Рубрикатор

Культура Мордовиясто – колмо омбо масторов
Мордовиясто – колмо омбо масторов

Молемс Россиянь томбалев ды варштамс Европанть – свал ульнесь монь покш мелекс-арсемакс, ды, окойники, аволь умок сон топавтовсь. Ялгам ламо иеть эри Германиясо ды кучсь тень тердема варштамс те масторонть, сонзэ эрямонзо-аштеманзо ды, теде башка, ве сельминесэ шабра мастортнэньгак: Бельгиянть ды Нидерландынть. Конёвонь теемань-анокстамонь тевтне-мелявтоматне кадовсть удалов, ды васенцеде, ськамон сыргинь васоло килангов. Талноматнень кекшинь седеем потс, арсезевинь, аволь уш эйкакшан – кинть муса. Васняяк «Мордовия» фирменной поездэсь ускимим Московов, тосто роднян-раськень ильтимизь «Домодедово» аэропортов. Самолётонть учомс савсь кувать ды а мезень теемадо якинь-пакинь тосонь лавкатнева. Мартот ливтямонь учомань зонантень а мерить саемс кодамояк симема-ды ярсамопельть, бути ансяк шоколадкань плиткине. Те а стяко, эдь тосо аштиця лавкатненень эряви миемс эсь продукцияст. Питнетне кеменьксть седе покшт. Симемам сакшнось ды савсь саемс пельлитрань бутылкине ведь. Содатадо зяродо? 200 целковойде. Алкукскак, ведесь тосо «сырнень», ярсамкатнеяк истят жо. Паряк, эсь пекеть кодаяк сюлмасак ды кирдьсак, а вана кода эйкакштне, сынст истя савияк тосо андомс, мезеяк а теят.

 

