Рубрикатор

Культура «Сёрмадыцясь вешни ёвксонь мастор…»
«Сёрмадыцясь вешни ёвксонь мастор…»

Васенцеде Алина Подгорновань неия од сёрмадыцянь семинарсо. Сестэ сон тонавтнесь школасо. Е.Биушкинань марто Дубёнкань буестэ сынст ускокшнынзе эрзянь прозаикесь Л.П.Седойкин. Мейле эрьва ие карминек вастневеме литературань семинартнэсэ. Минь кода-бути сеске муинек вейкень-вейкень марто кель-вал ды теевинек ялгакс. Умок бажинь теемс мартонзо материал, ёвтнемс те од, мазый, превей тейтерденть, кона нолдась стихень кавто пусмот. Ды кода сондензэ а пачтямс? Алина лиссь «Иень поэт» Весероссиянь пелькстамонь финалс.

Алина Подгорнова чачсь 1991 иестэ Дубёнка буень Кобале велесэ. Школань прядомадо мейле тонавтнесь Н.П.Огарёвонь лемсэ МГУ-нь филологиянь факультетэнь «Журналистика» отделениясо. Колмоце курссо тонавтнемстэ тердизь важодеме «Сятко» журналс, косо важоди нейгак.

 

Алина, зярдо тон ушодыть стихень сёрмадомо?

– Школасо тонавтнемстэ. 4-це классо «Чилисема» журналсо лиссь васенце стихем. Те ульнесь тиринь веледе валморыне. Сон ульнесь эйкакшонь, шожда, кода весе ушодыця сёрмадыцятнень. Публикациядонть мейле мелесь сёрмадомс седеяк сыремсь. 8-це классо тонавтнемстэ васенцеде тердимизь од сёрмадыцянь семинаров, конань ютавты МР-нь Сёрмадыцянь вейсэндявксонь правлениясь. Ускимизь-пачтимизь тов Л.П.Седойкин, кона зярс-бути ветясь Кобалень школасо литературань кужине. Сон кармавтнимизь сёрмадомо те эли тона теманть коряс. Кандтнинек тензэ сёрмадовксонок, сон витнесь, тонавтсь. Лездась тень Надежда Викторовна Чугунова эрзянь келень тонавтыцямгак. Сон кепедсь сёрмадомань мелем, школань стенгазетас путнесь стихень, сайнилимим олимпиадав. Сон нейгак тонавты минек школасо ды мукшны Кобалестэ од сёрмадыцят, од лемть. Васенце ловныцям, чарькодеви, авам. Зярдо мезеяк сёрмадылинь – блокнотом марто чиилинь сонензэ. Авам, Галина Дмитриевна, ветясь школасо рузонь кель ды литература. Сон ёвтыль, косо мезе а истя, косо валтнэ а таркасост эли валось а чарькодеви.

Зярдо валморон кармасть лиснеме «Чилисема» журналсо, сась тень поэтэнть Маризь Кемалень пельде сёрма. Сон сестэ важодсь «Чилисемасо» ды вансь сёрмадыця эйкакштнень мельга. Велень эйкакшонтень истямо содавикс авторонть пельде сёрмась марявсь кие соды мезекс! Сон абунгавтымим ды пек кецявтымим.

Сюкпря ёвтавлинь литературань семинаронь ютавтыцятненень. Арсян, весе, кить сакшность семинартнэс, вадрясто ледстнесызь те шканть. Сынь макссть покш лезэ: содат, эряви теть анокстамс, сёрмадомс, секскак сави важодемс, а нузялгалемс.

