Рубрикатор

Культура Эля сырькаенть кедьсэ
Эля сырькаенть кедьсэ

Аволь умок Елена Александровна Митякина тешкстызе эсензэ чачома чинзэ. Тензэ топодсть 94 иеть. Инжетнеде сакшность цела кудо: эйкакштне, нуцькатне, правнуцькатне, роднятне-раськетне, весе арсесть тензэ шумбрачи. Сон мизолдозь каршост мериль: «Кадык тыненк Пазось максы превень ды рунгонь шумбрачи! Эрядо мондень ламо иеть. Неень шкаcто тенк седе шожда».

Елена Александровнань Кочкурова ёнксонь Од Мурза велесэ весе лемдить Эля сырькаекс. Сон, иензэ лангс апак вано, весе эрямонзо ёвтнесы педе-пес, дивазеват, зяро превензэ. Монь марто Эля сырькаесь седейшкава кортнесь вишка пингедензэ ды од порадонзо.

– Сельмень икеле тетянь-авань чачост, – ушодызе евтнеманзо Митякина. – Тетям, Александр Степанович, ульнесь кеме обуця, авам, Евдокия Ивановна, пек пароль, чевтель. Сынь эрясть ялгаксчисэ. Семиянок покшоль, ансяк аволь весе эйкакштне кастовсть, ламотне кулость вишка пингестэ. Мон чачинь веженсь Толя ялакстом икеле.

 

Стака шкат 

Элянь эйкакшпоразо савсь пек стака шкатнес. Сестэ ютась революциясь ды прядовсь гражданской войнась. Сокицянь-видицянь семияст эрясь стакасто. Элянь чачомадо икеле, ютазь пингень 30-це иетнестэ, ламонь лемдизь «кулакокс». Понгсь те кажонть алов Войновтнень семияськак. Сынь кирдсть ракшат ды кудосткак вадряль. Те кудосонть эрясть покштятне-сырькайтне, сынст цёраст, урьваст, эйдест. Зярдо састь панемест, Войнов покштясь кепе-штапо оргодсь ды туемстэ мерсь нинстэнь ванстомс эйкакштнень. Келя, мейле сы ды сайсынзе весень.

Кудостонть сестэ ливтизь весе ули-паронть. Мейле кудонтькак калавтызь ды чувтонь-чувтонь ускизь Семилеев, косо эйстэнзэ путсть од кудо кажовсто эриця семиянень. Войновтнень семияст жо мейле 17 иеть кудовтомо эрясь, косо понгсь. Арасельть ярмакт строямс. Покштянзо, Андрей лелянзо семиянек кучизь Казахстанов, валгстызь паксяс ды кадызь. Шкань ютазь сынь весе кулость вачодо. Истямо уцяска учось эште зярыя Од Мурзань семиятнень.

Неть стака шкатнеде икеле Элянь авазо рамась эстензэ мазый паця – кенярксось ульнесь а ёвтавикс. Кудосто панемстэ сон кекшизе пацянть оршамонзо потс ды паницятне эзизь муе. Мейле пацянть миизе ды семиясь рамась вазнэ, конась кассь, вазыясь ды кармась максомо ловсо. Семиясь ялатеке эрясь ломанень кудова.

Мейле Элянь тетязо тусь Московов, ламо важодсь, авазояк эйдетнень марто тусь ваксозонзо. Московсо Оля тейтерькаст кармась сэредеме. Сынь састь велев лецямонзо, ялатеке эйкакшось кулось. 

Колмо класст…

 Шкась мольсь. Кода сестэ эрясть Войновтне – ледстямскак стака, ярснесть кшинеде ды симсть ведте. Некеть ульнесть каванямкатне. Элянь тетязо-авазо пек бажасть тонавтневтемс эйкакшост школасо. Тейтерькась прядсь колмо класст. Нейгак Елена Александровна ледстни тонавтыцянзо. Сестэ школасо роботасть седе ламо цёраломанть. Тонавтыцятне Иван Зверков (мейле чавовсь войнас) ды Алексей Гаврилович Сеськин ульнесть авторитетнойть. Сынст пельде содамочитне пек лездасть тонавтницятненень.

Элянь тетязо, Александр Степанович, велестэнть васенцекс совась колхозс. Ламо иеть важодсь счетоводокс. Сестэ те должностесь ульнесь ответственной. Александр Степанович роботась парсте. Эйкакштне аштесть каштанчисэ тетяст кувалма.

