Рубрикатор

Культура Тиринь келест эзизь стувто
Тиринь келест эзизь стувто

… «Газель» автомашинась ливтязь ливтясь кияванть. Эйсэнзэ Финнэнь-угрань раськень культуратнень Равчирень куншкакуронь координаторось Т.Т.Чекушова, М.Е.Евсевьев лемсэ пединститутонь педагогикань наукань кандидатось, профессорось, музыкальной образованиянь ды методикань преподаваниянь кафедрань доцентэсь Л.П.Карпушина, И.Д.Воронин лемсэ республикань краеведениянь музеень отделэнь прявтось И.Н.Кудашкина, М.Е.Евсевьев лемсэ пединститутонь «Гайгема» народной инструментэнь ансамблянь артисттнэ, сетне, кить ардсть Ратор ошов «Этношкола» проектэнь презентациянть ютавтомо.

Ардомсто мезде ансяк апак кортазель! Ютазь пингень эрямодонть, а стувтовикс вастовоматнеде, тедеде РФ-нь Президентэнь кочкамотнеде ды истя седе тов.

– Содатадо, Ратор ошсо васенцеде ульнинь эйкакшпорасто, зярдо тонавтнинь Поводелень средней школасо, кона ашти Дубенкань районсо, – ледстни Т.Т.Чекушова. – Ратор ошось марявсь тень чопода ошокс. Весе кудотне артозельть вейкетьстэ – чопода-тюжа краскасо. Зярыя иень ютазь таго понгинь Ратор ошов. Уш кудотне артозельть чопода-пиже краскасо. Кодаяк тень эзь чарькодеве, мекс истя артсть. Мекс истя лисни? Ансяк зярыя иень ютазь чарькодинь: мекс вейке тюсонь краскасо артозельть кудотне. Ратор ошонь малав весе эрицятне важодсть заводсонть, косо тевс нолдасть краскатнень. Ды важодицятне «уевтильть» кудов васня вейке банка, мейле – кавто...

Саранскойстэ Ратор ошов ардомась малав 150 вайгельпеть. Тень лангс апак вано, Ратор ошов пачкодинек курок. Тесэ кудотне покшт, вадрят. Ней уш аволь истят, конатне ульнесть советэнь шкасто. Кудотнестэ ламотнень латотне ды ушоёнксост вельтязь неень шкань строямонь материалсо: сайдингсэ, лиясо мейсэ. Вана Ратор ошонь 9 № средней школась, кона кандтни Советской Союзонь Героенть П.Г.Макаровонь лемензэ. Самай тесэ ютавтозель «Этношкола» проектэнь презентациясь. Тесэнь актовой залс пурнавсть школань тонавтницятне, тонавтыцяст, сетне, кить тонавтнить шабра раськень культуранть, койтнень-кирдатнень, историянть.

Минек школасо тонавтнить 540 эйкакшт, – ёвтни 9№ средней школань директорось В.В.Марунов. – Сынст содамочинь  масторганть ветить 36 тонавтыцят, конатне пек парсте содасызь эсь тевест ды важодемань покш опыт марто. 2017-2018 тонавтнема иестэнть 11 класст прядыть 26 од ломанть. Вана 9-це классонть прядыть 52 тонавтницят. Апак кавтолдо мерян, школань прядыцятнестэ ламотне тонавтнемаст поладсызь Мордовиясо. Минек школань зярыя прядыцятне тонавтнить Орданьбуень медицинань училищасо. Лангаст кортыть ансяк паро валсо: ёроковт, паро тевень ушодыцят, ламонь содамо бажицят. Минек ошсо эрить ды важодить рузт, эрзят, мокшот, татарт, чувашт. Ды эрить вейкест-вейкест туртов лездазь, кеме ояксчисэ.

Пурнавозтненень поздоровт ёвтась Ратор ошонь Администрациянь Культурань, национальной политикань, туризмань, информационной политикань ды архивень тевень отделэнь прявтось В.А.Исаева.

Се, кить а тонавтнить шабра раськень культуранть, койтнень-кирдатнень, сетнестэ паро тевть илядо учо, – видькстась Вероника Алексеевна. – Минь тонавтнетяно. Теньсэ тенек лездыть Финнэнь-угрань раськень культуратнень Равчирень куншкакуросо важодицятне, конат эрямос совавтыть «Этношкола» проектэнть.