Самолётось сыргась аволь овсе тешкстазь шканть коряс, 30 минутадо мейле. Те аламо, кой-зярдо рейстнэсэ кавто-колмо част учнить. Монень, кода мерить, уцяскась мизолдсь се чистэнть. Германиянь Дюссельдорф ошонтень ливтямось 3 част 20 минутат. Те шкастонть миненек кандтнесть секе-тев чай, кофе, ведь, сокт ды натой андымизьгак пси саразнэде ды макссть эште ой, сыра, шоколад, кши, печения марто паргине. Ливтинекак мелявкстомо, вишка пижине «Боингесь» шождасто кепететсь менельс, вестькак эзь сорновтово, турбулентностень зонас эзь понгоне ды истя жо парсте валгсь. Ансяк шабратне монь ульнесть немецть. Теньсэ мезеяк берянесь арасель, бути аволь вейке тувталось: сынь ве валгак а чарькодить рузкс, мон жо немецекс содан, паряк, комсешка валт. Истя савсь весе ливтямонть перть вейке-вейкенек туртов мизолдомс ды кевкстнемс: «Алес гут?»
Германиясь вастымим чипайсэ ды 12 градусонь лембесэ. Туинь жо мон, зярдо Мордовиясо ульнесь -15 якшамо. Ялгам вастымим аэропортсо, ды минь сыргинек Эссен ошов, конась ашти Дюссельдорфсто 30 вайгельпеде васоло. Те ошось промышленной, зярдо-бути тесэ роботасть шахтат, конатне ней теезельть «Цольферайн» музеень комплексэкс. Ошсонть эрить малав 600 тёжат ломанть, якить автобуст, трамвайть, ули метро ды, нама, чугункань ки, конась сюлми эйсэнзэ весе малавикс оштнень марто. Эссенэнть Россиясо ули ошозо-побратимезэ – Нижней Новгородось. Те ошось ашти Рур леенть ды Бальденайзее эрькенть маласо, конань тосонь эрицятне вечксызь, ловить оймсема читнень ютавтома паро таркакс.
Мон ульнинь Германиясо, зярдо весе анокстасть сынст Инечинтень, конась тешкстави минектенть недлядо икеле. Тесэнь лавкатне пешксельть Инечинь нумолнэде, конатне, ёвксонь коряс, кекшнить алтнэнь, ды эйкакштненень эрявить сынст вешнемс кудованть. Дивавтымим вейке тевесь: Эссенэнь лавкатнесэ микшневить эрьва кодамо тюссо артозь алт – а эряви ютавтомс артомантень шка ды пацькамс кедтнень. Кой-кона кудотнень икельде мон неинь Инечинтень артозь алсо ды мазый парсейнесэ мазылгавтозь чувтынеть. Тесэ истямо коесь. Ялатеке немецтне алт вейкест-вейкест туртов а явшить ды кудова алонь пурнамо кияк а якси. Тетятне-аватне Инечистэ кекшнить кудованть эрьва кодамо тантей ярсамопельть, казнеть, ды валске рана эйкакштне ушодыть сынст вешнеме.
Эссенсэ, кода Европань малав весе оштнесэ, аволь весень улить эсест эрямо таркаст, ламот пингень перть эрить сиведезь квартирасо ды теньсэ кодамояк тамаша а неить. Ялгамгак мирдензэ марто эрить Эссенэнь куншкасо кавто нупалень квартирасо, конань кисэ пандыть аренда вейке организациянтень – кудонь азоронтень. Рамамс эстест кудо ды саемс тень кисэ пингень перть пандовиця кредит сынст арась мелест, кода Эссенэнь лия ломантненьгак. Кудонь азорось парсте ваны квартиратнень мельга, бути эряви – теи эйзэст ремонт. Вете этажсо кудосонть вейке подъездсэнть кемень квартират, сынст арасть номерэст. Эрьва квартиранть кенкшсэ сёрмадозь эрицятнень фамилияст.
Редяви, подъездтнэсэяк, ульцятнесэяк весе пштистэ ваныть ваньксчинть мельга, тестэ а неят ёртозь конёвне эли бутылка. Тешкстама, шукшпрятнень Эссенсэ сайни кудотнень вакссто истя жо «Ремондис» компаниясь, кода Саранскойсэяк. Бути тесэ минь ансяк карминек аламонь-аламонь явномо кудонь шукштнень, Германиясо те лувонтень тонавтозь эрицятне умок. Мон неинь, кода ялгам яви башка конёвтнень, суликань ды пластикень бутылкатнень. Пластикень бутылкатне тесэ зярдояк а ёртневить, сынь мекев максовить се лавкантень, косто рамазельть, эдь вейке чаво бутылканть кисэ тосо пандыть 25 центт, те малав 18 целковойть. Мекев велявтозь пивань чаво бутылкатнень кисэяк максови скидка. Винань, водкань бутылкатне тесэ саевить башка, сынст тюсост коряс. Шукштнень пурнамо таркасонть бутылкатнень туртов аравтозь колмо дивавтыця покш бакт. Сынь молить баягине ёнов. Куншказост ёртовитькак бутылкатне: тюжатне – тюжа бакс, ашотне – ашо ды пижетне – пиже бакс. Ванодо, илинк човоря. Германиясо весе банкатне, бутылкатне, кедьгетне ёртомадо икеле ваньксстэ шлявить. Тень кувалма кияк а музгорди ды а бажи теемс лиякс. Весе уш тонадсть.
Мезе монь дивавтымим Германиясо – весе кода-бути кемить вейке-вейкенень. Трамвайтнесэ-косо арасть кодаткак кондукторт. Автобуссо, поездсэ ардомс весе рамсить билетт ды киньгак мельсэ араськак ардомс стякодо. Васняяк, штрафось, бути кундатадызь, пек покш ды седе тов тон понгат полициянь сельме алов. Тесэ ламо правилат, конатнень чуросто колсить умонь эрицятне. Бути ансяк од сыцятне, меельце шкатнестэ Эссенс састь пек ламо оргодицят арабонь мастортнэстэ. Немецтне тенст мерить «тука-такат», ды, монень марявсь, аламодо эйстэст пелить. Эссенсэ сынст улить эсест кварталост, ды неть од эрицятне пек шождасто совасть тосонь эрямо лувонтень. Сынь чуросто важодить ды эрить пандовиця пособиятнень лангс. Сазтненень сеске максовить общежитият, ламо квартирас кудот, ды сеедьстэ сынь эште музгордить тень кувалмаяк. Эссенэнь клиникатне пешкедсть пекень кандыця «тапарянь пря» аватнеде ды раужине эйдетнеде ошонть ульцятнесэ седе ламо ашотнень коряс. Кода тесэ кортыть, арабтне эдь чувар лангсояк пряст трясызь, а мезть уш кортамс сюпав ошонть ланга. Ансяк тосонь власттнень политикась овсе а вечкеви «коренной» немецтнень туртов. Ялатеке Эссенэсь эште аволь пек майси «беженецтнэнь» кувалма, кода седе покш оштне ды Франциясь. Тосо, келя, сынь теевсть раськень алкуксонь тамашакс.
Кода уш сёрмадынь, Германиясо весе эрить кемекстазь вешематнень коряс ды сынст колсеме немецтне эрьва недлячистэ ардтнить маласо аштиця Голландияв. Вана косо мереви ветямс прянть кода ули мелеть. Нидерланды масторось ды сонзэ прявт ошось, Амстердамось, монень марявсть таркакс, косо кияк кидеяк, мездеяк а пели ды эри оляксчисэ. Ансяк те уш лия историясь…
(Поладксозо моли)

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...