Рубрикатор

Культура КЛАВДИЯ Батяркина: «Тиринь кельсэ сёрмадоманть марто арсян сюлмамс эрямом»
КЛАВДИЯ Батяркина: «Тиринь кельсэ сёрмадоманть марто арсян сюлмамс эрямом»

Отяжелень райононь Сабанцеле велень школань тонавтыцятне покш мельспаросо аштить сень кувалма, сынст тонавтницятнень ули мелест содамс тиринь келенть. Эйкакштне бажить эйсэнзэ кортамс, а виздить кувалманзо ды мельспаросо яксить эрзянь келень ды литературань олимпиадатнес, творчествань пелькстамотнес. Од иеденть мейле минь вастовинек тосонь 11-це классонь тонавтницянть Клавдия Батяркина марто. Ютксонок ютась лембе кортамо.

 

– Клава, зяро иесэ тон сёрмадык васенце стихотвореният?

– Васенце стихотворениям сёрмадокшныя рузонь кельсэ 10 иесэ, «Искусство слова» конкурсонтень. Нейгак мельсэнь кирдян лемензэ – «Кошка» («Каткине»). Сонзэ кисэ тень максокшнызь 3-це тарканть.

– Васень стихотвореният сёрмадозель рузонь кельсэ, а ней сёрмадат эрзянь кельсэ. Мекс полавтовсть вановтот?

– Рузонь кельсэ седе тов эзинь бажа сёрмадомс. Касозь, седе домкасто карминь чарькодеме тиринь эрзянь келенть ды литературанть. 7-це классо тонавтнемстэ тиринь литературань уроксо кудов максозель кармавтома: варчамс сёрмадомс стихотворения. Вана сестэ эйзэнь сась эрзякс сёрмадомань мелесь. Лиясто, марявсь, стихесь удалась, лиясто мелезэнь а туиль. Ансяк секе-тев мелем кепедилизе тиринь келень ды литературань тонавтыцянок Надежда Николаевна Сайгушкина. Сон ваннылинзе стихтнень ды ёвтыль: «Тень вана истя эряви теемс, тонань истя...» Надежда Николаевна сонськак сёрмады, минекак тонавты те тевентень.

– Клава, косто тон саят, рузкс меремс, вдохновения эрзянь кельсэ стихень сёрмадомс?

– Васняяк, эрямостонть, ёжомарямотнестэ. Монь койсэ, тиринь кельсэ седе шожда ёвтамс, пачтямс лиянень эсь оймень ёжомарямотнень. Эдь минек тиринь келенек – эрзянь, минь арсесынек меленек эрзякс, секс сёрмадомскак, маряви, эсеть кельсэ седе шожда.

– Кода тон ушодат сёрмадоманть?

– Теньсэ кодамояк алгоритма арась. Лиясто арсезеван мезе лангаяк, превезэнь сыть валрисьметне ды эрязасто неть строчкатнень сёрмадсынь конёв лангс. Эрси, стихесь сёрмадови аламо шкань перть, а лиясто куватьс лоткават – арсезеват.

– Кода семиясот ваныть сёрмадомат лангс?

– Тетям-авам кортыть – монь ули сёрмадомань докачим. Ламо сёрмадовксон лиснесть райононь «Вперёд» газетасо, «Чилисема» журналсо, «Эрзянь правда» газетасо.

– Кона сёрмадовкстнэнь ловсыть сехте питнеекс?

– Монь койсэ, сынь весе тень питнейть. Ялатеке юткстост тешкставлинь бу «Аванень», «Вечкевикс тетям», «Сабанцеле» стихотворениятнень. Сынь седе малавикст седеентень. Тешкставлия эште весть, покш лезэ сёрмадома меленть кастомасо монень максы тиринь келень ды литературань тонавтыцям Н.Н.Сайгушкина. Сонензэ ёвтан покш сюкпря.

– Клава, сёрмадомадо башка эште яват мезескак мель?

– Нама, ялган марто морсян «Килейне» фольклоронь ансамблясонть, яксян киштеме. Вана, саемга, ютазь иень ноябрясто якинек Саранскоев «Шумбрат, Мордовия!» фестивалев, косо невтинек эсь ёрокчинек. Покш мель яван викшнемантень, монь уш улить зярыя викшневксэнь.

– Кода моли тонавтнемась? Мезекс арсят улеме?

– Неень шкасто тонавтнемась монь туртов ашти васенце таркасо, эдь икеле учить экзаментнэ. Арсян сынст максомс парсте. Мезекс бажан улемс? Васняяк, ломанькс. Паряк, эрямом сюлмаса эрзянь кельсэ сёрмадоманть марто.

– Арсян теть весе мелеть топавтома.

– Сюкпря.

Анокстызе Марина ДЕВЯТОВА

 

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...