Рубрикатор

Культура Вай, тон велине, велинем, кисэть мелявты седеем…
Вай, тон велине, велинем, кисэть мелявты седеем…

Весень, кить чачсть-кассть велесэ, седейс токасызь эрзянь морыцянть Евгений Самаркинэнь моросто валтнэ: «Вай, тон велине, велинем, кисэть мелявты седеем, тесэ ютась монь вишка шкам, жальсимим авам…» Пек паро, бути тиринь велинесь эште эри масторлангсонть, ули ков самс кизна пси ошстонть, оймсевтемс ойменть ды лексемс тантейдеяк тантей кошттонть. Ансяк улить велеть лия уцяска марто, конатнеде кадовсть ансяк ледстнематне, каштом марто трубань таркатне ды пиципалакссо вельтязь ташто кудоюрттнэ. Ды сынь иеде иес седе ламолгадыть.
Чаунза ёнксонь Кульмина (Кульмино) велесь зярс аволь меельцетнень ютксо, кадык 415 иеть топодить тензэ сы иестэ, ялатеке сон эште эри, стамбарнэ, апак капша. Лемензэ сон саизе эрзянь цёранть Кульмань эли Кульнянь эйстэ, конась васенцекс путокшнызе кудонзо Коське Аморда леенть чирес покш виренть алов. Те ташто велесь мейле палсь, ды эрицятне валгсть седе алов, ансяк те шкас тосо вастневить мацттнэ ды кудынетнень аштема таркань тешкстнэ. Кульминасо эрясть ды нейгак эрить эрзянь ломанть, пропискань коряс 300 ломанде ламо, ансяк алкуксонь эрицятнеде эль-эль 200 пурнавить.

 

