Рубрикатор

Культура Альбина Абросимова: "Мон вечкса эрямонть!"
Альбина Абросимова: "Мон вечкса эрямонть!"

Альбина Платоновна Абросимовань Лямбирень районсо ламот содасызь. Сон паро тонавтыця, вечкиця ды вечкевикс ни, ава, сырькай, седи гармониясо, моры частушкат, вечксы эрямонть ды ломантнень. Абросимова истя жо Россиянь Журналистэнь союзонь член, республикань зярыя газетатнень паро ялга ды лездыця.

 

 Эрямованть – моразь

Чачсь-кассь Альбина Платоновна Абросимова (тейтерькс Однодворцева) кезэрень эрзянь велесэ – Сакаевасо, конась ашти Теньгушевань районсо. Тетязо-авазо кастсть кемень эйкакшт. Меельценть, Зоянь, Екатерина Николаевна авазо чачтызе 44 иесэ ды тензэ максозельть «Ава-героиня» лемесь ды Сырнень тештесь.

Ютасть ламо иеть, чудсь ламо ведь. Ансяк Однодворцевтнень семиясь нейгак эрьва иестэ бажи Сакаевав, сынь весе сакшныть Ине Троицянь чистэнть калмолангов тетяст-аваст лангс сюконямо ды эйкакшпоранть ледстнеме. Вейсэнь вастовоматнестэ Однодворцевтне свал морыть ды кенярдовтыть пертьпельксэнть мазый, ванькс вайгельсэст. Те докачись тенст сась тетяст-аваст пельде, конатне эрьва кенярксчистэ столь экшсэ ушодыльть раськень моронь морсеме. Ансяк сехте пек морсемань коесь ладясь Альбинанень, сонзэ вайгелезэяк вадря, морыяк – кунсолозеват. Те ёрокчись лезды печтямс эрямонь сехте стака шкатнень. Альбина Платоновна сестэ саи гармошка ды морси сехте вечкевикс моронзо: «По Дону гуляет казак молодой», «По диким степям Забайкалья», «Ямщик» ды Надежда Кадышевань репертуарсто. Альбина Платоновна тетянзо-аванзо эрямо шкасто сёрмадынзе сынст вайгелест ды морамост магнитофонс ды ней те катушкань ташто лентась пштистэ ванстови аванть кудосо. Тосо сонзэ тиринь ломанензэ морыть «По Дону гуляет…» моронть.

Раськень моротнень вечкемась лездась Альбина Абросимованень арсемс нурька морынеть. Сонтемензэ а ютнить райононь ды республикань «Играй, гармонь!» фестивалень пелькстамотне. 1993 иестэ гармонисткась вастокшнызе Геннадий Заволокинэнь, ды тонась казсь авантень книга ды автограф марто пластинка.

Эрямонь смустесь

Начальной класстнэнь тонавтомо Альбина Однодворцева ушодсь 18 иесэ, сеске Зубова-Полянань педучилищанть прядомадо мейле. Кавто иень ютазь кармась ветямо рузонь келень ды литературань урокт, мейле музыка. Паро, маштыль эйкакшпорасто гармошкасо седямо. Эрямонзо перть арсесь улемс географокс. Ансяк уцяскась ветизе филологиянь факультетэв.

Ютазь пингень 70-це иетнестэ Куликовка велень школав сась од математикесь Василий Абросимов, конась сеске сельмензэ каинзе виде рунго эряза тейтеренть лангс, ды Альбина полонизе цёранть седеензэ.

1980-це иетнестэ мирдть-полат арсесть туемс важодеме Лямбирень районов, мирдензэ патянть ёнов. Сестэнь РОНО-нь прявтось К.А. Альмяшев мусь тенст робота Черемишевань школасто. Шкань ютазь Василий Кузьмич кармась тосонь школань прявтокс.

Альбина Платоновнань туртов эйкакштнень марто роботамось – эрямонь уцясказо. Сон свал бажи улемс мельстуицякс тонавтницянзо туртов. Эйкакштнень марто Абросимова кармась тонавтнеме краеведениянть, сынь панжсть музей, козонь вейс пурназель Черемишева веленть историясь. Музейсэнть татаронь оршамопельтнень марто вейс пурназь шокша раськенть курмотнеяк-кармотнеяк. Альбина Платоновна сёрмадсь эсь исследованиятнеде покш научной робота.

– Тетям ульнесь Ине Отечественной войнань участникекс ды свал янксян, эзинь ёвтне ланганзо эрямонзо шкасто. Авамгак, конась трясь-кастсь кемень эйкакшт, зярдояк арасель монь статьянь героекс. Те музеенть панжомсто арсинь витемс мелем ды ёвтнемс сынст лангаяк.

Черемишева веленть ланга материалтнэнь пурнамось пек стакаль. Те татаронь велинеденть ульнесь ансяк вейке апокшке информация К.Инжеватовонь топонимикань валкссо. Чарькодинь, эряви ютамс сыре эрицятнень ланга, ды истя аламонь-аламонь роботась тусь. Сон нейгак эзь прядово.

Альбина Платоновнань тонавтницянзо а весть ульнесть райононь, республикань ды Россиянь пелькстамотнень изницякс. Абросимованень максозь «Почетный работник общего образования Российской Федерации» лемесь.

Апак топавто мелесь

Журналистэнь тевесь содавикс Абросимованень эште 70-це иетнестэ саезь. Сестэ сон ламо сёрмалесь Теньгушевань райгазетав школанть эрямодонзо. Од тонавтыцянть ульнесь эште вейке докачизэ: сон маштыль муеме кель-вал эрьва ломаненть марто. Геройтнень Абросимова а вешни, сынь сынсь сонзэ мукшныть, эли эрямось лангс ливти эйсэст. Альбина Платоновна вечки аволь ансяк кортнеме мартост, сон вечки ломантнень. Эште вейке мелесь сюлмизе сонзэ журналистиканть марто. Истя сон бажи топавтомс тетянзо-аванзо кармавтоматнень. «Мон максынь тенк кедть-пильгть, мазычи. Мезе эште тенк эряви парсте эрямонть туртов?» – кортнесь эйкакшонзо туртов авазо. «Эрьва косо ды свал кастодо авторитетэнк», – тонавтсь тетязо.

– Тетям-авам макссть Россиянтень кемень эйкакшт. Арсезеван яла, а мезе сынь несть? Монь оймем яла майси: арасть те масторсонть уш тетям-авам, васолот лелян-ялаксон, а эрян тиринь Сакаевасо. Эсень исследовательской роботасон мон теке бажан саевтемс чумом.

Альбина Абросимова уш ламо иеть эри Черемишевасо, ды те татаронь велесь кармась тензэ омбоце тиринь ёнксокс. Сонзэ кеме семиязо, кавто цёранзо – Игорь ды Александр, улить нуцьканзо. Игорь роботы инженерэкс, Саша – агрофирмасо. Альбина Платоновна вечксынзе кода тиринь шокшань  раськень культуранть, истя жо татаронь койтненьгак-кирдатненьгак. Арсетяно, сон топавтынзе тетянзо-аванзо кармавтоматнень: ютамс эрямованть прянть верьга кандозь ды тиринь ёнксонть вечкезь-морсезь.

Анокстызе М.Девятова

 

 

 

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...