Рубрикатор

Культура Поздоровт сехте вечкевикс покштянтень
Поздоровт сехте вечкевикс покштянтень

Минек редакцияв ней чуросто сакшныть конёвонь сёрмат, малав весе бажить эсест мелест-арсемаст кучомс Интернетэнть вельде. Аволь умок «Эрзянь правдань» сайтс сась энялдома ёвтамс поздоровт 60 иетнень топодеманть кувалма Сабанцеле велень эрицянтень Пётр Николаевич Сидоровнень. Сёрмадызь сонзэ нуцьканзо, конатне арсесть теемс «сюрприз» вечкевикс покштяст туртов, конась юткошкасто, келя, свал ловны тиринь кельсэ нолдавиця газетанть. Сёрманть ловнозь, минь арсинек, пароль бу панжомс истямо рубрика, косо, лембе валтнэде, поздоровтнеде башка, минь бу аламодо ёвтневлинек велень ломантнеде, сынст эрямодост-аштемадост, эдь журналисттнэнь туртов эрьва ломанень уцяскась – те мельстуиця история. Секскак, ялгат, кучодо сёрмат, почтанть эли социальной сеттнень вельде, кандодо эйсэст редакцияв, ёвтадо паро валт малавиксэнк туртов 50, 55, 60 ды седе ламо иетнень топодеманть кувалма! Илядо стувто кучомс истя жо паро фотографият! Минь мельспаросо сынст ловносынек ды печатасынек газетанть лопатнесэ! Весе поздоровтне максовить питневтеме, ансяк улезэ «Эрзянь правданть» лангс сёрмадстоманк.

 

Течинь васенце героенть, Пётр Николаевич Сидоровонь (Валяй Петянь), чачома чизэ – июнень 10-це чись. Тедеде, кода уш минь ёвтынек, тензэ топодить 60 иеть. Сон чачсь-кассь ды малав весе эрямонзо ютавтызе тиринь Отяжелень райононь Сабанцеле велесэ. Цёрынесь кадовсь тетявтомо сестэ, зярдо тензэ топодекшнесть ансяк 14 иеть, секс савсь пек ламо лездамс аванстэнь кудоютксо. Семиясонть кассть вете эйкакшт, ды аваст весень тонавтынзе кемемс ансяк эсест виест лангс. Сидоровтнень ульнесь покш умарьпирест, чувтотнень юткова аравтнезельть мекшень кудынеть. Сынь весе кадовкшность Петянь лангс. Сонензэ уш эйкакшпорасто пек вечкевсь мельгаст ваномась, ды те тевенть сон эзизе кадо те шкас.