В.А.Исаевань валонзо коряс, истят вастовоматне, «Этношкола» проектэнь презентациятне пек лездыть раськень сюпавчинь вельмевтемасо.

Чувашиянть ды Мордовиянть ютксо ояксчиденть эсь мелензэ-арсеманзо ёвтызе мокшэрзянь раськень автономиянь прявтось В.П.Седойкин. Владимир Павлович эри Порецкой районсо. Те сонзэ покш таликазо Чувашиясо культурно-массовой мероприятиятнень ютавтнемасо, конат алтавкшныть эрзянь культурантень, койтненень-кирдатненень. Нурькинестэ меремс, Чувашиясо авольть ёма эрзянь келесь, койтне-кирдатне.

В.П.Седойкин М.Е.Евсевьев лемсэ пединститутонь ректоронть В.В.Кадакинэнь пельде 9 № школантень макссь питней казнеть, благодарностть Ратор ошонть ды институтонть ютксо кеме сюлмотнень кисэ!

«Этношкола» проектэнь презентацияв сыцятненень пек вечкевсь Т.Т.Чекушовань кортамозо. Сон тешкстась, эрьва раськенть улить эсь ломанензэ, конатнень кувалма мельспаросот. Вана Мордовиясо истямокс лововить Советской Союзонь Героесь М.П.Девятаев, мелят тешкстынек лётчикенть чачома чистэнзэ 100 иетнень, Ине скульпторось Степан Эрьзя ды истя седе тов.

– Мордовиясо эрицятнестэ мокшэрзятнеде 32%. 68% эрить республикань томбале, – ёвтнесь Татьяна Тимофеевна. – Минь весементь тейтяно – томбале эриця эрзятне ды мокшотне аволизь стувто тиринь келест, койтнень-кирдатнень.

Мейле Т.Т.Чекушова МР-нь Культурань, национальной политикань, туризмань ды архивень тевень министерстванть ды Финнэнь-угрань раськень культуратнень Равчирень куншкакуронть пельде ламонень макссь питней казнеть, Благодарностть Ратор ошсо «Этношкола» проектэнь презентациянть парсте ютавтоманть кисэ.

 – Неть ломантне алкуксонь тонавтыцят, конат пек мелявтыть раськенть кисэ. Зяроксть эзинек пшкале лездамодо, сынь зярдояк эзть отказакшно, – мерсь Татьяна Тимофеевна.

Л.П.Карпушина учёноесь пурнавозтнень теинзе содавиксэкс пединститутонть марто, кода течи эрить тесэ студенттнэ. Истя, вузось аноксты 36 специальностень коряс специалистт. Тесэ важодить 13 научной школат. Се, кие сы тонавтнеме пединститутов, янксеме а карми. Тесэ ули пек паро общежития, тонавтнемань условиятне пек вадрят.

… Ды зярыя шкань ютазь Ратор ошонь 9 № школань актовой залсо гайгезевсь пек паро музыкась. Эсь ёрокчинзэ невтизе «Гайгема» народной инструментэнь ансамблясь. Те коллективенть парсте содасызь аволь ансяк минек республикасо, сонзэ томбалеяк. Аволь весть лиснесь регионъютконь ды весероссиянь творческой коллективтнень ютксо изницякс. Ансамблянь художественной прявтось – пединститутонь музыкальной образованиянь ды методикань преподаваниянь кафедрань старшей преподавателесь Т.А.Шутова.

Видькстан, монень пек вечкевсь ансамблянть седямозо.  Ледить мелезэть военной, советэнь кинофильмасто моротне ды истя седе тов.

Мейле ушодовсть мастер-класстнэ. Фольклоронть ветясь Л.П.Карпушина, раськень някань анокстамонть – И.Н. Кудашкина. Сеске мертяно, школань тонавтницятне кадовсть мельспаросо.

… Юткошкасто арсинек молемс школань столовойс. Апак учне пидицясь кевкстсь:

– Тынь косто сыде?

– Саранскойстэ.

– Минек столовойсэ весе важодицятне Орданьбуень.

– Паро! Тиринь келенк эзинк стувто?

– Арась.

Тень марязь кода а кецязеват?!

Пётр Зиновьев.

Чувашия Республикань Ратор ош

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...