Ютазь пингенть ушодовомсто тесэнь ломантнеде ульнесть 1,5 тёжадо ламо, панжозель церковно-приходской школа, веленть куншкасо аштесь покш церькова. Советэнь властень шкатнестэ важодсть натой колмо колхозт (перестройканть шкас кадовкшнось вейке), строязель школа, медпункт, почта, велень библиотека, клуб, стявтозель Ине Отечественной войнасо чавовозь солдаттнэнень-воинтнэнень кеврунго. 60-80-це иетнестэ велесэнть чачнесть 25-30 эйкакшт иезэнзэ, класстнэ эль кельгильть школантень.
Ансяк неень шкане, кадовозь инфраструктуранть коряс неяви, тосонь колхозось ульнесь а пек сюпавтнестэ ды секскак, нать, сон ютазь пингень 90-це иетнестэ ёмась. Веленть маласо модатнень эсензэ сёлмо алов саинзе Чаунзань птицефабрикась. Нармунень кастомань комплекстнэ неявить Кульмина веленть ёнов ардомсто. Паро, маласо хоть ули предприятия, конась панжсь важодема таркат. Килангось вадря, асфальтось аволь таштотнестэ. Кенярдозевинек, теньсэ, паряк, Кульминась уцяскав, эдь сеедьстэ китне велетнева авардстемань ды минень-сюнонь ёвтамонь таркат.
Пачкодемстэ сеске рединек, велинесь ёмась пиже чувто потс, сон моли теке ёвксонь тарка ёнов: куншкаванзо чуди шольниця лей, ваксканзо касыть сядо пингень кальть, кудынетнень ули эсест чачост. Ансяк велень администрациянть ваксс пачкодезь, ёвксось прядовсь. Тозонь покш килангстонть малав 300 метрат эряви молемс ялго, вишка яннэва, машинасо бути ансяк коське шкане ардоват. Сонсензэ администрациянть вакска ютамсто зярдояк а арсезеват, тесэ ашти велень прявтось. Ансяк бути Россиянь ды Мордовиянь лыйниця флагтне ёвтыть те ташто, чиремезь кирьпецень кудыненть статусто. Потмозояк умок уш учи витнемат-петнемат. Администрациянть удало ашти седеяк ташто чувтонь кудыне, конась строязель эште 1936 иестэ, ды тесэ, келя, велень Культурань кудось. Неяви, сон стявтомадонзо мейле зярдояк эзь витневе-петневе ды неень шкане сонзэ потс седе пароль панжомс музей ды невтнемс инжетненень, кодат велесэнть ульнесть алкуксонь кезэрень кудынетне. Истя жо вакссонзо пароль снимсемс фильмат ютазь пингетнестэ эрямодонть. Ялатеке, зярс те культурань ды досугонь центра, кадык сонзэ вальматнеяк чавозь лазсо ды тельня эйсэнзэ стядо кельмат.
Велень администрациянь прявтось Надежда Георгиевна Романова, маряви, сонськак визди, зярдо инжетне кармить кевкстнеме велень неть кавто «достопримечательносттнеде». Теке марто зярыя иес велень администрациянтень можналь бу таштамс ярмакт сынст ланга-прява витнемс-петнемс. Ды улевельгак бу тесэ кеме азор, покш предприятия, а кадовлинзе, паряк, сынст. Птицефабриканть туртов жо маласо аштиця велетне ансяк важодема виень эрямо таркат. Ёмить шабра велетне, кармить усксеме робочейть лия ёндо, шабра районтнэстэ. Мелявксось аволь покш. Кульминасто птицефабрикав ды цементэнь заводов роботамо ардтнить велень весе важодиця ломантне. Лиятне умок уш тукшность Саранскоев ды Мордовиянь томбалев. Велесэнть роботыцятнеде зярс ниленьгемень, сыньгак уш аволь одтнэстэ. Од ломантне тесэ куватьс а кирдевить, цють касыть, сеске ношкстыть ошов. Вана кемень иеть топодить, кода школась пекстазель. Мекс пекстазель школась, нама, весенень чарькодеви. Арасть велесэнть од ломанть, а чачить эйкакшт. «Тедедень майстэ, окойники, вейке од эйдине-тейтерька чачсь, – ёвтни велень прявтось. – Истямо кеняркс минек умок арасель. Секскак якинек поздоровонь ёвтамо, раминек казне. Велесэнть, паряк, 10-шка эйкакшт пурнавить, вейксэтне якить школав. Сынст микроавтобуссо усксить Отрадное шабра велев».
Седе сеедьстэ тесэ кенярксчист тешкстыть сырькайтне ды покштятне. Саемс, невтемга, Екатерина Михайловна Худойкинань, конанень сёксня топодить 96 иеть. Иетнень лангс апак вано, сон парсте ледстнесы весе эрямо кинзэ. «Маряви, эрямось ливтясь теке вейке чи, варштан икелев, сядо иетненень аламошка лиядсь, – ёвтни Екатерина Михайловна. – Мон уш аволь эйсэст истя учан. Вана бу правнуком армиясто самонзо учовлия. Улевель тень пек покш кеняркс». Сон мельспаросо ледстни од поранзо, зярдо ушодсь роботамо фельдшерэкс-акушерэкс. Васняяк топавтсь тевсэнзэ шабра Маколова велесэ, ютазь пингень кодгеменце иетнестэ Кульминасояк панжсть медпункт, ды Екатерина Михайловна ушодсь важодеме тиринь велесэ. Сестэ Кульминась покшоль, малав 700 ломанть эрильть, аватнеде пек ламольть, эйкакштнеде чачтыльть аволь вейкень-вейкень. Иезэнзэ Екатерина Михайловнань кедьга ютыльть 26-28 эйкакшт, ловт, цела класс пурнавиль. Е.М.Худойкинань медроботникень стажозо 40 иеде ламо, сон – трудонь ветеран, пенсиясояк улемстэ сон важодсь эште зярыя иеть ды нейгак а ашти тевтеме: шли-муськи эсь мельганзо, штерди ды коды понань цюлкат нуцькатнень ды сынст эйкакштнень туртов, ваны кулят телевизорга. Сон ней эри урьванзо-цёранзо марто, бажи тенст лездамс. Екатерина Михайловнань валонзо коряс, куватьс эрить сетне, кие озадо а ашти. Сонсь Е.М.Худойкина весе эрямонзо перть кирдсь скалт, анокстась тенст тикше, путсь тинге ды пирепотмот. Алкуксонь трудицятнеде, кода Екатерина Михайловна, Кульминасо пек ламо. Тешкстасынек В.И.Худойкинань, В.Я.Лемайкинань, В.Н.Кильдяевень ды ламо лиятнень.
Седе куватьс тесэ эрить сырькайтне ды малав весе эсь превсэст. Цёраломантне симитькак пиже гуйденть седе сеедьстэ, сэредитькак ды кулытькак васенцекс. Секскак велень администрациянть прянь сэредстиця мелявксокс ашти калмазыренть ёнов кинть строямось. Бути кулыця сёксня эли тунда, пандось эль кузеви кандолаз марто, модась пильге алдо уезь уи. Сестэ ансяк тракторось лезды. Тельняяк секе-тев килангонть эряви ванськавтомс, ловонь пандотнева истя жо а ютават. Паро, улить велесэнть ломанть, конатне а стувтнить тиринь велест мелявкстнэде, максыть лезкс валсояк-тевсэяк. Вейкесь эйстэст – почётной гражданинэсь Александр Сергеевич Подсеваткин, конань ламо иеть Кульминань эрицятне ловить эсест нежекс ды кемемакс. Александр Сергеевич ломанесь панжадо седей, эсест мелявксост кувалма сонензэ секе-тев гайневтнить телефонс, кода велень администрациянь роботниктне, истя жо эрицятнеяк. Кие учи пельдензэ превспутомат, кие сонсь максы превть, кие лезкс веши, кие ярмакт – киненьгак а отказы, свал кунсолосынзе ды карми вешнеме мелявксонь витема кить-янт. Лезксэнзэ вельде велень калмолангсонть полавтозель пирявксось, неть читнестэ ушодовсь тов кинть витнемась-петнемась. Муемс неть тевтнень теемс ярмакт пек стака, эдь Мордовиясо ламо истят велеть, кода Кульминась, ды малав весе мелявкстнэ вейкеть. Секскак савсь пшкадемс республикань Прявтонтень В.Д.Волковнень, конась эзинзе кадо эрицятнень лезкстэме.