1976 иестэ Пётр Сидоров прядызе школанзо ды сайсь мель тонавтнемс электромонтёрокс, эдь сон чинь-чоп котьмась яжазь телевизортнэнь ды радиотнень лангсо. Лиясто истя процессэсь чаракавтылизе, ярсамонзояк стувтылизе. Сестэ эдь те техникась ансяк совась эрямонтень, ды сонзэ витнемань-петнемань тевесь лововсь, кода ней мерить, пек «престижнойкс». Ялатеке аволь весень тенень кедест ладясть ды ёрокчист сатотсь. 18 иесэ тусь тонавтнеме Саранскоень профтехучилищав ды иень ютазь тензэ максозель промышленной оборудованиянь витнемань коряс электромонтёронь диплом. Эзь кенере кедьсэяк сонзэ кирдемс, кода сась повестка армияв туемадо, ды кавто иеть Пётр Сидоров служась пек васоло – Дальней Востоконь Свободный ошсо. Тосояк кедьчелькев ломанесь эстензэ тев мукшнось, юткошкасто тейнесь чеканкат. Ледстнетядо, се шкастонть весе кудотнень стенатнесэ понгавтнезельть чеканкань технологиянть коряс теезь картинат, ды малав эрьва солдатось тукшныль казнекс малавиксэнзэ туртов истят изделият. А уш зяро истят казнеть армиясо тейсь Сидоров ялганзо туртов – а лововитькак! Армиядо мейле цёрась велявтсь тиринь велев ды сонзэ сеске саизь роботамо строявиця од АТС-в (телефононь станция) связистэкс. Сестэ, ютазь пингень 80-це иетнень ушодовомсто, весе Сабанцеле велесь телефонт рамсесь ды эрьва кудос савкшнось ветнемс уськеть-мезть, ваномс линиянть парсте роботамонзо мельга. Од, сэрей, ёлганя, превей цёрась аволь куватьс яксесь апак урьваксто. Иень ютазь сон саизе никс шабра Таразбуе велень Люба тейтеренть, шкань ютазь чачсь васенце тейтерькаст – Галина. Од семиясь эрясь тетянзо-аванзо кудосо, колхозсонть специалисттнэнь туртов од строявиця кудотнень кисэ «тюремат» молильть ды учомс эсест эрямо тарка Сидоровтненень марявсь куватьс. Секскак 1982 иестэ сынь сыргасть Саратовав, косо тенст алтазель ды максозель башка квартира. Семиянь азорось ушодсь важодеме электрикекс-аккумуляторщикекс. Кавто иеть Пётр Николаевич тосо роботась, зярдояк кияк эзь пеняця лангозонзо, эзь мурне, ансяк мекс-бути седеесь ризнэсь, мезе-бути эзь сатно, мелявтсь тиринь веленть, сад-пиренть, мекшень кудынензэ кисэ. Кода прявтозо эзь энялдо икелензэ, мейсэ ансяк эзь «маня» эйсэнзэ, Сидоров сайсь мель велявтомс мекев Сабанцелев ды, аволь сюпав курмотнень-кармотнень пурназь, сыргась килангов. Сонзэ превс уш чачсь покш талновтыця мель – киньгак ды мезеньгак апак учне, стявтомс эсь кедьсэнзэ кудо. Авазояк тердсь ды уш кудоюрт вешнесь. Аволь васоло тиринь кудост эйстэ, кавто-колмо кудодо верев, микшневсь ташто кудыне. Сонзэ рамизьгак Сидоровтне ды ушодсть эсест кудонь стявтомо. Сестэ Пётр Николаевичень нинзэ марто чачсь омбоце тейтерест – Екатерина, мейле, ниле иень ютазь, колмоцесь – Анастасия. Цела ие кудонть стявтсть, нама, аволь ськамонзо, лездыцят ламо ульнесть: роднятне-раськетне, колхозось, эдь сон сеске саезель роботамо электрикекс-аккумуляторщикекс ды те таркасонть важодсь 1997 иес. Мейле тусь роботамо связистэкс «ВолгаТелекомонь» (ней «Ростелекомонь») Отяжелень филиалс. Тосо сон роботы те шкас. Прявттнэнь пельде Пётр Николаевичень ламо сюкпрянь ды шнамонь конёвонзо, эдь сон – ломанесь ответственной, тевень содыця, пельдензэ тонавтнить ней уш од специалисттнэяк, весенень максы превспутомат.
Теке марто Пётр Николаевич эзизе кадо вечкевикс тевензэ: мекштнень ды техниканть марто озямонть-котьмамонть. Братонзо марто пурнась ташто пельксстэ вишка тракторнэ, модамарень таргамка. Велень эрицятнеяк, бути кинь лиси мелявкс телефоност, телевизорост, светэст, приставкаст марто, сеске чиить Пётр Николаевичнень: «Лездак!». Сон весенень яви мель. Кизна Пётр Николаевичень кудопотмозояк бизны, теке промонь сад-пире: каникулав покштяст-бабаст туртов сыть кото нуцькаст. Сынь пек вечксызь ютавтомс оймсема шкаст велесэ, кодамояк лагерде а арсить, ансяк тов. Нуцькатненень пек вечкевить покштяст марто кортнематне, сонзэ тонавтоматне, вейсэнь калонь ульмамотне. Сеедьстэ вешить покштяст пельде мезеяк тенст артомс конёв лангс, эдь Пётр Николаевич истят картинат арты – весе дивсить. Школавгак нуцьканзо туртов арты стенгазетат ды Од иенень картинат. Сон ломанесь чевте седей, а манчиця, малавиксэнзэ кисэ мелявтыця ды весемесэ лездыця. Секскак, нать, истя тензэ педить эйкакшонзо ды нуцьканзо. А стяко сёрмадстькак: «Наш дедушка просто супер!»
Чачома чинзэ каршо сюкпрянь валт кастомаст, пильге лангс стявтомаст кисэ ёвтыть Пётр Николаевичнень колмо тейтерензэ. Шумбрачи ды паро валт арсить низэ, содамонзо ды весе малавиксэнзэ. Кенярксов кувака эрямо, мелявкстомо киланго ды седейшкавань поздоровт кучить нуцьканзо. «Кадык уцяскась ды Пазось свал лездыть минек тетянок ды покштянок туртов!» Истя улезэяк!
Марина Девятова

