Рубрикатор

Культура Оськинасо ютась «Шумбрат» кенярксчи
Оськинасо ютась «Шумбрат» кенярксчи

Июнень 16-це чистэ Ульяновск областень Инзабуень Оськина велесэ ютась покш кенярксчи – «Шумбрат». Тей пурнавкшность кода велень эрицятне, истя жо сакшность ламо инжеть. Эрзянь мазый оршамосо эйкакштне ды од ломантне ютасть велень куншкасто саезь кенярксчинь ютавтома таркантень. Тесэ ладязь сцена, озамо таркат, весе наряжазь килейнесэ. Васолов марявить эрзянь моротнень гайгемаст. Покшчинть ушодкссто весе тердевсть ютамс ве кирькссэ. Кирвазтезель раськень штатолось.


 

– Оськинань мельвановикс эрицят ды инжеть! Ёвтан седейшкавань паро валт кенярксчинть кувалма. Ледстнеса, кода ниле иеде икеле васенцеде ютась «Шумбратось». Сон мольсь эрзянь вишка велинесэ, косо эрить ансяк 20 ломанть. Тень лангс апак вано, тов сакшность малав тёжа инжеть. Минь аштетяно каштанчисэ сеть ломантнень кувалма, конат чачсть минек райононь эрзянь велетнесэ. Тесэ ванстыть тиринь келенть, койтнень-кирдатнень, культуранть. Келентень вечкеманть максыть эйкакшост ды нуцькаст туртов. Аволь стяко эйкакштне изнякшныть эрзянь келень ды литературань коряс весероссиянь олимпиадасо. Кода а ёвтамс «Лейне» эйкакшонь народной коллективденть? Сонзэ содасызь ды вечксызь аволь ансяк Инзабуесэ, областень томбалеяк. Сюкпря ёвтавлинь эрзянь-мокшонь райононь автономиянтень, кона вети покш тев келенть ванстоманзо коряс. Кадык седе товгак а ёми келесь. Уцяска тенк, паро эрямо ды кеме шумбрачи! – кортась Инзабуень райононь прявтось В.Н.Шкунов.

Сонзэ валонзо поладынзе Инзабуень администрациянь прявтось А.И.Макаров:

– Аволь васенце ие минек районсо ютавтови лия ёнов а молиця кенярксчи. Сон вейсэнди весень, кить явить мель тиринь раськень культурантень. Шнамо валт ёвтавлинь Оськинань эрицятненень, конат ванстыть коест-кирдаст.

Эрзянь ды мокшонь раськень регионъютконь общественной вейсэндявксонь исполкомонь секретаресь О.В.Дулкин истя жо пшкадсь инжетненень лембе вал марто. Мурань велесь, косо сон чачсь, икеле ульнесь Симбирской губерниянь Карсунской уездэнь. Валонзо коряс, течи Ульяновск областьсэ раськень политикань коряс важодемась паро невтевкс лия регионтнэнь туртов. МР-нь Культурань, национальной политикань, туризмань ды архивень тевень министерстванть пельде сон явшесь Благодарностть сетненень, кить ветить покш тев, ванстыть койтнень-кирдатнень. Казевсть А.И.Макаров, В.С.Бардин, А.А.Коткина, Е.А.Волкович, С.А.Плигузов, «Лейне» ансамблясь.

Ульяновской областень эрзянь ды мокшонь национально-культурной автономиянь прявтось В.А.Софонов ушодызе кортамонзо сюкпрянь валтнэстэ, конат алтавсть Инзабуень образованиянь ды культурань управлениятнень туртов.

Инзань районось васенцекс кармась тешкстамо «Шумбрат» кенярксчинть 2015 иестэ саезь. Кода нетядо, сон теевсь ламонень вечкевикс ды учовикс эрьва иень покшчикс. Ульяновск ошсо ютавтовиця «Шумбратонтень» свал сакшны минек губернаторось С.И.Морозов. Косо бу авольть эря эрзянь ды мокшонь ломантне, минь тейтяно весементь, улевель сынст весемесь вадря, марявольть пряст парсте, – кортась В.А. Софонов.

