельть Саровсто Серафим Саровскоень одс муезь мощанзо. Саровось, эли, кода тензэ эште мерить, Арзамас-16 ошось, пекстазель малав весень туртов. Вакссонзо аштиця Дивеевась жо кармась аволь ансяк преподобной батюшканть мощанзо кирдема таркакс, истя жо ядерной центранть андыцякс-симдицякс. Дивеевань ловсонь комбинатось, конасонть роботась Татьяна Девятова од специалистэсь, топавтсь покш тев: тесэ Саровонь пекстазь учреждениятнень туртов нолдавсь эрьва кодамо продукция ансяк ванькс ловсосто, ды оенть, сыранть, топонть нолдамонь процессэнть мельга пштистэ вансть эрьва ёндо, натой Московстояк. Чарькодеви, кодашка ответственность прась прявт технологонть Татьяна Девятовань лангс, кона сась тей Ульяновск ёнксонь Димитровградонь ловсонь промышленностень механико-технологической техникумонть прядомадо мейле ды сеске аравтозель истямо «вере аштиця» должностес. Кода ледстни Татьяна Петровна, васенце иесь пек стакаль, ансяк аволь сонзэ обуцясо пелемс стакачитнеде ды оргодемс седе шождыне таркав. Лездась эрзянь кеме, назой корось, конась, нать, ютась тензэ тетянзо-аванзо пельде. Чачсь Татьяна Отяжеле ёнксонь Вильдим вишка велинесэнть, конась ней уш умок ёмась масторлангстонть, ансяк, маряви, Татьяна Петровна пек вечкилинзе неть мазый таркатнень ды мейле сеедьстэ, од порасто ардтниль варштамо Вильдим пряв. Девятовтнень семиясь тосто туекшнесь «Сараст» нармунень совхозов, зярдо тейтерькантень топодсть колмо иеть. Те ульнесь 1963 иестэ. Саизь мартост аволь ансяк курмост-кармост – кудосткак. Срубонть зярыя чить усксесть лишмесэ ды одов стявтызь совхозонть куншкакурос. Авазо, Мария Никитична, ды тетязо, Пётр Иванович, кода весе велень эрицятне, эзть пеле важодемадо ды эрямонь перть ульнесть аволь меельце ломанекс. Пётр Иванович ютызе Ине Отечественной войнанть, тюрсь Ленинградонть кисэ, понгонесь тозонь блокадас. Войнадонть мейле кармась роботамо бригадирэкс колхозсо, Мария Никитична нинзэ марто трясть-кастсть кото эйкакшт. Татьянань авазояк коршинзе войнань весе стакачитнень, сон чувсь окопт Сурань рубежсэнть, паксясо лишме мельга сокась модат, видсь сюро, мейле кармась важодеме совхозонь нармунень андомань цехсэнть. Мария Никитична ульнесь авакс, конась кенериль эрьва ков: важодемеяк, пидемеяк-панемеяк, муськемеяк, кизна муиль шка роботадо икеле чиемс вирев ды пурнамс часозонзо ведрашка кстыйть эли лия ягодат. Теде башка, путыль пирес модамарть, кастыль эмежть, кирдиль скал, реветь, вазт. А уш кодат кшить паниль – весе дивсильть! Мария Никитичнанень сонсь совхозонь прявтось кармавтомат максыль: покш прявттнэнь само чинтень панемс зярыя ашо кшить. Васов марявсь мейле каштомсто молиця тантей чинесь.

 Ёжовчинть, мелявкстнэде а пелемань ды сынст чиде-чис изнямонь обуцянть Татьяна Петровна, неяви, саизе аванзо пельде. Тетязо, Пётр Иванович, жо тонавтызе тейтерензэ ды весе лия эйкакшонзо а пелемс тевде ды стяко а аштемс. Весе Девятовтне эйкакшпорасто саезь лездасть тетяст-аваст туртов: кие кудот шли, кие пиресэ, кие мекшт кундси, кие тикше аноксты… Тевтнеде велесэ свал муевить. Лелятне-ялакстнэ тонавтозельть вейкест-вейкест туртов лездамояк. Татьяна жо аволь ансяк роботадо а пелиль, школастояк, ловт, ванькс «вететь» кандтниль. Эрьва иенть прядовомсто кенярдозь ды ванстозь поводиль кудонь шпалертнэнь лангс шнамонь конёвт. Пек вечкевсь тензэ литературась, сочинениятнень сёрмадомась.  Райкомстояк школань прядомадо мейле ильтиксэлизь литературань факультетэв. Ульнесь васняяк Танянь мелезэ тонавтнемс журналисткакс. Ансяк вечкевикс Зина патязо, конань сон лемдсь «кокакс», кортавтызе, келя, конёв ланга сёрмалезь пекеть а пештясак. «Варштак, саемга, шабратне кода эрить, аваст оень заводсо важоди, эйкакштнеяк теке ойнесэ ваднезь, вачот а эрсить».