Сурань рубеж 

Ушодовсь войнась. Эрьва семиястонть фронтов тусть зярыя цёрат. Велесэнть кадовсть ансяк сыретне, аватне ды эйкакштне. Кинь ульнесть виест важодемс, сетне яксесть окопонь чувомо Сура чирев. Тов понгонесь кемсисемге иесэ Эляяк. 1941 иень ноябрясто-декабрясто ды 1942 иень январьстэ тарькс якшамотнестэ сон вейсэ велень эрицятнень марто чувсь кевень моданть. Сура чирестэ аватнень кучизь вирев. Тосо сынь таго чувсть окопт, верьга вализь олгсо ды ланга кайсесть лов. Неть варятнень лангс путнесть тешкст, кабу эстест тозонь а прамс. Важодемс лездась мелесь, илязо минек модась понго немецтненень.

Торфонь таргамо 

Весе бажасть кодаяк лездамс фашисттнэнь каршо тюремасонть. Ламот од тейтертнестэ тукшность торфонь таргамо. 1942 иень апрельстэ Кочкурова ёнксонь тейтертнень ильтизь ташто, варяв вагонсо Москов ёнксонь Дулево ошов. 16 част чизэнзэ савсь таргамс торф. Эля тосо роботась оймсемань апак сода сёксес.

Омбоце сезонстонть Эля роботась Владимир ёнксонь Петушкисэ. Кода сестэ прязо ванстовсь, сонськак а соды. Модась лиясто лондадыль ды весть тозонь торфонь варятнес валявсть кавто тейтерькат. Мейле сынст таргизь ды калмизь аволь васоло. Мезе лангс апак вано, эрявсь эрямс ды топавтомс вешематнень.

Мирденень лисемась

Войнась прядовсь. Од Мурзасто ламо цёрат эзть велявто кудов. Эрьва семиянтень сакшность чавовомадо эли ёмамодо сёрмат. Ансяк ломантне ялатеке кемсть сынст велявтомантень. Элянь тетянзо войнань шкане саекшнызь Пермь ошов ды тосто уш эзь велявто.

Фронтсто сазь, цёратне куватьс апак арсе, чиясть одирьват. Сестэ арасельть «конфеткань ды цецянь пусмонь» шкат. 1947 иестэ велявтсь фронсто Николай Кириллович Митякин ды сеске сась Элянь чиямо. Од ломантне вечкевсть вейкест-вейкест туртов ды урьвакстсть-венчасть. 17 иеть эрясть ояксчисэ. Ламонь сельмть сявадсть. Николай сэреель, мазыель, важодемань вечкицяль. Эрясть аволь сюпавсто, чачсть-кастсть 7 эйкакшт. Эля роботась декретс апак тукшно, сестэ истят тевть а содыльть. Эйкакштнень мельга вансь авазо, Евдокия Ивановна.

Эля васняяк роботась фермасо, яксесь ваз мельга, мейле потявтсь скалт, важодсь паксясо. Сонзэ стажозо – 52 иеть ды Эля сырькаесь казезь «Ветеран труда» лемсэ. 

Довань уцяскась 

Элянь мирдезэ кулось 40 иесэ. Ламо стакачить сон мейле печтясь сонтемензэ. Сестэ сынь од кудо ушодокшность строямо ды вана, сась зыянось. Лезкс учомс а косто, пиземесь валы кудонть потс, латось эште апак вельтяль. Эйкакштнень марто пурнась минень-сюнот, пекстызь варятнень. Мейле колхозось макссь ссуда – 50 целковойть. Покшт ярмактне сестэ ульнесть. 10 целковойть иезэнзэ савкшнось велявтомс государствантень. Велень плотниктне лездасть кудонть прядомс. Иван васенце цёразо ушодсь роботамо 10 иесэ. Зярдо тетязо кулось, Ванянень колхозонь прявтось макссь ловицянь тарка. Цёрынесь веньберть сёрмадсь отчётт, чоподас паксясоль. Сёксня макссть тензэ зарплата – кавто тоннат сюро. Покш сестэ ульнесь кенярксось!

 Эйкакштнень туртов мезеяк тантейне эзь рамсеве, сехте парокс тенст марявсь сахарось, кшись ды ловсось. Потявтсы скалонть Эля ды кайсесы кружкаваст ловсонть. Ярсыть ды пейдить, пек тантей!