Седе тов сцена лангс тердевсть артисттнэ: морасть «Лейне» Оськинань народной ансамблясь, паро инжекс ульнесть Кузоватовабуень Кивать велень «Пизёлнэ» ансамблясь ды Мордовиянь «Лайме» коллективесь.

Инзабуесэ ютавтовиця эрзянь покшчитнес свал сакшны Сергей Алексеевич Плигузов. Кода карминек содамо, сон лезды ютавтомс раськень кенярксчитнень кода спонсор. Теде башка, ломанесь эсенек, чачсь Мордовиясо, эрямозо жо сюлмавсь Инзабуенть марто, косо сон важоди врачокс.

Сергей Алексеевич, ёвтнеде, косо тынь чачиде-касыде?

– Мон чачинь Ташто Шайгова ёнксонь «Восход» совхозсо. 1996 иестэ сырнень медаль марто прядыя Ташто Теризморгань средней школанть. Бажинь улемс милиционерэкс, ансяк малавиксэнь кортымизь молемс тонавтнеме врачокс.

Медицинань факультетсэ тонавтнемс аволь шожда…

– Виде, тосо тонавтнемс стака, ансяк монень пек вечкевсь. Тонавтнемань иетне эзть марявояк, кода ютасть. Ёвтавлинь сюкпрянь валт Л.К.Федоткинанень (сестэ сон важодсь медфаксо деканокс). Пек паро прявт ды тонавтыця. Сон сеть ломантнень ютксто, конат эрямосон кадсть тешкс, лездасть. Сестэ факультетсэ важодсть тонавтыцят, конат ламо иень перть роботасть вузсонть, макссть тенек паро содамочить, превспутомат. Истят, кода Г.Ф.Вдовина, Т.В.Демидова ды лият. Кавто иеть ординатурам ютавтыя Саранскоень 13№ больницясо. Мейле ялган тердимизь самс важодеме Инзав. Тесэ тень алтасть максомс эрямо таркаяк. Се шкане семиямгак арасель. Истя, монень алкукс макссть кавто нупальсэ квартира больницянть каршо. Ней уш топодсть 14 иеть, кода тесэ эрян ды важодян урологокс. Мелят тонавтнинь медицинань куроконь лезксэнь максыця врачокс. Минек районось ашти васоло Ульяновск ошонть эйстэ. Сакшныть тенек сэредицят шабра районтнэстэяк. Паро мельсэ лецятано весень, кие пшкали.

Сеедьстэ эрсетядо тиринь ёнкссо?

– Инзасто монь веленть видьс 200 вайгельпеть. Койсэнь, те аволь ламо. Сакшнотано сеедьстэ, тосо эрить тетям-авам ды ламо малавиксэнь.

Ёвтнеде семиядонк.

– Монь кавто цёран. Покшось, Александр, прядсь 4-це класс, Данила яки эйдень кужов.

Сергей Алексеевичень ундоксонзо рузонь ды чачськак сон рузонь велесэ. Ташто Теризморга велень школасо тонавтнемстэ кармась содамо мокшонь келенть. Чарькоди ды корты. Ды ашти тень кувалма мельспаросо. Весе эрзянь ды мокшонь раськетнень кувалма ашти каштанчисэ. Казаньсэ улемстэ якась лётчикенть, Советской Союзонь Героенть М.П.Девятаевень калмолангс. Сон ёвтни эйкакшонзо туртовгак кить минь, кодамо раськень, кодат коенек-кирданок, кодат содавикс ломаненек улить. Минек героесь видькстась, пек кецни, зярдо Инзабуесэ ютыть раськень покшчить, сынь паролгавтыть ёжо, теке мерят, мельсэ-оймесэ понгони Мордовияв.

Т.Маторкина

 

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...