Истя, Татьяна Девятова васняяк тусь тонавтнеме Димитровградонь ловсонь промышленностень техникумов, колмо иень ютазь од инженерэсь-технологось тосто понгсь Дивеевань ловсонь комбинатов. Тейтерентень сеске макссть общежития, иень ютазь комбинатось явсь Девятованень квартира, эдь должностезэ од специалистэнть кассь производствань коряс прявтонь полавтыцякс.

«Кодамо минек карми эрямонок ды уцясканок, ашти сеньстэяк, кодамо минек обуцянок». Марсиде истямо валмеревкс? Арсян, сон видетнестэ. Татьяна Петровнанень кияк лембе таркине эзь анокста, сон сась Дивеевав эрзянь вишкине велестэ, аволь сюпав, трудицянь семиясто, конань арасельть кодаткак «блатост» эли покш таркасо аштиця родняст-раськест. Эрямонь покш килангов тетязо ильтизе вейке чемоданнэ марто, авазо баславизе крыльця песэ: «Ливтяк, тейтерем, кодамокс карми эрямот – ашти ансяк эсеть эйстэ!» Истя лисськак. Татьяна Петровна сеть аватнеде, конатне сынсь эсь пряст теизь ломанекс, эсест превест, виест вельде. Ловсонь комбинатсонть сон важодсь 18 иеть ды мельспаросо ледстни се шкадонть: «Когда весна придёт, не знаю» («Весна на Заречной улице» фильмась) – монь сехте вечкевикс мором. Маряви, сон теке мондень, од порадон. Ловсонь заводонь проходноесь ливтимим ломань юткс, Дивеевань вейке ульцянть куншкасо мон вастовинь вечкевикс мирдем марто. Эрямонь ким лангс варштазь, свал арсезеван, монень лия уцяска а эряви!»

Кадык Татьяна Петровнань эрямосо аволь свал ульнесть валдо ды маней чить, эрьва мезе савсь печтямс, ялатеке сон эсь прядонзо ёвтнемстэ васняяк бажи ледстямс кенярдовтыця шкатнень. Течинь чис Валя ялаксонзо марто а стувтсызь чинть, зярдо Сергей мирдезэ сакшнось чиямонзо раужо «Волгасо». Неть машинатне сестэ ульнесть ансяк «покш начальстванть». Сергей энялдсь лелянстэнь максомс Мордовияв ардомс кавто «Волгат»: арсесь теньсэ дивавтомс од роднятнень-раськетнень. «Сараст» совхозсо жо те шкане истямо машина ансяк прявтонть ульнесь ды райононь милициянь начальникенть. Зярдо кавто раужо «Волгат» велявтсть кудост ёнов, Мария Никитична, Танянь авазо, тандадомадонть мацтс эцесь, арсесь: апарс састь. Куватьс эйсэнзэ вешнесть. Свадьбадонть мейле ламо пеедькшнесть.  Сергей Иванович мирдензэ марто Татьяна Петровна эри малав 35 иеть. Вейсэ сынь   трясть-кастсть кавто эйкакшт. Екатерина тейтерест ней эри Московсо, сонзэ ули Варвара тейтерьказо ды Арсений цёрынезэ. Илья цёраст зярс служи армиясо. Сон тусь тов эсь мельсэнзэ, кадызе Московсо паро роботамо тарканзо ды ней максы долгонзо тиринь масторонтень.