Эсь келень вечкиця

 Эряви тешкстамс, Эля сырькаесь пек вечксы эсь келензэ. Весе эрямонзо перть сон сёрмадстни «Эрзянь правда» газетанть ды нейгак учи эйсэнзэ мельспаросо. Эля сырькаесь ламо мезе соды, стувтозь валтнэяк сонзэ мельсэть-превсэть. Зярдо ютазь пингестэ Мордовияв Финляндиясто сакшность эрзянь келень тонавтницят, сынст ветякшнызь Митякинанень. Тонась ёвтнесь кезэрень эрзянь ламо валт, кода сынь полавтовсть, кода ёвтавить. Вана истя эрзянь раськень авась лездась финнэнь ученойтненень.

Уцяскав сырькай

Весе, кие марто корты Митякина, дивсить сонзэ эрямонь вечкемантень. Эля сырькаенть кудосо свал инжеть: шабратне, ялгатне, эйкакштне-нуцькатне. Сырькаенть кемень нуцьканзо ды кото правнуцьканзо. Елена Александровнань семиясо улить инженерт, врачт, тонавтыцят, юристт, строицят, топ-менеджерт, спортсмент. Сонзэ кудосо свал шожда лексемс, сон вечки ваньксчи, пиресэнзэ свал эмежть. Весе тевтнесэ тензэ лездыть нуцькатне ды тейтертне. Ускить тензэ казнеть, цецят, кадык сырькаенть свал ули паро ёжомарямозо. Тейтертне ярсамот ускить, цёратне одкстомтыть кудонть, нуцькатне лецясызь, бути ормалгады. Паро, зярдо покш семият! «Нать, секс истя куватьс эрян, арсян, мон тенст эряван ды сыньгак монень. Пазнэнь ознан кисэст ды Пазось тень лезды», – корты Елена Александровна.

Кортамстонок секе тев гайнесь телефонозо. Эля сырькаесь ежовсто токши сотовоень кнопкатнень ды куватьс кортни роднянзо-раськензэ марто. Столь лангсо аштить планшет ды ноутбук. Келя, нуцькатне кадызь, зярдо сыть – налксить. Ней эйкакштнень вешемаст лият, ансяк сюлмось мартост Эля сырькаенть кеме. Те кенярдовты!

Л.Викторова

 

Новости

Национальной театрасо панжови сезонось

Ванды, сентябрянь 27-це чистэ, Эрзянь ды мокшонь раськень драматической театрасо панжови сезонось. Ваныцятнень туртов невтеви К.Петровань «Ташто койсэ» эрзянь кельсэ спектаклясь. Путовкссонть кармить ламо морот, киштемат, невтеви покш свадьба. Парсте невтевить эрзянь фольклорось, койтне-кирдатне. Спектаклясонть ули мезе лангс ваномс. Нама, шкась кезэрень, XIX-XX-це пингесь. Кой-кона тевтне абунгавтыть. Ансяк те – весе ульнесь алкукс, те минек историясь.

Моледе ваномо, ушодксось 18:30 чассто.

 
Пивсэзь 1 миллион тоннат сюро

Кода а кецямс?! Мордовиянь агропромышленной комплекссэ важодицятне, тедедень коське кизэнть лангс апак вано, пивсэсть 1 миллион тоннат сюро. Эрьва гектарсто среднейстэ саезь 25,8 центнерт. Теде пачтясть МР-нь Велень хозяйствань ды продовольствиянь министерствань специалисттнэ.

Подробнее ...
 
На заседании Социальной платформы обсудили принятие региональных льгот

17 сентября в Государственном Собрании РМ состоялось заседание Социальной платформы Партии «ЕДИНАЯ РОССИЯ», в рамках которой депутаты Госсобрания обсудили принятие на предстоящей сессии проекта закона Республики Мордовия «О внесении изменений в статьи 2 и 9 Закона Республики Мордовия «О мерах социальной поддержки отдельных категорий населения, проживающего в Республике Мордовия». 

Подробнее ...
 
Сторонники Партии проанализируют возможности регионов в области переобучения и повышения квалификации людей предпенсионного возраста

  Региональные координационные советы сторонников Партии «Единая Россия» с 21 сентября начинают сбор и систематизацию информации относительно возможностей субъектов Российской Федерации по предоставлению различных курсов и программ, направленных на профессиональную переориентацию людей старшего поколения. Об этом сообщил сопредседатель Центрального координационного совета сторонников Партии Сергей Боярский.

Подробнее ...
 
Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...