Рубрикатор

Культура Санаксарось – оймень оймсевтиця тарка
Санаксарось – оймень оймсевтиця тарка

Умок ульнесь мелем пачкодемс Санаксаров, Рождество-Богородичной церань монастырев – те иневанькс, оймень оймсевтиця таркантень, косо ванстовить мощаст Иневанькс Феодор Санаксарскоень ды сонзэ малавикс раськензэ Иневанькс праведной воинэнть Феодор Ушаковонь. Бути алкукс мездеяк арсят, сонсь Пазось теть лезды. Истя лисськак. Маринь ялгань пельде: Санаксаров Саранскойстэ курок сырги автобус, конанть сайсызь тов Казанской Пазонь авань храмонтень сакшныцятне, конась ашти Светтехстройсэ. Мартост вейсэ сырги тосонь батюшкась Сергий. Те ульнесь аволь экскурсия, секскак аламодо тандадынь, сатыть-арась вием кирдемс весе службатнень ды кадовомс тозонь удомо. Ялатеке сыргинь мельспаросо, вейке тевесь – молемс монастырев, кода турист, омбоцесь – кода паломник, чуросто истямо тев лисни монь эрямосо.

 


Паломниктнеде пурнавсть ламо, ульнесть зярыя ават эйкакш мартояк. Килангось Темникова енов марявсь овсе аволь кувакакс ды вана минь уш Санаксаронть маласотано. Ардомсто карминь содамо, «санаксарь» валось мокшонь кельстэ ютавтови, кода «чейбулонь тарка». Истя лемдеви тосонь эрькесь, конанть лангсо аштияк Рождество-Богородичной церань монастыресь. Минек вастымизь тосонь батюшкась – кураторонок ды сеске ютавтсь а покшке экскурсия монастырьганть. Совинек васняяк Соборной церьковантень, косо ванстовить иневанькс мощатне. Минек туртов сынь панжозельть ды весе састыне ознынек вакссост ды комсинек паламост. Дивазевинь ракатнень мазычист кувалма. Лангось теезь пек кеме чувтосто. Феодор Санаксарскоенсесь теезь теке кандолаз, адмиралонть Феодор Ушаковонсесь – теке иневенч, конанть вере эште понгавтозь паруст ды чувтосто керсезь эрьва кодамо усиянь лия курмот-кармот. Лангсонзо сермадозь озномань валт. Феодор Ушаковонь мощатне те церьковантень совавтозельть монастыренть маласо аштиця калмонть потсто, зярдо сонзэ лемесь канонизировазель ды Феодор Ушаков ловозель иневанькс праведной воинэкс. Те калмось ашти овсе Соборной храмонть вакссо. Лангсонзо – раужо кевень плита ды покш крест.