Ансяк велявттано зярыя иеде теде икелев. Дивеевань ловсонь комбинатось эрясь-аштесь ютазь пингень 90-це иетнес, мейле ушодовсь перестройкась, ловсонть кармасть ускомо пек аламо, заводось кармась каладомо ды ёмавтомо позициянзо. Масторлангсонть зярыя заводт ды фабрикат сестэ пекставсть, комбинатоськак сынст ютксоль. Татьяна Петровна аволь куватьс аштесь роботавтомо, сонзэ сеске тердизь «Дивеевское» нармунень кастомань хозяйствантень. Кода пейди Климушкина, саразтнэ сонзэ а кадныть эрямонзо перть. Васняяк эрясь «Сараст» совхозсо, ней уш малав комсь иеть Дивеевань саразонь предприятиянь коммерческой директор. Те хозяйстванть, прянь апак шна, кепедизе Татьяна Петровна Климушкина вейсэ прявтонть марто. Сонзэ самодо мейле тесэ ушодовсь модернизациясь, одкстомтозельть цехтне, оборудованиясь, предприятиясь ней уш эрьва иестэ невтни продукциянзо «Сырнень сёксь» Весероссиянь выставкасонть ды саи васенце таркат. Алтнэнь весе лемест тесэ арсинзе Татьяна Петровна, «Дивеевань» алонь фабрикань продукциянть свал баславить тосонь батюшкатне. Климушкина кирди сюлмот весе клиенттнэнь марто, сонзэ лемезэ содавикс Нижней Новгородонь бизнесментнэнь ютксо.

Татьяна Петровна роботадонзо башка а стувтни вечкевикс семиядонзо ды кудодонзо, конань сынь строизь вейсэ мирдензэ марто. Те кудось аванзо куломадо мейле ды икелеяк кармась весе роднятнень-раськетнень вастневема таркакс. Вечкить Татьяна Петровнань лелянзо-ялаксонзо,  эйкакшонзо, нуцьканзо ды малавиксэнзэ сакшномс тей инжекс, эдь Климушкина весень бажи вастомс-каванямс ды ильтямс аволь чавонь кедть. Дивавты Татьяна Петровнань пирепотмозо, кодат ансяк чувтот, куракшт, эмежть, тикшеть-люкшат тесэ а касыть. Ды весе сынь тантейть, ламо урожаень максыцят. Татьяна Петровна вечксы садпирензэ. Тесэ сонзэ оймсема тарказо ды инжень каванямо курынезэ. Аволь умок сон эште строясь кудонзо ваксс инжень кудыне, козонь яла сакшныть удомо Дивеевань паломниктне. Ялатеке сехте сеедьстэ тосо удсить роднянзо-раськензэ семиянек. Татьяна Петровнань кенкшензэ, кода седеезэ ды оймезэ, свал панжадот весенень!

Марина Тикшайкина

 

Новости

«Единая Россия» добилась принятия закона о защите животных

Закон о защите животных был принят Государственной Думой 19 декабря через 8 лет с момента внесения. В марте 2011 года он прошел первое чтение. Осенью 2016 года на важность его принятия обратил внимание Президент России и дал соответствующее поручение Правительству РФ.

Подробнее ...
 
Более 1500 заявок подано на участие в учебном модуле Высшей партийной школы «Политический лидер»

За 10 дней с момента старта Высшей партийной школы и первого учебного модуля «Политический лидер» из регионов подано более 1500 заявок на участие. Всего в этом году будет отобрано 150 участников, для которых в Москве пройдет недельное обучение. Об этом заявила первый заместитель секретаря Генерального совета «Единой России» Ольга Баталина.

Подробнее ...
 
Од иень ярмунка

Од иень кенярксчитнеде икеле, ацамковонь 22-це чистэ, Саранскойсэ ютавтови ярмунка, косо кармить микшневеме эрьва кодат товарт ды велень хозяйствань продукция.
Ярмункасонть кармить Мордовиянь микшнемань сферань, общественной питаниянь, перерабатывающей промышленностень ды велень хозяйствань предприятиятне.

Подробнее ...
 
Турчак: Власти компенсируют гражданам затраты на покупку приставок для цифрового ТВ

Правительство РФ и региональные власти предусмотрели исчерпывающий набор компенсирующих мероприятий при переходе с аналогового на цифровое телевещание для малозащищенных слоев населения. Также в региональных бюджетах предусмотрены денежные компенсации или закупка необходимого оборудования. Совет по развитию цифровой экономики при Совете Федерации представит на ПМЭФ-2019 свой рейтинг цифровизации регионов и предложит механизм поддержки лучших региональных практик. Об этом заявил вице-спикер Совета Федерации, секретарь Генерального совета «Единой России» Андрей Турчак по итогам второго заседания Совета по развитию цифровой экономики в Новосибирске.

Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.