Алина тонавтнесь 9-це классо, зярдо тетянзо мельга, кона важодсь Московсо, ошов тусть авазо ды ялаксозо. Сон эзь моле мартост, кадовсь велес. Мекс истя лиссь, кода ютась малавикс ломантневтеме шкась? Вана мезе теде ёвтни Алина:

– Велесэ важодема таркат арасельть. Васняяк тусь Московов тетям. Зярыя иеть важодсь тосо ськамонзо. Содазь, семиявтомо стака, берянь. Шкань ютазь авамгак пурнась. Тетям мусь тензэ школасо важодема тарка. Ялаксом сестэ тонавтнесь 5-це классо, мон прядынь 9-це класс. Школань прядомо моньгак саиксэлимизь тов. Васняяк теде тандадынь: тонадынь эсенек школантень, ве классо тонавтницятненень. Пелиньгак, соваван-арась тосонь эрямо лувонтень? Туемась марявсь тень Марсов оргодемакс. Монь уш сестэ ульнесь мелем самс тонавтнеме Саранскоев. А содан, косто саинь зняро назойчи молемс тетянь-авань каршо. Эзинь саеве тенст. Нама, аволь ськамон лиялинь. Сырькаем мартон ульнесь. Авань ёндо вечкабабам свал сакшнось варштамон, монсь яксилинь тензэ. Эзинь ульне кадозь ломанекс. Школань прядомс ульнинь эсень велесэ, эсень школасо, малавиксэнь вакссо. Саранскойсэ тонавтнемстэ эрьва оймсема читнестэ ардылинь велев. Чарькодеви, кодамо сон – чаво кудос самось: вастыцят арась, шабрасо эриця ялгатнень вастыть тетяст-аваст, монь – сэтьмечись. Азортомо кудось якшамо. Сон тарги нусманя мельть, те неяви се шкань стихтнестэяк. Чарькодеви, тетям-авам пек мелявтсть кисэнь. Сестэ, паряк, монень эзь чарькодевеяк, кода пек. Ялатеке, койсэнь, янксемс монень а мезень коряс.

Тон сёрмадат кавто кельсэ. Аволь эрьванть ули истямо ёрокчизэ. Кодамо кельсэ теть седе шожда сёрмадомс?

– Эрзякс. Мезень коряс? Седе содаса-маряса эрзякс сёрмадомань лувонть, шожда муемс эрявикс валтнэнь, ёвтамс мельтнень. Рузкс сёрмадомо карминь омбоце курссо тонавтнемстэ. Кой-кона тематне рузокс панжовить седе шождасто. Ансяк рузонь келень лексикаськак седе сюпав, лиясто маняват, сайсак допрок а се валонть. Бути сёрмадат аволь тиринь кельсэ, кавксть седе пштистэ ванома эсеть мельга, иляст мере: аволь эсеть таркас эцить. Эряви пштистэ ваномс, илязо уле визькс сёрмадозенть коряс. Тень ёвтаса эрзянь валморотнедеяк.

2013 иестэ Алина Подгорновань лиссь «Марямга» стихень васенце пусмозо. Тосо стихтне явозь кавто курова: эрзякс ды рузкс. Секе иестэнть сонензэ максозель од автортнэнь туртов МР-нь Прявтонь премиясь. Теде башка, тейтересь совавтозель РФ-нь Сёрмадыцянь вейсэндявксос.

2016 иестэ лиссь «Кроме рифм» омбоце пусмозо. Тосояк валморотне эрзянь ды рузонь. Кода ёвтни авторось, омбоце пусмось явови васенценть эйстэ. Келесь ванськадсь, тематненьгак бажась панжомс седе домкасто. Эрзянь ловныцятне мерсть, сыненст седе малавикст тиринь кельсэ стихтне. Рузонь ломантне, кить а чарькодить эрзякс, нама, ёвтыть мелест рузонь валморотнень коряс.

Алина панжсь Интернетсэ курыне, ков путни сёрмадовксонзо. Тень вельде сонзэ муизь веёндонь ловныцянзо. Мелят сёрмадызе прянзо «Стихи.ру» сайтс. Те Интернетсэ истямо панжадо тарка, ков путовить стихть. Тов совасть миллиондо ламо сёрмадыцят ды путсть а лововияк зяро валморот. Тозо мереви сёрмадомс мельть-арсемат, рецензият. Нама, Алина тов путсь эрзянь стихтькак.