 

Новости

«Единая Россия» возьмет на контроль реализацию закона о паллиативной помощи

Партия «Единая Россия» поддержит парламентский мониторинг за реализацией закона о паллиативной помощи. Об этом заявил член общественного совета партпроекта «Единой России» «Здоровое будущее», член комитета Государственной Думы по охране здоровья Юрий Кобзев. 

Подробнее ...
 
150 человек пройдут обучение в рамках модуля «Политический лидер» Высшей партийной школы «Единой России»

Первые занятия стартуют 25 февраля

Экспертной группой первого модуля Высшей партийной школы «Единой России» «Политический лидер» по итогам всех испытаний из более чем 6,6 тысяч участников были отобраны 150 слушателей. Из них 50 приступят к учебе уже с 25 февраля, еще 100 пройдут обучение в Высшей партийной школе в следующих потоках в марте-апреле. Конкурс на участие в проекте составил 44 человека на место.

Подробнее ...
 
Республикадонть – социальной сетьсэ

Печатень кудонь Пресс-центрасо аволь умок ютавтовсь мероприятия, конанть лувсо невтевсь социальной сеттнесэ Мордовия Республикань официальной аккаунтось. Пилотной нолдамось ульнесь уш даволковонь 1-це чистэ, секскак васень подписчиктне уш ванызь контентэнть вадрячинзэ.

Подробнее ...
 
Ловонть ускома шкастонзо

Неть читнестэ Саранскоень Администрациясо ютавтозь промкссонть башка мель явовсь ошсонть эйсюротнень, эенть ды ловонть урядамонь кевкстемантень. Ленинской райононь прявтось Александр Юткин ёвтнесь, управляющей компаниятне тагояк рамасть сал китнень ды ютамо таркатнень почодомс. «Эйсюротнень урядамонь коряс роботатне ветявить эрьва чистэ. Тевенть топавтыть верьга якицят ды специализированой техника», – пачтясь Александр Юткин.

Подробнее ...
 
Автобусонь од маршрут

Ошонь прявтось сонсь ловны эрицятнень сёрмаст, конат кучовить сонзэ лемс. Мэрэнть кедьсэ промкссонть Пётр Тултаев пшкадсь Транспортонь управлениянь прявтонь полавтыцянтень Елена Потапованень: «Сась пеняцямо, конасонть тешкстави, автобуссо эли троллейбуссо ардоманть кис карточкасо пандомадонть мейле ярмактне саевить аволь сеске эли аволь зняро эряви. Ломантне арсить те «Горэлектротранс» муниципальной предприятиянть вановтост ало. Ёвтадо: кие чумось ды ков пшкадема?»

Подробнее ...