Батюшкась, конась невтнесь монастыренть, евтнесь сонзэ историядонть. Валонзо коряс, те Пазонь таркась панжозель эште 17-це пингестэ ды 19-це пингентень теевсь покш, паро обителекс. Сонзэ строямось сехте эрязасто мольсь, зярдо тосо эрясть старецэсь Феодор, мейле старецэсь Филарет. 1929 иестэ монастыресь пекстазель ды часовнясь, косо калмазель Феодор Ушаков, яжазель. Ине Отечественной войнань шкасто И.В.Сталин мерсь нолдамс Ушаковонь орден усиясо тюрематнень кисэ, ансяк кияк а содыль, кодамокс артомс адмиралонть чаманзо. Сестэ Санаксаров кучозель государственной комиссия, конась панжизе калмонть ды тейсть экспертиза. Монастыресь теде мейле кармась ванстовомо. 1991 иестэ обителень зданиятне ютасть Саранскоень епархиянтень. Теке жо шкастонть тосо эрясь старецэсь схиигуменэсь Иероним (Верендякин), конась лововсь ламонь содыцякс, превспутыцякс, виде килангос стявтыцякс ды мартонзо вастовомо сакшность пек ламо паломникть. Батюшкась кулось 2001 иестэ, сонзэ калмозо ашти монастыренть маласо ды ней лангозонзо стявтозель часовня. Минек группась пачколесь те калмазырентеньгак. Тосо калмазь малав весе монахтне, конатне эрясть Рождество-Богородичной монастырьсэнть. Схиигуменэнть Иеронимень калмозо ашти башка. Сонзэ лангсо путнезь ламо пазавинеть, конатнень озныцятне сайнить мартост кудов. Калмось мазылгавтозь цецясо, крестонть чирестэ паломниктне сеедьстэ сайнить чувар ды мода, кортыть, батюшкась лезды истяяк. Минь тосто вастынек ава, конась эрьва чистэ сакшны те калмонть ванськавтомо. Кортазевинек мартонзо, лиссь, те сон самай озавтни тозонь цецинеть, ансяк куватьс сынь а касыть – паломниктне бажить саемс цецянь лопинетнень ледстнемакс. Секскак, эрьва чистэ сави озавтнемс лият. Старецэнть Иеронимень сон содылизе, сеедьстэ сакшнось тензэ талновтыця кевкстема марто. Нейгак тензэ маряви, батюшкась а кадны эйсэнзэ лезкстэме.
Чокшнень кувака службанть аштемадо мейле минек группанть андызь трапезнойсэ. Ярсамопелесь ульнесь постонь: пидезь лапшат, эмежень икра ды кулиця. Минь жо ульнинек пек вачот, секскак весемесь марявсь пек тантеекс. Седе тов сыргинек инжень кудов, косо тенек явсть кавто нупальть. Инжень кудось, нама, а моли ошонь «вете тештес» отельтнень енов. Те – кирьпецень кавто этажос кудыне, косо эрить паломникть ды трудникть, конатне витнить-петнить монастыренть. Тейтерь-аватнень тесэ эсест нупалест, цератнень – эсест. Минек нупальсэ эрясь сырькай, конась Санаксаронь монастырев сась васоло Донбассто, зярдо тосо ушодовсь войнась. Сырькаенть кудонзо яжизь, ды сон церанзо марто уш зярыя иеть эри Мордовиясо. Церазо роботы монастырьсэнть. Бабинесь жо ваны нупальтнень мельга, шли-тенси киякстнэнь, ушты пенгсэ каштомонть. Ярсни трапезнойсэ ды седе, мезе максыть паломниктне. Сыргамс одов Украинав сонзэ арасть ярмаконзо ды велявтомскак тозонь а ков. Истя пиштияк тесэ, зярс тензэ максы Пазось.
Валске рана монь ялган таго тусть службав, сынь малав весе арсесть тосо исповедямс ды причастямс. Мон жо таго яксинь монастырьганть. Келиятне тесэ уштовить пенгесэ, секскак тосонь вальмалкстнэ пештязь пенге куцядо. Ули монастыренть эсензэ оранжереязо, косо кастовить цецят ды эрьва кодат тикшеть-люкшот. Паломниктнень туртов монастырень ортатнень икеле панжозь микшнемань лавка. Сонзэ кирдить аволь монахтне, сынь тов кандтнить микшнемс кши, конанть панить обителенть пекарнясо. Кшитне эрьва кода: ламбамот, постнойть, изюм, мак марто. Монгак саинь кудов варчамс ды редия, кшись моли кулиця енов.
Службадо мейле таго андымизь трапезнойсэ ды монастырень ортатнень ваксс усксть тенек лисьмапрянь ведь, конанть пештинек весе улиця кедьгезэнек. Теньсэ тевенек эзть прядово, бажинек эште молемс авасоло аштиця иневанькс лисьмапрянтень, косо ламот бажасть экшелемс. Ильтиця монахось ветимезь вирень янганть. Лисьмапрясь пек кельмель, ялатеке ламот совсесть купелентень. Монь вием эзь сато, ансяк валныя прям.
Саранскоев ардомсто чипаесь калясь автобусонь вальматнес, ульнесь пек пси ды минь секе тев валнынек прянок лисьмань кельме ведьсэнть. Чаманок мизолдсть, сельметне цивтердсть ды весень ульнесь мелесь самс тей эште весть. Истямо таркатнесэ эдь оймесь кенярды!

Марина Девятова

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...