Рубрикатор

Культура Марина Пакшина: «Монь галстуктне-нимилявтне «ливтнить» масторонь келес»
Марина Пакшина: «Монь галстуктне-нимилявтне «ливтнить» масторонь келес»

Эрзя-мокшонь раськень кезэрень викшневкстнэ лововить минек масторонь сехте мазый, лия ёнов а молиця ды явовиця тешксэкс. Ансяк сынст минь нетяно сеедьстэ фольклоронь коллективтнень оршамопельтнестэ ды пек чуросто неень шкань эрямостонть. Саранск ошонь эрицясь Марина Пакшина макссь од эрямо раськень викшневкстнэнень – сон тейни эрзянь ды мокшонь орнамент марто галстукт-нимилявнеть. Аволь умок минь вастовинек те кедьчелькев од тейтеренть марто ды кевкстнинек творчествадонзо.

 

– Марина, мекс тон явить мель эрзя-мокшонь викшневкстнэнень, нать, ули потсот неть раськетнень толнэ?

– Истя, монь улить мокшэрзянь раськень ундоксон, ансяк а содасынь неть кельтнень («шумбрат» ды «пек вадря» валтнэнь а лован келень содамонь ёнксокс). Тетям-авам, малавиксэнь истя жо а кортыть эрзякс, тень лангс апак вано, аштян каштанчисэ сень кувалма, эрян регионсо, косо кастовить-кемекставить мокшэрзянь раськень культурась ды койтне-кирдатне. Ули мелем те лувонтень лездамс эсень ёндо ды аволь умок арсинь неень шкань од ломантнень гардеробс совавтомс викшневкс марто галстукт-нимилявнеть. Мокшонь ды эрзянь викшневкс марто галстуктне, койсэнь, – те мазый ды васолдо неявиця аксессуар, пек паро казне кода эрзятненень, мокшотненень, истя жо минек республикань инжетненень.

– Зярдо тон кармить стакшномо галстукт-нимилявнеть?

– Ледстяса, те ульнесь 2013 иень январьстэ. Косто-бути неинь, те модань тенденциясь пек вечкеви ломантнень туртов, ды сась мель стамс мазый галстук-нимилявне эсень туртов. Мейле карминь стамо ялган-оян туртов. Тонатне ёвтнесть ды невтнесть теевксэнь эсест ялгаст туртов. Истя монь нимилявнетне неизь пертьпельксэнть. Зярдо стынь пек ламо, арсинь, эрявить сынст микшнемс. Тень кисэ арсинь «Вконтакте» социальной сетентень группа, седе тов панжинь эсень лопа, мейле теинь фото-профиль «Инстаграмс».

Стамо-викшнеме тонадынь эйкакшпорасто. Стакшнынь някатненень оршамопельть, арсинь тенст кодаткак од модельть. Седе касозь, карминь викшнеме крестиксэ, ушодынь стамо налкшкеть ды тееме конёвсто мазый открыткат.

– Арасель мель тонавтнемс модельерэкс?

– Арась, васняяк арсинь получамс высшей образования, прядыя Н.П. Огарёв лемсэ университетэнь Историко-социологиянь институтонть. Тосо тонавтнемстэ ушодыньгак стамо галстукт-нимилявт, ды монь творчествам овсе эзь меша тонавтнемантень. Тешкстаса, зярдо ломанесь пек ламо роботы, сестэ ламос кенерияк.

–  Марина, тонь галстуктне пек мельстуицят, кенярдовтыцят. Косто саят материалтнэнь ды мельтнень-арсематнень сынст теемс?

– Васняяк карминь стакшномо галстукт-нимилявнеть аволь мокшэрзянь викшневкс марто. Коцтонть вешнинь Саранскоень лавкатнева, мейле карминь ардтнеме кисэст Москововгак. Галстуктнень стынь свадьбатнес, морыцятнень-киштицятнень туртов, модань вечкицятненень, эйкакштненень. Арсинь зярыя темат: Од иентень стынь ловне марто, Вечкемань чинтень – седейне марто… Сехте пек вечкан стамо эйдетнень туртов, эдь сынь вечкить мазый, цивтёрдыця, сельмс каявиця тюст. Коцтсто галстуктнеде башка, тейнян специальной экземплярт чувтостояк. Весе галстуктнень путнесынь мазый пакетикс, эдь тапардавксось кедьсэ теезь товартнэнь миемстэ налкси покш талика. Седе паро, зярдо эстеть эли вечкевиксэть-малавиксэть туртов казнесь тапардазь ды а эряви арсемс, кода сонзэ максомс.

Эрзя-мокшонь викшневкстнэнь марто нимилявнетнень карминь стамо 2015 иестэ саезь. Мелесь, тейнемс истят галстукт, сась тень умок, ансяк кодаяк шка а прыль.

Кода-бути весть тень гайневтсть Мордовиянь Туристэнь-информациянь куншкакуросто ды энялдсть теемс галстукт раськень викшневкс марто. Мон васняяк арсинь модельтнень, кодамо тюсонь стамс, кодат викшневкст ладить. Тесьманть рамсян специализированной лавкатнестэ. Коцтось сынст туртов саеви коень коряс якстере, ашо, чопода-якстере ды чопода-сэнь. Стакшнан нимилявнетнень лияназсто, хлопкасто, костюмонь коцтсто.

– Кода невти шкась, ломантненень вечкеви те аксессуарось.

– Кевкстницятнеде пек ламо, саицятнеде жо аволь пек ламо. Монь нимилявнетнень саизь МР-нь Туристэнь-информациянь куншкакуронтень ды тосто сынст седе рамсить минек региононь инжетне ды эрицятне. Арсян, Футболонь коряс масторлангонь чемпионаттонть икеле галстуктне раськень тематиканть марто кармить седе вешевикст ды сынст кармить саеме сувенирэнь весе лавкатне. Сестэ монь нимилявнетне кармить «ливтнеме» весе масторонть келес ды, паряк, сонзэ томбалевгак.

– Марина, содан, тонь теевкстнэ изнясть покш пелькстамосо…

– Истя, тень кувалма аштян покш мельспаросо. Ютазь иень декабрясто монь галстуктне-нимилявнетне эрзя-мокшонь викшневкстнэнь марто изнясть «Туристический сувенир Республики Мордовия» пелькстамосонть, конань ютавтызе минек республикань Культурань, национальной политикань, туризмань ды архивень тевень министерствась. Монень максозельть изницянь дипломт кавто номинациянь коряс: «Этноукрашение» ды «Народный выбор». Сюкпря ёвтан весенень, кить каизь вайгелест монь кедьсэ теезь мазыйкатнень кисэ.

– Арсян теть а аштемс ве таркасо ды невтемс эсь ёрокчить эште лия ёндояк.

– Сюкпря. Мельтнеде-арсематнеде монь ламо ды кой-конатне истя жо сюлмавозь эрзя-мокшонь раськень культуранть кастоманзо-виевгавтоманзо марто. Ансяк а карман ёвтнеме эйстэдест икелепелев. Кода сынь топавтовить, невтьсы шкась.

Кортась Марина Девятова

 

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...