Се чистэнть, зярдо минь сакшнынек Кульминав, калмазырев ветиця кинть маласо валязельть опокань пандот, тосо роботасть зярыя тракторт: валакавтовсь ды келейгавтовсь кись. Тедедень кизна опокасо вельтясызь велень администрацияв ветиця яннэнтькак. Улить мелявкст лия ульцянь китнень коряскак. Китнеде, нама, а эряви стувтнемс, эдь Кульмина велесь аволь васоло Саранск ошонть эйстэ, ды ламот икелень эрицятнестэ бажить самс пенсияв лисемадо мейле тиринь велев. Улить чаво кудонь рамицятак, мон а меревлинь бу, питнетне тесэ вишкинеть – вешить 400 тёжадо ламо целковойть, ялатеке кевкстницятне ламолгадыть иестэ иес. Кульминасо, ловт, арасть азортомо кудот. Бути тельня аштить чавот, кизна теевить дачакс. Кизэсь, каникулатне ды отпусктне свал седе «вельмевтьсызь» Кульминанть: ульцятнева гайгезевить эйкакшонь вайгельтне, седе сеедьстэ ардтнить машинатне, кудо икелькстнэсэ чокшне ланга пурнавить калярдомо одтнэяк-сыретнеяк, апак капша, пецьк-пецьк ютыть эрькенть ёнов галатне… Велесь теке сыргози. Тельня жо сон теке «удыця мазыйка»: чуросто неят ловонть ланга ломанень пильгечалгавкст, марят кудыкеле лембе кемень чикордома, лавкавгак лотксить яксеме – сынсь весе кши панить. Весе бажить ютавтомс кувака теленть лембе кудосо ды телевизор икеле, стувтовить шабрацек яксемань койтне. Ды а мезть дивсемс, велесэнть сыре ломантнеде малав 80 процентт. Ней кияк уш а кирди скалт, реветь, а зярдо-бути тесэнь скалонь стадасонть лововсть 400 прят.
Кода содатано, велень эрицятнень мелявкстнэде-сэредькстнэде пек ламо, ансяк улить кенярксов тевтькак. Кульмина велень эрзянь ломантне пек чарькодицят, вейкест-вейкест туртов лездыцят, эрить покш ялгаксчисэ. Эрьва тунда веленек ванськавтыть велень калмазыренть, кудо икелькстнэнь. Субботникс лисить весе, кие койме саи, кие трактор, кие шукшонь пурнамс кескавт. Истя мирём теить пек эрявикс тев. Истя жо веленек тесэ тешкставить раськень, православной ды государственной кенярксчитне: Мастясь, Ине Изнямонь чись, Тундонь ильтямось, Троицясь, Сыре ломанень ковось, Вознесениянь престольной праздникесь, конань кувалма службатне ютавтовить тесэнь мазыйдеяк мазый храмсонть. Сон ашти веленть куншкасо, вакссонзо кельме лисьма ды вельтязь купель. Зярыя иеде теде икеле стявтомс эште ютазь пингестэ яжазь церькованть таркас од храм мелесь сась Александр Сергеевич Подсеваткиннэнь, конась топавтызеяк те Пазонь тевенть ды тейсь покш казне весе Пазнэнь кемицятненень ды озныцятненень.
Вознесениянь храмонть вакссо эште покш чаво тарка, тозонь бу пек ладяволь строямс социальной центра, конатне ней панжовить минек республикань велетнева. Тозонь вейс пурнавольть Кульмина велень поселениянь весе учреждениятне: библиотекась, медпунктось, велень администрациясь ды Культурань кудось. Те, эряви меремс, Кульмина велень эрицятнень зярс а топавтовиця сехте покш мелесь-арсемась. Нама, те тевесь а тееви спонсортнэнь вийсэ, тенень эрявить покш ярмакт ды республикань прявттнэнь лездамо. Ансяк велень администрациянтеньгак а эряви аштемс кедень илештязь ды учнемс, зярдо мезеяк менельстэ пры, эряви чийнемс, вачкоемс аволь вейке кабинетэнь кенкшс, сёрмадомс аволь вейке энялдома… Кода кортыть эрзятне: кинть ютасы молицясь.
Тешкстама, бути строявольть истямо комплексной центра, сон а улевель бу чавокс эли а эрявиксэкс. «Тесэнь «Комолявка» ансамблянок пештявлизе бу сонзэ эрзянь мазый мородо ды чинь-чоп концертт бу невтевлинек», – корты Кульмина велень эрицясь, клубонь прявтось Татьяна Васильевна Макарова. «Комолявкась» – те Кульминань эште вейке каштанчист, ансамблясь пурназель эште 25 иеде теде икеле, морсить аватне морот баянтомо, эсест мазый, лия ёнов а молиця вайгельсэст. Лемесь чачсь «Комолявка» кезэрень моронть эйстэ, конань аватне вечксызь сехте пек. Репертуарсонть ансяк эрзянь фольклоронь морот, конатнень сынь марсизь эште эсест сырькаест ды тетяст-аваст пельде. Ансамблясь содавикс весе райононть ды республиканть келес ды ульнесь кавксошка иеде теде икеле натой гастрольсэ Эстониясо. «Кадынек тувонок, скалонок мирденек туртов ды оргодинек омбо масторов морсеме», – пейди Т.В.Макарова. Татьяна Васильевнань ды лия морыцятнень туртов се путешествиясь те шкас а стувтневи, чуросто эдь велень аватне кудосто тукшныть ды эште гастролев. Течинь чине «Комолявкасонть» морсить кото ават: Татьяна Васильевна Макаровадо башка, Раиса Григорьевна Дудникова (сон сехте сыретнестэ, тензэ 81 ие), художественной руководителесь Анастасия Васильевна Ерошкина, Зоя Николаевна Никитина, Худойкина Валентина Ивановна ды моронь ушодыцясь Тамара Васильевна Кильдяева. Неть аватнень вайгелест эрьва иестэ гайнить республикань «Шумбрат, Мордовия!» фестивальсэнть, Чаунзань райононь «Маринк минек моронок» ды «Родные напевы» фестивальтнесэ. Эрзянь раськень оршамопельтнень тенст ставтовтомс Эстонияв молемстэ лездакшнось Н.И. Меркушкин, аватне сынст пек ванстыть, теке сехте питней казненть. Неть аватне аволь ансяк морыцят, сынь весе велень кенярксчитнень ушодыцят-ветицят, юткошкасто свал тев эстест муить: вейсэ кодыть-викшнить, ютавтнить репетицият, анокстыть выставкат. Ансяк вана таркась неть тевтнень теемс вишкине, эдь сынь весе вейке кудынес пештязь – велень администрациянть зданияс. Тосо, тешкстама, Прявтонь ды Президентэнь кочкамотнеяк ютнить. Кодамо сон, тынь уш содатадо.
Кульмина велестэ туемстэ арсезевинь, зярс эште те велесь карми эрямо масторлангсонть? Арсян, семс, зярс сонзэ эрицятнесэ карми паломо тиринь велентень вечкема сяткинесь ды сынь весе виест кармить максомо сонзэ кисэ аштемантень. Ламось ашти эсенек эйстэяк!
Марина Девятова