– Апак учо, эрзянь валмородон мельть-арсемат сёрмадсть ломанть, конат эрить васоло, ансяк улить эрзянь ундоксост. Монень пек мельспароль. Те сайтсэнть зярыя иеть ютавтневи «Поэт года» пелькстамось. Мирдем кортымим кучомс тов валморот. Кучинь ниле. Мейле сась сёрма, келя, карминь улеме номинантокс: васенце этапось ютавсь. Лиссть номинанттнэнь валморост марто альманахт. Сынст мейле ваннынзе жюрись ды тов совазь сёрмадыцятнень ютксто кочкась финалистт. Монень гайневтсть Московсто ды мерсть, што монгак понгинь юткозост. Тердимизь прявт ошов изницятнень лемест ёвтамонь коень ютавтомо. Мон кувать эзинь арсе, меринь, сан. Ды а янксян, мекс якинь. Эряви ёвтамс, литературань те премиянть ушодсть максомо 2011 иестэ. Таркатне явшевить вейксэ номинациянь коряс. Лауреаттнэ казевить статуэткасо, конань лангсо ашти пера, ды, теде башка, Россиянь Сёрмадыцянь вейсэндявксонь ярмак лангс книгань нолдамосо. Тедеде ульнесть мелень лауреаттнэнь книгаст презентацият. Изницятнестэ ламотнень те васенце пусмост, секскак кенярксост а ёвтавишкаль. Монь мельс тусь те вастовомась, покшчись, сон ютась лембестэ, парсте. Сакшность культурань ды литературань содавикс деятельть. Эзинь учнеяк, зяро лембе валт сёрмадыть тень Интернетсэ. Ламот арсесть изнямс, мелявтсть кисэнь. Сюкпря неть ломантненень!

Мезень тееме вечкат ютко шкасто?

– Вечкан музыкань кунсоломо, фотонь тейнеме, бажан седе ламо шка явомс ловномантень. Улить вечкевикс сёрмадыцян: А.Арапов, Д.Таганов, А.Сульдина, А.Эскин, вечксынь П.Бардинэнь пародиянзо (берянь, ней малав кияк истят а сёрмады), Л.Рябова. Рузонсетнестэ ёвтасынь С.Казновонь, В.Мишкинэнь, А.Вознесенскоень, В.Маяковскоень, Д.Быковонь лириканзо, Б.Пастернаконь, И.Бродскоень, А.Твардовскоень. Меельце шкасто вешнян вечкевиця од авторт Интернетстэ. Мелезэнь тукшныть Михаил Анищенконь, Знаменосец Ирань, Стефания Даниловань, Владимир Листомировонь ды лиятнень сёрмадовксост.

Алина, содан, тейнят мазый фотографият.

– Седе пек вечкан тейнемест велесэ. Вановтом лоткси каладыця ташто кудотнень лангс, иень эрьва кодамо шкасто вечкан снимсеме пертьпельксэнть. Мельспаро, зярдо лиснить фотот, конат талновтыть ойменть ды кадовить ледстнемапелекс. Весть тельня снимия лишмесэ ардомсто шабранок. Фотосонть сон озадо нурдосо, пани лишменть, вепеле эйстэнзэ неяви калмоланго. Иень ютазь азорось кулось, лишменть миизь. Фотось лиядсь ледстнемапелекс, эрямонь нурькачинь тешксэкс. Сон нейгак монь талновты.  Корязонзо валморояк сёрмадынь.

А стувтови, кода снимсинь локсейть. Тетянь марто якинек калс. Сон сайсь ульмат, мон – фотоаппарат. Ды аволь стяко саия, неинь локсейть. Сёлтонь чиретне аволь сэрейть, ведесь маласо. Стинь кумажа лангс,  прязон педявтынь рукшна лопа, эцинь седе тустосто касыця тикшенть потс, –  а неявозан. Аштян, монсь, маряви, а лексянгак, ансяк а тандавтомс нармунтнень. Локсейть маласто вестькак эзинь некшне. Превейть идемкатне: уить, а ваныть ёнот, мерят, а редитькак тонь, сынсь стамбаркине яла веёнов ды веёнов туить. Ды видестэ теить: эрьва кодат ломанть улить, а содат, мезе превсэст.

