Рубрикатор

Культура Кочкуровасо – Культурань куншкакуро
Кочкуровасо – Культурань куншкакуро

Мордовия Республикань Кочкуровань райононь куншкакуросонть панжовсь Культурань центра. Те од форматонь социальной объект, кона стявтовсь райононь ташто Культурань кудонть таркас. Ней районсонть культурань эрямось карми ламо ёнксонь. Те – тарка творческой коллективтнень, од ломанень организациятнень туртов. Невтемакс, ули эйкакшонь някань театрань студия. Рамазь электрогитарат ды барабанонь установка.

 

Документэнь коряс лемдявсь Культурань кудонть реконструкциякс, тевсэ жо те допрок од здания. Таштонть эйстэ кадовкшнось ансяк фундаметэсь. Райононь культурань эрямонь юрось жо – те фольклоронь коллективтне.

Республикань Прявтось В.Д.Волков ваннызе кода роботы хореографиянь классось. Тесэ тейтерькатне тонавтнить художественной гимнастикантень. Центранть стенатнень мазылгавтыть Кочкуровань ёроков ломантнень грамотатне ды дипломтне. Омбоце этажонтень кельгстявсь музеесь, конань экспонаттнэнь мукшныть тосонь поисковиктне. Ули тарка, косо невтевить кезэрень эрзятнень курмост-кармост. Тесэ ули тарка рок-группантеньгак. Ансамблянть пурнызе Вирь ало Тавла велень школань директорось. Сынь уш арсить гастрольде. Улить шахматсо налксемань кружок, някань театра. Ды, нама, Кочкуровань райононь прявт брендэсь  чувто ланга керсемась. Тесэ панжовсь Вирь ало Тавлань школань филиалось. Икеле Кочкуровань эйкакштне ардтнильть Вирь ало Тавлав.

Кочкуровань Культурань центрась строявсь «Устройчивое развитие сельских территорий» программанть юрсо. Строямонтень, оборудованиянть ды инструменттнэнь рамамс явозь 87 миллионт целковойде ламо. Эйстэст 26,5 миллионтнэ – федеральной средстват. Кадовикстнэ явозь республикань казнасто ды райононь бюджетстэ.

В.Д.Волков тешкстызе, иеде икеле Кочкуровань эрицятне энялдсть тензэ од Культурань дворецэнь строямодо. Истя Культурань центрась лиссь покш, неень шкань, мазый. Теде кортасть 400 таркас залстонть, кона анок примамс покш уровнянь артистткак.

 

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...