 

Новости

Более 1500 заявок подано на участие в учебном модуле Высшей партийной школы «Политический лидер»

За 10 дней с момента старта Высшей партийной школы и первого учебного модуля «Политический лидер» из регионов подано более 1500 заявок на участие. Всего в этом году будет отобрано 150 участников, для которых в Москве пройдет недельное обучение. Об этом заявила первый заместитель секретаря Генерального совета «Единой России» Ольга Баталина.

Подробнее ...
 
Од иень ярмунка

Од иень кенярксчитнеде икеле, ацамковонь 22-це чистэ, Саранскойсэ ютавтови ярмунка, косо кармить микшневеме эрьва кодат товарт ды велень хозяйствань продукция.
Ярмункасонть кармить Мордовиянь микшнемань сферань, общественной питаниянь, перерабатывающей промышленностень ды велень хозяйствань предприятиятне.

Подробнее ...
 
Турчак: Власти компенсируют гражданам затраты на покупку приставок для цифрового ТВ

Правительство РФ и региональные власти предусмотрели исчерпывающий набор компенсирующих мероприятий при переходе с аналогового на цифровое телевещание для малозащищенных слоев населения. Также в региональных бюджетах предусмотрены денежные компенсации или закупка необходимого оборудования. Совет по развитию цифровой экономики при Совете Федерации представит на ПМЭФ-2019 свой рейтинг цифровизации регионов и предложит механизм поддержки лучших региональных практик. Об этом заявил вице-спикер Совета Федерации, секретарь Генерального совета «Единой России» Андрей Турчак по итогам второго заседания Совета по развитию цифровой экономики в Новосибирске.

Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...