2015 иестэ Алина лиссь мирденень. Мирдензэ, Георгиень, эрзянь ундоксонзо, паряк, секс сон яви мель эрзянь культурантень, а покорды нинть мельтемечисэ, ваны шкинеманзо мельга, лезды, максы превть. Текесь ёвтама  Алинань вечкабабадонзояк. Вера Петровна – Алинань прявт ловныцязо. Кавто пусмонзо ловнынзе педе-пес, ды аволь весть. Бути а чарькодеви тензэ кодамояк валось, валрисьмесь – кевкстьсы нуцьканзо, мезе тона бажась ёвтамс. Яла абунгали, косто од тейтересь мусь истят валт, кода ладсинзе сынст стихс. Сон видестэ чарькоди валморотнень. Кой-конатнень натой кирди мельсэ, ловны марямга.

Алина Подгорновань стихензэ коряс улить сёрмадозь зярыя мороткак. Музыканть арсизь-сёрмадызь Алексей Лесных, Сергей Терханов, Николай Карпов.

Алинань сеедьстэ тердтнить школав, библиотекав ловныцятнень марто вастовомо. Сон ёвтни шкинемадонзо, ловны валморот. Мельспаро кунсоломс сонзэ. Машты ёжомарязь, парсте, вайгелень путозь валморонь ловномо. Кадык минек раськесь ашти каштанчисэ, зярс улить ютксонок истят Пазонь сяткине марто ломанть. Кеман, Алина кецявтсамизь стихень эштё аволь вейке пусмосо, ды минь карматано учомо пельдензэ книгань презентация!

Т.Маторкина

 

 

Новости

Турчак заявил о запуске конкурса социальных проектов первичных отделений «Единой России»
В ближайшее время стартует конкурс социальных проектов первичных
отделений «Единой России», лучшие проекты смогут претендовать на
грантовую поддержку Партии. Об этом сообщил секретарь Генсовета Партии
Андрей Турчак, выступая на пленарном заседании форума первичных
отделений «Единой России» в Северо-Кавказском федеральном округе.
Подробнее ...
 
20 лучших водных ревизоров Мордовии продолжат свою работу в Артеке
Сегодня в Саранске прошло заседание регионального штаба Всероссийской
экологической акции «Вода и здоровье». Там были названы имена 20 лучших
водных ревизоров республики, которые станут участниками федерального этапа
акции «Вода и здоровье»
Подробнее ...
 
Директор спортивной школы попросил депутата ГД Александра Воробьева помочь мордовской биатлонистке
 9 июня депутат Госдумы РФ, член Комитета Госдумы по
аграрным вопросам Александр Воробьев встретился с жителями
Мордовии на личном приеме. Люди обращались по разным вопросам
– в сфере ЖКХ, обеспечения лекарствами, помощи в получении жилья
и другим.
Подробнее ...
 
Молодогвардейцы - победители «Школы парламентаризма«посетили высшие законодательные органы страны
Первым пунктом экскурсии для ребят из Мордовии стал Совет Федерации Федерального
Собрания Российской Федерации, внутренний интерьер и дизайн которого поразил их своей
красотой и величием. Экскурсовод познакомила ребят с особенностями здания, провела по
главным местам Совета Федерации. Ребятам также удалось побывать в большом зале
заседаний, увидеть своими глазами рабочие места сенаторов и кресло председателя
Валентины Матвиенко. Также молодогвардейцы узнали, как проходит подготовка к
заседанию и собственно
сама
работа
заседаний.
Подробнее ...
 
Путин казизе Мордовиясто семиянть «Родительская слава» орденсэ

Июнень 1-це чистэ, Эйкакшонь ванстомань раськеютконь чистэ, РФ-нь Президентэсь Владимир Путин казинзе ламо эйкакшонь триця семиятнень «Родительская слава» орденсэ. Покш казнесэ тешкстазель Мордовиянь Зубова-Полянань райононь Ширингуши велень Урсовтнень кудораськесь. Покш промксонтень истя жо тердевсть РФ-нь ёнкстнэнь прявттнэ, косто састь семиятне, сынст ютксоль МР-нь Прявтось Владимир Волковгак.

Подробнее ...